ກກໜ ເຝິກອົບຮົມກ່ຽວກັບການຕີຄວາມໝາຍ ແລະອະທິບາຍກົດໝາຍ

09/01/2020 00:00 -

(ສພຊ) ​ເພື່ອ​ເຮັດໃຫ້ລັດຖະກອນ​ ທີ່​ເປັນ​ເສນາ​ທິການ​ກ່ຽວກັບ​ວຽກງານ​ຕີ​ຄວາມໝາຍ ​ແລະ ອະທິບາຍ​ກົດໝາຍ ໃຫ້​ແກ່​ກໍາມາ​ທິການຂອງ​ສະພາ​ແຫ່ງ​ຊາດ ​ມີ​ຄວາມ​ຮັບ​ຮູ້ ​ແລະ ເຂົ້າ​ໃຈຕື່ມຕໍ່​ວຽກງານ​ດັ່ງກ່າວ ​ທັງເປັນ​ການ​ແລກປ່ຽນກ່ຽວກັບທັດສະນະ​ທາງ​ດ້ານ​ວິຊາ​ການ​ໃນ​ການຈັດ​ຕັ້ງ ​ແລະ ການ​ປະຕິບັດໜ້າທີ່​ໃນ​ການ​ເປັນ​ເສນາ​ທິການ. ສະນັ້ນ, ລະຫວ່າງວັນທີ 26-29 ທັນວາ 2019​ ທີ່​ເມືອງ​ວັງ​ວຽງ ​ແຂວງ​ວຽງຈັນ ໂດຍໄດ້ຮັບການສະໜັບສະໜູນດ້ານງົບປະມານຈາກໂຄງການເຊກາ (CEGGA) ກໍາມາທິການກົດໝາຍ (ກກໝ) ຈຶ່ງໄດ້ຈັດກອງປະຊຸມເຝິກ​ອົບຮົມ ​ແລະ ​ແລກປ່ຽນບົດຮຽນທັດສະນະ​ຄວາມ​ຮັບ​ຮູ້ ​ແລະ ​ເຂົ້າ​ໃຈ​ກ່ຽວກັບ​ການ​ຕີ​ຄວາມໝາຍ ແລະ ອະທິບາຍ​ກົດໝາຍ ​ໂດຍ​ການເປັນປະທານ​ຂອງທ່ານ ອໍາ​ໄພ ຈິດ​ມາ​ນົນ ສະມາຊິກ​ສະພາ​ແຫ່ງ​ຊາດ, ຮອງປະທານ ກກໝ; ​ເຂົ້າ​ຮ່ວມມີ​ທ່ານ ສາຍທອງ ​ແກ້ວ​ດວງ​ດີ ປະທານ ກກໝ, ​ມີຕາງໜ້າບັນດາກໍາມາ​ທິການ ແລະ ວິຊາການທີ່ກ່ຽວຂ້ອງຈໍານວນໜຶ່ງ.

ກອງປະຊຸມ​ໃນ​ຄັ້ງ​ນີ້ ຜູ້​ເຂົ້າ​ຮ່ວມໄດ້ຮັບຟັງການບັນລະຍາຍ ບົດຮຽນກ່ຽວກັບ​ການ​ຕີ​ຄວາມໝາຍ ​ແລະ ອະທິບາຍ​ກົດໝາຍ ທີ່​ຕິດ​ພັນ​ກັບ​ການ​ປະຕິບັດໜ້າທີ່​ວຽກງານ​ຕົວ​ຈິງ​ຂອງ​ກໍາມາ​ທິການ​ຕ່າງໆ ກໍ​ຄື​ກໍາມາ​ທິການ​ກົດໝາຍ​ຂອງ​ບາງ​ປະ​ເທດ ​ເປັນ​ຕົ້ນ ລາຊະ​ອານາຈັກ​ໄທ, ສປຈີນ, ສສ.ຫວຽດນາມ, ຝຣັ່ງ ​ແລະ ອັງກິດ ​ນອກຈາກ​ນັ້ນ ຍັງ​ໄດ້​ຮັບ​ຟັງ ​ແລະ ​ແລກປ່ຽນບົດຮຽນ​ໃນ​ການ​ເປັນ​ເສນາ​ທິການ​ທາງ​ດ້ານ​ວິຊາ​ສະ​ເພາະ ​ເພື່ອ​ເຮັດ​ໃຫ້​ຜູ້​ເຂົ້າ​ຮ່ວມ​ໄດ້​ນໍາ​ໄປ​ສົມທຽບກັບ​ການ​ປະຕິບັດ​ວຽກງານ​ຕົວ​ຈິງ.