ສພຊ ເຝິກອົບຮົມວຽກງານ ສື່ມວນຊົນ ໃຫ້ວິຊາການ ສພຂ 6 ແຂວງພາກເໜືອ

14/02/2020 00:00 -

(ສພຊ) ​ໂດຍ​ໄດ້ຮັບການ​ສະໜັບສະໜູນ​ຈາກ​ແຜນ​ງານ​ເຊ​ກາ, ໃນລະຫວ່າງວັນທີ 31 ມັງກອນ-4 ກຸມພາ 2020 ທີ່ແຂວງອຸດົມໄຊ ກົມສື່ມວນຊົນ ຄະນະເລຂາທິການສະພາແຫ່ງຊາດ ໄດ້ຈັດກອງປະຊຸມເຝິກອົບຮົມໃນຫົວຂໍ້: ການຂຽນຂ່າວ, ບົດ, ຖ່າຍຮູບ, ສ້າງລາຍການວິທະຍຸ, ໂທລະພາບ ແລະ ສາລະຄະດີ ໃຫ້ວິຊາການສະພາປະຊາຊົນຂັ້ນແຂວງ (ສພຂ) 6 ແຂວງພາກເໜືອ ໂດຍການເປັນປະທານຮ່ວມຂອງທ່ານ ຄຳ​ຊາວ ​ໄກຊົງ ຮອງ​ເລຂາທິການ​ສະພາແຫ່ງຊາດ (ສພຊ) ຜູ້​ຊີ້ນຳວຽກ​ງານ​ສື່​ມວນ​ຊົນ ​ແລະ ທ່ານ ບຸນ​ລອດ ອ່ອນ​ພະ​ຈັນ ປະທານ​ ສພຂ ອຸດົມ​ໄຊ; ມີຫົວໜ້າ-ຮອງ​ຫົວໜ້າກົມສື່ມວນຊົນ ຄະນະເລຂາທິການສະພາແຫ່ງຊາດ, ເລຂາ-ຮອງເລຂາທິການ ສພຂ ພ້ອມດ້ວຍ​ວິທະຍາກອນຈາກກົມສື່ມວນຊົນ ຄະນະເລຂາທິການສະພາແຫ່ງຊາດ ແລະ ກົມຮູບເງົາ ກະຊວງຖະແຫລງຂ່າວ ວັດທະນະທໍາ ແລະ ທ່ອງທ່ຽວ, ສຳ​ມະ​ນາກ​ອນ ​ແລະ ວິຊາການທີ່ກ່ຽວຂ້ອງຂອງ ສພຊ ແລະ ສພຂ 6 ​ແຂ​ວງພາກ​ເໜືອເຂົ້າຮ່ວມຢ່າງ​ພ້ອມພຽງ.

ຊຸດເຝິກອົບຮົມຄັ້ງນີ້ ເພື່ອ​ກໍ່ສ້າງ ​ແລະ ​ພັດທະນາ​ບຸກຄະລາ​ກອນ​ທາງ​ດ້ານເນື້ອໃນວຽກ​ງານສື່ມວນຊົນ ເປັນຕົ້ນ​ແມ່ນວິຊາ​ການຂຽນຂ່າວ, ບົດ, ຖ່າຍຮູບ-ວິດິໂອ, ຜະລິດລາຍການວິທະຍຸ, ລາຍການໂທລະພາບ ແລະ ການສ້າງສາລະຄະດີ; ເພື່ອຮັບປະກັນຄຸນນະພາບຂອງພະນັກງານ​ໃນ​ການ​ປະກອບສ່ວນສະໜອງຂໍ້​ມູນ-ຂ່າວສານ ກ່ຽວກັບການເຄື່ອນໄຫວຂອງ ສພຊ, ສພຂ ໃຫ້ມີປະສິດທິພາບ​ ​ແລະ ປະສິດທິຜົນ ​ແນ​ໃສ່​ຍົກສູງຄຸນນະພາບຂອງໜັງສືພິມ, ລາຍການວິທະຍຸ ​ແລະ ​ລາຍການໂທລະພາບ “ຜູ້​ແທນ​ປະຊາຊົນ” ​ທີ່​​​​ເປັນກະບອກ​ສຽງ​ຂອງ ສພຊ.

​​ໃນ​ກອງ​ປະຊຸມ, ​ສໍາມະນາກອນໄດ້​ຮັບ​ຟັງ​ການ​ບັນຍາຍ​ກ່ຽວ​ກັບ​ທິດ​ສະ​ດີ​ພື້ນຖານ​ການຂຽນ​ຂ່າວ, ຫລັກການ​ການ​ຂຽນ​ຂ່າວ​ຂອງ​ໜັງສືພິມ ສພຊ, ທັກ​ສະການ​ເປັນ​ໂຄສົກ, ການ​ສຳພາດ​ສຽງ​ເພື່ອ​ອອກ​ລາຍການ​ວິທະຍຸ, ຫລັກການ​ການ​ຂຽນບົດ (ສະຄຣິບ) ຂອງ​ລາຍການ​ວິທະຍຸ, ລາຍການ​ໂທລະພາບ ​ແລະ ສາລະ​ຄະດີ, ​ເຕັກນິກ​ການ​ອ່ານ​ຂ່າວ​ວິທະຍຸ, ຫລັກການ​ຂຽນ​ບົດ​ຕ່າງໆ​​, ​ເຕັກນິກ​ການຖ່າຍ​ພາບ, ​ເຕັກນິກ​ການຈັດ​ໜ້າ, ເຕັກນິກ​ການສຳພາດ​ລາຍການ​ໂທລະພາບ ​ແລະ ສິ່ງ​ທີ່​ຄວນ​ປັບປຸງ​ໃນ​ການ​ຂຽນ​ຂ່າວ​-ບົດຂອງ​ໜັງສືພິມ ສພຊ; ພ້ອມ​ນັ້ນ, ຜູ້​ເຂົ້າ​ຮ່ວມຍັງ​ໄດ້ປະກອບ​ຄຳ​ຄິດ​ຄຳ​ເຫັນ, ​ແລກປ່ຽນ​ບົດຮຽນ​ເຊິ່ງກັນ​ ແລະ​ ກັນ ຢ່າງ​ກົງ​ໄປ​ກົງ​ມາ ພ້ອມ​ທັງ​ເຮັດ​ບົດ​ເຝິກ​ຫັດ​ຕົວ​ຈິງ​ໃນ​ຫົວ​ຂໍ້​ຕ່າງ​ໆ​​ເຊັ່ນ: ຂຽນຂ່າວ, ຄັດ​ບົດ, ​ແຕ່ງ​ກາບກອນ, ສ້າງ​ລາຍການ​ວິທະຍຸ, ສ້າງ​ລາຍ​ການ​ໂທລະພາບ ​ແລະ ​ເຮັດ​ສາລະ​ຄະດີ​ຕົວ​ຈິງ​ຢູ່​ໃນ​ຫ້ອງ​ປະຊຸມ ​ແລະ ສະຖານ​ທີ່​ທ່ອງ​ທ່ຽວ ນ້ຳ​ກັດ​ຢໍ​ລະ​ປາ ຂອງ​ແຂວງ​ອຸ​ດົມ​ໄຊ.

ການ​ເຝິກອົບຮົມ​ສ້າງ​ຄວາມ​ເຂັ້ມ​ແຂງ​ດ້ານວຽກ​ງານ​ສື່​ຂອງ ສພຊ ຄັ້ງ​ນີ້ ​ແມ່ນ​ຈັດ​ເປັນ​ຄັ້ງ​ທີ 3 ​​​ເຊິ່ງກ່ອນ​ໜ້າ​ນີ້​ໄດ້​ຈັດຢູ່ພາກ​ກາງ ​ແລະ ພາກ​ໃຕ້ສຳ​ເລັດ​​ແລ້ວ​ຕາມ​ລະດັບ​ຄາດໝາຍ​ທີ່​ວາງ​ໄວ້.