ກອງປະຊຸມຄົບຍຄະນະ ກຜງສ ປະຈຳປີ 2019

14/11/2019 00:00 -

  (ສພຊ) ລະຫວ່າງວັນທີ 24-25 ຕຸລາ 2019 ທີ່ໂຮງແຮມເມືອງແທັງ ນະຄອນຫລວງວຽງຈັນ ກໍາມາທິການແຜນການ, ການເງິນ ແລະ ການກວດສອບ (ກຜງສ) ສະພາແຫ່ງຊາດ (ສພຊ) ໄດ້ຈັດກອງປະຊຸມຄົບຄະນະປະຈໍາປີ 2019 ໂດຍການເປັນປະທານຂອງທ່ານ ວິໄລວົງ ບຸດດາຄໍາ ປະທານ ກຜງສ; ມີບັນດາທ່ານ, ບັນດາທ່ານປະທານ-ຮອງປະທານກໍາມາທິການສະພາແຫ່ງຊາດ, ກໍາມະການຂອງ ກຜງສ, ບັນດາທ່ານຮອງລັດຖະມົນຕີ, ຜູ້ຕາງໜ້າຈາກຂະແໜງການຂອງລັດຖະບານ ແລະ ແຂກທີ່ຖືກເຊີນເຂົ້າຮ່ວມ.

ຈຸດປະສົງຂອງການຈັດກອງປະຊຸມໃນຄັ້ງນີ້ ເພື່ອເປັນການສະຫລຸບຄືນວຽກງານການເຄື່ອນໄຫວ ປະຈໍາປີ 2019 ແລະ ວາງທິດທາງແຜນການປະຈໍາປີ 2020 ຂອງ ກຜງສ ແລະ ເປັນການປະເມີນຜົນການຈັດຕັ້ງປະຕິບັດບັນດາກົດໝາຍ ແລະ ນິຕິກໍາໃຕ້ກົດໝາຍ, ການຕິດຕາມກວດກາວຽກງານໂຄງການລົງທຶນຂອງລັດໃນການພັດທະນາຂະແໜງການຕ່າງໆ, ວຽກງານພັດທະນາຊົນນະບົດ ແລະ ລຶບລ້າງຄວາມທຸກຍາກ ຕິດພັນກັບເປົ້າໝາຍການພັດທະນາແບບຍືນຍົງ (SDGs) ແລະ ການແກ້ໄຂຟື້ນຟູໄພພິບັດ ໃນແຜນປີ 2019 ເພື່ອຈະນໍາໄປເປັນຂໍ້ມູນໃຫ້ແກ່ການຄົ້ນຄວ້າພິຈາລະນາ ເພື່ອສ້າງ ແລະ ປັບປຸງແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ ປີ 2020 ໃນກອງປະຊຸມສະໄໝ ສາມັນເທື່ອທີ 8 ຂອງສະພາແຫ່ງຊາດຊຸດທີ VIII.

ກອງປະຊຸມໄດ້ຮັບຟັງການຜ່ານບົດສະຫລຸບການຈັດຕັ້ງປະຕິບັດວຽກງານຂອງ ກຜງສ ປະຈໍາປີ 2019 ແລະ ແຜນການປະຈໍາປີ 2020; ການລາຍງານກ່ຽວກັບຮ່າງບົດສະຫລຸບຜົນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 9 ເດືອນ, ຄາດຄະເນໝົດປີ 2019 ແລະ ແຜນການປະຈໍາປີ 2020; ການລາຍງານກ່ຽວກັບບົດສະຫລຸບຕີລາຄາສະພາບການຈັດຕັ້ງປະຕິບັດຂາດຕົວງົບປະມານແຫ່ງລັດ ປະຈໍາປີ 2018, ການຈັດຕັ້ງປະຕິບັດງົບປະມານ 9 ເດືອນ ແລະ ຄາດຄະເນໝົດປີ 2019 ແລະ ແຜນງົບປະມານແຫ່ງລັດ ປະຈໍາປີ 2020; ການລາຍງານກ່ຽວກັບຮ່າງບົດລາຍງານການຈັດຕັ້ງປະຕິບັດແຜນເງິນຕາ 9 ເດືອນ ຄາດຄະເນໝົດປີ 2019 ແລະ ແຜນການປະຈໍາປີ 2020; ລາຍງານການເຄື່ອນໄຫວຂອງອົງການກວດສອບແຫ່ງລັດປະຈໍາປີ 2019 ແລະ ແຜນການເຄື່ອນໄຫວປີ 2020; ລາຍງານຜົນການກວດສອບບົດສະຫລຸບຂາດຕົວການຈັດຕັ້ງປະຕິບັດງົບປະມານແຫ່ງລັດ ປະຈໍາປີ 2018; ຮ່າງບົດລາຍຂອງອົງການລັດຖະບານ ກ່ຽວກັບຜົນຂອງການກວດສອບຕາມມະຕິສະບັບເລກທີ 101/ສພຊ, ລົງວັນທີ 28/11/2018; ບົດສະຫລຸບຜົນການຕິດຕາມກວດກາການຈັດຕັ້ງປະຕິບັດກົດໝາຍ ແລະ ນິຕິກໍາໃຕ້ກົດໝາຍທີ່ຕິດພັນກັບການຈັດເກັບລາຍຮັບ; ລາຍງານຫຍໍ້ກ່ຽວກັບຮ່າງກົດໝາຍວ່າດ້ວຍຫລັກຊັບ, ຮ່າງກົດໝາຍວ່າດ້ວຍການປະກັນໄພ, ການປັບປຸງມາດຕາ 12 ຂອງກົດໝາຍວ່າດ້ວຍການສົ່ງເສີມການລົງທຶນ ຈາກນັ້ນ, ຜູ້ແທນກອງປະຊຸມກໍໄດ້ຜັດປ່ຽນກັນປະກອບຄໍາເຫັນໃສ່ຫົວຂໍ້ຕ່າງໆຕາມເນື້ອຂອງກອງປະຊຸມທີ່ນໍາມາສະເໜີ ນອກຈາກນີ້ ກອງປະຊຸມຍັງໄດ້ຮັບຟັງການໂອ້ລົມໃຫ້ທິດເຍືອງທາງ ຈາກທ່ານ ບຸນປອນ ບຸດຕະນະວົງ ຮອງປະທານສະພາແຫ່ງຊາດ, ຜູ້ຊີ້ນໍາວຽກງານ ກຜງສ