ສ້າງຄວາມເຂັ້ມແຂງ ໃຫ້ຄະນະຮັບຜິດຊອບ ຄຸ້ມຄ້ອງໂຄງການ”ສຽງຂອງແມ່ຍິງ” ແຂວງ ບໍລິຄຳໄຊ

28/01/2020 00:00 -

(ສພຊ) ລະຫວ່າງວັນທີ 14-16 ມັງກອນ 2020 ທີ່ເມືອງບໍລິຄັນ ແຂວງບໍລິຄໍາໄຊ ຄະນະສະມາຊິກສະພາແຫ່ງຊາດ (ສສຊ) ເພດຍິງ ໄດ້ຈັດກອງປະຊຸມ “ສຽງຂອງແມ່ຍິງ” ທີ່ແຂວງບໍລິຄໍາໄຊ ໂດຍການເປັນປະທານຂອງທ່ານ ນາງ ບົວພັນ ລີໄກຢາ ປະທານກໍາມາທິການບັນດາເຜົ່າ ສະພາແຫ່ງຊາດ (ສພຊ), ໂດຍການເປັນປະທານຮ່ວມຂອງທ່ານ ນາງ ສີໄຄ ສີປະເສີດ ຮອງປະທານສະພາປະຊາຊົນແຂວງບໍລິຄໍາໄຊ ແລະ ກ່າວຕ້ອນຮັບໂດຍທ່ານ ນາງ ສີດາ ພັນທະລາ ຮອງເຈົ້າເມືອງບໍລິຄັນ ແຂວງບໍລິຄໍາໄຊ; ເຂົ້າຮ່ວມມີທ່ານ ນ. ທັດສະດາພອນ ແສງສຸລິຍາ ປະທານຄະນະ ສສຊ ເພດຍິງ, ມີຕາງຄະນະຮັບຜິດຊອບໂຄງການ “ສຽງຂອງແມ່ຍິງ” ແຂວງບໍລິຄໍາໄຊ, ຕາງໜ້າກົມເຜົ່າ ແລະ ສາສະໜາ, ກົມວັດທະນະທໍາ-ສັງຄົມ ສພຊ ແລະ ຜູ້ແທນຈາກບັນດາພະແນກການອ້ອມຂ້າງແຂວງບໍລິຄໍາໄຊ ເຊັ່ນ: ຕາງໜ້າພະແນກແຮງງານ ແລະ ສະຫວັດດີການສັງຄົມ, ສຶກສາທິການ ແລະ ກິລາ, ສາທາລະນະສຸກ, ຍຸຕິທໍາ, ພາຍໃນ, ແນວລາວສ້າງຊາດ, ສະຫະພັນນັກຮົບເກົ່າ, ສະຫະພັນກໍາມະບານ ແລະ ຄະນະບໍລິຫານງານຊາວໜຸ່ມແຂວງ; ພ້ອມນັ້ນ, ຍັງມີບັນດາເປົ້າໝາຍໂຄງການ ກໍຄືຫ້ອງການທີ່ກ່ຽວຂ້ອງອ້ອມຂ້າງເມືອງບໍລິຄັນ ແລະ ເລຂາຄະນະພັກຮາກຖານ 6 ບ້ານເປົ້າໝາຍເມືອງບໍລິຄັນ ແຂວງບໍລິຄໍາໄຊ ພ້ອມດ້ວຍພະນັກງານວິຊາການທີ່ກ່ຽວຂ້ອງເຂົ້າຮ່ວມທັງໝົດເກືອບ 50 ທ່ານ.

ຈຸດປະສົງຂອງກອງປະຊຸມຄັ້ງນີ້ ເພື່ອເຜີຍແຜ່ທີ່ຕັ້ງ ແລະ ພາລະບົດບາດຂອງຄະນະ ສສຊ ເພດຍິງ, ກໍາມາທິການວັດທະນະສັງຄົມ ແລະ ບັນດາເຜົ່າ; ແລກປ່ຽນບົດຮຽນສ້າງຄວາມເຂັ້ມແຂງໃຫ້ແກ່ຄະນະຮັບຜິດຊອບໂຄງການ “ສຽງຂອງແມ່ຍິງ” ຢູ່ແຂວງເປົ້າໝາຍຂອງໂຄງການ ໃຫ້ຮັບຮູ້ ແລະ ເຂົ້າໃຈເຖິງບາງມາດຕາທີ່ກ່ຽວພັນກັບ ສິດ ແລະ ຜົນປະໂຫຍດຂອງແມ່ຍິງ ແລະ ເດັກ, ຂັ້ນຕອນຂອງການເຂົ້າເຖິງຂະບວນການຍຸຕິທໍາ ແລະ ບາງມາດຕາຂອງສົນທິສັນຍາສາກົນກ່ຽວກັບແມ່ຍິງ ແລະ ເດັກ; ຮຽນຮູ້ວຽກງານຕິດຕາມກວດກາ ເຜີຍແຜ່ແນວທາງຂອງພັກ-ລັດ ກ່ຽວກັບວຽກງານສາສະໜາ, ການຮ່າງເອກະສານທາງການ ແລະ ແລກປ່ຽນບົດຮຽນ ຄໍາຄິດຄໍາເຫັນກັບທ່ານ ສສຊ ປະຈໍາເຂດເລືອກຕັ້ງ.

ໃນພິທີໄຂ, ປະທານກອງປະຊຸມໄດ້ມີຄຳເຫັນບາງຕອນສໍາຄັນວ່າ: ກອງປະຊຸຸມມື້ນີ້ ເປັນຈຸດເປີດສາກໃນການຈັດຕັ້ງບັ້ນເຝິກອົບຮົມສ້າງຄວາມເຂັ້ມແຂງໃຫ້ຄະນະຮັບຜິດຊອບໂຄງການສຽງຂອງແມ່ຍິງຢູ່ 3 ແຂວງເປົ້າໝາຍ ຄື: ບໍລິຄໍາໄຊ, ຊຽງຂວາງ ແລະ ຜົ້ງສາລີ  ເຊິ່ງມີ 6 ບ້ານເປົ້າໝາຍຂອງແຕ່ລະຈຸດ ແລະ ພາກສ່ວນກ່ຽວຂ້ອງຕ່າງໆຂອງເມືອງ ຈະໄດ້ເຂົ້າຮ່ວມເຝິກອົບຮົມ ພ້ອມກັນນັ້ນ, ກອງປະຊຸມຄັ້ງນີ້ ຈະມີຫລາຍເອກະສານ ຈາກນັກວິທະຍາກອນທີ່ມາຈາກຫລາຍພາກສ່ວນ ສະນັ້ນ; ຮຽກຮ້ອງມາຍັງບັນດາທ່ານທີ່ເຂົ້າຮ່ວມ ຈົ່ງເຊີດຊູຄວາມຮັບຜິດ ຊອບໃນການຮັບຟັງ, ຄົ້ນຄວ້າປະກອບຄໍາຄິດຄໍາເຫັນຕໍ່ແຕ່ລະເນື້ອໃນ ເພື່ອແລກປ່ຽນບົດຮຽນເຊິ່ງກັນ ແລະ ກັນ ແລະ ເພື່ອເຮັດໃຫ້ການເຝິກອົບຮົມເທື່ອນີ້ ໄດ້ຮັບໝາກຜົນຕາມຄາດໝາຍທີ່ວາງໄວ້.

ກອງປະຊຸມໄດ້ຮັບຟັງເອກະສານກ່ຽວກັບບາງມາດຕາທີ່ກ່ຽວພັນກັບສິດ ແລະ ຜົນປະໂຫຍດຂອງແມ່ຍິງ ແລະ ເດັກ ນໍາສະເໜີໂດຍທ່ານ ໂພໄຊ ເພັດພູທອນ ຫົວໜ້າກົມຄະນະ ສສຊ ເພດຍິງ ສພຊ; ຮັບຟັງເອກະສານພາລະບົດບາດຂອງຄະນະ ສສຊ ເພດຍິງ, ເອກະສານຄວາມຮູ້ພື້ນຖານກ່ຽວກັບບາງມາດຕາຂອງສົນທິສັນຍາສາກົນທີ່ກ່ຽວຂ້ອງກັບແມ່ຍິງ ແລະ ເດັກ ແລະ ເປົ້າໝາຍການພັດທະນາແບບຍືນຍົງ, ເອກະສານຂັ້ນຕອນ ແລະ ວິທີການຕິດຕາມກວດກາຄວາມຄືບໜ້າການຈັດຕັ້ງປະຕິບັດໂຄງການຢູ່ບັນດາແຂວງເປົ້າໝາຍຂອງໂຄງການສຽງຂອງແມ່ຍິງ ນໍາສະເໜີໂດຍ ທ່ານ ນາງ ທັດສະດາພອນ ແສງສຸລິຍາ ປະທານຄະນະ ສສຊ ເພດຍິງ ສພຊ; ເອກະສານດໍາລັດວ່າດ້ວຍການຄຸ້ມຄອງ ແລະ ການປົກປ້ອງການເຄື່ອນໄຫວສາສະໜາຢູ່ ສປປລາວ ແນວທາງຂອງພັກປະຊາຊົນປະຕິວັດລາວ ກ່ຽວກັບການຄົ້ນຄວ້າຊື່ເອີ້ນຊົນເຜົ່າໃນ ສປປລາວ ແລະ ບາງປາກົດການຫຍໍ້ທໍ້ທາງດ້ານສາສະໜາທີ່ຕິດພັນກັບຊົນເຜົ່າ ແລະ ບາງວິທີການແກ້ໄຂ ນໍາສະເໜີໂດຍທ່ານ ອໍາໄພ ຫລ້າດວງພັນ ຫົວໜ້າກົມເຜົ່າ ແລະ ສາສະໜາ ກໍາມາທິການບັນດາເຜົ່າ ສພຊ; ເອກະສານບົດບາດຂອງກໍາມາທິການວັດທະນະທໍາ-ສັງຄົມ ກ່ຽວກັບວຽກງານປົກປ້ອງສິດ ແລະ ຜົນປະໂຫຍດຂອງແມ່ຍິງ ແລະ ເດັກ ສະເໜີໂດຍທ່ານ ນາງ ມະນີວັນ ລິດສົມພານ ຮອງຫົວໜ້າກົມວັດທະນະທໍາ-ສັງຄົມ ສພຊ ແລະ ຮ່າງເອກະສານທາງການ ການສ້າງແຜນການ ການສ້າງບົດສະຫລຸບ ແລະ ການສ້າງບົດລາຍງານວຽກງານໂຄງການສຽງຂອງແມ່ຍິງ ນໍາສະເໜີໂດຍ ທ່ານ ນາງ ຫວັນໄຊ ຈັນທະລາ ຮອງຫົວໜ້າກົມຄະນະ ສສຊ ເພດຍິງ ສພຊ.

ນອກຈາກນີ້, ຜູ້ເຂົ້າຮ່ວມກອງປະຊຸມ ຍັງໄດ້ສົນທະນາແລກປ່ຽນຄໍາຄິດຄໍາເຫັນ ກ່ຽວກັບແຕ່ລະຫົວຂໍ້ ເພື່ອເປັນການສ້າງຄວາມເຂັ້ມແຂງໃຫ້ຄະນະຮັບຜິດຊອບຄຸ້ມຄອງໂຄງການສຽງຂອງແມ່ຍິງ ແຂວງບໍລິຄໍາໄຊ ໃຫ້ມີຄວາມຮັບຮູ້ ແລະ ເຂົ້າໃຈຢ່າງເລິກເຊິ່ງຕໍ່ວິຊາສະເພາະ ຮັບປະກັນການຈັດຕັ້ງປະຕິບັດໂຄງການດັ່ງກ່າວ ໃຫ້ໄດ້ຮັບໝາກຜົນດີຂຶ້ນເທື່ອລະກ້າວ.