ເສີມຂະຫຍາຍຜົນສຳເລັດ ກອງປະຊຸມຮ່ວມ ຄັ້ງທີ 8 ຂອງກຳມາທິການງົບປະມານ ແລະການເງິນ  ສພຊ 4 ປະເທດ

22/10/2019 00:00 -

(ສພຊ) ລະຫວ່າງວັນທີ 4-5 ຕຸລາ 2019 ກໍາມາທິການແຜນການ, ການເງິນ ແລະ ການກວດສອບ (ກຜງສ) ສະພາແຫ່ງຊາດ (ສພຊ) ໄດ້ຈັດກອງປະຊຸມຕິດຕາມກວດກາ ແລະ ການສ້າງຄວາມເຂັ້ມແຂງການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດ ເພື່ອການເຊື່ອມໂຍງເສດຖະກິດ ແລະ ການຄຸ້ມຄອງການເງິນພາກໃຕ້ ສປປລາວ ທີ່ໂຮງແຮມຈໍາປາສັກແກຣນ ນະຄອນປາກເຊ ແຂວງຈໍາປາສັກ ໂດຍການເປັນປະທານຂອງທ່ານ ບຸນປອນ ບຸດຕະນະວົງ ຮອງປະທານສະພາແຫ່ງຊາດ, ມີບັນດາທ່ານປະທານ-ຮອງປະທານ ກຜງສ, ປະທານ-ຮອງປະທານສະພາປະຊາຊົນແຂວງ, ປະທານສະພາປະຊາຊົນນະຄອນຫລວງວຽງຈັນ, ສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ, ມີຮອງລັດຖະມົນຕີກະຊວງແຜນການ ແລະ ການລົງທຶນ, ຮອງລັດຖະມົນຕີກະຊວງການເງິນ,  ຮອງຜູ້ວ່າການທະນາຄານ ແຫ່ງ ສປປລາວ, ຮອງຫົວໜ້າສະຖາບັນຄົ້ນຄວ້າເສດຖະກິດແຫ່ງຊາດ, ຜູ້ຊີ້ນໍາວຽກງານເສດຖະກິດແຂວງຈໍາປາສັກ, ຮອງປະທານສະພາການຄ້າ ແລະ ອຸດສາຫະກໍາແຫ່ງຊາດ, ຮອງເຈົ້າແຂວງແຂວງຈໍາປາສັກ, ຜູ້ແທນຈາກສະພາແຫ່ງຊາດແຫ່ງຣາຊະອານາຈັກກໍາປູເຈຍ ແລະ ແຂກຖືກເຊີນຈາກອົງການຕ່າງໆທັງພາຍໃນ ແລະ ຕ່າງປະເທດເຂົ້າຮ່ວມ.

          ຈຸດປະສົງຂອງກອງປະຊຸມຄັ້ງນີ້ ແມ່ນເພື່ອແລກປ່ຽນບົດຮຽນ ແລະ ປະສົບການທີ່ດີ ຈາກປະເທດເພື່ອນມິດ ແລະ ສາກົນ ກ່ຽວກັບການສ້າງນິຕິກໍາ ແລະ ການຕິດຕາມກວດກາການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດ ທີ່ຮັບໃຊ້ໃນການເຊື່ອມໂຍງເສດຖະກິດຢູ່ພາກໃຕ້ ສປປລາວ.

ໃນພິທີເປີດກອງປະຊຸມ ທ່ານ ວິໄລວົງ ບຸດດາຄໍາ ໄດ້ກ່າວວ່າ: ການຕິດຕາມກວດກາ ແລະ ການສ້າງຄວາມເຂັ້ມແຂງ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດ ເພື່ອການເຊື່ອມໂຍງເສດຖະກິດ ແລະ ການຄຸ້ມຄອງການເງິນພາກໃຕ້ ສປປລາວ  ທີ່ຈັດຂຶ້ນຄັ້ງນີ້ ເປັນການທົບທວນ ແລະ ເສີມຂະຫຍາຍຜົນສໍາເລັດກອງປະຊຸມຮ່ວມຄັ້ງທີ 8 ຂອງກໍາມາທິການງົບປະມານ ແລະ ການເງິນ ຂອງສະພາແຫ່ງຊາດ 4 ປະເທດ (CLMV) ໃນການຕິດຕາມກວດກາ ການຈັດຕັ້ງປະຕິບັດງົບປະມານແຫ່ງລັດ ຈັດຂຶ້ນທີ່ນະຄອນຫຼວງພະບາງ ໃນຄັ້ງຜ່ານມາ ເຊິ່ງຈຸດປະສົງຕົ້ນຕໍ ແມ່ນຈະສຸມໃສ່ສືບຕໍ່ປຶກສາຫາລືແລກປ່ຽນ ແລະ ຖອດຖອນບົດຮຽນຮ່ວມກັນດັ່ງນີ້: ເພື່ອເປັນການສືບຕໍ່ປຶກສາຫາລື ແລະ ແລກປ່ຽນບົດຮຽນ ບັນຫາສໍາຄັນທີ່ຕິດພັນກັບການພັດທະນາເສດຖະກິດ-ສັງຄົມ ເຊິ່ງໄດ້ຍົກຂຶ້ນໃນກອງປະຊຸມຮ່ວມ ກໍາມາທິການງົບປະມານ ແລະ ການເງິນ 4 ປະເທດ ທີ່ນະຄອນຫລວງພະບາງ ໃນຄັ້ງຜ່ານມາ; ແລກປ່ຽນບົດຮຽນ ແລະ ປະສົບການ ຮ່ວມກັບກໍາມາທິການງົບປະມານ ແລະ ການເງິນ 4 ປະເທດ (ຣາຊະອານາຈັກກໍາປູເຈຍ, ສປປລາວ, ສາທາລະນະລັດ ສະຫະພາບ ມຽນມາ ແລະ ສສ.ຫວຽດນາມ) ແລະ ຊ່ຽວຊານສາກົນ ກ່ຽວກັບການຕິດຕາມກວດກາ ແລະ ການສ້າງຄວາມເຂັ້ມແຂງ ໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ, ແຜນເງິນຕາ, ການກວດສອບ ແລະ ກົດໝາຍທີ່ຕິດພັນກັບການຈັດເກັບລາຍຮັບ ເພື່ອຮັບໃຊ້ໃນການເຊື່ອມໂຍງເສດຖະກິດ, ການພັດທະນາສູນກາງການເງິນ, ການລົງທຶນ, ການບໍລິການຂົນສົ່ງສິນຄ້າ ແລະ ການທ່ອງທ່ຽວ ໃນເຂດພັດທະນາ 3 ລ່ຽມ (ລາວ-ຫວຽດນາມ-ກໍາປູເຈຍ) ແລະ ເຂດ 3 ລ່ຽມມໍລະກົດ (ລາວ-ໄທ-ກໍາປູເຈຍ); ຍາດແຍ່ງເອົາບົດຮຽນ ແລະ ປະສົບການຈາກອົງການຈັດຕັ້ງສາກົນ (WB, JICA, BIDV) ໃນການວາງຍຸດທະສາດການພັດທະນາແບບຍືນຍົງ, ການເຊື່ອມໂຍງເສດຖະກິດ ແລະ ການຄຸ້ມຄອງການເງິນ ໃນພາກພື້ນ ແລະ ສາກົນ ໂດຍສະເພາະນະໂຍບາຍເສດຖະກິດເສລີດ້ານການຄ້າ ແລະ ການບໍລິການ, ການເງິນ-ເງິນຕາ, ທຶນ, ເຕັກໂນໂລຊີ ແລະ ນະວັດຕະກໍາ, ແຮງງານ ແລະ ການຖ່າຍທອດຄວາມຮູ້ສໍາລັບການເຊື່ອມໂຍງເສດຖະກິດ ແລະ ການເງິນ ລະຫວ່າງ ສປປລາວ ກັບປະເທດໃກ້ຄຽງ; ສ້າງຄວາມເຂັ້ມແຂງດ້ານນິຕິກໍາ, ການຕິດຕາມກວດກາ ແລະ ຊຸກຍູ້ການພັດທະນາເຂດເສດຖະກິດພິເສດ, ການພັດທະນາສູນກາງການເງິນ, ການຄ້າຊາຍແດນ ແລະ ການທ່ອງທ່ຽວ ໃນ 4 ແຂວງພາກໃຕ້ ສປປລາວ ໃຫ້ແກ່ສະມາຊິກສະພາແຫ່ງຊາດ ແລະ ສະພາປະຊາຊົນຂັ້ນແຂວງ ເພື່ອກະກຽມສະຫລຸບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດ ປະຈໍາປີ 2019 ແລະ ເພື່ອລາຍງານຕໍ່ກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ VIII  ແລະ ກອງປະຊຸມສະພາປະຊາຊົນແຂວງ ແລະ ປະທານ ກຜງສ ຍັງໄດ້ສະເໜີໃຫ້ບັນດາທ່ານຜູ້ແທນ ເອົາໃຈໃສ່ປຶກສາຫາລື ແລະ ພິຈາລະນາບັນຫາຕ່າງໆ ດ້ວຍຄວາມຮັບຜິດຊອບ, ຢ່າງສ້າງສັນ​ ແລະ ສາມັກຄີມິດຕະພາບ ເພື່ອເປັນການຜັນຂະຫຍາຍການຮ່ວມມືຂອງສະພາແຫ່ງຊາດ.