ກອງປະຊຸມຄົບຄະນະກໍາມາທິການກົດໝາຍປະຈໍາປີ 2019

17/12/2019 00:00 -

 (ສພຊ) ໃນວັນທີ 7 ທັນວາ 2019 ທີ່ຫ້ອງປະຊຸມສູນເຝິກອົບຮົມສູນກາງແນວລາວສ້າງຊາດ ນະຄອຫລວງວຽງຈັນ ກໍາມາທິການກົດໝາຍສະພາແຫ່ງຊາດ (ສພຊ) ໄດ້ຈັດກອງປະຊຸມຄົບຄະນະປະຈໍາປີ 2019 ຂຶ້ນ ໂດຍການເປັນປະທານຂອງທ່ານ ສາຍທອງ ແກ້ວດວງດີ ປະທານກໍາມາທິການກົດໝາຍ ສະພາແຫ່ງຊາດ;  ເຂົ້າຮ່ວມມີທ່ານ ສົມພັນ ແພງຄໍາມີ ຮອງປະທານສະພາແຫ່ງຊາດ ຜູ້ຊີ້ນໍາວຽກງານກໍາມາທິການກົດໝາຍ, ມີບັນດາທ່ານປະທານ-ຮອງປະທານກໍາມາທິການພາຍໃນສະພາແຫ່ງຊາດ, ບັນດາສະມາຊິກສະພາແຫ່ງຊາດທີ່ເປັນກໍາມະການກໍາມາທິການກົດໝາຍ ແລະ ແຂກທີ່ຖືກເຊີນຈາກພາກສ່ວນກ່ຽວຂ້ອງເຂົ້າຮ່ວມ.

          ຈຸດປະສົງຂອງການຈັດກອງປະຊຸມໃນຄັ້ງນີ້ ກໍເພື່ອເປັນທົບທວນຄືນສັງເກດຕີລາຄາ ແລະ ການຈັດຕັ້ງປະຕິບັດພາລະບົດບາດ, ສິດ ແລະ ໜ້າທີ່ ຂອງກໍາມາທິການກົດໝາຍໃນແຕ່ລະກອງປະຊຸມສະໄໝສາມັນ ເທື່ອທີ 7 ຮອດເທື່ອທີ 8 ຂອງສະພາແຫ່ງຊາດຊຸດທີ VIII ແລະ ກໍານົດແຜນການເຄື່ອນໄຫວວຽກງານໃນປີຕໍ່ໜ້າ ຂອງກໍາມາທິການກົດໝາຍ.

          ກອງປະຊຸມ ໄດ້ຮັບຟັງການຜ່ານຮ່າງບົດສະຫລຸບການເຄື່ອນໄຫວວຽກງານປະຈໍາປີ 2019 ແລະ ທິດທາງແຜນການປະຈໍາປີ 2020 ຂອງກໍາມາທິການກົດໝາຍ ສະພາແຫ່ງຊາດ, ການປະກອບຄໍາຄິດຄໍາເຫັນໃສ່ບົດລາຍງານ ແລະ ຂໍ້ເຈາະຈີ້ມຂອງປະທານກອງປະຊຸມ ແລະ ຮອງປະທານສະພາແຫ່ງຊາດ ໃນຫົວຂໍ້ຊອກຫາຈຸດອ່ອນຂອງກົດໝາຍທີ່ເຮັດໃຫ້ກົດໝາຍບໍ່ມີຄຸນະພາບເທົ່າທີ່ຄວນ ພ້ອມທັງປະກອບຄໍາເຫັນໃສ່ຮ່າງມະຕິກອງປະຊຸມຈາກບັນດາຜູ້ແທນທີ່ເຂົ້າຮ່ວມກອງປະຊຸມ.