ປະທານ ກຜງສ ຕ້ອນຮັບການເຂົ້າຟ້ຽມຂໍ່ານັບຂອງຜູ້ອຳນວນການ ອີຢູ

05/03/2020 00:00 -

(ສພຊ) ຕອນບ່າຍວັນທີ 20 ກຸມພາ 2020 ທີ່ສະພາແຫ່ງຊາດ (ສພຊ), ທ່ານ ວິໄລວົງ ບຸດດາຄໍາ ປະທານກໍາມາທິການແຜນການ, ການເງິນ ແລະ ການກວດສອບ (ກຜງສ) ສະພາແຫ່ງຊາດ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ນາງ ປາວລາ ປາມປານິ (Paola Pampaloni) ຜູ້ອໍານວຍການ ແລະ ຮອງອໍານວຍການດ້ານການບໍລິຫານພາກພື້ນອາຊີ-ປາຊີຟິກຂອງຫ້ອງການພົວພັນພາຍນອກ ສະຫະພາບເອີຣົບ ປະຈໍານະຄອນຫລວງ ບຣູດແຊນຊ (Brussels) ພ້ອມດ້ວຍຄະນະ.

          ທ່ານ ວິໄລວົງ ບຸດດາຄໍາ ໄດ້ກ່າວຕ້ອນຮັບອັນອົບອຸ່ນຕໍ່ທ່ານ ນາງ ປາວລາ ປາມປານິ ທີ່ເດີນທາງມາຢ້ຽມຢາມ ແລະ ເຮັດວຽກຢູ່ ສປປລາວ ໃນຄັ້ງນີ້ ພ້ອມທັງແຈ້ງໃຫ້ຮູ້ກ່ຽວກັບສະພາບການພັດທະນາເສດຖະກິດ-ສັງຄົມ ຂອງລາວໃຫ້ຮູ້ໂດຍສັງເຂບ ແລະ ໄດ້ສະແດງຄວາມຂອບໃຈຕໍ່ການຊ່ວຍທຶນຮອນໃນໂຄງການຕ່າງໆ ຂອງສະຫະພາບເອີຣົບຕໍ່ການພັດທະນາເສດຖະກິດ-ສັງຄົມໃນ ສປປລາວ ໃນຕະຫລອດໄລຍະຜ່ານມາ ແລະ ຍັງໄດ້ສະເໜີໃຫ້ສະຫະພາບເອີຣົບ ຈົ່ງຊ່ວຍສະໜອງທຶນຊ່ວຍເຫລືອໃຫ້ພະນັກງານສະພາແຫ່ງຊາດລາວ ໄດ້ໄປສຶກສາຍົກລະດັບຄວາມຮູ້ຄວາມສາມາດ, ແລກປ່ຽນ ແລະ ຖອດຖອນບົດຮຽນໃນການສ້າງ ແລະ ປັບປຸງກົດໝາຍ ນໍາສາກົນ ກໍຄືບັນດາປະເທດທີ່ມີປະສົບການຜົນສໍາເລັດໃນການສ້າງ ແລະ ປັບປຸງກົດໝາຍ.   ນອກນັ້ນ ຍັງໄດ້ສະເໜີສະຫະພາບເອີຣົບຊ່ວຍນໍາເອົາຊ່ຽວຊານໃນການສ້າງ ແລະ ປັບປຸງກົດໝາຍມາຊ່ວຍເຝິກອົບຮົມໃຫ້ແກ່ພະນັກງານ-ລັດຖະກອນ ຂອງສະພາແຫ່ງຊາດລາວ.

          ໂອກາດດັ່ງກ່າວ ທ່ານ ນາງ ປາວລາ ປາມປານິ ກໍໄດ້ກ່າວສະແດງຄວາມຂອບໃຈທີ່ທ່ານປະທານ ກຜງສ ທີ່ໄດ້ເສຍສະຫລະເວລາອັນມີຄຸນຄ່າຕ້ອນຮັບຢ່າງອົບອຸ່ນ ພ້ອມທັງລາຍງານໃຫ້ຮູ້ກ່ຽວກັບຈຸດປະສົງຂອງການເດີນທາງມາຢ້ຽມຢາມ ສປປລາວ ໃນຄັ້ງນີ້ ກໍເພື່ອພົບປະເຮັດວຽກປຶກສາຫາລືກັບບັນດາການນໍາ ສປປລາວ ທີ່ມີໜ້າທີ່ຮັບຜິດຊອບບັນດາຂະແໜງການກ່ຽວຂ້ອງກັບການພັດທະນາເສດຖະກິດ-ສັງຄົມຂອງ ສປປລາວ ພ້ອມທັງໃຫ້ຮູ້ອີກຕື່ມວ່າ ສະຫະພາບເອີຣົບ ແມ່ນກໍາລັງເລັ່ງການສ້າງແຜນງົບປະມານໃນການໃຫ້ທຶນຊ່ວຍເຫລືອ ສປປລາວ ໃນປີ 2020; ທັງສອງຝ່າຍຍັງໄດ້ໂອ້ລົມສົນທະນາບັນຫາຕ່າງໆ ທີ່ຕົນໃຫ້ຄວາມສົນໃຈ.