ກອງປະຊຸມຄົບຄະນະກໍາມາທິການການຕ່າງປະເທດ

06/11/2019 00:00 -

    (ສພຊ) ລະຫວ່າງວັນທີ 30-31 ຕຸລາ 2019 ກໍາມາທິການການຕ່າງປະເທດສະພາແຫ່ງຊາດ (ສພຊ) ໄດ້ຈັດກອງປະຊຸມຄົບຄະນະຂຶ້ນຢູ່ທີ່ສູນເຝິກອົບຮົມ ICTC ນະຄອນຫລວງວຽງຈັນ ໂດຍການເປັນປະທານຂອງທ່ານ ເອກສະຫວ່າງ ວົງວິຈິດ ປະທານກໍາມາທິການການຕ່າງປະເທດ ເຂົ້າຮ່ວມໂດຍທ່ານ ແສງນວນ ໄຊຍະລາດ ຮອງປະທານສະພາແຫ່ງຊາດ ຜູ້ຊີ້ນໍາວຽກງານກໍາມາທິການການຕ່າງປະເທດ, ທ່ານ ສະເຫລີມໄຊ ກົມມະສິດ ລັດຖະມົນຕີກະຊວງການຕ່າງປະເທດ, ບັນດາທ່ານປະທານ-ຮອງປະທານກໍາມາທິການພາຍໃນສະພາແຫ່ງຊາດ, ບັນດາທ່ານສະມາຊິກສະພາແຫ່ງຊາດທີ່ເປັນກໍາມະການຂອງກໍາມາທິການການຕ່າງປະເທດ ຈາກເຂດເລືອກຕັ້ງຕ່າງໆ ແລະ ຄະນະເລຂາທິການສະພາແຫ່ງຊາດພ້ອມດ້ວຍແຂກທີ່ຖືກເຊີນເຂົ້າຮ່ວມ.

          ຈຸດປະສົງຂອງກອງປະຊຸມຄັ້ງນີ້ ກໍ່ເພື່ອເປັນການສະຫລຸບການເຄື່ອນໄຫວວຽກງານການຕ່າງປະເທດ ກໍຄືສະພາແຫ່ງຊາດລາວຊຸດທີ VIII ປະຈໍາປີ 2019 ແລະ ຮັບຮອງເອົາແຜນການວຽກງານປະຈໍາປີ 2020; ຮັບຟັງການລາຍງານກ່ຽວກັບສະພາບການທີ່ພົ້ນເດັ່ນຂອງໂລກ ແລະ ພາກພື້ນ ແລະ ການເຄື່ອນໄຫວວຽກງານການຕ່າງປະເທດ ຈາກຂະແໜງການທີ່ກ່ຽວຂ້ອງຂອງລັດຖະບານ ປະຈໍາປີ 2019 ແລະ ທິດທາງແຜນການປີ 2020; ຮັລຟັງການລາຍງານກ່ຽວກັບວຽກງານຕິດຕາມກວດກາຂອງກໍາມາທິການຕ່າງປະເທດ ປະຈໍາປີ 2019 ຢູ່ສອງແຂວງພາກເໜືອຂອງລາວ (ແຂວງຊຽງຂວາງ ແລະ ແຂວງຫົວພັນ) ແລະ ເພື່ອເກັບກໍາສະພາບການທີ່ພົ້ນເດັ່ນຂອງພາກພື້ນ ແລະ ສາກົນ.

  1.     ກອງປະຊຸມໄດ້ຮັບຟັງການລາຍງານການເຄື່ອນໄຫວວຽກງານກໍາມາທິການການຕ່າງປະເທດສະພາແຫ່ງຊາດ ປະຈໍາປີ 2019 ແລະ ທິດທາງແຜນການ ປະຈໍາປີ 2020; ລາຍງານກ່ຽວກັບສະພາບການຂອງໂລກ ແລະ ພາກພື້ນທີ່ພົ້ນເດັນ ແລະ ການເຄື່ອນໄຫວວຽກງານການຕ່າງປະເທດຂອງລັດຖະບານ ປະຈຳປີ 2019 ແລະ ທິດທາງ ປະຈຳປີ 2020; ສະພາບການ ກ່ຽວກັບວຽກງານຊາຍແດນ, ໂດຍສະເພາະ ຊາຍແດນລາວ-ກຳປູເຈຍ ແລະ ຊາຍແດນລາວ-ຫວຽດນາມ ບາງຈຸດຢູ່ແຂວງຫົວພັນ;ສະພາບການເກັບລາຍຮັບຈາກການເຮັດວີຊ້າເຂົ້າງົບປະມານແຫ່ງລັດ; ລາຍງານກ່ຽວກັບວຽກງານຕິດຕາມກວດກາ ຂອງກຳມາທິການການຕ່າງປະເທດ ຢູ່ 2 ແຂວງ ພາກເໜືອ ຄື: ແຂວງຊຽງຂວາງ ແລະ ແຂວງຫົວພັນ; ລາຍງານກ່ຽວກັບຜົນຂອງການຈັດຕັ້ງປະຕິບັດຂໍ້ຕົກລົງຂອງລັດຖະບານແຫ່ງ ສປປ ລາວ ແລະ ລັດຖະ ບານແຫ່ງ ສສ ຫວຽດນາມ ວ່າດ້ວຍບັນຫາການຍົກຍ້າຍພູມລຳເນົາຕາມລຳພັງໃຈ ແລະ ການແຕ່ງດອງຜິດກົດໝາຍຢູ່ບໍລິເວນຊາຍແດນ ຂອງສອງປະເທດ; ລາຍງານກ່ຽວກັບສະພາບການຮ່ວມມືສາກົນ, ການຄຸ້ມຄອງການຊ່ວຍເຫຼືອລ້າເພື່ອການພັດທະນາ(ODA); ສະເໜີເນື້ອໃນ ກ່ຽວກັບ ສະພາບການຈັດຕັ້ງປະຕິບັດ ແຜນແມ່ບົດໃນການສ້າງຄູ່ຮ່ວມຊາຕາກໍາ ລາວ-ຈີນ; ລາຍງານກ່ຽວສະພາບການຮ່ວມມືລາວ-ຫວຽດນາມ ແລະ ລາຍງານກ່ຽວກັບສະພາບການຮ່ວມມືລາວ-ຈີນ ຈາກນັ້ນ ຜູ້ແທນກອງປະຊຸມກໍ່ໄດ້ຜັດປ່ຽນກັນປະກອບຄໍາຄິດຄໍາເຫັນໃສ່ຄໍາຖາມເຈາະຈີ້ມຂອງປະທານກອງປະຊຸມ ແລະ ບົດລາຍງານຕ່າງໆທີ່ກອງປະຊຸມໄດ້ນໍາມາສະເໜີ.

ໂອກາດດັ່ງກ່າວກອງປະຊຸມຍັງໄດ້ຮັບຟັງການໂອ້ລົມໃຫ້ທິດເຍືອງທາງຈາກທ່ານຮອງປະທານສະພາແຫ່ງຊາດຜູ້ຊີ້ນໍາວຽກງານການຕ່າງປະເທດເຊິ່ງທ່ານໄດ້ມີຄໍາເຫັນບາງຕອນສໍາຄັນດັ່ງນີ້: ໃຫ້ຍົກສູງຄວາມຮັບຜິດຊອບໃນການຈັດຕັ້ງປະຕິບັດພາລະບົດບາດຂອງສະພາແຫ່ງຊາດ ເພື່ອບັນລຸແຜນການທ້າຍສະໄໝ ທີ່ສະພາແຫ່ງຊາດໄດ້ຮັບຮອງເອົາ ໂດຍສະເພາະແມ່ນການເຂົ້າຮ່ວມແຕ່ຫົວທີໃນການສ້າງຮ່າງກົດໝາຍວ່າດ້ວຍຊາຍແດນແຫ່ງຊາດ, ຮ່າງກົດໝາຍວ່າດ້ວຍນາມມະຍົດ ແລະ ຊັ້ນການທູດ ສປປລາວ ແລະ ນິຕິກໍາໃຕ້ກົດໝາຍທີ່ຈໍາເປັນ ເພື່ອຮັບໃຊ້ວຽກງານການເຄື່ອນໄຫວຕ່າງປະເທດ; ເອົາໃຈໃສ່ຕິດຕາມກວດກາການຈັດຕັ້ງປະຕິບັດຂໍ້ຕົກລົງ ລະຫວ່າງລັດຖະບານລາວ ແລະ ຫວຽດນາມກ່ຽວກັບບັນຫາຍົກຳຍ້າຍພູມລໍາເນົາຕາມລໍາພັງໃຈ ແລະ ການແຕ່ງດອງຜິດກົດໝາຍຕາມບໍລິເວນຊາຍແດນລາວ-ຫວຽດນາມ, ການຕິດຕາມກວດກາການຈັດຕັ້ງປະຕິບັດຂໍ້ຕົກລົງ, ສັນຍາ ແລະ ສົນທິສັນຍາລະຫວ່າງ ສປປລາວ ກັບຕ່າງປະເທດກ່ຽວກັບການຄ້າ, ກາສນລົງທຶນຂອງຕ່າງປະເທດ, ໂດຍສະເພາະບັນດາໂຄງການທີ່ມີຜົນກະທົບຕໍ່ການປ້ອງກັນຊາດ-ປ້ອງກັນຄວາມສະຫງົບ, ຊີວິດການເປັນຢູ່ຂອງປະຊາຊົນ ແລະ ສະພາບແວດລ້ອມ; ສູ້ຊົນຄົ້ນຄວ້າກໍານົດຍຸດທະສາດວຽບກງານການຕ່າງປະເທດຂອງສະພາແຫ່ງຊາດ ຊຸດທີ IX ບົນພື້ນຖານແນວທາງການຕ່າງປະເທດຂອງພັກ, ໂດຍສະເພາະແມ່ນແຜນຍຸດທະສາດການພົວພັນຮ່ວມມື ລະຫວ່າງສະພາແຫ່ງຊາດລາວກັບສະພາແຫ່ງຊາດຫວຽດນາມ, ສປຈີນ, ປະເທດເພື່ອນມິດສັງຄົມນິຍົມ ແລະ ກ້າວໜ້າກໍຄືບັນດາປະເທດໃນກຸ່ມອາຊຽນ; ເປັນເສນາທິການໃຫ້ແກ່ຄະນະຜູ້ແທນສະພາແຫ່ງຊາດທຸກລະດັບຂອງສະພາແຫ່ງຊາດຊຸດທີ VIII ໃນການໄປເຄື່ອນໄຫວຢ້ຽມຢາມ, ແລກປ່ຽນບົດຮຽນກັບລັດຖະສະພາຕ່າງປະເທດ, ການເຂົ້າຮ່ວມກອງປະຊຸມລັດຖະສະພາພາກພື້ນ ແລະ ສາກົນ, ການຕ້ອນຮັບຄະນະຜູ້ແທນຕ່າງປະເທດທີ່ມາເຄື່ອນໄຫວຢ້ຽມຢາມສະພາແຫ່ງຊາດລາວໃຫ້ມີປະສິດທິພາບ ແລະ ປະສິດທິຜົນກວ່າເກົ່າ; ຄົ້ນຄວ້າຈັດແບ່ງວຽກ, ຈັດແບ່ງຄວາມຮັບຜິດຊອບໃຫ້ສະມາຊິກສະພາແຫ່ງຊາດຜູ້ທີ່ມີຄວາມຮູ້ຄວາມສາມາດ ເພື່ອຄົ້ນຄວ້າ ແລະ ກໍາໄດ້ຫລັກການ, ວິທີການ, ທໍານຽມ ແລະ ເນື້ອໃນຂອງບັນດາກອງປະຊຸມຂອງອົງການລັດຖະສະພາພາກພື້ນ ແລະ ສາກົນ ເພື່ອເຂົ້າຮ່ວມ ແລະ ປະກອບສ່ວນຢ່າງຕັ້ງໜ້າໃນກອງປະຊຸມເຫລົ່ານັ້ນ; ສືບຕໍ່ສຶກສາອົບຮົມພະນັກງງານວິຊາການຂອງສອງກົມທີ່ເປັນເສນາທິການຢ່າງຕັ້ງໜ້າ ເພື່ອໃຫ້ມີຄວາມຮູ້ດ້ານການເມືອງ ແລະ ຄວາມສາມາດດ້ານວິຊາສະເພາະ ລວມທັງດ້ານພາສາຕ່າງປະເທດ ເພື່ອເຮັດຫລ້ອນໜ້າທີ່ວຽກງານທີ່ການຈັດຕັ້ງມອບໝາຍໃຫ້ດ້ວຍຜົນສໍາເລັດດີ ແລະ ຄວາມຮັບຜິດຊອບສູງ ແລະ ເອົາໃຈໃສ່ເຮັດວຽກງານແນວຄິດ-ການເມືອງໃຫ້ແກ່ພະນັກງານສອງກົມ ປະຕິບັດລະບຽບວິໄນ ແລະ ມີຄວາມຮັບຜິດຊອບສູງ ເພື່ອເຮັດຫລ້ອນໜ້າທີ່ວຽກງານທີ່ຖືກມອບໝາຍ ແລະ ເປັນແບບຢ່າງທີ່ດີ ຂອງກໍາມາທິການການຕ່າງປະເທດ.