ຄະນະຮັບຜິດຊອບວຽກງານເຂດເລືອກຕັ້ງ ເຄື່ອນໄຫວວຽກງານ ຢູ່ແຂວງຄຳມ່ວນ

05/11/2019 00:00 -

(ສພຊ) ລະຫວ່າງວັນທີ 17-18 ຕຸລາ 2019 ທີ່ຫ້ອງປະຊຸມ 21 ມີນາ ແຂວງຄໍາມ່ວນ, ຄະນະຮັບຜິດຊອບວຽກງານເຂດເລືອກຕັ້ງ ສະພາແຫ່ງຊາດ ໄດ້ຈັດກອງປະຊຸມເຝິກອົບຮົມ ການຍົກລະດັບຂີດຄວາມສາມາດ ໃຫ້ໜ່ວຍສະມາຊິກສະພາປະຊາຊົນແຂວງ (ສສຂ) ປະຈໍາເຂດເລືອກຕັ້ງຂັ້ນເມືອງ ແລະ ກົງຈັກເສນາທິການຊ່ວຍວຽກຄະນະສະມາຊິກສະພາແຫ່ງຊາດ (ສສຊ) ປະຈໍາເຂດເລືອກຕັ້ງ ໂດຍການເປັນປະທານຂອງທ່ານ ພົງສະເໜ່ ຍຸຕິທຳ ຫົວໜ້າຄະນະຮັບຜິດຊອບວຽກງານເຂດເລືອກຕັ້ງ ສະພາແຫ່ງຊາດ, ເຂົ້າຮ່ວມມີທ່ານ ອວນມາ ຂັນຕິຍະວົງ ຮອງປະທານສະພາປະຊາຊົນແຂວງຄໍາມ່ວນ; ພ້ອມດ້ວຍຄະນະປະຈໍາສະພາປະຊາຊົນແຂວງ, ຄະນະເລຂາທິການ, ສະມາຊິກສະພາປະຊາຊົນແຂວງປະຈໍາເຂດເລືອກຂັ້ນເມືອງ; ເຂົ້າຮ່ວມເຝິກອົບຮົມຄັ້ງນີ້ ມີ 3 ແຂວງ ຄື: ຄໍາມ່ວນ, ສະຫວັນນະເຂດ, ສາລະວັນ ແລະ ພະນັກງານວິຊາການທີ່ກ່ຽວຂ້ອງ.

ກອງປະຊຸມໄດ້ຮັບຟັງບົດສະເໜີກ່ຽວກັບການຈັດຕັ້ງ ແລະ ການເຄື່ອນໄຫວຂອງໜ່ວຍ ສສຂ ປະຈໍາເຂດເລືອກຕັ້ງຂັ້ນເມືອງ, ບົດສະເໜີກ່ຽວກັບການຈັດຕັ້ງ ແລະ ການຄື່ອນໄຫວຂອງຂະແໜງຊ່ວຍວຽກ ຄະນະ ສສຊ ປະຈໍາເຂດເລືອກຕັ້ງ, ບົດສະເໜີກ່ຽວກັບການພົບປະປະຊາຊົນ, ບົດສະເໜີກ່ຽວກັບການຕັ້ງຄໍາຊັກຖາມຕໍ່ກອງປະຊຸມຂອງສະມາຊິກສະພາປະຊາຊົນຂັ້ນແຂວງ ແລະ ການຈັດເຝິກອົບຮົມໃນຄັ້ງນີ້ ຊ່ວຍເຮັດໃຫ້ ສສຂ ມີບົດຮຽນເຂົ້າໃນການຈັດຕັ້ງປະຕິບັດພາລະບົດບາດ, ສິດ ແລະ ໜ້າທີ່ຂອງ ສສຂ, ຂະແໜງກົງຈັກເສນາທິການຊ່ວຍວຽກ ຄະນະ ສສຊ ປະຈໍາເຂດເລືອກຕັ້ງ ໃຫ້ມີຄວາມເຂັ້ມແຂງ ກໍາໄດ້ພື້ນຖານ ແລະ ທັກສະຕ່າງໆ ໃນການເຝິກອົບຮົມ ພ້ອມທັງເພີ່ມທະວີການເປັນເສນາທິການຊ່ວຍວຽກ ໃຫ້ມີປະສິດທິພາບຍິ່ງຂຶ້ນ, ກອງປະຊຸມ ໄດ້ດຳເນີນໄປດ້ວຍບັນຍາກາດອັນຟົດຟື້ນ, ມີເນື້ອໃນທີ່ໜັກແໜ້ນ, ມີການສົນທະນາແລກປ່ຽນບົດຮຽນເຊິ່ງກັນ ແລະ ກັນ ລະຫວ່າງຜູ້ແທນສະພາປະຊາຊົນ 3 ແຂວງ, ຜູ້ແທນເຂົ້າຮ່ວມກອງປະຊຸມ ໄດ້ພ້ອມກັນຍົກສູງຄວາມຮັບຜິດຊອບໂດຍສຸມໃສ່ການຕັ້ງຄໍາຖາມສົນທະນາແລກປ່ຽນໃນແຕ່ລະຂໍ້ ອັນໄດ້ເຮັດໃຫ້ເຂົ້າສູ່ລວງເລິກ ແລະ ມີໝາກຜົນຫລາຍຂຶ້ນ.

ໃນຕອນທ້າຍ ປະທານກອງປະຊຸມໄດ້ມີຄໍາເຫັນ ແລະ ໃຫ້ທິດຊີ້ນຳຕໍ່ກອງປະຊຸມວ່າ: ກອງປະຊຸມເຝິກອົບ ຮົມຄັ້ງນີ້ ເຖິງວ່າຈະດໍາເນີນພຽງແຕ່ 2 ວັນກໍຕາມ ແຕ່ເຊື່ອໝັ້ນວ່າ ບັນດາເນື້ອໃນທີ່ໄດ້ນໍາມາສະເໜີໃຫ້ບັນດາຜູ້ແທນທີ່ເຂົ້າຮ່ວມ ຈະນຳໄປເພື່ອເປັນບ່ອນອີງໃຫ້ແກ່ການສືບຕໍ່ ແລະ ນໍາໄປຈັດຕັ້ງປະຕິບັດຕົວຈິງໃນປີຕໍ່ໄປໃຫ້ມີຄວາມຄ່ອງຕົວ, ມີປະສິດທິພາບ ແລະ ປະສິດທິຜົນສູງກວ່າເກົ່າ.