ເລຂາທິການສະພາແຫ່ງຊາດ ເຄື່ອນໄຫວວຽດຢູ່ແຂວງ ອັດຕະປື

10/02/2020 00:00 -

(ສພຊ) ວັນທີ 27 ມັງກອນ ຜ່ານມາ, ທີ່ຫ້ອງປະຊຸມສະພາປະຊາຊົນແຂວງ (ສພຂ) ອັດຕະປື ທ່ານ ນາງ ສວນສະຫວັນ ວິຍະເກດ ເລຂາທິການສະພາແຫ່ງຊາດ ພ້ອມດ້ວຍຄະນະ ໄດ້ເຮັດວຽກຮ່ວມກັບ ສພຂ ອັດຕະປື ໂດຍການຕ້ອນຮັບ ແລະ ຮ່ວມເຮັດວຽກຂອງທ່ານ ເພັດແກ້ວ ເຮືອງປັນຍາ ປະທານ ສພຂ ອັດຕະປື; ມີຮອງປະທານ, ຄະນະກໍາມະການ, ຄະນະເລຂາທິການ, ຫົວໜ້າ-ຮອງຫົວໜ້າຂະແໜງ ພ້ອມດ້ວຍພະນັກງານ-ວິຊາການພາຍໃນ ສພຂ ທີ່ກ່ຽວຂ້ອງເຂົ້າຮ່ວມ.

          ທັງນີ້, ກໍເພື່ອຕິດຕາມຊຸກຍູ້ ແລະ ເກັບກຳຂໍ້ມູນ  ສະພາບຂໍ້ສະດວກ, ຂໍ້ຫຍຸ້ງຍາກ ການປະຕິບັດໜ້າທີ່ວຽກງານຂອງຄະນະເລທິການສະພາປະຊາຊົນຂັ້ນແຂວງເປັນຕົ້ນ: ໃນການຄົ້ນຄວ້າສັງລວມເນື້ອໃນໃຫ້ແກ່ ສພຂ, ຄະນະປະຈໍາ ສພຂ ແລະ ຄະນະສະມາຊິກສະພາແຫ່ງຊາດ (ຄສຊ) ປະຈໍາເຂດເລືອກຕັ້ງ; ວຽກງານປະສານງານພາຍໃນ ແລະ ພາຍນອກ; ວຽກງານກົງຈັກການຈັດຕັ້ງຂອງ ສພຂ; ວຽກງານຄຸ້ມຄອງ ແລະ ນະໂຍບາຍພະນັກງານ-ລັດຖະກອນ; ວຽກງານການກໍ່ສ້າງພື້ນຖານໂຄງລ່າງຂອງ ສພຂ; ການໂຄສະນາເຜີຍແຜ່ກ່ຽວກັບການຈັດຕັ້ງ ແລະ ການເຄື່ອນໄຫວຂອງ ສພຂ ແລະ ຄສຊ ປະຈໍາເຂດເລືອກຕັ້ງ; ການສ້າງແຜນການ, ການຄຸ້ມຄອງງົບປະມານ ຮັບໃຊ້ໃຫ້ແກ່ການເຄື່ອນໄຫວຂອງ ສພຂ ແລະ ຄສຊ ເຂດເລືອກຕັ້ງ ແລະ ວຽກງານອື່ນໆ.

ໂອກາດນີ້, ເລຂາທິການສະພາແຫ່ງຊາດ  ພ້ອມດ້ວຍຄະນະ ຍັງໄດ້ເຈາະຈີ້ມຫລາຍບັນຫາ ເປັນຕົ້ນແມ່ນ ຂໍ້ສະດວກ ແລະ ຂໍ້ຫຍຸ້ງຍາກ ເປັນຕົ້ນແມ່ນການປັບປຸງກົງຈັກການຈັດຕັ້ງ, ສັບຊ້ອນບຸກຄະລາກອນ, ການກະກຽມດ້ານເນື້ອໃນຂົງເຂດທີ່ຄະນະເລຂາທິການສະພາປະຊາຊົນຂັ້ນແຂວງຮັບຜິດຊອບໂດຍກົງ ໃຫ້ແກ່ການດຳເນີນກອງປະຊຸມສະໄໝສາມັນຂອງ ສພຂ ແຕ່ລະໄລຍະ, ການຄຸ້ມຄອງ, ຈັດຕັ້ງພະນັກງານ-ລັດຖະກອນໃນ ສພຂ, ການຄຸ້ມຄອງເອກະສານ ແລະ ຂໍ້ສະດວກ ຂໍ້ຫຍຸ້ງຍາກໃນການນຳໃຊ້ງົບປະມານຂອງຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 17 ແລະ ສະພາປະຊາຊົນແຂວງ ແລະ ການກະກຽມ, ຄວາມຄືບໜ້າໃນການສ້າງຕຶກອາຄານຫລັງໃໝ່ໃຫ້ແກ່ ສພຂ.

ຄະນະເລຂາທິການ ສພຂ ຍັງໄດ້ສະແດງຄວາມຮູ້ບຸນຄຸນຢ່າງສູງຕໍ່ທ່ານເລຂາທິການສະພາແຫ່ງຊາດ ທີ່ໄດ້ເອົາໃຈໃສ່ຕິດຕາມຊຸກຍູ້ ແລະ ເກັບກຳເອົາຂໍ້ສະດວກ ຂໍ້ຫຍຸ້ງຍາກຂອງວຽກງານຄະນະເລຂາທິການ ສພຂ ແລະ ໃຫ້ທິດຊີ້ນຳໃນການຈັດຕັ້ງປະຕິບັດໃນຊຸມປີຕໍ່ໜ້າໃຫ້ໄດ້ຜົນສຳເລັດດີຂຶ້ນກວ່າເກົ່າ.