ກອງປະຊຸມສ້າງຄວາມເຂັ້ມແຂງໃຫ້ຄະນະຮັບຜິດຊອບຄຸ້ມຄອງໂຄງການສຽງຂອງແມ່ຍິງຢູ່ແຂວງຜົ້ງສາລີ.

20/01/2020 00:00 -

ສພຊ :ວັນທີ 20 ມັງກອນ 2020 ທີ່ພະແນກການເງິນແຂວງ ເມືອງຜົ້ງສາລີ ແຂວງຜົ້ງສາລີ, ຄະນະ ສສຊ ເພດຍິງ ໄດ້ຈັດກອງປະຊຸມສ້າງຄວາມເຂັ້ມແຂງ ໃຫ້ຄະນະຮັບຜິດຊອບຄຸ້ມຄອງໂຄງການສຽງຂອງແມ່ຍິງຢູ່ແຂວງຜົ້ງສາລີ ໂດຍການເປັນປະທານຮ່ວມຂອງທ່ານ ນ. ທັດສະດາພອນ ແສງສຸລິຍາ ປະທານຄະນະ ສສຊ ເພດຍິງ ແລະ ທ່ານ ນ. ວັນມະນີ ຫານນະວົງ ຮອງປະທານສະພາປະຊາຊົນແຂວງ (ສພຂ) ຜົ້ງສາລີ;​ ເຂົ້າຮ່ວມມີທ່ານ ບຸນທອງ ຕິ່ງສົມເຮືອງ ຮອງເຈົ້າເມືອງໆຜົ້ງສາລີ, ແນວລາວສ້າງຊາດແຂວງ, ສະຫະພັນນັກຮົບເກົ່າແຂວງ, ຫ້ອງການແຮງງານ ແລະ ສະຫວັດດີການສັງຄົມເມືອງ; ນອກນັ້ນຍັງມີຫ້ອງການສຶກສາ ແລະ ກິລາ,​ ຫ້ອງການສາທາລະນະສຸກ, ຫ້ອງການຍຸຕິທໍາ, ຫ້ອງການພົວພັນຕ່າງປະເທດ, ຫ້ອງການພາຍໃນ, ແນວລາວສ້າງຊາດ, ສະຫະພັນນັກຮົບເກົ່າ, ສະຫະພັນກໍາມະບານ ແລະ ຄະນະບໍລິຫານງານຊາວໜຸ່ມເມືອງຜົ້ງສາລີ ຮວມທັງເລຂາຄະນະພັກຮາກຖານບ້ານ 6 ບ້ານເປົ້າໝາຍຂອງເມືອງຜົ້ງສາລີ.
ຈຸດປະສົງ ເພື່ອເຜີຍແຜ່ທີ່ຕັ້ງ ແລະ ພາລະບົດບາດ ຂອງຄະນະສະມາຊິກສາະພາແຫ່ງຊາດ (ສສຊ) ເພດຍິງ, ກໍາມະການວັດທະນະທໍາ ແລະ ກໍາມະການບັນດາເຜົ່າ ສະພາປະຊາຊົນແຂວງ ທັງເປັນການແລກປ່ຽນບົດຮຽນ ສ້າງຄວາມເຂັ້ມແຂງໃຫ້ຄະນະຮັບຜິດຊອບໂຄງການສຽງຂອງແມ່ຍິງ ໃຫ້ຮັບຮູ້ ແລະ ເຂົ້າໃຈເຖິງບາງມາດຕາ ຂອງກົດໝາຍທີ່ກ່ຽວພັນກັບສິດ ແລະ ຜົນປະໂຫຽດຂອງແມ່ຍິງ ແລະ ເດັກ, ຂັ້ນຕອນການເຂົ້າເຖິງ ຂະບວນການຍຸຕິທໍາ ແລະ ບາງມາດຕາຂອງສົນທິສັນຍາສາກົນກ່ຽວກັບແມ່ຍິງ ແລະ ເດັກ ພ້ອມທັງເປັນການ ຮຽນຮູ້ວຽກງານຕິດຕາມກວດກາການເຜີຍແຜ່ແນວທາງຂອງພັກ-ລັດ ກ່ຽວກັບວຽກງານສາສະໜາ, ການຮ່າງ ເອກະສານທາງການ ແລະ ແລກປ່ຽນຄໍາເຫັນກັບສະມາຊິກສະພາແຫ່ງຊາດ ປະຈໍາເຂດເລືອກຕັ້ງ.