ຄຮຂ ຈັດກອງປະຄົບຄະນະປະຈຳປີ 2019

30/12/2019 00:00 -

(ສພຊ) ໃນວັນທີ 24 ທັນວາ 2019 ທີ່ຫ້ອງປະຊຸມສະໂມສອນຈັດຕັ້ງສູນກາງພັກ ນະຄອນຫລວງວຽງຈັນ ຄະນະຮັບຜິດຊອບວຽກງານເຂດເລືອກຕັ້ງ (ຄຮຂ) ສະພາແຫ່ງຊາດ (ສພຊ) ໄດ້ຈັດກອງປະຊຸມຄົບຄະນະປະຈໍາປີ 2019 ໂດຍການເປັນປະທານຂອງທ່ານ ພົງສະເໜ່ ຍຸຕິທໍາ ຫົວໜ້າ ຄຮຂ, ເຂົ້າຮ່ວມມີທ່ານ ສົມພັນ ແພງຄໍາມີ ຮອງປະທານ ສພຊ, ຜູ້ຊີ້ນໍາວຽກງານ ຄຮຂ; ມີບັນດາທ່ານປະທານ-ຮອງປະທານກໍາມາທິການພາຍໃນສະພາແຫ່ງຊາດ, ບັນດາທ່ານຮອງປະທານຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງ, ຮອງເລຂາທິການສະພາປະຊາຊົນຂັ້ນແຂວງ ຜູ້ຮັບຜິດຊອບວຽກງານຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງ ແລະ ແຂກທີ່ຖືກເຊີນຈາກພາກສ່ວນກ່ຽວຂ້ອງເຂົ້າຮ່ວມ.

          ຈຸດປະສົງຂອງການຈັດກອງປະຊຸມໃນຄັ້ງນີ້ ເພື່ອເປັນການສະຫລຸບຕີລາຄາການຈັດຕັ້ງປະຕິບັດການເຄື່ອນໄຫວວຽກງານປະຈໍາປີ 2019 ແລະ ທິດທາງແຜນການ ປະຈໍາປີ 2020 ຂອງ ຄຮຂ ທັງເປັນການຖອດຖອນບົດຮຽນກ່ຽວກັບການເຄື່ອນໄຫວວຽກງານ ໂດຍແນໃສ່ປັບປຸງແຜນວິທີເຮັດວຽກ, ກະຕຸກຊຸກຍູ້ຂອງວຽກງານເຂດເລືອກຕັ້ງໃຫ້ດີກວ່າເກົ່າ ແລະ ປຶກສາຫາລືບາງວຽກງານສໍາຄັນທີ່ຢູ່ໃນຄວາມຮັບຜິດຊອບຂອງຕົນ.

          ກອງປະຊຸມ ໄດ້ຮັບຟັງການຜ່ານຮ່າງບົດສະຫລຸບການເຄື່ອນໄຫວວຽກງານປະຈໍາປີ 2019 ແລະ ທິດທາງແຜນການປະຈໍາປີ 2020 ຂອງຄະນະຮັບຜິດຊອບວຽກງານເຂດເລືອກຕັ້ງ.  ຈາກນັ້ນ ຜູ້ເຂົ້າຮ່ວມກອງປະຊຸມໄດ້ປະກອບຄໍາຄິດຄໍາເຫັນໃສ່ບົດລາຍງານ ຕາມຂໍ້ເຈາະຈີ້ມຂອງປະທານກອງປະຊຸມ ແລະ ຍັງຮັບຟັງການໂອ້ລົມ ຈາກທ່ານຮອງປະທານສະພາແຫ່ງຊາດ.