ສຳມະນາລະດົມຄຳຄິດເຫັນ ປະກອບໃສ່ຮ່າງມະຕິ ຂອງ ຄປຈ ສພຊ ກ່ຽວກັບວຽກງານສາຍດ່ວນ

17/02/2020 00:00 -

(ສພຊ) ລະຫວ່າງວັນທີ 8-9 ກຸມພາ 2020 ທີ່ທ່າລາດ ແຂວງວຽງຈັນ,  ຄະນະເລຂາທິການສະພາແຫ່ງຊາດ (ຄລສ) ໄດ້ຈັດກອງປະຊຸມສໍາມະນາລະດົມຄໍາຄິດຄໍາເຫັນປະກອບໃສ່ມະຕິຂອງຄະນະປະຈໍາສະພາແຫ່ງຊາດ  (ຄປຈ ສພຊ) ກ່ຽວກັບວຽກງານສາຍດ່ວນ ໂດຍການເປັນປະທານຂອງທ່ານ ຄໍາຊາວ ໄກຊົງ ຮອງເລຂາທິການສະພາແຫ່ງຊາດ; ເຂົ້າຮ່ວມມີບັນດາຫົວໜ້າ-ຮອງຫົວໜ້າກົມ, ຫົວໜ້າ-ຮອງຫົວໜ້າສູນ ພ້ອມດ້ວຍຫົວໜ້າ-ຮອງຫົວໜ້າພະແນກ ແລະ ພະນັກງານວິຊາການທີ່ກ່ຽວຂ້ອງພາຍໃນ ສພຊ ຈໍານວນ 36 ທ່ານ ຍິງ 11 ທ່ານ.

ຈຸດປະສົງຂອງກອງປະຊຸມຄັ້ງນີ້ ເພື່ອຜັນຂະຫຍາຍແຜນການຂອງ ຄປຈ ສພຊ ເຂົ້າໃນວຽກງານເຄື່ອນໄຫວຂອງ ຄລສ ປີ 2019 ໂດຍສະເພາະການສ້າງນິຕິກໍາ ເພື່ອເປັນບ່ອນອີງໃຫ້ແກ່ການຈັດຕັ້ງ ແລະ ເຄື່ອນໄຫວວຽກງານສາຍດ່ວນຂອງ ສພຊ; ເພື່ອຄົ້ນຄວ້າປະກອບຄໍາເຫັນໃສ່ຮ່າງນິຕິກໍາຂອງ ຄປຈ ສພຊ ວ່າດ້ວຍວຽກງານສາຍດ່ວນຂອງ ສພຊ ເຮັດໃຫ້ນິຕິກໍາດັ່ງກ່າວມີເນື້ອໃນຄົບຖ້ວນ ແລະ ຮັດກຸມ ແນໃສ່ຮັບປະກັນການຈັດຕັ້ງປະຕິບັດການເຄື່ອນໄຫວຕາມພາລະບົດບາດ ແລະ ໜ້າທີ່ຂອງເສນາທິການທີ່ຮັບຜິດຊອບວຽກງານສາຍດ່ວນຂອງ ສພຊ ໄດ້ເປັນຢ່າງດີ; ເພື່ອປັບປຸງນິຕິກໍາກ່ຽວກັບວຽກງານສາຍດ່ວນຂອງ ສພຊ ເຮັດໃຫ້ບັນດາຄໍາເຫັນ ແລະ ຄໍາສະເໜີຂອງປະຊາຊົນບັນດາເຜົ່າ ຜ່ານໂທລະສັບສາຍດ່ວນຂອງ ສພຊ ໃຫ້ໄດ້ຮັບການແກ້ໄຂວ່ອງໄວ ແລະ ມີປະສິດທິຜົນສູງຂຶ້ນ.

ໃນພິທີໄຂ, ທ່ານ ຄໍາຊາວ ໄກຊົງ ໄດ້ຮຽກຮ້ອງໃຫ້ຜູ້ເຂົ້າຮ່ວມກອງປະຊຸມ ສຸມທຸກສະຕິປັນຍາເຂົ້າໃນການປະກອບຄໍາຄິດຄໍາເຫັນໃສ່ຮ່າງມະຕິຂອງ ຄປຈ ສພຊ ທີ່ນໍາມາສະເໜີໃນຄັ້ງນີ້ ເພື່ອໃຫ້ມີເນື້ອໃນຄົບຖ້ວນ, ກະທັດຮັດ, ຈະແຈ້ງ, ຮັດກຸມ ແລະ ສາມາດຈັດຕັ້ງປະຕິບັດໄດ້.

ພາຍຫລັງທ່ານ ສິນທະລາ ຫຼ້າສຸກສະໄໝ ຫົວໜ້າກົມກວດກາ ໄດ້ນໍາສະເໜີຮ່າງມະຕິຂອງ ຄປຈ ສພຊ ວ່າດ້ວຍວຽກງານສາຍດ່ວນ ແລະ ການຄົ້ນຄວ້າແກ້ໄຂຄໍາຮ້ອງ, ຄໍາສະເໜີປະກອບມີ 6 ໝວດ 18 ມາດຕາ, ບັນດາຜູ້ເຂົ້າຮ່ວມກອງປະຊຸມສໍາມະນາ ໄດ້ສຸມທຸກຄວາມສາມາດໃນການຄົ້ນຄວ້າ ປະກອບຄໍາເຫັນໃສ່ໂຄງປະກອບໃນແຕ່ລະໝວດ ແລະ ແຕ່ລະມາດຕາຢ່າງກົງໄປກົງມາ ເພື່ອຮັບປະກັນໃຫ້ຮ່າງມະຕິດັ່ງກ່າວສາມາດຈັດຕັ້ງປະຕິບັດໄດ້.

ຮ່າງມະຕິທີ່ນໍາມາລະດົມຄໍາຄິດເຫັນໃນຄັ້ງນີ້ ແມ່ນເຄີຍນໍາເຂົ້າທາບທາມໃນກອງປະຊຸມສໍາມະນາທາບທາມນິຕິກໍາຂອງ ສພຊ ຄັ້ງວັນທີ 26-28 ທັນວາ 2018 ທີ່ແຂວງບໍລິຄໍາໄຊ ໂດຍການເປັນປະທານຂອງທ່ານ ນາງ ສວນສະຫວັນ ວິຍະເກດ ເລຂາທິການສະພາແຫ່ງຊາດ ເຊິ່ງເມື່ອກ່ອນເອີ້ນວ່າຮ່າງຂໍ້ຕົກລົງ ຂອງຄະນະເລຂາທິການສະພາແຫ່ງຊາດ ວ່າດ້ວຍວຽກງານສາຍດ່ວນຂອງ ສພຊ.