ຄະນະຜູ້ແທ່ນສະພາແຫ່ງຊາດລາວ ເຂົ້າຮ່ວມກອງປະຊຸມ ພາກພື້ນ ອາຊີ-ປາຊີຟິກ

22/10/2019 00:00 -

(ສພຊ) ຄະນະຜູ້ແທນຂອງສະພາແຫ່ງຊາດ, ນຳໂດຍທ່ານ ອຳໄພ ຈິດມານົນ ຮອງປະທານກຳມາທິການກົດໝາຍ, ທັງເປັນສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 17 ແຂວງອັດຕະປື ໄດ້ເຂົ້າຮ່ວມກອງປະຊຸມພາກພື້ນອາຊີ-ປາຊີຟິກ ພາຍໃຕ້ຫົວຂໍ້: ລັດຖະສະພາໃນການປ້ອງກັນ ແລະ ຕ້ານການກໍ່ການຮ້າຍ ແລະ ເງື່ອນໄຂໃນການແກ້ໄຂການກໍ່ການຮ້າຍໃນພາກພື້ນອາຊີ-ປາຊີຟິກ, ໃນລະຫວ່າງວັນທີ 1-3 ຕຸລາ 2019 ທີ່ ກົວລາລຳເປີ ປະເທດມາເລເຊຍ.

ໂດຍການກ່າວເປີດກອງປະຊຸມຢ່າງເປັນທາງການຈາກ ທ່ານຮອງປະທານລັດຖະສະພາມາເລເຊຍ ຊຶ່ງເປັນກອງປະຊຸມຮ່ວມ ລະຫວ່າງ ສະຫະພັນລັດຖະສະພາສາກົນ ກັບອົງການສະຫະປະຊາຊາດ (IPU-UN) ມີຈຸດປະສົງ ເພື່ອປຶກສາຫາລືຮ່ວມກັນຂອງລັດຖະສະພາໃນການປະເຊີນໜ້າຕໍ່ການກໍ່ການຮ້າຍໃນຂົງເຂດອາຊີ-ປາຊີຟິກ ແລະ ການປ້ອງກັນກຸ່ມຫົວຮຸນແຮງ ທີ່ນຳໄປສູ່ການກໍ່ການຮ້າຍ ແລະ ໂອກາດທີ່ເປັນໄປໄດ້ໃນການແກ້ໄຂສິ່ງທ້າທາຍດັ່ງກ່າວ. ພ້ອມດຽວກັນ ນັ້ນ, ກອງປະຊຸມຍັງໄດ້ປຶກສາຫາລືບັນຫາຕ່າງໆ ເຊັ່ນ: ໄພຂົ່ມຂູ່ຕໍ່ການກໍ່ການຮ້າຍໃນພາກພື້ນອາຊີ-ປາຊີຟິກ, ການພັດທະນາໃນໄລຍະທີ່ຜ່ານມາໃນກອບກົດໝາຍສາກົນ ວ່າດ້ວຍການຕ້ານການກໍ່ການຮ້າຍສາກົນ, ຄວາມຈຳເປັນໃນການປັບປຸງກົນໄກລະດັບຊາດ ແລະ ຍຸດທະສາດຂອງພາກພື້ນ ທີ່ມີຢູ່, ການດຳເນີນຄະດີ, ການສ້າງມາດຖານໃໝ່ໃນທີ່ຄຸມຂັງໃຫ້ມີການຝຶກວິຊາຊີບ, ການຟື້ນຟູ ແລະ ການເຊື່ອມໂຍງເຂົ້າກັນ, ການສະໜັບສະໜູນຜູ້ຖືກເຄາະຮ້າຍທີ່ໄດ້ຮັບຜົນກະທົບຈາກການກໍ່ການຮ້າຍ, ການສ້າງຄວາມສາມາດ ໃນການປັບໂຕໃຫ້ແກ່ແມ່ຍິງ ແລະ ໄວໜຸ່ມໃຫ້ມີຄວາມສາມັກຄີ ແລະ ມີຄວາມສະຫງົບໃນຊຸມຊົນ, ການຮັກສາຄວາມສະຫງົບລຽບຕາມຊາຍແດນ ແລະ ອື່ນໆ.

ກອງປະຊຸມຄັ້ງນີ້ ໄດ້ມີການແລກປ່ຽນ ແລະ ປະກອບຄຳຄິດຄຳເຫັນໃສ່ບັນຫາທີ່ເຄັ່ງຮ້ອນ ພາຍໃຕ້ຫົວຂໍ້ທີ່ກ່າວມາຂ້າງເທິງນີ້. ຄະນະຜູ້ແທນຂອງສະພາແຫ່ງຊາດລາວ ໄດ້ປະກອບຄຳເຫັນ ໃນຫົວຂໍ້ກ່ຽວກັບໄພຂົ່ມຂູ່ຕໍ່ການກໍ່ການຮ້າຍໃນພາກພື້ນອາຊີ-ປາຊີຟິກ ໃນນັ້ນ ໄດ້ຍົກໃຫ້ເຫັນເຖິງການເອົາໃຈໃສ່ ຈັດຕັ້ງປະຕິບັດແນວທາງນະໂຍບາຍການຕ່າງປະເທດທີ່ສະເໝີຕົ້ນສະເໝີປາຍ ຂອງ ສປປລາວ ກ່ຽວກັບບັນຫາດັ່ງກ່າວ ເຊິ່ງປັດຈຸບັນ ສປປລາວ ໄດ້ປະກາດໃຊ້ກົດໝາຍ ແລະ ນິຕິກຳລຸ່ມກົດໝາຍຈຳນວນໜຶ່ງ ເພື່ອເປັນບ່ອນອີງສຳຄັນໃນການຈັດຕັ້ງປະຕິບັດກ່ຽວກັບການສະກັດກັ້ນ ແລະ ຕ້ານການກໍ່ການຮ້າຍ ເປັນຕົ້ນ: ກົດໝາຍວ່າດ້ວຍການສະກັດກັ້ນການຟອກເງິນ ແລະ ສະໜອງທຶນໃຫ້ແກ່ການກໍ່ການຮ້າຍ, ປະມວນກົດໝາຍອາຍາ, ກົດໝາຍວ່າດ້ວຍການດຳເນີນຄະດີອາຍາ ແລະ ກົດໝາຍອື່ນໆທີ່ກ່ຽວຂ້ອງ. ນອກນັ້ນ, ຍັງມີອົງການຈັດຕັ້ງຮັບຜິດຊອບ ເຊັ່ນ: ກະຊວງປ້ອງກັນຄວາມສະຫງົບ, ກະຊວງປ້ອງກັນປະເທດ, ກະຊວງການຕ່າງປະເທດ, ກະຊວງຍຸຕິທຳ, ກະຊວງສາທາລະນະສຸກ, ກະຊວງແຮງງານ ແລະ ສະຫວັດດີການສັງຄົມ, ກະຊວງການເງິນ, ອົງການໄອຍະການປະຊາຊົນສູງສຸດ, ສານປະຊາຊົນສູງສຸດ, ທະນາຄານ ແຫ່ງ ສປປລາວ ແລະ ອື່ນໆ ລວມໄປເຖິງການຮ່ວມມືກັບພາກພື້ນ ແລະ ສາກົນ ເຊິ່ງປັດຈຸບັນ ສປປລາວ ໄດ້ເຂົ້າເປັນພາຄີຂອງສົນທິສັນຍາສາກົນກ່ຽວກັບການຕ້ານການກໍ່ການຮ້າຍແລ້ວ ຈຳນວນ 13 ສະບັບ ໃນຈຳນວນທັງໝົດ 29 ສະບັບ, ພ້ອມນັ້ນ ຍັງໄດ້ໃຫ້ສັດຕະຍາບັນແກ່ສົນທິສັນຍາອາຊຽນ ວ່າດ້ວຍການຕ້ານການກໍ່ການຮ້າຍ ແລະ ຮັບຮອງເອົາຖະແຫລງການຮ່ວມລະຫວ່າງອາຊຽນ-ອີຢູ, ອາຊຽນ-ອາເມລິກາ ກ່ຽວກັບການຮ່ວມມືໃນການຕ້ານການກໍ່ການຮ້າຍສາກົນ.

ກອງປະຊຸມ ໄດ້ດຳເນີນໄປເປັນເວລາ 3 ວັນເຕັມ ແລະ ປິດລົງດ້ວຍການເຫັນດີເປັນເອກະພາບກັນ ຕົກລົງຮັບຮອງເອົາຮ່າງ 15 ຂໍ້ສະເໜີ ເພື່ອຈະນຳໄປພິຈາລະນາຢູ່ກອງປະຊຸມສະຫະພັນລັດຖະສະພາສາກົນ (IPU)  ຄັ້ງທີ 141 ເຊິ່ງຈະຈັດຂຶ້ນທີ່ ເຊີເບຍ ໃນເດືອນຕຸລາ 2019.