ປະທານຄະນະສະມາຊິກສະພາແຫ່ງຊາດ ເພດຍິງ ໄດ້ສໍາພາດ ເນື່ອງໃນໂອກາດສະເຫລີມສະຫລອງວັນແມ່ຍິງສາກົນ ຄົບຮອບ 108 ປີ

07/03/2018 00:00 -

(ສພຊ) ເນື່ອງໃນໂອກາດສະເຫລີມສະຫລອງວັນແມ່ຍິງສາກົນ (8/3/1910-8/3/2018) ຄົບຮອບ 108 ປີ ທ່ານ ນາງ ທັດ​ສະ​ດາ​ພອນ ​ແສງ​ສຸລິຍາ ປະທານ​ຄະນະ​ສະມາຊິກ​ສະພາ​ແຫ່ງ​ຊາດ​ (ສສຊ) ເພດ​ຍິງ ໄດ້​ສໍາພາດ​ຈາກ​ສື່​ມວນ​ຊົນວ່າ: ຄື​ດັ່ງ​ທີ່​ພວກ​ເຮົາ​ຮັບ​ຮູ້​ນໍາ​ກັນ​ແລ້ວ​ວ່າ ວັນ​ທີ 8 ມີນາ ​ແມ່ນ​ວັນ​ແມ່ຍິງ​ສາກົນ ເຊິ່ງ​ເປັນ​ວັນ​ທີ່​ແມ່ຍິງ​ທົ່ວ​ໂລກ​ ພ້ອມ​ກັນ​ສ້າງ​ຂະ​ບວນການສະ​ເຫລີມສະ ຫລອງວັນ​ແຫ່ງ​ຄວາມ​ສໍາ​ເລັດ​ໃນ​ການ​ຕໍ່ສູ້​ເພື່ອ​ສິດ​ເສລີພາບ​ແລະ​ໄດ້​ກາຍ​ເປັນວັນ​ແຫ່ງ​ໄຊຊະນະ​ຂອງ​ແມ່ຍິງ​ໃນ​ທົ່ວ​ໂລກ​ນັບ​ແຕ່​ອະດີດຮອດ​ປະຈຸ​ບັນ ​ເວົ້າ​ລວມ, ​ເວົ້າ​ສະ​ເພາະ ແມ່ຍິງ​ລາວ​ ໄດ້​ພ້ອມ​ສ້າງ​ຂະ​ບວນການ​​ສະ​ເຫີມສະຫລອງ ​ແລະ​ ລະນຶກ​ເຖິງ​ມູນ​ເຊື້ອ​ໃນວັນ​ອັນ​ສໍາ ຄັນ​ດັ່ງກ່າວ

      ​ໃນ​ຖານະ​ທີ່​ເປັນ ​ສສຊ ​ແມ່ນ​ອົງການຕົວ​ແທນ​​ແຫ່ງ​ສິດ ​ແລະ​ ຜົນ​ປະ​ໂຫຍ​ດຂອງປະຊາຊົນ​ລາວ​ບັນດາ​ເຜົ່າ, ​ເປັນ​ອົງການ​ສູງ​ສຸດອໍານາດ​ແຫ່ງ​ລັດ​, ​ເປັນ​ອົງການ​ນິຕິບັນຍັດ ປະຕິບັດ​ພາລະ​ບົດ​ບາດ​ ຮັບຮອງ​ເອົາລັດຖະທໍາ​ມະນູນ​ ແລະ​ ກົດຫມາຍ, ​ຕົກລົງ​ບັນ​ຫາ​ພື້ນຖານ​ຂອງ​ປະ​ເທດ​ຊາດ ​ແລະ ຕິດ ຕາມ​ກວດກາການ​ເຄົາລົບ​ແລະ​ປະຕິບັດ​ລັດຖະທໍາ​ມະນູນ​ແລະ​ກົດຫມາຍຂອງ​ບັນດາ​ອົງການ​ລັດ.

ພາຍຫລັງ​ປະ​ເທດ​ຊາດ​ໄດ້​ຮັບ​ການ​ປົດ​ປ່ອຍ ປະຊາຊົນ​ລາວ​ພາຍ​ໃຕ້​ການ​ນໍາພາ​ຂອງ​ພັກ​ປະ ຊາຊົນ​ປະຕິວັດ​ລາວ ​ໄດ້​ພ້ອມ​ກັນ​ປະຕິບັດ ສອງ​ຫນ້າ​ທີ່​ຍຸດ​ທະ​ສາດ​ຄື​ປົກ​ປັກ​ຮັກສາ​ແລະ​ສ້າງສາ​ປະ​ເທດ​ຊາດ  ​ໂດຍ​ສະ​ເພາະ​ແມ່ນ​ການ​ດໍາ​ເນີນ​ພາລະກິດ​ປຽນ​ແປງ​ໃໝ່​ຢ່າງຮອບດ້ານ​ແລະ​ມີ​ຫລັກການ​ ​ເພື່ອ​ຂຸດ​ຄົ້ນ​​ແລະ​ເສີມ​ຂະຫຍາຍ​ກໍາລັງ​ແຮງ​ຂອງ​ຊາດ​ແລະ​ຍຸກ​ສະ​ໄໝ ​ເຂົ້າ​ໃນ​ການ​ສື​ບຕໍ່​​ແລະ​ບູລະນະ​ລະບອບ​ປະຊາທິປະ​ໄຕ​ປະຊາຊົນ,​ເຮັດ​ໃຫ້​ປະຊາຊົນ​ຮັ່ງມີ​ຜາ​ສຸກ,ປະ​ເທດ​ຊາດ​ມັ່ງ​ຄັ່ງ​ເຂັ້ມແຂງ, ສັງ ຄົມ​ສາມັກຄີ​ປອງ​ດອງ, ປະຊາທິປະ​ໄຕ, ຍຸຕິ​ທໍາ​ ແລະ ​ສີວິ​ໄລ, ສ້າງ​ປະຖົມ​ປັດ​ໃຈ​ກ້າວ​ຂຶ້ນ​ສູ່​ສັງຄົມ​ນິຍົມ.

ນັບ​ແຕ່​ມື້​ນັ້ນ​ມາ ສະພາ​ປະຊາຊົນ​ສູງ​ສຸດ​ຊຸດ​ທີ I ​ໄດ້​ຮັບ​ການ​ສ້າງ​ຕັ້ງ​ຂຶ້ນ​ໃນ​ວັນ​ທີ 2 ທັນວາ 1975 ​ໃນ​ກອງ​ປະຊຸມ​ຜູ້​ແທນ​ທົ່ວ​ປະ​ເທດ​ໄດ້​ແຕ່ງ​ຕັ້ງ​ຜູ້​ແທນ​ປະຊາຊົນ ຈໍານວນ 45 ທ່ານ, ​ໃນ​ນັ້ນ​ມີ​ແມ່ຍິງ 4 ທ່ານ ​ກວມ​ເອົາ 8,8 % ໝາຍວ່າ​ສະພາ​ປະຊາຊົນ​ສູງ​ສຸດ​ຊຸດ​ທີ I ນີ້ ​ໄດ້​ກໍາ​ເນີ​ດ​ເກີດ​ຂຶ້ນ​ໃນ​ປະ​ເທດ​ຊາດ​ຫາກໍ່​ໄດ້​ຮັບ​ການ​ປົດ​ປ່ອຍ ,

 - ສະພາ​ປະຊາຊົນ​ສູງ​ສຸດ​ຊຸດ​ທີ 2 ​ໄດ້​ຮັບ​ການ​ເລືອກ​ຕັ້ງ​ທັງ​ຫມົດ​ຈໍ​ານວນ: 79 ທ່ານ ຍິງ 5 ທ່ານ​ເທົ່າ​ກັບ 6,3 ​ເບີ​ເຊັນ;

 - ສະພາ​ແຫ່ງ​ຊາດ​ຊຸດ​ທີ 3​ໄດ້​ຮັບ​ການ​ເລືອກ​ຕັ້ງ​ທັງ​ຫມົດ​ຈໍ​ານວນ: 85 ທ່ານ ຍິງ 8 ທ່ານ​ ເທົ່າ​ກັບ 9,4 ​ເບີ​ເຊັນ;

- ສະພາ​ແຫ່ງ​ຊາດ​ຊຸດ​ທີ 4ໄດ້​ຮັບ​ການ​ເລືອກ​ຕັ້ງ​ທັງ​ຫມົດ​ຈໍ​ານວນ: 99 ທ່ານ ຍິງ 21 ທ່ານ​ ເທົ່າ​ກັບ 21,2​ເບີ​ເຊັນ;

- ສະພາ​ແຫ່ງ​ຊາດ​ຊຸດ​ທີ 5ໄດ້​ຮັບ​ການ​ເລືອກ​ຕັ້ງ​ທັງ​ຫມົດ​ຈໍ​ານວນ: 109 ທ່ານ ຍິງ 25 ທ່ານ​ ເທົ່າ​ກັບ 23 ​ເບີ​ເຊັນ;

- ສະພາ​ແຫ່ງ​ຊາດ​ຊຸດ​ທີ 6ໄດ້​ຮັບ​ການ​ເລືອກ​ຕັ້ງ​ທັງ​ຫມົດ​ຈໍ​ານວນ: 115 ທ່ານ ຍິງ 29 ທ່ານ​ ເທົ່າ​ກັບ 25,2​ເບີ​ເຊັນ;

- ສະພາ​ແຫ່ງ​ຊາດ​ຊຸດ​ທີ 7ໄດ້​ຮັບ​ການ​ເລືອກ​ຕັ້ງ​ທັງ​ຫມົດ​ຈໍ​ານວນ: 132 ທ່ານ ຍິງ 33 ທ່ານ​ ເທົ່າ​ກັບ 25 ​ເບີ​ເຊັນ;

- ສະພາ​ແຫ່ງ​ຊາດ​ຊຸດ​ທີ 8ໄດ້​ຮັບ​ການ​ເລືອກ​ຕັ້ງ​ທັງ​ຫມົດ​ຈໍ​ານວນ: 149 ທ່ານ ຍິງ 41 ທ່ານ​ ເທົ່າ​ກັບ 27,5 ​ເບີ​ເຊັນ;

        ຜ່ານ​ຂະ​ບວນການ​ເລືອກ​ຕັ້ງສະມາຊິກ​ສະພາ​ແຫ່ງ​ຊາດ​ໃນ​ແຕ່​ລະ​ຊຸດ ໄດ​້​ມີ​ຈໍານວນ​ຕົວ​ເລກ​ຂອງ​ສະມາຊິກ​ສະພາ​ແຫ່ງ​ຊາດ​ເພດ​ຍິງ ​​ເພີ່ມ​ຂຶ້ນ​ໃນ​ແຕ່​ລະ​ຊຸດ ໃນ​ວັນ​ທີ 24 ກຸມພາ 2002 ​ໄດ້​ມີ​ການເລື​ອກຕັ້ງສະມາຊິກ​ສະພາ​ແຫ່ງ​ຊາດຊຸຸດທີ V ​ໂດຍອີງ​ໃສ່​ທິດ​ທາງ​ການ​ເຄື່ອນ​ໄຫວ​ຂອງ​ສະພາ​ແຫ່ງ​ຊາດຊຸດ​ທີ V ​ວ່າ​ດ້ວຍ​ການ​ສືບຕໍ່ປັບປຸງ​ຄວາມ​ສາມາດ​​ຂອງ​​ສະມາຊິກ​ສະພາ​ແຫ່ງ​ຊາດ​ເພດ​ຍິງ ທັງ​ນີ້ກໍ​ເພື່ອ​ຍົກ​ລະ​ດັບ​ຄວາມ​ກ້າວໜ້າຂອງ​ແມ່ຍິງ​ລາວ​ບັນດາ​ເຜົ່າ​ໃຫ້​ນັບ​ມື້​ນັບ​ຫຼາຍຂຶ້ນ​ໃນ​ທຸກ​ດ້ານ, ​ໃນ​ຂົງເຂດ​ການ​ເມືອງ, ​ເສດຖະກິດ, ວັດທະນະ​ທໍາ-ສັງຄົມ ​ໃຫ້​ໄດ້​ທາງ​ດ້ານ​ປະລິມານ ​ແລະ​ ຄຸນນະ ພາ​ບ​​ສູງ​ຂຶ້ນ​ເປັນ​ລໍາດັບ ດັ່ງ​ນັ້ນ,​​ ​ ໃນ​ປີ 2002 ຕົ້ນ​ສະ​ໄໝຂອງ​ສະພາ​ແຫ່ງ​ຊາດ ຊຸດ​ທີ V ພາຍ​​ໃຕ້​ຄວາມຄິດ​ລິ​ເລີ່ມ ​ແລະ ​ຊີ້​ນໍາ​ຂອງ​ທ່ານ ນາງ ປານີ ຢາ​ທໍ່​ຕູ້ ເຊິ່ງ​ເວລາ​ນັ້ນ​ເປັນ​ຮອງ​ປະທານ​ສະພາ​ແຫ່ງ​ຊາດ ຄະນະສະມາຊິກ​ສະພາ​ແຫ່ງຊາດ​ເພດ​ຍິງ​ໄດ້​ສ້າງ​ຕັ້ງ​ຂຶ້ນ​. ມາໃນ​ທ້າຍ​ສະ​ໄໝສະພາ​ແຫ່ງ​ຊາດ ຊຸດ​ທີ VI ​ໄດ້​ມີ​ການ​ປັບປຸງ​ກົດໝາຍວ່າ​ດ້ວຍ ສະພາ​ແຫ່ງ​ຊາດ ​ແລະ​ຖືກ​ຮັບຮອງ, ປະກາດ​ໃຊ້​ໃນ​ວັນ​ທີ 15 ທັນ​ວາ 2010 ​ໄດ້​ລະບຸ​ສະຖານະ​ພາບ​ຄະນະ​ສະມາຊິກ​ສະພາ​ແຫ່ງ​ຊາດ​ເພດ​ຍິງ ​ເຂົ້າ​ໃນ​ກົດ ໝາຍ ນັບ​ແຕ່​ສະພາ​ແຫ່ງ​ຊາດ ຊຸດ​ທີ VII, ຊຸດ​ທີ VIII.

        ​ໃນ​ຖານະຄະນະ​ສະມາຊິກ​ສະພາ​ແຫ່ງ​ຊາດ​ເພ​ດຍິງ ​ແມ່ນ​ກົງຈັກໜຶ່ງຂອງ​ຄະນະ​ປະ​ຈໍາ​ສະພາ​ແຫ່ງ​ຊາດ, ປະຕິບັດ​ພາລະ​ບົດບາດ​ເປັນ​ເສນາ​ທິການ​ໃຫ້​ຄະນະ​ປະ​ຈໍາ​ສະພາ​ແຫ່ງ​ຊາດ, ຕິດຕາມ​ກວດ ກາ​, ການ​ປະຕິບັດ​ກົດໝາຍ, ​ແຜນ​ຍຸດ​ທະ​ສາດ ​ແລະ​ນະ​ໂຍບາຍ​ກ່ຽວກັບ​ການ​ເຊື່ອມ​ທັດສະນະ​ບົດ ບາດ​ຍິງ-ຊາຍ, ສິດ​ສະ​ເໝີພາບ​ຍິງ-ຊາຍ, ການ​ສ້າງ​ຄວາມ​ເຂັ້ມ​ແຂງ​ໃຫ້​ແກ່​ແມ່ຍິງ, ການ​ສົ່ງ​ເສີມ​ຄວາມ​ກ້າວໜ້າຂອງ​ແມ່ຍິງ, ວຽກງານ​ປົກ​ປ້ອງ​ພັດທະນາ​ແມ່ ​ແລະ ​ເດັກ ​ແລະ ​ຊຸກຍູ້​ການ​ປະຕິບັດ​ສັນຍາ​ສາກົນ ​ແລະ ​ສົນທິສັນຍາ​ກ່ຽວກັບ​ແມ່ຍິງ. ຄະນະ​ສະມາຊິກ​ສະພາ​ແຫ່ງ​ຊາດ​ເພດ​ຍິງ ​ໄດ້​ເຄື່ອນ​ໄຫວ​ຕາມ 4 ພາລະ​ບົດບາດ​ຂອງ​ສະພາ​ແຫ່ງ​ຊາດຄື: ​ເປັນ​ຕົວ​ແທນ​ແຫ່ງ​ສິດຜົນປະ​ໂຫຍ​ດອັນ​ຊອບ​ທໍາ​ຂອງ​ປະຊາ​ຊົນ, ບົດ​ບາດ​ນິຕິບັນຍັດ, ຕົກລົງ​ບັນຫາ​ພື້ນຖານ​ສໍາຄັນ​ຂອງ​ຊາດ, ​ຕິດຕາມ​ກວດກາ. ສະມາຊິກ​ສະພາ​​ເພດ​ຍິງ​ໄດ້​ປະກອບສ່ວນ​ຢ່າງ​ຕັ້ງໜ້າຄຽງ ບ່າ​ຄຽງ​ໄລ່ຮ່ວມກັບສະມາຊິກ​ສະພາ​ເພດ​ຊາຍ.

ພິ​ເສດຄະນະສະມາຊິກ​ສະພາ​ແຫ່ງ​ຊາດ​ເພດ​ຍິງ ຊຸດ​ທີ VIII ​ໄດ້​ເຄື່ອນ​ໄຫວ​ຕາມ 3 ພາ​ລະ​ບົດບາດ​ທີ່​ລະບຸ​ໄວ້​ໃນ​ກົດໝາຍຂອງ​ສະພາ​ແຫ່ງ​ຊາດ ຄື: ບົດ​ບາດ​ນິຕິບັນຍັດ, ຕົກລົງ​ບັນຫາ​ພື້ນ ຖານສໍາຄັນ​ຂອງ​ຊາດ, ​ຕິດຕາມ​ກວດກາ ພ້ອມ​ກັນ​ນັ້ນ, ​​ໃນ​ແຕ່ລະ​ປີໄດ້​ຈັດ​ກອງ​ປະຊຸມ​ຄົບ​ຄະນະ​ສະ ມາຊິກ​ສະພາ​ແຫ່ງ​ຊາດ​ເພດ​ຍິງ. ນອກ​ນັ້ນ ​ໄດ້​ຈັດ​ສໍາ​ມະ​ນາ​ສ້າງ​ຄວາມ​ເຂັ້ມ​ແຂງ​ໃຫ້​ແກ່​ສະມາຊິກ​ສະ ພາ​ແຫ່ງ​ຊາດ​ເພດ​ຍິງ ​ແລະ​ສະມາຊິກ​ສະພາ​ປະຊາ​ຊົນ​ເພດ​ຍິງ​ຂັ້ນ​ແຂວງ ​ແລະ​ໄດ້​ເຂົ້າ​ຮ່ວມ​ກອງ​ປະຊຸມ​ສະມັດຊາ​ລັດຖະສະພາ​ລະຫວ່າງ​ຊາດ​ອາຊຽນ​ໄອ​ປາ (​ໄວ​ປາ), ກອງ​ປະຊຸມ​ອົງການ​ສະຫະພັນ​ລັດຖະສະພາ​ສາກົນ (IPU) ​ແລະ​ກອງ​ປະຊຸມ​ສະມັດຊາ​ລັດຖະສະ ພາ​ບັນດາ​ປະ​ເທດ​ທີ່​ໃຊ້​ພາສາ​ຝຣັ່ງ (ຝຣັ່ງ​ໂກ​ໂຟນີ IPF). ​ເພື່ອ​ເຮັດ​ສໍາ​ເລັດ​ໜ້າ​ທີ່​ທີ່​ຂັ້ນ​ເທິ່ງມອບ​ໝາຍ​ໃຫ້ ຄະນະ​ສະມາຊິກ​ສະພາ​ແຫ່ງ​ຊາດ​ເພດ​ຍິງ ​ໄດ້​​ວາງ​ວິ​ໄສ​ທັດຮອດ​ປີ 2030, ຍຸດ​ທະ​ສາດ​ແຕ່​ປີ 2016-2025 ​ແລະ​ແຜນ​ການ 5 ປີ​ຂອງ​ຄະນະ​ສະມາຊິກ​ສະພາ​ແຫ່ງ​ຊາດ​ເພດ​ຍິງ ສະພາ​ແຫ່ງ​ຊາດ ຊຸດ​ທີ VIII (2016-2020) ​ແລະ​ທິດ​ທາງແຜນການ ປີ 2017.

​        ເພື່ອ​ເຮັດ​ສໍາ​ເລັດໜ້າທີ່​ທີ່​ຂັ້ນ​ເທິງ​ມອບໝາຍ​ໃຫ້​ນັ້ນ ​ໂດຍ​ປະຕິບັດ​ຕາມ​ມະຕິ​ຂອງ​ຄະນະ​ປະ​ຈໍາ​ສະພາ​ແຫ່ງ​ຊາດ  ສະບັບ​ເລກທີ 0126/ຄປຈ, ລົງ​ວັນ​ທີ 11 ກັນຍາ 2016 ກ່ຽວກັບ​ການຈັດ​ຕັ້ງ ​ແລະ​ການ​ເຄື່ອນ​ໄຫວ​ຂອງ​ຄະນະ​ສະມາຊິກ​ສະພາ​ແຫ່ງ​ຊາດ​ເພດ​ຍິງ ​ແລະ​ມະຕິ​ຂອງ​ຄະນະ​ປະ​ຈໍາ​ສະພາ​ແຫ່ງ​ຊາດ ສະບັບ​ເລກທີ 013/ຄປຈ, ລົງ​ວັນ​ທີ 02 ກຸ​ມພາ 2017 ວ່າດ້ວຍກົນ​ໄກ​ການ​ປະສານ​ງານ ​ແລະ​ການ​ພົວພັນ​ກັບ​ພາກ​ສ່ວນ​ທີ່​ກ່ຽວຂ້ອງ​ຢູ່​ຂັ້ນ​ສູນ​ກາງ ​ແລະ​ທ້ອງ​ຖິ່ນ. ສະມາຊິກ​ສະພາ​ແຫ່ງ​ຊາດ​ເພດ​ຍິງ ​ແລະ​ສະມາຊິກ​ສະພາ​ປະ​ຊາ​ຊົນ​ເພດ​ຍິງ​ຂັ້ນ​ແຂວງ ທີ່​ປະ​ຈໍາ​ຢູ່​ສູນ​ກາງ ​ແລະ​ເຂດ​ເລືອກ​ຕັ້ງ ​ໄດ້​ປະກອບ​ສ່ວນ​ປະຕິບັດ​ພາລະ​ບົດບາດ​ຂອງ​ສະພາ​ແຫ່ງ​ຊາດ ​ແລະ​ສະພາ​ປະຊາຊົນ​ຂັ້ນແ, ນິຕິ​ກຳ​ລຸ່ມ​ກົດໝາຍ ທີ່​ນໍາ​ເຂົ້າ​ມາ​ຜ່ານ​ໃນ​ກອງ​ປະຊຸມ​ສະ​ໄໝສາມັນ​ ຂອງ​ສະພາ​ແຫ່ງ​ຊາດ, ສະພາ​ປະຊາຊົນ​ຂັ້ນ​ແຂວງ ​ໃນ​ແຕ່​ລະ​ຄັ້ງ ປະຈຸ​ບັນ​ມີຈໍານວນ 125 ສະບັບ ​ແລະ​ນິຕິ​ກຳ​ລຸ່ມກົດໝາຍຫຼາຍສະບັບ ທີ່​ພົວພັນ​​ເຖິງ​ການ​ພັດທະນາ​​ເສດຖະກິດ-ສັງຄົມ​ຂອງທ້ອງ​ຖິ່ນ. ​ໃນ​ນັ້ນ ກົດໝາຍທີ່​ພົວພັນ​ໂດຍ​ກົງ​ຕໍ່​ແມ່ຍິງ ​ແລະ​ເດັກນ້ອຍ​ນັ້ນ ປະກອບ​ມີ: ກົດໝາຍວ່າ​ດ້ວຍການ​ພັດທະນາ ​ແລະ​ປົກ​ປ້ອງ​ແມ່ຍິງ, ກົດໝາຍວ່າ​ດ້ວ​ຍການ​ຕ້ານ ​ແລະ​ການ​ສະກັດ​ກັ້ນ​ການ​​ໃຊ້​ຄວາມ​ຮຸນ​ແຮງ​ຕໍ່​ແມ່ຍິງ ​ແລະ​ເດັກ …..​​ແລະ​ມີ​ຫຼາຍກົດໝາຍທີ່​ພົວພັນ​ເຖິງ​ການ​ປົກ​ປ​້ອງ, ການ​ສົ່ງ​ເສີມ ​ແລະການ​ພັດທະນາ​ແມ່ຍິງ ​ແລະ​ເດັກ.

  • ພາລະ​ບົດບາດ​ຕົກ​ລົງ​ບັນຫາ​ສໍາຄັນ​ພື້ນຖານ​ຂອງ​ປະ​ເທດ​ຊາດ ​ແລະ​ເພດ​ຍິງ​ໄດ້​ປະກອບ​ສ່ວນ​ໃນ​ການ​ປະກອບ​ຄໍາ​ຄິດ​ຄໍາ​ເຫັນ, ພິຈາລະນາ​ເອົາ​ບັນ​ຫາ​ສໍາຄັນ​ພື້ນຖານ​ຂອງ​ປະ​ເທດ​ຊາດ ​ແມ່ນ​ພັດທະນາ​ເສດຖະກິດ-ສັງຄົມ.
  • ພາລະ​ບົດບາດ​ຕິດຕາມ​ກວດກາ ​ແມ່ນ​ມີ​ຄວາມ​ສໍາຄັນ​ຫຼາຍ ນອກ​ຈາກ​ສະມາຊິກ​ສະພາ​ແຫ່ງ​ຊາດ​ເພດ​ຍິງ ​ໄດ້​ເຂົ້າ​ຮ່ວມ​ຮັບ​ຟັງ​ການ​ລາຍ​ງານ​ຂອງ​ລັດຖະບານ, ອົງການ​ຕຸລາການ ​ແລະ​ພາກ​ສ່ວນ​ທີ່​ກ່ຽວຂ້ອງ ທີ່​ນໍາ​ເຂົ້າ​ມາ​ຜ່ານ​ໃນ​ກອງ​ປະຊຸມ​ສະພາ​ແຫ່ງ​ຊາດ​ແລ້ວ ​ແລະ​ສະມາຊິກ​ສະພາ​ແຫ່ງ​ຊາດ​ເພດ​ຍິງ ​ແລະໜ່ວຍສະມາຊິກ​ສະພາ​ປະຊາຊົນ​ເພດ​ຍິງ​ຂັ້ນ​ແຂວງ ​ໄດ້​ປະຕິບັດ​ບົດບາດ​ຕິດຕາມ​ກວດກາ ​ໂດຍ​ຜ່ານ​ການ​ລົງ​ພົບ​ປະ​ຜູ້​ມີ​ສິດ​ເລືອກ​ຕັ້ງ; ຜ່ານ​ການ​ເຂົ້າ​ພົບ​ສະມາຊິກ​ສະພາ​ແຫ່ງ​ຊາດ​ເພດ​ຍິງ​ໂດຍ​ກົງ ​ແລະ​ຜ່ານ​ການ​ນໍາ​ສະ​ເໜີຄໍາ​ຮ້ອງ​ຂໍ​ຄວາມ​ເປັນ​ທໍາ​ຈາກ​ແມ່ຍິງ​ລາວບັນ​ດາ​ເຜົ່າ ​ແລະ​ປະຊາຊົນ​ຜູ້​ມີ​ສິດ​ເລື​ອກຕັ້ງ.

ນອກ​ນັ້ນ ​ໂດຍ​​ເລັ່ງ​ໃສ່​ຕິດຕາມ​ກວດກາ​ເປົ້າໝາຍທີ 05 ທີ່​ລະບຸ​ໄວ້​ໃນ​ເປົ້າໝາຍການ​ພັດທະນາ​ແບບ​ຍືນ​ຍົງ “ມີ​ຄວາມ​ສະ​ເໝີພາບ​ຍິງ-ຊາຍ” ຊຶ່ງ​ມີ 6 ​ເນື້ອ​ໃນ​ຄື:

1. ລຶບລ້າງ​ທຸກ​ຮູບ​ການ​ຂອງ​ການ​ຈໍາ​ແນ​ກຕໍ່​ແມ່ຍິງ ​ແລະ​ເດັກ​ຍິງ ຢູ່​ທົ່ວ​ທຸກ​ແຫ່ງ;

2. ກໍາຈັດທຸກ​ຮູບ​ແບບ​ຂອງ​ການ​ໃຊ້​ຄວາມ​ຮຸນ​ແຮງ​ຕໍ່​ແມ່ຍິງ ​ແລະ​ເດັກ​ຍິງ ​ໃນ​​ເຂດ​ສາທາ ລະນະ ​ແລະ​ເຂດ​ສ່ວນ​ບຸກຄົນ ລວມທັງ​ການ​ຄ້າ​ມະນຸດ ​ແລະ​ການ​ຂູດ​ຮີດ​ທາງ​ເພດ ​ແລະ​ຮູບ​ແບບ​ອື່ນໆ;

3. ກໍາຈັດ​ທຸກ​ການ​ກະທໍາ​ທີ່​ເປັນ​ອັນຕະລາຍ​ເຊັ່ນ: ການ​ແຕ່ງງານ​ຂອງ​ເດັກ, ການ​ແຕ່ງງານ​ກ່ອນ​ໄວ ​ແລະ​ການ​ບັງຄັບ​ໃຫ້​ແຕ່ງງານ;

4. ຮັບ​ຮູ້ ​ແລະ​ໃຫ້​ຄຸນຄ່າ​ການ​ດູ​ແລ​​ເອົາ​ໃຈ​ໃສ່ ​ແລະ​ວຽກ​ໃນ​ຄອບຄົວ ທີ່​ບໍ່​ໄດ້​ຮັບ​ຄ່າ​ຈ້າງ ​ໂດຍ​ການ​ຕອບ​ສະໜອງທາງ​ບໍລິການ​ດ້ານ​ສັງຄົມ, ພື້ນຖານ​ໂຄງ​ລ່າງ ​ແລະ​ນະ​ໂຍບາຍ​ການ​ປົກ​ປ້ອງ​ດ້ານ​ສັງ​ຄົມ ກໍ​ຄື ສົ່ງ​ເສີມ​ໃຫ້​ມີ​ຄວາມ​ຮັບຜິດຊອບ​ຮ່ວມ​ກັນ​ພາຍ​ໃນ​ຄອບຄົວ;

5. ຮັບປະກັນ​ໃຫ້​ແມ່ຍິງ​ມີ​ສ່ວນ​ຮ່ວມ​ຢ່າງ​ເຕັມ​ສ່ວນ ​ແລະ​ມີ​ປະສິດທິ​ຜົນ ​ແລະ​ໄດ້​ຮັບ​ໂອກາດ​ເທົ່າ​ທຽມກັນ ສໍາລັບ​ການ​ເປັນ​ການ​ນໍາ​ລະດັບ​ຕັດ​ສິນ​ໃຈ​ທາງ​ດ້ານ​ການ​ເມືອງ, ​ເສດ ຖະກິດ ​ແລະ​ຊີວິດ​ການ​ເປັນ​ຢູ່​ໃນ​ສັງຄົມ.

 ຢາກ​ປະຕິບັດ​ບັນລຸ​ຕາມ​ຄາດໝາຍຄື​ແນວ​ນັ້ນ ກ່ອນ​ອື່ນໝົດຕ້ອງ​ໄດ້​ສ້າງ​ຄວາມ​ເຂັ້ມ​ແຂງ​ໃຫ້​ແກ່​ສະມາຊິກ​ສະພາ​ແຫ່ງ​ຊາດ​ເພດ​ຍິງ, ສະມາຊິກ​ສະພາ​ປະຊາຊົນ​ເພດ​ຍິງ​ຂັ້ນ​ແຂວງ ​ໂດຍ​ການຈັດ​ສໍາ​ມະ​ນາ​ໃນ​ຫົວ​ຂໍ້​ຕ່າງໆ ​​ໄດ້​ມີ​ການ​ປະສານ​ງານ​ກັບ​ພາກສ່ວນ​ທີ່​ກ່ຽວຂ້ອງ ທີ່​ສໍາຄັນ ​ແມ່ນ​ການ​ມີ​ສ່ວນ​ຮ່ວມ​ຂອງທ່ານ​ຊາຍ​​ເພື່ອຊ່ວຍ​ໂຄສະນາ, ​ເຜີຍ​ແຜ່​ແນວທາງ, ກົດໝາຍ, ນິຕິ​ກໍາ, ບັນດາ​ສົນທິສັນຍາ​ທີ່​ພົວພັນ​ເຖິງການ​ສົ່ງ​ເສີມ​ຄວາມ​ສະ​ເໝີພາບ​ຍິງ-ຊາຍ, ການ​ສ້າງ​ຄວາມ​ເຂັ້ມ​ແຂງ​ໃຫ້​ແກ່​ແມ່ຍິງ ​ແລະ​ເດັກ ​

​ໃນ​ນາມ ຕາງໜ້າ​ໃຫ້​ສະມາຊິກ​ສະພາ​ແຫ່ງ​ຊາດ​ເພດ​ຍິງ ​ແລະ​ສະມ​າຊິກ​ສະພາ​ປະຊາຊົນ​ເພດ​ຍິງ​ຂັ້ນ​ແຂ​ວງ ​ຂໍ​ຮຽກຮ້ອງມາ​ຍັງ​ອົງ​ການຈັດ​ຕັ້ງ, ​ອໍາ​ນາດ​ການ​ປົກຄອງ​ທຸກ​ຂັ້ນ​ມີ​ສ່ວນ​ຮ່ວມ​ໃນ​ການ​ສ້າງ​ຄວາມ​ເຂັ້ມ​ແຂງ​ໃຫ້​ແກ່​ແມ່ຍິງ​ ຊຶ່ງ​ເຮັດ​​ໃຫ້​ແມ່ຍິງ​ທີ່​ມີ​ຈໍານວນຕົວ​ເລກ​ກວມ​ເກືອບ​ເຄິ່ງໜຶ່ງຂອງ​ພົນລະ​ເມືອງ​ລາວ​ໃນ​ທົ່ວ​ປະ​ເທດ ​ໃຫ້​ສາມາດ​ປະກອບ​ສ່ວນ​ນໍາ​ໃຊ້​ສະຕິ​ປັນຍາ, ​ເຫື່ອ​ແຮງ ​ແລະ​ມູນ​ເຊື້ອ​ທີ່​ດີ​ຂອງ​​ແມ່ຍິງ​ລາວ ທີ່​ກອງ​ປະຊຸມ​ໃຫຍ່​ຜູ້​ແທນ​ແມ່ຍິງ​ລາວ​ທົ່ວ​ປະ​ເທດ​ຄັ້ງ​ທີ 7 ​ໄດ້​ຮັບຮອງ​​ເອົາ​ຄໍ​າຂວັນ ​ແລະ​ຂໍ້​ແຂ່ງຂັນ 3 ດີ​ຂອງ​ສະຫະພັນ​ແມ່ຍິງ​ລາວ “ພົນລະ​ເມືອງ​ດີ, ພັດທະນາ​ດີ ​ແລະ​ສ້າງ​ຄອບຄົວ​ດີ"​ ເຂົ້າ​ໃນ​ການ​ສ້າງສາ ​ແລະ​ພັດທະນາ​ປະ​ເທດ​ຊາດ​ຂອງ​ພວກ​ເຮົາ.

        ​ໃນ​ວາລະ​ທ້າຍ​ນີ້, ຂ້າພະ​ເຈົ້າ ຂໍ​ຂອບ​ໃຈ​ນໍາ​ບັນດາ​ທ່ານ​ການ​ນໍາ​ຂອງ​ສະພາ​ແຫ່ງ​ຊາດ​ທີ່​ໄດ້​ໃຫ້ການ​ສະໜັບສະໜູນສ້າງ​ເງື່ອນ​ໄຂ​ໃຫ້​ແກ່​ສະມາຊິກ​ສະພາ​ແຫ່ງ​ຊາດ​ເພດ​ຍິງ ​ໄດ້​ເຄື່ອນ​ໄຫວ​ຕາມ​ພາລະ​ບົດບາດ, ສິດ ​ແລະໜ້າທີ່​ຂອງ​ຕົນ​ໄດ້​ຮັບ​ຜົນ​ສໍາ​ເລັດ​ຕະຫຼອດມາ.

        ຂໍ​ຂອບ​ໃຈ​ນໍາ​ສື່​ມວນ​ຊົນ ທີ່​ໄດ້​​ລົງ​ມາ​ສໍາພາດ​ຄະນະ​ສະມາຊິກ​ສະພາ​ແຫ່ງ​ຊາດ​ເພດ​ຍິງໃນ​ຄັ້ງ​ນີ້.     

ອີກ​ເທື່ອໜຶ່ງຂໍ​ອວຍພອນ​ໄຊອັນ​ປະ​ເສີດ​ໃຫ້​ບັນດາ​ທ່ານ​ຜູ້​ນໍາ​ພັກ-ລັດ, ອະດີດ​ການ​ນໍາ​ສະຫະ ພັນ​ແມ່ຍິງ​ລາວ, ​​ແມ່ຍິງ​ລາວ​ບັນດາ​ເຜົ່າ​ໃນ​ຂອບ​ເຂດ​ທົ່ວ​ປະ​ເທດ ມີ​ສຸຂະພາບ​ພະ​ລາ​ນາ​ໄມ​ທີ່​ສົມບູນ ​ເຂັ້ມ​ແຂງ ພ້ອມ​ກັນປະກອບສ່ວນ​ສ້າງ​ຂະ​ບວນການສະ​ເຫຼີມສະຫຼອງ ​ເພື່ອ​ຂໍ່ານັບ​ຮັບ​ຕ້ອນ​ວັນ​ແມ່ຍິງ​ສາກົນ ວັນທີ 8 ມີນາ ຄົບຮອບ 108 ປີ ​ໃຫ້​ມີ​ຂະ​ບວນການ​ຟົດ​ຟື້ນ​ ​ແລະ ມ່ວນຊື່ນ.

(ສົມນຶກ ແກ້ວໄຊຍະຈັກ)