24/10/2019 00:00 -

(ສພຊ) ໃນຕອນເຊົ້າວັນທີ 10 ຕຸລາ 2019 ທີ່ສະພາແຫ່ງຊາດ, ທ່ານ ເອກສະຫວ່າງ ວົງວິຈິດ ປະທານກໍາມາທິການການຕ່າງປະເທດ (ກຕທ) ສະພາແຫ່ງຊາດ ໄດ້ຕ້ອນຮັບການເຂົ້າຢ້ຽມຂໍ່ານັບຂອງທ່ານ ລີໂອວ ຊີວ ຫລິນ (Leow Siu Lin) ເອກອັກຄະລັດຖະທູດ ແຫ່ງ ສາທາລະນະລັດ ສິງກະໂປ ປະຈໍາລາວ ເນື່ອງໃນໂອກາດມາດໍາລົງຕໍາແໜ່ງເປັນເອກອັກຄະລັດຖະທູດຄົນໃຫມ່ ປະຈໍາ ສປປລາວ.

ໃນເວລາຕໍ່ມາ ກໍໄດ້ຕ້ອນຮັບ ທ່ານ ໄກໂຊະ ຕະເກວະກະ (Keizo Takewaka) ເອກອັກຄະຣາຖະທູດ ແຫ່ງ ຍີ່ປຸນ ປະຈໍາລາວ, ເນື່ອງໃນໂອກາດມາດໍາລົງຕໍາແໜ່ງເປັນເອກອັກຄະຣາຊະທູດຄົນໃຫມ່ ປະຈໍາ ສປປລາວ.

          ໃນໂອກາດດັ່ງກ່າວ, ທ່ານປະທານ ກຕທ ໄດ້ກ່າວສະແດງຄວາມຍິນດີຕ້ອນຮັບຢ່າງອົບອຸ່ນ ແລະ ຕີລາຄາສູງຕໍ່ການມາດໍາລົງຕໍາແໜ່ງຂອງທັງສອງທ່ານ ພ້ອມທັງແຈ້ງໃຫ້ຊາບກ່ຽວກັບພາລະບົດບາດຂອງສະພາແຫ່ງຊາດ ກໍຄືການສ້າງ ແລະ ປັບປຸງກົດໝາຍ ຂອງ ສປປລາວ ຍັງເປັນໂອກາດດີໃຫ້ແກ່ບັນດາການນໍາຂອງສະພາແຫ່ງຊາດ ທີ່ຈະໄດ້ໂຄສະນາເຜີຍແຜ່ແນວທາງຂອງພັກ ແລະ ນະໂຍບາຍຂອງລັດ ທັງເປັນການປະກອບສ່ວນອັນສໍາຄັນເຂົ້າໃນການເພີ່ມພູນຄູນສ້າງສາຍພົວພັນມິດຕະພາບ ແລະ ທັງເປັນການສືບຕໍ່ການຮ່ວມມືທີ່ດີລະຫວ່າງລາວ-ສິງກະໂປ ແລະ ລາວ-ຍີ່ປຸ່ນ ໃຫ້ນັບມື້ນັບດີຂຶ້ນເລື້ອຍໆ ເປັນຕົ້ນ: ວຽກງານພັດທະນາຊັບພະຍາກອນມະນຸດ ເຊິ່ງທັງສອງປະເທດແມ່ນມີປະສົບການ ແລະ ບົດຮຽນອັນດີຫລາຍຢ່າງ ເຊິ່ງ ສປປລາວ ຈະຕ້ອງໄດ້ຖອດຖອນບົດຮຽນ ແລະ ຮຽນຮູ້ນໍາໃນຫລາຍໆດ້ານ.

          ໃນໂອກາດດັ່ງກ່າວ, ທັງສອງທ່ານ ກໍໄດ້ສະແດງຄວາມຂອບໃຈມາຍັງທ່ານປະທານ ກຕທ ທີ່ສະຫລະເວລາອັນມີຄ່າໃຫ້ການຕ້ອນຮັບຢ່າງອົບອຸ່ນໃນຄັ້ງນີ້ ແລະ ເຫັນດີຕໍ່ການສະເໜີຂອງທ່ານປະທານ ກຕທ ໃນດ້ານຕ່າງໆ ແລະ ຈະນໍາເອົາຄໍາສະເໜີໄປລາຍງານໃຫ້ລັດຖະບານຂອງຕົນຮັບຊາບ.