ສ້າງຄວາມເຂັ້ມແຂງກ່ຽວກັບວຽກງານການເງິນ ໃຫ້ພະນັກງານພາຍໃນ ສພຊ ແລະ ສພຂ

27/02/2020 00:00 -

 (ສພຊ) ລະຫວ່າງວັນທີ 14-15 ກຸມພາ ຜ່ານມາ ທີ່ຫ້ອງປະຊຸມສະພາແຫ່ງຊາດ (ຫລັກ 6) ນະຄອນ ຫລວງວຽງຈັນ ກົມການເງິນ ຄະນະເລຂາທິການສະພາແຫ່ງຊາດ ໄດ້ຈັດກອງປະຊຸມເຝິກອົບຮົມ ສ້າງຄວາມເຂັ້ມ ແຂງວຽກງານການເງິນ ໃຫ້ພະນັກງານກົມການເງິນ, ບັນດາກົມ ພາຍໃນສະພາແຫ່ງຊາດ (ສພຊ) ແລະ ພະນັກງານທີ່ຮັບຜິດຊອບວຽກງານການເງິນທີ່ມາຈາກສະພາປະຊາຊົນແຂວງ (ສພຂ) ໂດຍການເປັນປະທານຂອງທ່ານ ຄຳຊາວ ໄກຊົງ ຮອງເລຂາທິການສະພາແຫ່ງຊາດ; ເຂົ້າຮ່ວມມີບັນດາທ່ານຫົວໜ້າ-ຮອງຫົວໜ້າກົມການເງິນ, ວິທະຍາ ກອນຈາກກະຊວງການເງິນ, ພະນັກງານທີ່ຮັບຜິດຊອບວຽກງານການເງິນ ທີ່ມາຈາກ ສພຊ ແລະ ສພຂ ພ້ອມດ້ວຍພາກສ່ວນທີ່ກ່ຽວຂ້ອງ.

ກອງປະຊຸມຈະໄດ້ຮັບຟັງການສະເໜີໃນ 4 ຫົວຂໍ້ຄື: ແນະນຳກ່ຽວກັບການຈັດຕັ້ງປະຕິບັດກົດໝາຍວ່າດ້ວຍ ການຈັດຊື້-ຈັດຈ້າງດ້ວຍທຶນຂອງລັດ; ແນະນຳກ່ຽວກັບການປະກອບເອກະສານ ແລະ ການກວດກາ ເອກະສານລາຍຈ່າຍງົບປະມານແຫ່ງລັດ; ແນະນຳກ່ຽວກັບການກວດກາຫລັງຈ່າຍງົບປະມານຂອງລັດ; ຄວາມສຳຄັນ, ຄວາມຮູ້ພື້ນຖານກ່ຽວກັບວຽກງານບັນຊີຄູ່ ແລະ ເຕັກນິກໃນການບັນທຶກບັນຊີຂອງອົງການຈັດຕັ້ງລັດ (ບັນຊີຄູ່). ທັງ 4 ຫົວຂໍ້ນີ້ ແມ່ນມີຄວາມສຳຄັນຫລາຍ ເພາະມັນຕິດພັນກັບການປະຕິບັດໜ້າທີ່ການເປັນເສນາທິການໃນການຄຸ້ມຄອງ ແລະ ນຳໃຊ້ງົບປະມານໃຫ້ບັນດາກົງຈັກທີ່ຕົນສັງກັດຢູ່, ທັງເຮັດໃຫ້ບັນດານັກສໍາມະນາກອນ ໄດ້ເຂົ້າໃຈເລິກເຊິ່ງກວ່າເກົ່າກ່ຽວກັບການຈັດຊື້-ຈັດຈ້າງດ້ວຍທຶນຂອງລັດ, ຂັ້ນຕອນການປະກອບເອກະສານ, ການກວດກາຫລັງຈ່າຍ ແລະ ລວມທັງການລົງບັນຊີຕ່າງໆ ເພື່ອໃຫ້ນຳໄປຈັດຕັ້ງປະຕິບັດຢ່າງເປັນເອກະພາບ ທັງຮັບ ປະກັນການປະຕິບັດລະບຽບການຢ່າງເຂັ້ມງວດ.

          ທ່ານ ຄຳຊາວ ໄກຊົງ ໄດ້ມີຄຳເຫັນກ່າວເປີດກອງປະຊຸມ ເຊິ່ງບາງຕອນສໍາຄັນວ່າ: ກອງປະຊຸມຄັ້ງນີ້ ເພື່ອຍົກສູງຂີດຄວາມສາມາດໃຫ້ແກ່ພະນັກງານ-ລັດຖະກອນພາຍໃນສະພາແຫ່ງຊາດ, ພະນັກງານທີ່ຮັບຜິດຊອບວຽກງານການເງິນທີ່ມາຈາກ ສພຂ ໂດຍສະເພາະແມ່ນການຈັດຕັ້ງປະຕິບັດກົດໝາຍວ່າດ້ວຍການຈັດຊື້-ຈັດຈ້າງດ້ວຍທຶນຂອງລັດ, ການປະກອບເອກະສານ ແລະ ການກວດກາເອກະສານລາຍງານຈ່າຍງົບປະມານແຫ່ງລັດ, ຄຳແນະນຳວ່າດ້ວຍການກວດກາຫລັງຈ່າຍງົບປະມານຂອງລັດ; ຄວາມສຳຄັນ, ຄວາມຮູ້ພື້ນຖານກ່ຽວກັບວຽກງານບັນຊີຄູ່ ແລະ ເຕັກນິກໃນການບັນທຶກບັນຊີຂອງອົງການຈັດຕັ້ງລັດ (ບັນຊີຄູ່). ໃນຕອນທ້າຍ, ປະທານກອງປະຊຸມ ໄດ້ຮຽກຮ້ອງມາຍັງພະນັກງານ-ລັດຖະກອນທຸກຄົນ ຈົ່ງໄດ້ເອົາໃຈໃສ່ຕິດຕາມຮັບຟັງການສະເໜີບົດຮຽນຂອງວິທະຍາກອນ ສຸມສະຕິປັນຍາເຂົ້າໃນການຄົ້ນຄວ້າ, ວິເຄາະບັນຫາ, ປະກອບຄຳເຫັນ ຖ້າມີບັນຫາໃດບໍ່ເຂົ້າໃຈ ຫລື ບໍ່ທັນຈະແຈ້ງ ກໍໃຫ້ຍົກຄຳຖາມ ແລະ ແລກປ່ຽນຄຳຄິດຄຳເຫັນ ເພື່ອເຮັດໃຫ້ກອງປະຊຸມເຝິກອົບຮົມ ໄດ້ດໍາເນີນໄປດ້ວຍຜົນສໍາເລັດຕາມຈຸດປະສົງ ແລະ ລະດັບຄາດໝາຍທີ່ກໍານົດໄວ້.