ປະທານ ກຜງສ ເຄື່ອນຕິດຕາມກວດກາ ຢູ່ແຂວງ ຫລວງນໍ້າທາ

10/10/2019 00:00 -

(ສພຊ) ລະຫວ່າງວັນທີ 25 ກັນຍາ-1 ຕຸລາ 2019; ກຳມາທິການແຜນການ, ການເງິນ ແລະ ການກວດສອບ (ກຜງສ) ຂອງສະພາແຫ່ງຊາດ ນຳໂດຍທ່ານ ວິໄລວົງ ບຸດດາຄຳ ຄະນະປະຈຳສະພາແຫ່ງຊາດ, ປະທານ ກຜງສ ຂອງສະພາແຫ່ງຊາດ ພ້ອມດ້ວຍຄະນະ ຮ່ວມກັບຄະນະກຳມະການເສດຖະກິດ, ແຜນການ ແລະ ການເງິນ ຂອງສະພາປະຊາຊົນແຂວງ (ສພຂ) ຫລວງນ້ຳທາ ນໍາໂດຍທ່ານ ນາງ ອຸ່ນຫລ້າ ອ້ຽງລໍລາດ ຮອງປະທານ ສພຂ, ທັງເປັນປະທານຄະນະກຳມະການເສດຖະກິດ, ແຜນການ ແລະ ການເງິນ ຂອງ ສພຂ ຫລວງນ້ຳທາ ໄດ້ລົງເຄື່ອນໄຫວຕິດຕາມກວດກາ ແລະ ຊູກຍູ້ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ ປະຈຳປີ 2019 ແລະ ທິດທາງແຜນການປີ 2020; ການກະກຽມສະຫລຸບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 4 ປີຜ່ານມາ ແລະ ການສ້າງແຜນ 5 ປີ ຄັ້ງທີ IX (2021-2025); ການແກ້ໄຂໜີ້ສິນໂຄງການລົງທຶນຂອງລັດຕາມຜົນການກວດສອບ; ການຈັດຕັ້ງປະຕິບັດນິຕິກຳໃຕ້ກົດໝາຍຂອງລັດຖະບານ, ກະຊວງອົງການທ້ອງຖິ່ນໃນຂົງເຂດແຜນການ ແລະ ການລົງທຶນ, ການເງິນ, ທະນາຄານ ພ້ອມທັງລົງຢ້ຽມຢາມກວດກາຕົວຈິງບາງໂຄງການລົງທຶນຂອງລັດ ເປັນຕົ້ນໂຄງການກໍ່ສ້າງເສັ້ນທາງລົດໄຟລາວ-ຈີນ, ການພັດທະນາພື້ນທີ່ເຂດເສດຖະກິດພິເສດບໍ່ເຕ່ນແດນງາມ, ການກໍ່ສ້າງອຸໂມງມິດຕະພາບລາວ-ຈີນ, ໂຄງການພັດທະນາຕົວເມືອງຕາມແລວທາງອະນຸພາກພື້ນແມ່ນ້ຳຂອງ 2, ຕົວເມືອງຫລວງນ້ຳທາ (ການກໍ່ສ້າງຂົວຂ້າມນ້ຳທາ ລະຫວ່າງບ້ານດອນສຳພັນ ຫາບ້ານທົ່ງດີ); ການກໍ່ສ້າງສວນວັດທະນະທຳບ້ານແປ່ເກົ່າ ແຂວງຫລວງນ້ຳທາ ເພື່ອເປັນຂໍ້ມູນພື້ນຖານໃນການກະກຽມເນື້ອໃນໃຫ້ແກ່ກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ VIII.

ໃນຕອນເຊົ້າວັນທີ 30 ກັນຍາ 2019, ຍັງໄດ້ເປີດກອງປະຊຸມຮ່ວມກັບອົງການປົກຄອງແຂວງຫລວງນ້ຳທາ, ກ່ຽວກັບການລົງເຄື່ອນໄຫວຕິດຕາມກວດກາ ແລະ ຊູກຍູ້ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດຂອງແຂວງ ທີ່ຫ້ອງປະຊຸມໃຫຍ່ຂອງ ສພຂ ໂດຍການເປັນປະທານຂອງທ່ານ ວິໄລວົງ ບຸດດາຄຳ, ເຂົ້າຮ່ວມມີທ່ານ ໄຊພອນ ຄຸນສີລິເຮືອງ ປະທານ ສພຂ, ທ່ານ ຄຳໄຫລ ສີປະເສີດ ຮອງເຈົ້າແຂວງ, ມີບັນດາທ່ານຮອງປະທານ  ສພຂ, ປະທານ-ຮອງປະທານຄະນະກຳມະການພາຍໃນ ສພຂ, ຫົວໜ້າ-ຮອງຫົວໜ້າພະແນກການຂົງເຂດເສດຖະກິດ, ບັນດາທະນາຄານ ພ້ອມດ້ວຍທີມງານສະພາແຫ່ງຊາດ ແລະ ສພຂ ທີ່ກ່ຽວຂ້ອງເຂົ້າຮ່ວມທັງໝົດ 30 ຄົນ ຍິງ 4 ຄົນ.

          ຈຸດປະສົງຂອງກອງປະຊຸມຮ່ວມກັບອົງການທີ່ກ່ຽວຂ້ອງໃນຄັ້ງນີ້ ເພື່ອຕິດຕາມຊູກຍູ້ການຈັດຕັ້ງປະຕິບັດຕາມມະຕິກອງປະຊຸມສະພາແຫ່ງຊາດ ເລກທີ 099/ສພຊ, ລົງວັນທີ 28 ພະຈິກ 2018 ກ່ຽວກັບແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ ແລະ ການຕິດຕາມຊູກຍູ້ການຈັດຕັ້ງປະຕິບັດກົດໝາຍກ່ຽວກັບການເກັບລາຍຮັບຕ່າງໆຢູ່ພາຍໃນແຂວງ.

          ໃນກອງປະຊຸມ ໄດ້ຮັບຟັງການສະຫລຸບລາຍງານຈາກພະແນກແຜນການ ແລະ ການລົງທຶນແຂວງ, ພະແນກການເງິນແຂວງ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ 6 ເດືອນຕົ້ນປີ 2019 ແລະ ທິດທາງແຜນການປະຈຳປີ 2019 ແລະ ຮັບຟັງສະພາບການຈັດຕັ້ງປະຕິບັດວຽກງານຜົນຂອງການກວດສອບ, ກວດກາລັດ ແລະ ການລາຍງານບາງບັນຫາທີ່ພົ້ນເດັ່ນຂອງແຂວງ ເປັນຕົ້ນ: ສະພາບການກໍ່ສ້າງ ແລະ ການຊົດເຊີຍຜົນເສຍຫາຍຈາກການກໍ່ສ້າງເສັ້ນທາງລົດໄຟລາວ-ຈີນ ຕາມຄຳຖາມເຈາະຈີ້ມຂອງ ກຜງສ ສະພາແຫ່ງຊາດ ພ້ອມດຽວກັນ ປະທານກອງປະຊຸມກໍໄດ້ມີຄຳຖາມເຈາະຈີ້ມບາງບັນຫາຕໍ່ກັບພະແນກການທີ່ລາຍງານ ແລະ ພາກສ່ວນກ່ຽວຂ້ອງ ໄດ້ອະທິບາຍຊີ້ແຈງ ນອກນັ້ນ, ບັນດາທ່ານຜູ້ແທນເຂົ້າຮ່ວມກອງປະຊຸມ ຍັງໄດ້ແລກປ່ຽນປະກອບຄຳຄິດເຫັນຕໍ່ກັບການຈັດຕັ້ງປະຕິບັດວຽກງານດັ່ງກ່າວພາຍໃນແຂວງຢ່າງກົງໄປກົງມາ ແລະ ສະເໜີບາງບັນຫາທີ່ພົບຄວາມຫຍຸ້ງຍາກໃນການຈັດຕັ້ງປະຕິບັດວຽກງານຢູ່ພາຍໃນແຂວງ ໃຫ້ກຳມາທິການດັ່ງກ່າວ ນຳສະເໜີພາກສ່ວນທີ່ກ່ຽວຂ້ອງແກ້ໄຂຕາມຄວາມເໝາະສົມ.

          ຕອນທ້າຍ ປະທານກອງປະຊຸມ ໄດ້ມີຄຳເຫັນໂອ້ລົມ ເຊິ່ງກ່ອນອື່ນທ່ານໄດ້ສະແດງຄວາມຂອບໃຈມາຍັງອົງການປົກຄອງແຂວງ ທີ່ໄດ້ລາຍງານຕາມຄຳຖາມເຈາະຈີ້ມຂອງ ກຜງສ ພ້ອມທັງຮຽກກຮ້ອງໃຫ້ອົງການປົກຄອງແຂວງ ຮ່ວມກັບ ສພຂ ຊູກຍູ້, ສົ່ງເສີມຕິດຕາມກວດກາໃນຂົງເຂດເສດຖະກິດ ແລະ ຍາດແຍ່ງເອົາການລົງທຶນທັງພາຍໃນ ແລະ ຕ່າງປະເທດໃຫ້ຫລາຍກວ່າເກົ່າ ເພື່ອເກັບເອົາບັນດາລາຍຮັບເຂົ້າແຂວງໃຫ້ຫລາຍກວ່າເກົ່າ ພ້ອມກັນພັດທະນາປະເທດຊາດ ກໍຄືແຂວງຫລວງນ້ຳທາ ໃຫ້ມີລາຍຮັບທີ່ໝັ້ນຄົງ ແລະ ຫລຸດພົ້ນອອກຈາກຄວາມທຸກຍາກເທື່ອລະກ້າວ.

(ນາງ ວັນນີ ແຝງບົວວັນ)