ສະພາແຫ່ງຊາດ ສ້າງຄວາມເຂັ້ມແຂງວຽກງານເລຂານຸການ

30/12/2019 00:00 -

(ສພຊ) ລະຫວ່າງວັນທີ 21-23 ທັນວາ 2019 ຄະນະເລຂາທິການສະພາແຫ່ງຊາດ ໄດ້ຈັດກອງປະຊຸມສໍາມະນາໃຫ້ແກ່ເລຂາການນໍາສະພາແຫ່ງຊາດ (ສພຊ) ທີ່ເມືອງແກ້ວອຸດົມ ແຂວງວຽງຈັນ ໂດຍການເປັນປະທານຂອງທ່ານ ສຸບັນ ສະວະບຸດ ຮອງເລຂາທິການ ສພຊ; ເຂົ້າຮ່ວມມີທ່ານ ນາງ ສວນສະຫວັນ ວິຍະເກດ ເລຂາທິການ ສພຊ, ບັນດາເລຂາການນໍາສະພາແຫ່ງຊາດ ພ້ອມດ້ວຍພະນັກງານວິຊາການທີ່ກ່ຽວຂ້ອງ ທັງໝົດ 62 ທ່ານ ຍິງ 20 ທ່ານ.

ຈຸດປະສົງຂອງກອງປະຊຸມ ເພື່ອຮັບຟັງບົດຮຽນກ່ຽວກັບການເປັນເລຂາການນໍາ, ການປະສານວຽກງານດ້ານຕ່າງໆກັບພາກສ່ວນກ່ຽວຂ້ອງ ລວມທັງທັດສະນະຄຸນສົມບັດຂອງເລຂາການນໍາ; ຮັບຟັງ ແລະ ແລກປ່ຽນຄໍາຄິດຄໍາເຫັນ ແລະ ສະເໜີວິທີການແກ້ໄຂບັນຫາຕ່າງໆ ໃນການປະຕິບັດວຽກງານຕົວຈິງຜ່ານມາ ທີ່ມີທັງດ້ານດີ, ດ້ານອ່ອນ ແລະ ຂໍ້ຄົງຄ້າງທີ່ພາໃຫ້ການຈັດຕັ້ງປະຕິບັດວຽກງານບໍ່ທັນໄດ້ຮັບຜົນດີເທົ່າທີ່ຄວນ; ເພື່ອເຮັດໃຫ້ການເປັນເສນາທິການໃນວຽກງານກະກຽມ ແລະ ຮັບໃຊ້ ໂດຍສະເພາະການເກັບກໍາ ແລະ ສະໜອງຂໍ້ມູນ-ຂ່າວສານໃຫ້ແກ່ການນໍາສະພາແຫ່ງຊາດ ໃຫ້ມີປະສິດທິພາບດີຂຶ້ນເລື້ອຍໆ ແລະ ສ້າງຄວາມເປັນເອກະພາບກັນໃນການຈັດຕັ້ງປະຕິບັດວຽກງານຕ່າງໆ ເຊິ່ງເອກະສານຄວາມຮູ້ພື້ນຖານກ່ຽວກັບການກະກຽມກອງປະຊຸມ, ວຽກງານຕ້ອນຮັບພິທີການ, ການຮັກສາບຸກຄະລິກຕະພາບ, ການເກັບມ້ຽນ ແລະ ການບໍລິຫານເອກະສານ ເຊິ່ງນໍາສະເໜີໂດຍອາຈານ ອຸທອນ ສີພັນດອນ ວິຊາການພະແນກບໍລິຫານ ທັງເປັນຄູສອນສາຂາວິຊາເລຂານຸການ ແລະ ສາຂາວິຊາຄຸ້ມຄອງຫ້ອງການ ຈາກວິທະຍາໄລປາກປ່າສັກ; ຄວາມຮູ້ພື້ນຖານກ່ຽວກັບການເປັນເລຂານຸການ ແລະ ຂໍ້ຕົກລົງຂອງຄະນະເລຂາທິການສະພາແຫ່ງຊາດ ວ່າດ້ວຍການເຄື່ອນໄຫວຂອງສະພາແຫ່ງຊາດ ສະເໜີໂດຍທ່ານ ບຸນເລີດ ເພິ່ງປະສົມໄຊ ຫົວໜ້າພະແນກເລຂານຸການ, ເລຂາປະທານສະພາແຫ່ງຊາດ; ການກະກຽມເອກະສານຮັບໃຊ້ໃຫ້ແກ່ການດໍາເນີນກອງປະຊຸມສະພາແຫ່ງຊາດ, ກອງປະຊຸມຄະນະປະຈໍາສະພາແຫ່ງຊາດ ສະເໜີໂດຍທ່ານ ນາງ ກາບແກ້ວ ພິໄລສານ ຮອງຫົວໜ້າພະແນກເລຂານຸການ; ການສ້າງຄໍາຖາມເຈາະຈີ້ມ ການສ້າງຄໍາຊັກຖາມ, ການສ້າງບົດສັງລວມຄວາມເຫັນຂອງປະທານກອງປະຊຸມ ສະເໜີໂດຍທ່ານ ສຸລະສັກ ສຸວັນນະວົງ ຫົວໜ້າພະແນກສັງລວມ ແລະ ຄົ້ນຄວ້ານິຕິກໍາ; ການເປັນເສນາທິການຮອບດ້ານໃຫ້ແກ່ບັນດາຄະນະປະຈໍາສະພາແຫ່ງຊາດ ແລະ ຄະນະເລຂາທິການສະພາແຫ່ງຊາດ ສະເໜີໂດຍທ່ານ ສິງຄໍາ ວົງພະຈັນ ຫົວໜ້າກົມເລຂານຸການ ແລະ ເອກະສານກ່ຽວກັບລະບົບເຄືອຂ່າຍພາຍໃນ ແລະ ການແກ້ໄຂດ້ານເຕັກນິກໄອທີ ສະເໜີໂດຍທ່ານ ຄໍາແທ່ນ ວິລະກຸນ ຮອງຫົວໜ້າກົມເລຂານຸການ. ພ້ອມດຽວກັນນັ້ນ, ຍັງໄດ້ຮັບຟັງການແລກປ່ຽນຄໍາຄິດຄໍາເຫັນ ຈາກບັນດາຜູ້ເຂົ້າຮ່ວມກອງປະຊຸມ ເພື່ອຊອກຫາວິທີການແກ້ໄຂບັນດາວຽກງານທີ່ເຄີຍພົບຄວາມຫຍຸ້ງຍາກ ໄດ້ຮັບການປັບປຸງ ແລະ ແກ້ໄຂໃຫ້ດີຂຶ້ນ.

ໃນພິທີໄຂ, ປະທານກອງປະຊຸມໄດ້ມີຄໍາເຫັນວ່າ: ວຽກງານເລຂານຸການ ເປັນວຽກງານທີ່ມີຄວາມໝາຍສໍາຄັນຫລາຍໃນກົງຈັກການຈັດຕັ້ງພັກ-ລັດເວົ້າລວມ, ເວົ້າສະເພາະກົງຈັກການຈັດຕັ້ງສະພາແຫ່ງຊາດ ການນໍາຈະມີຜົນສໍາເລັດທີ່ດີໄດ້ ແມ່ນມີສ່ວນປະກອບສໍາຄັນຂອງຜູ້ເປັນເລຂານຸການ, ການນໍາຫລາຍທ່ານໄດ້ຮັບການແຕ່ງຕັ້ງຮັບຜິດຊອບໜ້າທີ່ວຽກງານທີ່ສູງກວ່າເກົ່າ ລ້ວນແຕ່ແມ່ນມີສ່ວນຮ່ວມຂອງບັນດາທ່ານທີ່ເປັນເລຂານຸການໃຫ້ແກ່ການນໍາເຫລົ່ານັ້ນ ເພື່ອສ້າງຂີດຄວາມສາມາດ ແລະ ພັດທະນາຄວາມຮັບຮູ້ໃໝ່ໆ ໃຫ້ແກ່ບັນດາເລຂານຸການ-ການນໍາ ພາຍໃນສະພາແຫ່ງຊາດ ສາມາດນໍາໄປໝູນໃຊ້ເຂົ້າໃນວຽກງານຕົວຈິງ ແລະ ແກ້ໄຂບັນຫາຕ່າງໆໄດ້ ໂອກາດດັ່ງກ່າວ ປະທານກອງປະຊຸມສະເໜີໃຫ້ບັນດາຜູ້ທີ່ເຂົ້າຮ່ວມກອງປະຊຸມ ພ້ອມກັນຄົ້ນຄວ້າມີຄໍາຄິດຄໍາເຫັນຢ່າງສ້າງສັນ, ກົງໄປກົງມາ, ມີເຫດຜົນ ແລະ ເປັນຂະບວນຟົດຟື້ນ ເພື່ອເຮັດໃຫ້ກອງປະຊຸມຄັ້ງນີ້ປະສົບຜົນສໍາເລັດຕາມຈຸດປະສົງລະດັບຄາດໝາຍທີ່ວາງໄວ້ ແລະ ໄດ້ຮຽກຮ້ອງມາຍັງສໍາມະນາກອນຈົ່ງສຸມທຸກສະຕິປັນຍາ, ຄວາມຮູ້ ແລະ ປະສົບການຖ່າຍທອດບົດຮຽນ, ຂໍ້ຄິດທີ່ດີຕໍ່ວຽກງານການເປັນເສນາທິການຮັບໃຊ້ການນໍາ ໃຫ້ແກ່ບັນດາເລຂານຸການ-ການນໍາສະພາແຫ່ງຊາດ ແນໃສ່ເຮັດໃຫ້ວຽກງານດັ່ງກ່າວ ມີຄຸນນະພາບ, ປະສິດທິຜົນສູງຂຶ້ນ ຮັບໃຊ້ໜ້າທີ່ການເມືອງຂອງພັກ-ລັດທີ່ໄດ້ຮັບມອບໝາຍ ປົກປັກຮັກສາຜົນປະໂຫຍດລວມຂອງຊາດ ຍົກສູງຄວາມເປັນເຈົ້າການໃນການຄົ້ນຄວ້າປຶກສາຫາລື ປະກອບຄໍາຄິດຄຳເຫັນ ແລະ ແລກປ່ຽນບົດຮຽນ ເພື່ອເຮັດໃຫ້ການເຝິກອົບຮົມໃນຄັ້ງນີ້ ໄດ້ຮັບຜົນສໍາເລັດຢ່າງຈົບງາມ.

ກອງປະຊຸມຍັງໄດ້ຮັບຟັງການໂອ້ລົົມຂອງທ່ານ ນາງ ສວນສະຫວັນ ວິຍະເກດ ເຊິ່ງທ່ານໄດ້ມີຄໍາເຫັນວ່າ: ເລຂາການນໍາຂອງສະພາແຫ່ງຊາດ ຕ້ອງເປັນພະນັກງານທີ່ມີແນວຄິດຫລັກໝັ້ນການເມືອງໜັກແໜ້ນ, ມີຄວາມຮັບຜິດຊອບສູງຕໍ່ໜ້າທີ່ການເມື່ອງທີ່ໄດ້ຮັບການມອບໝາຍ; ສ້າງແຜນການເຄື່ອນໄຫວວຽກງານຂອງການນໍາ ດ້ວຍການຜັນຂະຫຍາຍສິດ ແລະ ໜ້າທີ່ຂອງສະພາແຫ່ງຊາດ ທີ່ໄດ້ກໍານົດໄວ້ໃນລັດຖະທໍາມະນູນ ແລະ ກົດໝາຍ; ເປັນຜູ້ທີ່ເຮັດວຽກຢູ່ໃກ້ຊິດກັບການນໍາ ເຊິ່ງວຽກງານດັ່ງກ່າວ ສາມາດແບ່ງອອກໄດ້ເປັນກຸ່ມໃຫຍ່ຄື: ການຊ່ວຍວຽກງານດ້ານບໍລິຫານ, ພິທີການ ແລະ ການຊ່ວຍວຽກດ້ານເນື້ອໃນແກ່ການນໍາ; ການປະສານງານເປັນໜ້າທີ່ສໍາຄັນອັນໜຶ່ງຂອງເລຂາການນໍາ ແລະ ເປັນຂົວຕໍ່ລະຫວ່າງພາກສ່ວນອື່ນກັບການນໍາ, ຖ້າມີການປະສານງານທີ່ດີ, ໂລ່ງລ່ຽນ ກໍຈະເຮັດໃຫ້ການລາຍງານ, ການມີທິດຊີ້ນໍາ, ການຈັດຕັ້ງຜັນຂະຫຍາຍທິດຊີ້ນໍາ ເຂົ້າໃນວຽກງານຕ່າງໆໄດ້ຮັບຜົນສໍາເລັດທັນເວລາ ແລະ ບັນດາເລຂາການນໍາ ເປັນຜູ້ຮັບໃຊ້ວຽກງານຢ່າງໃກ້ຊິດກັບການນໍາ ບໍ່ວ່າການບໍລິການຮັບໃຊ້ ກໍຄືການຮັບ ແລະ ການຈັດເກັບບັນດາເອກະສານ ຈຶ່ງເປັນຜູ້ທີ່ຮູ້ຄວາມລັບຂອງວຽກງານ ຈະເປັນຄວາມລັບຂອງຊາດ, ຄວາມລັບຂອງລັດ ແລະ ຂອງອົງການ. ສະນັ້ນ, ຢູ່ໃນຂໍ້ຕົກລົງຂອງຄະນະເລຂາທິການສະພາແຫ່ງຊາດ ວ່າດ້ວຍການເຄື່ອນໄຫວຂອງເລຂາການນໍາຂອງສະພາແຫ່ງຊາດ ມາດຕາ 3 ຂໍ້ 1.1 ໄດ້ກໍານົດໜ້າທີ່ຂອງເລຂາການນໍາ ແມ່ນຕ້ອງຮັກສາຄວາມລັບ ອີກດ້ານໜຶ່ງການເປີດເຜີຍຄວາມລັບຂອງລັດ, ຄວາມລັບຂອງລັດຖະການ ຖືວ່າເປັນໂທດຕາມກົດໝາຍອາຍາ.