ກບຜ ຕິດຕາມກວດກາຢູ່ແຂວງ ຊຽງຂວາງ

14/11/2019 00:00 -

 

(ສພຊ) ​ລະຫວ່າງ​ວັນ​ທີ 20-25 ຕຸລາ ຜ່ານ​ມາ, ​ກໍາມາ​ທິການ​ບັນດາ​ເຜົ່າ (ກບຜ) ສະພາ​ແຫ່ງ​ຊາດ ນໍາ​ໂດຍ​ທ່ານ ນາງ ບົວ​ພັນ ລີ​ໄກ​ຢາ ຄະນະປະຈໍາສະພາແຫ່ງຊາດ, ປະທານ ກບຜ ພ້ອມດ້ວຍ​ຄະນະ ​ໄດ້​​ເຄື່ອນ​ໄຫວ​ຕິດຕາມ​ກວດກາ, ​ເກັບ​ກໍາ​ຂໍ້​ມູນກ່ຽວກັບປາກົດການຫຍໍ້ທໍ້ທາງສາສະໜາ ແລະ ສະພາບ​ການ​ພັດທະນາຊີວິດການເປັນຢູ່ຂອງປະຊາຊົນບັນດາເຜົ່າ ຢູ່​ບ້ານນໍ້າກົ້ນງົວ ແລະ ບ້ານ ຜາແອ່ນ ເມືອງໜອງແຮດ ແຂວງຊຽງຂວາງ.

​ໃນໂອກາດ​ເຄື່ອນ​ໄຫວ​ຄັ້ງ​ນີ້, ​​ເຫັນ​ວ່າ ປະຊາຊົນສ່ວນໃຫຍ່ ແມ່ນໄດ້ມີການພັດທະນາຄຸນນະພາບຊີວິດຂອງແຕ່ລະເຜົ່າຂຶ້ນສູ່ລະດັບທີ່ດີພໍສົມຄວນ; ພ້ອມໆກັບການພັດທະນາທາງເສດຖະກິດ-ຊີວິດການເປັນຢູ່ດັ່ງກ່າວ ຍັງເຫັນວ່າປະຊາຊົນສ່ວນຫລາຍ ຍັງເຊື່ອຖືບັນພະບູລຸດຂອງຕົນ, ອີກຈໍານວນໜຶ່ງ ແມ່ນເຊື່ອຖືສາສະໜາເຢຊູຄຣິດ ແລະ ມີວິຖີການດໍາລົງຊີວິດທີ່ຕິດ​ພັນ​ກັບ​ທໍາມະຊາດ, ຍືດຖືເອົາການ​ກະສິກໍາ ປູກ​ຝັງ-​ລ້ຽງສັດເປັນຕົ້ນຕໍ ແຕ່​ກໍຍັງ​ພົບກັບ​ຄວາມຫຍຸ້ງຍາກ​ຢູ່ບາງ​ດ້ານ​ ​ເປັນ​ຕົ້ນ: ​ຄວາມຫຍຸ້ງຍາກທາງດ້ານ​ທີ່​ດິ​ນທໍາ​ການ​ຜະ​ລິດ ເນື່ອງຈາກເປັນເຂດພູດອຍສູງຊັນ; ໂດຍສະເພາະບ້ານຜາແອ່ນ ແມ່ນຍັງມີຄວາມຫຍຸ້ງຍາກທາງດ້ານເສັ້ນທາງ ເຊິ່ງເປັນທາງແດງທີ່ມີສະພາບເປັນຂຸມເປ່ເພ ແລະ ຄັບແຄບ, ບໍ່ສາມາດນໍາໃຊ້ເສັ້ນທາງດັ່ງກ່າວໄປໄດ້ທັງສອງລະດູ ເວົ້າສະເພາະລະດູແລ້ງ ກໍຍັງບໍ່ສາມາດນໍາໃຊ້ລົດໄດ້ທຸກປະເພດ ເຊິ່ງເປັນສາເຫດເຮັດໃຫ້ປະຊາຊົນບໍ່ສາມາດນໍາເອົາຜົນຜະລິດຂອງຕົນອອກສູ່ຕະຫລາດໄດ້.  ແນວໃດກໍຕາມ, ຍ້ອນຄວາມເອົາໃຈໃສ່ຂອງພັກ-ລັດ ຈຶ່ງເຮັດໃຫ້ປະຊາຊົນທັງສອງບ້ານ ແລະ ບ້ານອື່ນໃກ້ຄຽງ ໄດ້ເຂົ້າເຖິງລະບົບການສຶກສາອະນຸບານ, ສຶກສາ-ສາມັນ ແລະ ການ​ບໍລິການ​ດ້ານ​ສາ​ທາ​ສະ​ນະ​ສຸກທີ່ມີຄຸນນະພາບ ເຮັດໃຫ້ເດັກຍິງ ແລະ ເດັກຊາຍໄດ້ເຂົ້າຮຽນຈົນຈົບຊັ້ນປະຖົມຂຶ້ນໄປຢ່າງເທົ່າທຽມ ແລະ ຍັງໄດ້ຮັບການສັກຢາ-ຢອດຢາຢ່າງເປັນປະຈໍາ; ສະນັ້ນ, ເດັກ ກໍຄືປະຊາຊົນເຂດດັ່ງກ່າວ ຈຶ່ງມີສຸຂະພາບທີ່ດີ​.

ທຸກໆບ່ອນທີ່ຄະນະໄດ້ໄປຮອດໄປເຖິງ, ທ່ານປະ​ທານ​ ກບຜ ​ໄດ້​ຖາມ​ເຖິງ​ຄວາມສຸກ​-ທຸກ ທັງໄດ້​ໃຫ້ການ​ໂອ້​ລົມ​​ ຊີ້​ແຈງຕໍ່ພໍ່ແມ່ປະຊາຊົນ ໃຫ້​ເຂົ້າ​ໃຈ​​ແນວທາ​ງນະ​ໂຍບາຍ​ຂອງ​ພັກ-​ລັດ ຕໍ່​ກັບ​ວຽກ​ງານຊົນ​ເຜົ່າ ​ແລະ ສາສະໜາ ​ພ້ອມທັງໄດ້ເຜີຍ​ແຜ່ບາງ​​ເນື້ອ​ໃນ​ຈິດ​​ໃຈ​ທີ່​ສໍາຄັນ​ຂອງ​ນິຕິ​ກໍາຕ່າງໆທີ່​ພົວພັນ​ເຖິງການພັດທະນາຊີວິດການເປັນຢູ່ຂອງປະຊາຊົນບັນດາເຜົ່າ ຕິດພັນກັບສິດ ແລະ ພັນທະພື້ນຖານຂອງພົນລະເມືອງ ແລະ ອື່ນໆ ໂດຍສະເພາະແມ່ນບັນຫາວັດທະນະ​ທໍາ​-ຮີດ​ຄອງ​ປະ​ເພນີ ແລະ ສາສະໜາ ​ເປັນ​ຕົ້ນ​ແມ່ນບາງ​ມາດຕາ​ຂອງລັດຖະທໍາ​ມະນູນ, ​ກົດໝາຍ​ຄອບຄົວ, ​​ດໍາລັດ 315/ລບ ວ່າ​ດ້ວຍ​ການ​ປົກ​ປ້​ອງ ​ແລະ ຄຸ້ມ​ຄອງການ​ເຄື່ອນ​ໄຫວ​ສາສະໜາ ຢູ່ ສປປລາວ ​ໃຫ້​ປະຊາຊົນ​ເຂົ້າ​ໃຈ​ຕື່ມ​ ພ້ອມ​ກັນນັ້ນ, ທ່ານຍັງ​ໄດ້​ຮຽກຮ້ອງ​ໃຫ້​ພໍ່ແມ່ປະຊາຊົນ​ບັນດາເຜົ່າຈົ່ງ​​ມີສະຕິລະວັງຕົວ, ຕ້ອງຮູ້ທັນ ແລະ ບໍ່ຫລົງເຊື່ອເດັດຂາດຕໍ່ກົນອຸບາຍຂອງສັດຕູ ທີ່ໄດ້ພະຍາຍາມສວຍໃຊ້ສາສະໜາ ເພື່ອບິດເບືອນແນວທາງນະໂຍບາຍຂອງພັກ-ລັດ, ແບ່ງແຍກປະຊາຊົນອອກຈາກການຈັດຕັ້ງ, ມ້າງເພທໍາລາຍຄວາມສາມັກຄີປອງດອງບັນດາເຜົ່າ, ຮຽກຮ້ອງໃຫ້ປະຊາຊົນທຸກຊົນເຜົ່າຈົ່ງເພີ່ມທະວີຄວາມໜັກແໜ້ນ ແລະ ເຊີດ​ຊູ​ຄວາມມີນໍ້າ​ໃຈຮັກຊາດ, ​ສາມັກຄີ​ປອງດອງ, ຮັກ​ແພງ​ຊ່ວຍ​ເຫລືອ​ເຊິ່ງກັນ ​ແລະ ກັນ, ເສີມຂະຫຍາຍມູນເຊື້ອດຸໝັ່ນ, ພ້ອມ​ກັນ​ສູ້​ຊົນ ​​ເພື່ອພັດທະນາ​ຊີວິດ​ການ​ເປັນ​ຢູ່​ໃຫ້​ດີ​ຂຶ້ນ​​ເປັນ​ກ້າວໆ​ຕາມ​ແນວທາງ​ນະ​ໂຍບາຍ​ທີ່​ພັກ-​ລັດ​ວາງ​ອອກ ແຕ່ລະໄລຍະ. ດ້ວຍຈິດ​ໃຈ​ທີ່​ເປັນ​ຫ່ວງ​ເປັນ​​ໃຍ​ຕໍ່ຊີວິດ ແລະ ​ສຸຂະພາບ​ຂອງ​ພໍ່​ແມ່​ປະຊາຊົນລາວ​ບັນດາ​ເຜົ່າ ກໍຄືປະຊາຊົນທັງສອງບ້ານ ແລະ ບ້ານອື່ນໃກ້ຄຽງ; ​ໃນ​ການ​ເຄື່ອນ​ໄຫວ​ຄັ້ງ​ນີ້ ທ່ານປະທານ ກບຜ ຍັງ​ໄດ້​ນໍາເອົາ​ຄະນະແພດ​ໝໍ ລົງ​ໄປ​ໃຫ້​ບໍລິການກວດ​ສຸຂະພາບໂດຍ​ບໍ່​​ເສຍ​ຄ່າ ພ້ອມທັງແຈກ​ຢາຍ​ຢາ​ປົວພະຍາດທີ່ຈໍາເປັນ​ໃຫ້​ປະຊາຊົນໃນບ້ານເປົ້າໝາຍດັ່ງກ່າວ ດ້ວຍຄວາມເປັນຫ່ວງເປັນໃຍ ແລະ ທັງໄດ້ມອບຢາຈໍານວນໜຶ່ງໃຫ້ສຸກສາລາປະຈໍາບ້ານເກັບຮັກສາໄວ້ ເພື່ອສືບຕໍ່ບໍລິການໃຫ້ປະຊາຊົນໃນຍາມຈໍາເປັນຕໍ່ໄປ.

ພາຍຫຼັງສໍາ​ເລັດ​ການ​ລົງ​ຢ້ຽມຢາ​ມພໍ່ແມ່ປະຊາຊົນ​ແລ້ວ, ຄະນະຍັງ​​ໄດ້​ເຮັດ​ວຽກຮ່ວມ​ກັບ​ຄະນະພັກ-ຄະນະປົກຄອງ ແລະ ບັນດາ​ຫ້ອງການທີ່ກ່ຽວຂ້ອງຂອງເມືອງໜອງແຮດ ໂດຍສະເພາະ ແນວລາວສ້າງຊາດ, ຫ້ອງການພາຍໃນ, ຫ້ອງການ ປກສ, ສະຫະພັນນັກຮົບເກົ່າ, ບັນດາອົງການຈັດຕັ້ງມະຫາຊົນຂັ້ນເມືອງ ແລະ ສະພາປະຊາຊົນແຂວງ ໂດຍໄດ້ຖືເອົາໂອກາດດັ່ງກ່າວ ໃຫ້ການແນະນໍາບັນຫາ​ຕ່າງໆຕໍ່ພາກສ່ວນທີ່ກ່ຽວຂ້ອງຂອງເມືອງ ແລະ ອໍານາດການປົກຄອງເມືອງ​ ​​ຈົ່ງສືບຕໍ່ປຶກສາຫາລື ​ຊອກ​ຫາ​ວິທີ​ແກ້​ໄຂ​ໃນ​ຕໍ່ໄປ ​ເພື່ອ​ເຮັດ​ໃຫ້​ວຽກ​ງານ​ພັດທະນາ​ຊົນ​ເຜົ່າ​ໃນ​ເຂດ​ຊົນນະບົດ, ພູດອຍ ຫ່າງໄກສອກຫລີກ ​ແລະ ກາ​ນ​ແກ້​ໄຂ​ບັນຫາຫຍໍ້ທໍ້ທາງ​ສາສະໜາທີ່ເກີດຂຶ້ນໃຫ້ນັບມື້ຫລຸດໜ້ອຍຖອຍລົງ ຕິດພັນກັບການຈັດຕັ້ງເຜີຍແຜ່ດໍາລັດ 315/ລບ ໃຫ້ກວ້າງຂວາງ ສົມທົບກັບການສຶກສາອົບຮົມການເມືອງ-ແນວຄິດ ໃຫ້ແກ່ປະຊາຊົນບັນດາເຜົ່າໃຫ້ມີຄວາມເຂົ້າໃຈເທື່ອລະກ້າວ.