ກຜງສ ຍາດໄດ້ຫລາຍຜົນງານພົ້ນເດັ້ນ

29/11/2019 00:00 -

ສພຊ :ໃນວາລະດຳເນີນກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດ (ສພຊ) ຊຸດທີ VIII ທ່ານ ວິໄລວົງ ບຸດດາຄຳ ປະທານກຳມາທິການແຜນການ, ການເງິນ ແລະ ການກວດສອບ (ກຜງສ) ສະພາແຫ່ງຊາດ, ສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 16 ແຂວງເຊກອງ ໄດ້ໃຫ້ສຳພາດຕໍ່ສື່ມວນຊົນ ໃນວັນທີ 14 ພະຈິກ 2019 ກ່ຽວກັບການ ຈັດຕັ້ງປະຕິບັດບາງວຽກງານໃນໄລຍະຜ່ານມາ ຂອງ ກຜງສ ວ່າ: ນັບແຕ່ກອງປະຊຸມສະໄໝສາມັນເທື່ອທີ 7 ຮອດເທື່ອທີ 8 ຂອງສະພາແຫ່ງຊາດຊຸດທີ VIII ກຜງສ ສາມາດຍາດໄດ້ຜົນງານການປະຕິບັດ 3 ພາລະບົດບາດ ຄື:

  • : ກຜງສ ໄດ້ປະສານສົມທົບ ແລະ ເຂົ້າຮ່ວມກັບກໍາມາທິການກົດໝາຍ ແລະ ຂະແໜງການທີ່ກ່ຽວຂ້ອງ ໃນການຄົ້ນຄວ້າສ້າງ, ປັບປຸງກົດໝາຍ ແລະ ບັນດານິຕິກຳໃຕ້ກົດໝາຍ ລະອຽດດັ່ງນີ້: ກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດຊຸດທີ VIII ໄດ້ຮັບຮອງ 3 ຮ່າງກົດໝາຍ ຄື: ກົດໝາຍວ່າດ້ວຍການຄຸ້ມຄອງສ່ວຍສາອາກອນ (ປັບປຸງ), ກົດໝາຍວ່າດ້ວຍອາກອນລາຍໄດ້ (ສ້າງໃໝ່) ແລະ ກົດໝາຍວ່າດ້ວຍອາກອນຊົມໃຊ້ (ສ້າງໃໝ່) ເຊິ່ງກົດໝາຍດັ່ງກ່າວນີ້ ໄດ້ຜ່ານການຮຽບຮຽງຄືນ ແລະ ຈະປະກາດໃຊ້ໃນຕົ້ນປີ 2020; ຄົ້ນຄວ້າມີຄຳເຫັນກ່ຽວກັບການຕີຄວາມໝາຍ ແລະ ອະທິບາຍຄໍາສັບຂອງກົດໝາຍ, ປະກອບຄໍາຄິດຄໍາເຫັນໃສ່ຮ່າງຄໍາແນະນໍາ ກ່ຽວກັບກົນໄກປະຕິບັດອາກອນມູນຄ່າເພີ່ມຂອງຂະແໜງບໍ່ແຮ່ ແລະ ພະລັງງານໄຟຟ້າ ທີ່ຈະເປັນນິຕິກໍາໃຕ້ກົດໝາຍ ຂອງກົດໝາຍວ່າດ້ວຍອາກອນມູນຄ່າເພີ່ມ (ສະບັບປັບປຸງ) ເລກທີ 48/ສພຊ, ລົງວັນທີ 20 ມິຖຸນາ 2018 ແລະ ກອງປະຊຸມທາບທາມ ແລະ ປະກອບຄໍາເຫັນຕໍ່ຮ່າງລັດຖະບັນຍັດ 001/ສປປ ວ່າດ້ວຍພາສີທີ່ດິນ, ຮ່າງລັດຖະບັນຍັດ 003/ປປທ ວ່າດ້ວຍຄ່າທໍານຽມ ແລະ ຄ່າບໍລິການ ເຊິ່ງຄະນະປະຈຳໄດ້ຊີ້ນຳໃຫ້ປັບປຸງໃໝ່; ເປັນເຈົ້າການ ແລະ ປະສານສົມທົບກັບພາກສ່ວນທີ່ກ່ຽວຂ້ອງ ໃນການຈັດ​ກອງ​ປະ​ຊຸມ​ກວດ​ກາເນື້ອ​ໃນ​ຮອບ​ດ້ານ ຮ່າງ​ກົດໝາຍວ່າດ້ວຍຫລັກຊັບ (ສະບັບປັບປຸງ) ແລະ ກົດໝາຍວ່າດ້ວຍການປະກັນໄພ (ສະບັບປັບປຸງ) ແລະ ການປັບປຸງມາດຕາ 12 ຂອງກົດໝາຍວ່າດ້ວຍການສົ່ງເສີມການລົງທຶນ ເພື່ອ​ລາຍ​ງານ​ຕໍ່ກອງ​ປະ​ຊຸມ​ຄະ​ນະ​ປະ​ຈໍາສະ​ພາ​ແຫ່ງ​ຊາດ ພິ​ຈາ​ລະ​ນາ​ເຂົ້າ​ໃນ​ວາ​ລະ​ກອງ​ປະ​ຊຸມ​ສະ​ໄໝ​ສາ​ມັນ​ ເທື່ອ​ທີ 8 ຂອງ​ສະ​ພາ​ແຫ່ງ​ຊາດຊຸດ​ທີ VIII.
  • : ເປັນເຈົ້າໃນການຄົ້ນຄວ້າບົດປະກອບຄຳເຫັນໃນນາມຄະນະປະຈຳ ສະພາແຫ່ງຊາດ ຕໍ່ກັບພາກເນື້ອໃນຂອງລັດຖະບານທີ່ລາຍງານ ຢູ່ໃນວາລະກອງປະຊຸມສະພາແຫ່ງຊາດ; ເປັນເຈົ້າການໃນການຄົ້ນຄວ້າ ຮ່າງມະຕິຮັບຮອງເອົາແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດ ແລະ ວຽກງານກວດສອບ ແລະ ກວດກາ ຢູ່ໃນກອງປະຊຸມສະໄໝສາມັນເທື່ອທີ 6-7 ຂອງສະພາແຫ່ງຊາດຊຸດທີ VIII ໂດຍການປະສານສົມທົບກັບກຳມາທິການພາຍໃນສະພາແຫ່ງຊາດ ແລະ ຂະແໜງການກ່ຽວຂ້ອງຂອງລັດຖະບານ.

ຄົ້ນຄວ້າໜັງສືສະເໜີຂອງລັດຖະບານ ເພື່ອຂໍອອກມະຕິຮັບຮອງໄດ້ທັງໝົດຈຳນວນ 11 ສະບັບ, ໃນນີ້ ບັນຫາທີ່ພົ້ນເດັ່ນແມ່ນ ມະຕິ 5 ສະບັບຄື: (1) ມະຕິວ່າດ້ວຍການຕີຄວາມໝາຍຂອງກົດໝາຍວ່າດ້ວຍທະນາຄານ ແຫ່ງ ສປປລາວ, (2) ມະຕິວ່າດ້ວຍການດັດແກ້ມູນຄ່າເພີ່ມໂຄງການກໍ່ສ້າງເສັ້ນທາງ ແຕ່ປາກລາຍ ຫາທົ່ງມີໄຊ ແຂວງໄຊຍະບູລີ, (3) ມະຕິວ່າດ້ວຍດັດແກ້ມູນຄ່າຫລຸດໂຄງການລົງທຶນຂອງລັດ ຈຳນວນ 5 ໂຄງການ, (4) ມະຕິວ່າດ້ວຍຜົນການກວດສອບທະນາຄານ ແຫ່ງ ສປປລາວ ແລະ ທະນາຄານທຸລະກິດລັດ, (5) ມະຕິວ່າດ້ວຍຜົນການກວດສອບວິສາຫະກິດລັດ.

ບັນດາກຳມະການຂອງກຳມາທິການ ທີ່ປະຈໍາຢູ່ສູນກາງ ແລະ ເຂດເລືອກຕັ້ງ ໄດ້ເອົາໃຈໃສ່ຄົ້ນຄວ້າ ແລະ ພິຈາລະນາການຈັດຕັ້ງປະຕິບັດບັນດາໂຄງການຂະໜາດໃຫຍ່ທີ່ຈັດຕັ້ງປະຕິບັດຢູ່ທ້ອງຖິ່ນ,  ໂຄງການລົງທຶນທີ່ມີມູນຄ່າສູງກວ່າ 20 ຕື້ກີບຂຶ້ນໄປ, ການດັດແກ້ໂຄງການກໍ່ສ້າງເສັ້ນທາງ, ໂຄງການກໍ່ສ້າງຊົນລະປະທານເຊັ່ນ: ຊົນລະປະທານຫ້ວຍທ່າຮາວ ແຂວງສະຫວັນນະເຂດ ແລະ ໂຄງການອື່ນໆ.

ບັນ​ດາ​ສະມາຊິກສະພາແຫ່ງຊາດ ທີ່ເປັນກຳ​ມະ​ການຂອງ​ກຳ​ມາ​ທິ​ການ ທີ່ປະຈຳຢູ່ສູນກາງ ແລະ ທ້ອງ​ຖິ່ນ ​ໄດ້​ເຂົ້າ​ຮ່ວມ​ໃນ​ການ​ຄົ້ນ​ຄວ້າ, ພິ​ຈາ​ລະ​ນາ ແລະ ຮັບ​ຮອງ​ເອົາ​ບັນ​ຫາ​ພື້ນ​ຖານ​ສຳ​ຄັນຕ່າງໆ ເປັນຕົ້ນ: ໄດ້ປະກອບຄຳເຫັນ, ໄດ້ຕັ້ງຄຳຖາມກັບທີ່ ຕໍ່ບົດລາຍງານຂອງລັດຖະບານ ແລະ ຮ່າງມະຕິກອງ​ປະ​ຊຸມ​ສະໄໝສາມັນເທື່ອທີ 6 ແລະ ເທື່ອທີ 7 ຂອງສະພາແຫ່ງຊາດຊຸດທີ VIII ຈຳນວນ 24 ທ່ານ ລວມທັງໝົດ 50 ຄັ້ງ  ແລະ ໄດ້ປະກອບຄຳເຫັນໃນກອງ​ປະ​ຊຸມ​ສະ​ພາ​ປະຊາຊົນຂັ້ນ​ແຂວງ ກ່ຽວ​ກັບບົດ​ລາຍ​ງານການ​ຈັດ​ຕັ້ງ​ປະ​ຕິ​ບັດແຜນ​ພັດ​ທະ​ນາ​ເສດ​ຖະ​ກິດ​-ສັງ​ຄົມ ປະ​ຈຳ​​ປີ 2018, ​ແຜນ​ງົບ​ປະ​ມານ ປະ​ຈໍາປີ 2018 ​ ແລະ ທິດທາງແຜນການປີ 2019 ແລະ ບັນ​ຫາ​ທີ່​ສຳ​ຄັນ​ອື່ນໆ.

ນອກຈາກໜ້າວຽກທີ່ໄດ້ກ່າວຂ້າງເທິງ ກຳມະການທີ່ປະຈຳການຢູ່ສະພາແຫ່ງຊາດ ໄດ້ເອົາໃຈໃສ່ຄົ້ນຄ້ວາແຜນການລົງທຶນຂອງລັດ  ປີ 2019 ມູນຄ່າສູງກວ່າ 20 ຕື້ກີບຂຶ້ນໄປຂອງຂະແໜງການຂັ້ນສູນກາງ ແລະ ທ້ອງຖິ່ນ ເປັນຕົ້ນ: ຢັ້ງຢືນກວດຜ່ານເອກະສານ ບ້ວງຈົດຮັບ-ຈົດຈ່າຍ  ຈໍານວນ 3 ສະບັບ ເປັນຕົ້ນແຜນການລົງທຶນຂອງລັດ ປີ 2018 ບ້ວງຈົດຮັບ-ຈົດຈ່າຍຜ່ານງົບປະມານຂອງກະຊວງ ວິທະຍາສາດ ແລະ ເຕັກໂນໂລຊີ,  ແຜນການລົງທຶນຂອງລັດ ປີ 2019 ບ້ວງຈົດຮັບ-ຈົດຈ່າຍຜ່ານງົບປະມານ ຂອງກະຊວງໄປສະນີໂທລະມະນາຄົມ ແລະ ຂົນສົ່ງ ມູນຄ່າ 25 ຕື້​ກີບ, ແຜນການລົງທຶນຂອງລັດ ປີ 2019 ບ້ວງຈົດຮັບ-ຈົດຈ່າຍ ຜ່ານງົບປະມານຂອງກະຊວງ ໂຍທາທິການ ແລະ ຂົນສົ່ງ (ມູນ​ຄ່າ 224,266 ຕື້​ກີບ ແລະ ກອງທຶນທາງ ມູນ​ຄ່າ 700 ຕື້​ກີບ).

ໄດ້​ຄົ້ນຄວ້າ ໜັງສື​ສະ​ເໜີ ຂອງທ່ານ​ນາຍົກລັດຖະມົນ​ຕີ ກ່ຽວ​ກັບການສະ​ເໜີ​ຂໍ​ການ​ຕົກລົງ​ຈາກສະພາ​​ແຫ່ງ​ຊາດ ​ເພື່ອ​ພິຈາລະນາ​ຕົກລົງ ກ່ຽວກັບການສະເໜີຂໍຍົກເວັ້ນການປະຕິບັດບາງມາດຕາ ຂອງກົດໝາຍ ທີ່ຕິດພັນກັບໂຄງການ ປຸກສ້າງຫໍສະພາແຫ່ງຊາດຫລັງໃໝ່, ການ​ດັດ​ແກ້​ມູນ​ຄ່າ​ຫລຸ​ດລົງ ​ຂອງ​ໂຄງການລົງທຶນ​ຂອງ​ລັດ 5 ​ໂຄງກາ​ນ ແລະ ອື່ນໆ.

  • : ກຳມາ​ທິການໄດ້​​ລົງ​ຕິດຕາມ​ກວດກາ ​ແລະ​ ຊູ​ກຍູ້​ການ​ຈັດ​ຕັ້ງ​ປະຕິບັດກົດໝາຍ, ນິຕິກຳໃຕ້ກົດໝາຍ, ​ແຜນ​ພັດທະນາ​ເສດຖະກິດ-ສັງຄົມ ​ແລະ ແຜນ​ງົບປະມານ​ແຫ່ງ​ລັດ ຢູ່​ບັນດາກະຊວງ, ອົງການລັດທຽບເທົ່າກະຊວງ ແລະ ທ້ອງຖິ່ນ​ຈຳນວນໜຶ່ງ​ ເຊິ່ງ​ສາ​ມາດ​ສັງ​ລວມ​ໄດ້​ດັ່ງ​ນີ້: ຕິດຕາມກວດກາໃນນາມຄະນະປະຈຳສະພາແຫ່ງຊາດ ການຈັດຕັ້ງປະຕິບັດກົດໝາຍ ແລະ ນິຕິກຳໃຕ້ກົດໝາຍ ທີ່ຕິດພັນກັບການເກັບລາຍຮັບ ເປັນຕົ້ນ: ກົດໝາຍວ່າດ້ວຍສ່ວຍສາອາກອນ, ກົດໝາຍວ່າດ້ວຍການຈັດຊື້-ຈັດຈ້າງດ້ວຍທຶນຂອງລັດ, ກົດໝາຍວ່າດ້ວຍການຄຸ້ມຄອງໜີ້ສິນສາທາລະນະ, ກົດໝາຍວ່າດ້ວຍໄຟຟ້າ, ກົດໝາຍວ່າດ້ວຍທີ່ດິນ ແລະ ຊັບພະຍາກອນທຳມະຊາດ ແລະ ສິ່ງແວດລ້ອມ, ກົດໝາຍວ່າດ້ວຍແຮ່ທາດ, ກົດໝາຍວ່າດ້ວຍແຮງງານ, ທ່ອງທ່ຽວ, ສຶກສາ ແລະ ອື່ນໆ ພ້ອມນີ້, ໄດ້ລົງຊຸກຍູ້ການຈັດຕັ້ງປະຕິບັດກົດໝາຍ ແລະ ນິຕິກໍາໃຕ້ກົດໝາຍທີ່ຕິດພັນກັບການລົງທຶນຂອງລັດ, ການບໍລິຫານ ກົນໄກການລົງທຶນປະຕູດຽວ ແລະ ການຈັດເກັບລາຍຮັບ ໂດຍຈັດເປັນ 3 ຈຸ ແລະ ແຍກໄປ 3 ພາກ ໂດຍສຸມໃສ່ຕິດຕາມການຈັດຕັ້ງປະຕິບັດກົດໝາຍວ່າດ້ວຍການລົງທຶນຂອງລັດ ມາດຕາ 18-19, ກົດໝາຍວ່າດ້ວຍການສົ່ງເສີມການລົງທຶນຂອງລັດ ມາດຕາ 12-17, ມາດຕາ 80 ການບໍລິການປະຕູດຽວ,  ກົດໝາຍວ່າດ້ວຍການຈັດຊື້-ຈັດຈ້າງ, ກົດໝາຍວ່າດ້ວຍການຄຸ້ມຄອງໜີ້ສິນສາທາລະນະ; ຕິດຕາມກວດກາ ແລະ ຊຸກຍູ້ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ ປີ 2019 ແລະ ການຊໍາລະໜີ້ໂຄງການລົງທຶນຂອງລັດ ຢູ່ສູນກາງ ແລະ ທ້ອງຖິ່ນຈຳນວນໜຶ່ງ ເຫັນວ່າການພັດທະນາເສດຖະກິດ-ສັງຄົມ ໂດຍພື້ນຖານແລ້ວປະຕິບັດໄດ້ດີສົມຄວນ; ຕິດຕາມ, ກວດກາໂຄງການລົງທຶນຂອງລັດທີ່ມີມູນຄ່າສູງ ທີ່ຈັດຕັ້ງປະຕິບັດຢູ່ທ້ອງຖິ່ນ ໂດຍສະເພາະໂຄງການກໍ່ສ້າງເສັ້ນທາງ ແລະ ໂຄງການກໍ່ສ້າງຕາຝັ່ງເຈື່ອນ ເປັນຕົ້ນ: ໂຄງການກໍ່ສ້າງຟື້ນຟູທາງເລກ 9 ແຂວງສະຫວັນນະເຂດ, ໂຄງການກັນຕາຝັ່ງເຈື່ຶອນ ແຂວງໄຊຍະບູລີ ແລະ ແຂວງບໍ່ແກ້ວ ທີ່ຍັງບໍ່ທັນມີຄວາມເອກະພາບກັນທາງດ້ານເຕັກນິກ ແລະ ລາຄາ. ດັດແກ້ມູນຄ່າຫລຸດລົງ ຂອງໂຄງການລົງທຶນຂອງລັດ ຈຳນວນ 5 ໂຄງການ; ໜັງສືສະເໜີຂອງລັດຖະບານກ່ຽວກັບການຂໍດັດແກ້ມູນຄ່າເງິນແຮ ຈຳນວນ 54,79 ຕື້ກີບ ເຂົ້າໃນກິດຈະກຳໂຄງການກໍ່ສ້າງຂອງໂຄງການຟື້ນຟູທາງຫລວງແຫ່ງຊາດ ເລກ 9 ມູນຄ່າສັນຍາ 1 ແລະ ສັນຍາ 2 ແຂວງສະຫວັນນະເຂດ (ຕາມຄໍາເຫັນຂອງຄະນະປະຈໍາສະພາແຫ່ງຊາດ); ຄົ້ນຄວ້າຄໍາຮ້ອງຂໍຄວາມເປັນທໍາຈາກບຸກຄົນ, ນິຕິບຸກຄົນ ຈໍານວນ 5 ສະບັບ  ໃນນີ້ ໄດ້ຄົ້ນຄວ້າມີຄໍາເຫັນ ແລະ ມອບໃຫ້ຂະແໜງການທີ່ກ່ຽວຂ້ອງຄົ້ນຄວ້າພິຈາລະນາແກ້ໄຂ ຈໍານວນ 4 ສະບັບ ສ່ວນທີ່ຍັງເຫລືອ ຈໍານວນ 1 ສະບັບ ກໍາລັງຢູ່ໃນຂັ້ນຕອນສັງລວມຂໍ້ມູນເພື່ອມີທິດທາງແກ້ໄຂ.

 ນອກຈາກນີ້ ບັນດາກໍາມະການກໍໄດ້ເອົາໃຈໃສ່ຄົ້ນຄວ້າບັນດາຄໍາຮ້ອງຂໍຄວາມເປັນທໍາຂອງປະຊາຊົນ ກ່ຽວກັບການຊົດເຊີຍ ຜົນກະທົບຈາກໂຄງການລົງທຶນຂອງລັດ ເປັນຕົ້ນໂຄງການກໍ່ສ້າງທາງລົດໄຟລາວ-ຈີນ, ໂຄງການກໍ່ສ້າງເສັ້ນທາງດ່ວນວຽງຈັນ-ວັງວຽງ, ໂຄງການກໍ່ສ້າງສະໜາມບິນ, ໂຄງການກໍ່ສ້າງເຂື່ອນໄຟຟ້າ.

ນອກຈາກວຽກງານ 3 ພາລະບົດບາດແລ້ວ  ກຜງສ ຍັງໄດ້ນຳພາບັນດາສະມາຊິກສະພາແຫ່ງຊາດທີ່ເປັນກຳມະການ ໄດ້ເຂົ້າຮ່ວມສຳມະນາ ແລະ ຝຶກອົບຮົມໃນຫົວຂໍ້ຕ່າງໆ ທັງຢູ່ພາຍໃນ ແລະ ຕ່າງປະເທດ.

ສຳລັບການຕິດຕາມກວດກາ, ພົບປະ ແລະ ລົງເຜີຍແຜ່ຜົນສໍາເລັັດຂອງກອງປະຊຸມສະໄໝສາມັນເທື່ອທີ 6 ແລະ ເທື່ອທີ 7 ຂອງສະພາແຫ່ງຊາດຊຸດທີ VIII ແລະ ສະພາປະຊາຊົນຂັ້ນແຂວງຊຸດທີ I ຢູ່ເຂດເລືອກຕັ້ງຂອງຕົນ ຕາມພາລະບົດບາດ ເຊິ່ງສາມາດສັງລວມໄດ້ຄໍາສະເໜີ ແລະ ຄວາມມຸ່ງມາດປາຖະໜາຂອງປະຊາຊົນ ແລະ ຂໍ້ສະເໜີທີ່ປະຊາຊົນໄດ້ສະເໜີຫລາຍທີ່ສຸດຄື: ການຈັດຕັ້ງປະຕິບັດຄ່າຊົດເຊີຍໃຫ້ປະຊາຊົນທີ່ຖືກຜົນກະທົບຈາກໂຄງການກໍ່ສ້າງເສັ້ນທາງລົດໄຟລາວ-ຈີນ ແລະ ການກໍ່ສ້າງທາງດ່ວນ; ການຈັດຕັ້ງປະຕິບັດນະໂຍບາຍ ແລະ ມາດຕະການແກ້ໄຂຕໍ່ຜູ້ທີ່ຖືກຜົນກະທົບຈາກໄພພິບັດ ຢູ່ໃນຫລາຍແຂວງທົ່ວປະເທດ.

  • ​ຄົງ​ຄ້າງ ຂອງ ກຜງສ ທີ່ຍັງບໍ່ສາມາດຈັ້ດຕັ້ງປະຕິບັດໄດ້ດີ ເປັນຕົ້ນ: 1. ການສ້າງ ແລະ ປັບປຸງກົດໝາຍ ແລະ ນິຕິກຳໃຕ້ກົດໝາຍ ເພື່ອເປັນບ່ອນອີງໃຫ້ປະຊາຊົນ ແລະ ຜູ້ປະກອບການ ນຳໄປຈັດຕັ້ງປະຕິບັດໃຫ້ຖືກຕ້ອງຕາມກົດໝາຍ; 2. ການ ຕິດຕາມກວດກາ ແລະ ຊຸກຍູ້ການຈັດຕັ້ງປະຕິບັດວຽກ​ງານ​ແຜນ​ພັດ​ທະ​ນາ​ເສດ​ຖະ​ກິດ-ສັງ​ຄົມ, ວຽກ​ງານ​ການ​ຄຸ້ມ​ຄອງ​ລາຍ​ຮັບ-ລາຍ​ຈ່າຍ, ວຽກ​ງານກວດ​ສອບ, ວຽກ​ງານກວ​ດກາ ໃຫ້​ມີ​ຄວາມ​ໂປ່ງ​ໃສ ສາ​ມາດຈັດ​ຕັ້ງ​ປະ​ຕິ​ບັດໄດ້​ ແລະ ​ປະ​ຕິ​ບັດຕາມ​ກົດ​ໝາຍຢ່າງ​ເຂັ້ມ​ງວດ ກ້າວໄປສູ່ການຄຸ້ມຄອງລັດດ້ວຍກົດໝາຍ.

ຍົກ​ສູງ​ຄວາມ​ເປັນ​ເຈົ້າ​ການ ​ໃນ​ການປະ​ສານ​ສົມ​ທົບ​ກັບ​ກຳ​ມາ​ທິ​ການ​ອື່ນ ຂອງ​ສະ​ພາ​ແຫ່ງ​ຊາດ ແລະ ພາກ​ສ່ວນ​ຮັບ​ຜິດ​ຊອບ​ສ້າງ ແລະ ປັບ​ປຸງ​ກົດ​ໝາຍ​ທີ່​ກ່ຽວ​ຂ້ອງ ພ້ອມທັງເຂົ້າ​ຮ່ວມ​ແຕ່​ຫົວ​ທີ​ໃນ​ການ​ຄົ້​ນ​ຄວ້າ, ການກວດ​ກາ ​ແລະ ການ​ຮຽບຮຽງຮ່າງ​ກົດ​ໝາຍ ໃຫ້​ມີ​ເນື້ອ​ໃນ​ຄົບ​ຖ້ວນ, ຈະ​ແຈ້ງ, ຮັດ​ກຸມ, ສອດ​ຄ່ອງ​ກັບ​ແນວ​ທາງນະ​ໂຍບາຍຂອງ​ພັກ ກ່ອນ​ຈະ​ນຳ​ເຂົ້າ​ພິ​ຈາ​ລະ​ນາ​ໃນ​ກອງ​ປະ​ຊຸມ​ສະ​ໄໝ​ສາ​ມັນ​ເທື່ອ​ທີ 9 ​ແລະ ​ເທື່ອ​ທີ 10 ຂອງ​ສະ​ພາ​ແຫ່ງຊາດຊຸດ​ທີ VIII ທີ່​ຍັງຈໍານວນ 5 ສະບັບ ຕາມການສະເໜີຂອງລັດຖະບານ​ໃຫ້ສໍາເລັດ 100%. ຄົ້ນ​ຄວ້າ​ປະ​ກອບ​ຄຳ​ເຫັນ​ໃສ່​ການ​ສ້າງ​ຮ່າງ​ນິ​ຕິ​ກຳ​ລຸ່ມ​ກົດ​ໝາຍ ເປັນ​ຕົ້ນມະ​ຕິຂອງ​ຄະ​ນະ​ປະ​ຈຳ​ສະ​ພາ​ແຫ່ງ​ຊາດ, ລັດ​ຖະ​ບັນ​ຍັດ ຂອງ​ປະ​ທານ​ປະ​ເທດ, ດຳ​ລັດຂອງ​ນາ​ຍົກ​ລັດ​ຖະ​ມົນ​ຕີ ໃນ​ຂົງ​ເຂດ​ວຽກ​ງານ​ທີ່​ກຳ​ມາ​ທິ​ການ​ຮັບ​ຜິດ​ຊອບ; ສືບຕໍ່ປະຕິບັດໜ້າທີ່ເປັນຕົວແທນ ຂອງປະຊາຊົນຜູ້ມີສິດເລືອກຕັ້ງໃນການລົງພົບປະ ແລະ ເຜີຍແຜ່ຜົນສໍາເລັດຂອງກອງປະຊຸມສະໄໝສາມັນ ຢ່າງເຕັມສ່ວນ.

ການຄາດຄະເນຈັດແບ່ງແຜນການສ້າງ ແລະ ປັບປຸງກົດໝາຍ: ກອງປະຊຸມສະໄໝສາມັນເທື່ອທີ 9 ຈໍານວນ 2 ສະບັບຄື: ກົດໝາຍວ່າດ້ວຍພາສີ (ປັບປຸງ) ແລະ ຮ່າງ​ກົດໝາຍ​ວ່າ​ດ້ວຍການ​​​​ອາກອນທີ່ດິນ ແລະ ຊັບສິນ (ສ້າງໃໝ່); ກອງປະຊຸມສະໄໝສາມັນເທື່ອທີ 10 ຈໍານວນ 1 ສະບັບຄື: ຮ່າງ​ກົດໝາຍ​ວ່າ​ດ້ວຍ​​ການ​​ອາກອນສິ່ງແວດລ້ອມ (ສ້າງໃໝ່).

ການຄົ້ນຄວ້າ ແລະ ການຮຽບຮຽງກົດໝາຍ: ສືບ​ຕໍ່ສົມ​ທົບ​ກັບ​ກຳ​ມາ​ທິ​ການ​ກົດ​ໝາຍ ແລະ ພາກ​ສ່ວນ​ທີ່​ກ່ຽວ​ຂ້ອງ ໃນ​ການ​ຮຽບ​ຮຽງເນື້ອ​ໃນ​ຮອບ​ດ້ານບັນດາກົດໝາຍທີ່​ໄດ້​ຮັບ​ຮອງໃນ​ກອງ​ປະ​ຊຸມ​ສະ​ໄໝ​ສາມັນ​ເທື່ອ​ທີ 8, ເທື່ອທີ 9, ເທື່ອທີ 10 ຂອງ​ສະພາ​ແຫ່ງ​ຊາດຊຸດ​ທີ VIII ເພື່ອນຳສະເໜີ​ພິຈາລະນາປະກາດ​​ໃຊ້ກົດ​ໝາຍ​ສະ​ບັບ​ນີ້​ຢ່າງ​ເປັນ​ທາງ​ການ.

ສູ້​ຊົນຄົ້ນ​ຄວ້າແກ້​ໄຂ​ຄຳ​ຮ້ອງ​ຂໍ​ຄວາມ​ເປັນ​ທຳຂອງ​ປະ​ຊາ​ຊົນ ໃຫ້​ຖືກ​ຕ້ອງ​ຕາມ​ກົດ​ໝາຍ ແລະ ລະ​ບຽບ​ການ​ທີ່​ກ່ຽວ​ຂ້ອງ​ຢ່າງ​ເຂັ້ມ​ງວດ ຄາດໝາຍສູ້ຊົນແກ້ໄຂໃຫ້ໄດ້ 80% ຂອງຈໍານວນເອກະສານຄໍາຮ້ອງຂໍຄວາມເປັນທໍາ ທີ່ສົ່ງ​ເຂົ້າ​ມາ​ກຳມາ​ທິການ ​ແລະ ກຳມະການ​ຂອງ​ກຳມາ​ທິການ ພ້ອມ​ທັງ​ຕິດ​ຕາມກວດ​ກາຜົນ​ຂອງ​ການ​ແກ້​ໄຂ​ບັນ​ຫາ​ດັ່ງ​ກ່າວ.

ໃນນາມສະມາຊິກສະພາແຫ່ງຊາດປະຈຳເຂດເລືອກຕັ້ງທີ 16 ແຂວງເຊກອງ ແລະ ໃນນາມ ກຜງສ ຂໍຝາກເຖິງພໍ່ແມ່ປະຊາຊົນ ຖ້າຫາກພົບເຫັນບັນຫາໃດຕໍ່ການຈັດຕັ້ງປະຕິບັດຂອງສະ​ມາ​ຊິກ​ສະ​ພາ​ແຫ່ງ​ຊາດ ແລະ ພະນັກງານ ໃນການຜັນຂະຫຍາຍແນວທາງນະໂຍບາຍຂອງພັກ-ລັດ ຢູ່ສູນກາງ ກໍຄືຢູ່ທ້ອງຖິ່ນທີ່ຂາດປະສິດທິຜົນ ຫລື ພໍ່ແມ່ປະຊາຊົນ ມີຄວາມຮຽກຮ້ອງຕ້ອງການຕໍ່ການພັດທະນາທ້ອງຖິ່ນ ຂໍໃຫ້ສະເໜີມາຍັງສາຍດ່ວນຂອງສະພາແຫ່ງຊາດ ຫລື ຜ່ານສະພາປະຊາຊົນແຂວງ. ໃນນາມທີ່ເປັນຕົວແທນຂອງປະຊາຊົນ ຈະພະຍາຍາມຊຸກຍູ້ໃນການປະຕິບັດໜ້າທີ່ການຕິດຕາມກວດກາການຈັດຕັ້ງປະຕິບັດແນວທາງນະໂຍບາຍຂອງພັກ-ລັດ ໂດຍສະເພາະການຜັນຂະຫຍາຍມະຕິຂອງສະພາແຫ່ງຊາດກ່ຽວກັບແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ ແລະ ການຈັດຕັ້ງປະຕິບັດຜົນການກວດກາຕາມຜົນການກວດສອບທີ່ສະພາແຫ່ງຊາດໄດ້ຮັບຮອງ.