ຮອງປະມານ ກບຜ ຕິດຕາມກວດກາວຽກງານສາສະໜາຢູ່ແຂວງ ຜົ້ງສາລີ

20/11/2019 00:00 -

(ສພຊ) ລະຫວ່າງ​ວັນ​ທີ 22-24 ຕຸລາຜ່ານ​ມາ,​ ທ່ານ ຄຳຈັນ ໂສຕາປະເສີດ ຮອງປະທານກໍາມາ​ທິການ​ບັນດາ​ເຜົ່າ (ກບຜ) ສະພາແຫ່ງຊາດ ພ້ອມດ້ວຍ​ຄະນະ ​ໄດ້​ລົງ​ເຄື່ອນ​ໄຫວຕິດຕາມ​ກວດກາ​ວຽກງານສາສະໜາ ຢູ່ບ້ານຍາງໃຕ້ ເມືອງໃໝ່ ແຂວງຜົ້ງສາລີ ໂດຍສົມທົບກັບສະພາປະຊາຊົນແຂວງ ແລະ ພາກສ່ວນທີ່ກ່ຽວຂ້ອງຂອງແຂວງຜົ້ງສາລີ ຈັດກອງປະຊຸມເພື່ອປຶກສາຫາລື ແລະ ຊອກຫາວິທີການແກ້ໄຂບັນຫາທີ່ແມ່ຍິງບວດເປັນພຣະພິກຂຸນີ (ຫົ່ມຜ້າເຫລືອງ) ຢູ່ບ້ານຍາງໃຕ້ ເມືອງໃໝ່ ແຂວງຜົ້ງສາລີ; ຈາກນັ້ນ ຄະນະ ກໍໄດ້ລົງໄປຕິດຕາມກວດກາຕົວຈິງ ເຫັນວ່າບັນຫາດັ່ງກ່າວ ແມ່ນໄດ້ເກີດຂຶ້ນແຕ່ປີ 2012 ເປັນຕົ້ນມາ ຍ້ອນຄວາມເຊື່ອຖືງົມງວາຍ ແລະ ຄວາມຮູ້ເທົ່າບໍ່ເຖິງການຂອງປະຊາຊົນ.

ໃນໂອກາດພົບປະກັບປະຊາຊົນບ້ານຍາງໃຕ້ ທ່ານຮອງປະທານ ກບຜ ກໍໄດ້ເນັ້ນຫລາຍບັນຫາ ໂດຍສະເພາະ ແມ່ນໃຫ້ຢຸດເຊົາການບວດຫົ່ມຜ້າເຫລືອງຂອງນາງ ທັນ ເຊິ່ງເປັນປະຊາຊົນຢູ່ບ້ານຍາງໃຕ້ ເພາະເປັນການກະທໍາແຕະຕ້ອງເຖິງຫລັກທຳຄຳສັ່ງສອນຂອງພຸດທະສາສະໜາ ເຮັດໃຫ້ເສື່ອມເສຍ ແລະ ຜິດຕໍ່ລະບຽບກົດໝາຍຢູ່ ສປປ ລາວ ໂດຍສະເພາະ ດຳລັດ 315/ລບ ແລະ ທຳມະນູນປົກຄອງສົງລາວ ສະບັບປັບປຸງ ວັນທີ 15 ກຸມພາ 2019 ອີກດ້ວຍ, ພ້ອມກັນນັ້ນ ທ່ານ ຄຳຈັນ ໂສຕາປະເສີດ ຍັງໄດ້ປຸກລະດົມຈິດໃຈຂອງປະຊາຊົນ ໃຫ້ມີຄວາມກະຕືລືລົ້ນໃນການປົກປັກຮັກສາ ແລະ ສ້າງສາພັດທະນາປະເທດຊາດ, ສ້າງສາຊີວິດການເປັນຢູ່ໃຫ້ດີຂຶ້ນ ໂດຍສະເພາະການທໍາການຜະລິດກະສິກໍາໃຫ້ກາຍເປັນສິນຄ້າ ເພື່ອສ້າງລາຍຮັບໃຫ້ແກ່ຄອບຄົວ ສາມາດແກ້ໄຂຄວາມທຸກຍາກຂອງຕົນ ແລະ ຂອງບ້ານເໝືອນກັບບ້ານອື່ນໆ ໃນຂອບເຂດເມືອງຂອງຕົນ ຫລັງຈາກພົບປະກັບປະຊາຊົນແລ້ວ ຄະນະກໍໄດ້ໄປເບິ່ງສະຖານທີ່ບ່ອນນາງ ທັນ ອາໄສຢູ່, ພ້ອມທັງມອບໃຫ້ຄະນະທີ່ກ່ຽວຂ້ອງຂອງເມືອງໃໝ່ ເປັນຜູ້ສືບຕໍ່ແກ້ໄຂບັນຫາແມ່ຍິງບວດນຸ່ງຜ້າເຫລືອງ ພາຍໃນເວລາອັນຄວນ.

(ບົວໄທ ໄຊຍະເຫຼັກ)