ກວດກາເນື້ອໃນຮອບດ້ານ ຮ່າງກົດໝາຍວ່າດ້ວຍການອະນາໄມ ແລະ ສົ່ງເສີມສຸຂະພາບ

06/11/2019 00:00 -

 

(ສພຊ) ການອະນາໄມ ແມ່ນການທໍາຄວາມສະອາດ, ການກໍາຈັດສິ່ງທີ່ເປັນອັນຕະລາຍຕໍ່ສຸຂະພາບ ແລະ ການສ້າງສະພາບແວດລ້ອມທີ່ເອື້ອອຳນວຍໃຫ້ແກ່ການດຳລົງຊີວິດ,​ ການປະຕິບັດໜ້າທີ່ວຽກງານຕົວຈິງ ທີ່ຊ່ວຍໃຫ້ຄົນເຮົາມີສຸຂະພາບດີ ແລະ ສາມາດກັນພະຍາດໄດ້.

ການສົ່ງເສີມສຸຂະພາບ ແມ່ນຂະບວນການໃຫ້ຄວາມຮູ້, ຂໍ້ມູນ-ຂ່າວສານ, ສ້າງໃຫ້ຄົນເຮົາມີສະຕິຕື່ນຕົວໃນການເບິ່ງແຍງ ແລະ ດູແລສຸຂະພາບຂອງຕົນ, ຄອບຄົວ, ຊຸມຊົນ ແລະ ສັງຄົມ ເພື່ອໃຫ້ມີສຸຂະພາບດີ.

 ເພື່ອເຮັດໃຫ້ວຽກງານອະນາໄມ ແລະ ສົ່ງເສີມສຸຂະພາບ ໄດ້ຮັບການຈັດຕັ້ງປະຕິບັດຢ່າງຖືກຕ້ອງ, ສອດຄ່ອງກັບສະພາບການຂະຫຍາຍຕົວທາງດ້ານເສດຖະກິດ-ສັງຄົມໃນໄລຍະໃໝ່ ແລະ ສາມາດເຊື່ອມໂຍງກັບພາກພື້ນ ແລະ ສາກົນ, ຈຶ່ງມີຄວາມຈໍາເປັນປັບປຸງກົດໝາຍສະບັບດັ່ງກ່າວ ໃຫ້ມີເນື້ອໃນຄົບຖ້ວນສົມບູນ; ສະນັ້ນ, ເພື່ອເປັນການກະກຽມຄວາມພ້ອມໃນດ້ານຕ່າງໆຂອງ​ຮ່າງ​ກົດໝາຍ ທີ່ຈະນໍາເຂົ້ົາໃນກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ VIII, ໃນລະຫວ່າງວັນທີ 21-22 ຕຸລາ 2019 ກໍາມາທິການກົດໝາຍ ຮ່ວມກັບກຳມາທິການວັດທະນະທຳ-ສັງຄົມ ສະພາແຫ່ງຊາດ ແລະ ກະຊວງສາທາລະນະສຸກ ໄດ້ຈັດກອງປະຊຸມກວດກາເນື້ອໃນຮອບດ້ານຮ່າງກົດໝາຍສະບັບດັ່ງກ່າວ ທີ່ທ່າລາດ ເມືອງແກ້ວອຸດົມ ແຂວງວຽງຈັນ ໂດຍການເປັນປະທານຮ່ວມຂອງທ່ານ ສາຍທອງ ແກ້ວດວງດີປະທານກໍາມາທິການກົດໝາຍ, ທ່ານ ສົມພູ ດວງສະຫວັນ ປະທານກຳມາທິການວັດທະນະທຳ-ສັງຄົມ ສະພາແຫ່ງຊາດ ແລະ ທ່ານ ພູທອນ ເມືອງປາກ ຮອງລັດຖະມົນຕີກະຊວງສາທາລະນະສຸກ; ເຂົ້າຮ່ວມມີຮອງປະທານກຳມາທິການກົດໝາຍ, ຮອງປະທານກຳມາທິການວັດທະນະທຳ-ສັງຄົມ ສະພາແຫ່ງຊາດ ແລະ ຜູ້ຕາງໜ້າຈາກຫ້ອງວ່າການປະທານປະເທດ, ຫ້ອງວ່າການສຳນັກງານນາຍົກລັດຖະມົນຕີ, ກະຊວງຍຸຕິທຳ, ພະນັກງານບໍານານ, ບັນດາຫົວໜ້າ-ຮອງຫົົວໜ້າກົມ ແລະ ລັດຖະກອນວິຊາການ ຈາກສະພາແຫ່ງຊາດ ແລະ ກະຊວງສາທາລະນະສຸກຈໍານວນໜຶ່ງ.

ກອງປະຊຸມຄັ້ງນີ້ ເປັນການກວດກາຄວາມສອດຄ່ອງທາງດ້ານເນື້ອໃນ ເປັນຕົ້ນໂຄງປະກອບຂອງຮ່າງກົດໝາຍ, ແນວທາງນະໂຍບາຍຂອງລັດ ແລະ ເນື້ອໃນລະອຽດຂອງແຕ່ລະມາດຕາ ເພື່ອໃຫ້ສອດຄ່ອງກັບລັດຖະທໍາມະນູນ ແລະ ກົດໝາຍອື່ນ ລວມທັງສົນທິສັນຍາ ແລະ ສັນຍາສາກົນ ທີ່ ສປປລາວ ເປັນພາຄີ ເພື່ອໃຫ້ມີເນື້ອໃນລະອຽດ, ຈະແຈ້ງ​, ຮັດກຸມ, ຄົົບຖ້ວນ ແລະ ສອດຄ່ອງກັບຂັ້ນຕອນຂອງການສ້າງ ແລະ ປັບປຸງກົດໝາຍ ຕາມທີ່ໄດ້ກໍານົດໄວ້ໃນກົດໝາຍວ່າດ້ວຍການສ້າງນິຕິກໍາ ເພື່ອສາມາດນຳເຂົ້າພິຈາລະນາໃນກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ VIII.