ປະທານ ກຜງສ ຕ້ອນຮັບທູດສິງກະໂປ

20/01/2020 00:00 -

(ສພຊ) ວັນທີ 10 ມັງກອນ 2020 ທີ່ຫ້ອງຮັບແຂກສະພາແຫ່ງຊາດ ນະຄອນຫລວງວຽງຈັນ;  ທ່ານ ວິໄລວົງ ບຸດດາຄໍາ ປະທານກໍາມາທິການແຜນການ, ການເງິນ ແລະ ການກວດສອບ (ກຜງສ) ສະພາແຫ່ງຊາດ ໄດ້ຕ້ອນຮັບການເຂົ້າຢ້ຽມຂໍ່ານັບຂອງທ່ານ ລິວ ຊື ລິນ (Leow Siu Lin) ເອກອັກຄະລັດຖະທູດສິງກະໂປ ປະຈໍາ ສປປລາວ ເນື່ອງໃນໂອກາດມາຮັບໜ້າທີ່ຕໍາແໜ່ງເອກອັກຄະລັດຖະທູດຄົນໃໝ່.

          ທ່ານ ວິໄລວົງ ບຸດດາຄໍາ ໄດ້ກ່າວສະແດງຄວາມຍິນດີຕ້ອນຮັບອັນອົບອຸ່ນຕໍ່ທ່ານ ລິວ ຊື ລິນ ພ້ອມທັງຕີລາຄາສູງຕໍ່ການເຂົ້້າຢ້ຽມຂໍ່ານັບໃນຄັ້ງນີ້ ແລະ ຍັງໄດ້ສະແດງຄວາມຍິນດີທີ່ໄດ້ຮັບຕໍາແໜ່ງ ເປັນເອກອັກຄະລັດຖະທູດຄົນໃໝ່ ປະຈໍາ ສປປລາວ ເຊິ່ງເປັນການປະກອບສ່ວນສືບຕໍ່ສາຍພົວພັນຮ່ວມມືລະຫວ່າງສອງປະເທດ ລາວ-ສິງກະໂປ.  ທ່ານຍັງໄດ້ສະເໜີໃຫ້ສືບຕໍ່ປະສານການຮ່ວມມືລະຫວ່າງສອງປະເທດໃຫ້ດີຂຶ້ນກວ່າເກົ່າ ແລະ ຂອບອົກຂອບໃຈຕໍ່ປະເທດສິງກະໂປ ທີ່ໄດ້ໃຫ້ການຊ່ວຍເຫລືອ ສປປລາວ ໃນດ້ານຕ່າງໆ ເປັນຕົ້ນແມ່ນໃຫ້ຄວາມສຳຄັນຕໍ່ກັບແຜນພັດທະນາບຸກຄະລາກອນ ພາຍໃນ ສປປລາວ ໃຫ້ມີຄວາມຮູ້ຄວາມສາມາດ ເປັນຕົ້ນແມ່ນດ້ານວິຊາຊີບ ເພື່ີອໃຫ້ສາມາດຮັບຮອງຕະຫລາດຂອງນັກລົງທຶນທີ່ກຳລັງຂະຫຍາຍຕົວໃນ ສປປລາວ ໂດຍສະເພາະແມ່ນນັກລົງທຶນຈາກຕ່າງປະເທດ.

          ທ່ານ ລິວ ຊື ລິນ ກໍໄດ້ກ່າວສະແດງຄວາມຂອບໃຈຕໍ່ທ່ານ ວິໄລວົງ ບຸດດາຄໍາ ທີ່ໄດ້ເສຍສະຫລະເວລາອັນມີຄຸນຄ່າໃຫ້ການຕ້ອນຮັບ ຈະສືບຕໍ່ປະກອບສ່ວນເຂົ້າໃນການຊ່ວຍເຫລືອ ສປປລາວ ແລະ ໃຫ້ການຮ່ວມມືລະຫວ່າງສອງປະເທດໃຫ້ດີຂຶ້ນກວ່າເກົ່າ.