ກອງປະຊຸມຄົບຄະນະ ກບພ ປະຈຳປີ 2019

22/10/2019 00:00 -

 

(ສພຊ) ລະຫວ່າງວັນທີ 8-10 ຕຸລາ 2019 ກໍາມາທິການບັນດາເຜົ່າ (ກບຜ) ສະພາແຫ່ງຊາດ (ສພຊ) ໄດ້ຈັດກອງປະຊຸມຄົບຄະນະປະຈໍາປີ 2019 ທີ່ສູນປະຊຸມ ແລະ ເຝິກອົບຮົມສາກົນ (ICTC) ນະຄອນຫລວງວຽງຈັນ ໂດຍການເປັນປະທານຂອງທ່ານ ນາງ ບົວພັນ ລີໄກຢາ ປະທານ ກບຜ; ມີບັນດາທ່ານຮອງປະທານກໍາມາທິການ, ບັນດາທ່ານສະມາຊິກສະພາແຫ່ງຊາດທີ່ເປັນກໍາມະການຂອງ ກບຜ ແລະ ຕາງໜ້າຂອງບັນດາກໍາມາທິການ ພາຍໃນສະພາແຫ່ງຊາດ, ຕາງໜ້າຈາກກະຊວງທີ່ກ່ຽວຂ້ອງ, ປະທານສູນກາງສະຫະພັນກໍາມະບານລາວ, ຜູ້ຕາງໜ້າຈາກອົງການຈັດຕັ້ງມະຫາຊົນ ແລະ ຂະແໜງການທີ່ກ່ຽວຂ້ອງ, ຄະນະກົມ, ຄະນະພະແນກ, ວິຊາການຈາກສູນກາງ, ຈາກ 18 ເຂດເລືອກຕັ້ງໃນທົ່ວປະເທດ ແລະ ແຂກທີ່ຖືກເຊີນເຂົ້າຮ່ວມ.

          ຈຸດປະສົງຂອງການຈັດກອງປະຊຸມໃນຄັ້ງນີ້ ແມ່ນເພື່ອສະຫລຸບຕີລາຄາ, ຖອດຖອນບົດຮຽນ ການເຄື່ອນໄຫວວຽກງານຂອງ ກບຜ ປະຈໍາປີ 2019 ແລະ ວາງທິດທາງແຜນການເຄື່ອນໄຫວວຽກງານໃນປີ 2020; ຮັບຮູ້ ແລະ ເຂົ້າໃຈແຈ້ງຕໍ່ບັນຫາທີ່ພົ້ນເດັ່ນໃນຂົງເຂດວຽກງານຊົນເຜົ່າ, ສາສະໜາ ໂດຍຜ່ານການຕິດຕາມກວດກາ ແລະ ເກັບກໍາຂໍ້ມູນຕ່າງໆໃນປີ 2019 ແລະ ເພື່ອຄົ້ນຄວ້າ, ປະກອບຄໍາເຫັນໃສ່ຮ່າງນິຕິກໍາ ຂອງບັນດາພາກສ່ວນທີ່ກ່ຽວຂ້ອງໃນຂອບເຂດຄວາມຮັບຜິດຊອບຂອງກໍາມາທິການບັນດາເຜົ່າ.

          ກອງປະຊຸມໄດ້ຮັບຟັງການຜ່ານບົດສະຫລຸບຕີລາຄາການເຄື່ອນໄຫວວຽກງານຂອງ ກບຜ ປະຈໍາປີ 2019 ແລະ ທິດທາງແຜນການເຄື່ອນໄຫວປີ 2020; ຮັບຟັງບົດລາຍງານການປະເມີນຜົນການຈັດຕັ້ງປະຕິບັດດໍາລັດ 315/ລບ, ວ່າດ້ວຍການຄຸ້ມຄອງ ແລະ ປົກປ້ອງການເຄື່ອນໄຫວສາສະໜາຢູ່ ສປປລາວ ແລະ ການປະສານງານກັບກໍາມາທິການບັນດາເຜົ່າໃນໄລຍະຜ່ານມາ; ບົດລາຍງານກ່ຽວກັບການແກ້ໄຂບັນດາປາກົດການຫຍໍ້ທໍ້ ແລະ ຄວາມຄືບໜ້າໃນການພັດທະນາຢູ່ໃນໂຮງຮຽນກິນນອນຊົນເຜົ່າໃນຂອບເຂດທົ່ວປະເທດ; ບົດລາຍງານກ່ຽວກັບສະພາບການຄ້າມະນຸດທີ່ຕິດພັນກັບແມ່ຍິງ ແລະ ເດັກຍິງຊົນເຜົ່າໃນໄລຍະຜ່ານມາ; ບົດລາຍງານກ່ຽວກັບສະພາບປາກົດການຫຍໍ້ທໍ້ທາງສັງຄົມເປັນຕົ້ນແມ່ນບັນຫາຢາເສບຕິດ ແລະ ການຄ້າມະນຸດທີ່ຕິດພັນກັບບັນຫາຊົນເຜົ່າ ແລະ ສາສະໜາ ຢູ່ເຂດສາມຫລ່ຽມຄໍາ; ບົດລາຍງານການແບ່ງຄວາມຮັບຜິດຊອບກ່ຽວກັບວຽກງານເຜົ່າ ແລະ ສາສະໜາ ລະຫວ່າງກົມຊົນເຜົ່າ, ກົມສາສະໜາຂອງສູນກາງແນວລາວສ້າງຊາດ; ບົດລາຍງານກ່ຽວກັບການແກ້ໄຂບັນຫາປາກົດການຫຍໍ້ທໍ້ທາງສາສະໜາທີ່ເກີດຢູ່ແຂວງອັດຕະປື ພາຍຫລັງໄພພິບັດເຂື່ອນເຊປຽນ-ເຊນໍ້ານ້ອຍແຕກ ແລະ ຮັບຟັງບົດລາຍງານກ່ຽວກັບການມີສ່ວນຮ່ວມຂອງສະມາຊິກສະພາແຫ່ງຊາດ ໃນການກະກຽມຮັບມື ແລະ ການແກ້ໄຂຜົນກະທົບຈາກໄພພິບັດນໍ້າຖ້ວມ ຈາກນັ້ນ, ຜູ້ແທນກອງປະຊຸມ ຍັງໄດ້ພ້ອມກັນສົນທະນາປະກອບຄໍາຄິດຄໍາເຫັນໃສ່ບົດລາຍງານດັ່ງກ່າວ.

          ໃນພິທີໄຂກອງປະຊຸມ ທ່ານ ນາງ ບົວພັນ ລີໄກຢາ ໄດ້ກ່າວວ່າ: ກອງປະຊຸມໃນຄັ້ງນີ້ ໄດ້ໄຂຂຶ້ນທ່າມກາງບັນຍາກາດທີ່ສະພາແຫ່ງຊາດ ກໍຄືສະພາປະຊາຊົນແຂວງ ກໍາລັງຫ້າງຫາກະກຽມເນື້ອໃນຮອບດ້ານເພື່ອການດໍາເນີນກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ VIII ແລະ ສະພາປະຊາຊົນຂັ້ນແຂວງຊຸດທີ I ທີ່ຈະໄຂຂຶ້ນໃນບໍ່ດົນຕໍ່ໜ້ານີ້.  ກອງປະຊຸມຄົບຄະນະໃນຄັ້ງນີ້ ເປັນຄັ້ງທີ 4 ຂອງສະພາແຫ່ງຊາດຊຸດທີ VIII, ເພື່ອເປັນການສະຫລຸບຕີລາຄາການເຄື່ອນໄຫວວຽກງານ ປະຈໍາປີ 2019 ແລະ ວາງທິດທາງແຜນການເຄື່ອນໄຫວໃນປີ 2020 ຂອງກໍາມາທິການບັນດາເຜົ່າ ທັງຈະໄດ້ຮັບຟັງການປະກອບຄໍາຄິດຄໍາເຫັນຈາກບາງເຂດເລືອກຕັ້ງ ແລະ ບັນດາພາກສ່ວນທີ່ກ່ຽວຂ້ອງຢູ່ສູນກາງ ເພື່ອເປັນການແລກປ່ຽນຄໍາຄິດຄໍາເຫັນ ແລະ ຖອດຖອນບົດຮຽນກ່ຽວກັບການເຄື່ອນໄຫວຂອງແຕ່ລະພາກສ່ວນ ແລະ ບັນຫາສໍາຄັນ ແມ່ນຜູ້ແທນກອງປະຊຸມ ຈະໄດ້ພ້ອມກັນແລກປ່ຽນຄໍາຄິດຄໍາເຫັນລົງເລິກໃສ່ຂອດການປະສານງານເຊິ່ງກັນ ແລະ ກັນໃນໄລຍະ 1 ປີຜ່ານມາ.

          ໂອກາດດັ່ງກ່າວ ທ່ານ ແສງນວນ ໄຊຍະລາດ ຮອງປະທານສະພາແຫ່ງຊາດ ທັງເປັນຜູ້ຊີ້ນໍາວຽກງານກໍາມາທິການບັນດາເຜົ່າ ໄດ້ມີຄໍາເຫັນໂອ້ລົມຕໍ່ກອງປະຊຸມວ່າ: ກໍາມາທິການບັນດາເຜົ່າ ແມ່ນກົງຈັກການຈັດຕັ້ງໜຶ່ງທີ່ມີພາລະບົດບາດເປັນເສນາທິການໃຫ້ແກ່ສະພາແຫ່ງຊາດ ແລະ ຄະນະປະຈໍາສະພາແຫ່ງຊາດ ກ່ຽວກັບວຽກງານຊົນເຜົ່າ ແລະ ສາສະໜາ, ວຽກງານພົວພັນອົງການຈັດຕັ້ງມະຫາຊົນ ເຊິ່ງວຽກງານດັ່ງກ່າວນີ້ ແມ່ນມີຄວາມສໍາຄັນຫລາຍ ເພາະເປັນວຽກທີ່ພົວພັນກັບຫລາຍພາກສ່ວນ ເຊັ່ນສູນກາງແນວລາວສ້າງຊາດ, ສະຫະພັນນັກຮົບເກົ່າລາວ ແລະ ອົງການຈັດຕັ້ງມະຫາຊົນຂັ້ນສູນກາງ ກໍຄືກະຊວງຈໍານວນໜຶ່ງ ການຈັດກອງປະຊຸມຄົບຄະນະບັນດາເຜົ່າໃນຄັ້ງນີ້ ເປັນກອງປະຊຸມສະຫລຸບຕີລາຄາຜົນຂອງການເຄື່ອນໄຫວວຽກງານໃນໜຶ່ງປີຜ່ານມາ ແລະ ວາງທິດທາງແຜນການເຄື່ອນໄຫວໃນປີຕໍ່ໜ້າຂອງກໍາມາທິການບັນດາເຜົ່າ; ກອງປະຊຸມໄດ້ຮັບຟັງການປະກອບຄໍາຄິດຄໍາເຫັນຈາກກໍາມະການຂອງກໍາມາທິການ ຈາກ 3 ເຂດເລືອກຕັ້ງ ແລະ 7 ພາກສ່ວນທີ່ກ່ຽວຂ້ອງຢູ່ຂັ້ນສູນກາງຢ່າງກົງໄປກົງມາດ້ວຍບັນຍາກາດທີ່ສ້າງສັນ ເຊິ່ງການລາຍງານຂອງແຕ່ລະພາກສ່ວນນັ້ນ ລ້ວນແຕ່ໄດ້ຢັ້ງຢືນເຖິງຄວາມຮັບຜິດຊອບສູງຕໍ່ວຽກງານຊົນເຜົ່າ, ວຽກງານສາສະໜາ ວຽກງານພົວພັນປະສານງານ ເຊິ່ງກັນ ແລະ ກັນ ຕາມພາລະບົດບາດ, ສິດ ແລະ ໜ້າທີ່ຂອງໃຜລາວ ນັບທັງຢູ່ຂັ້ນສູນກາງ ແລະ ທ້ອງຖິ່ນ ເພື່ອບັນລຸເປົ້າໝາຍໃນການພັດທະນາຊີວິດການເປັນຢູ່ຂອງປະຊາຊົນບັນດາເຜົ່າຕາມແນວທາງນະໂຍບາຍທີ່ພັກ-ລັດວາງອອກ.