ສພຊ ມອບ-ຮັບເຄື່ອງຊ່ວຍເຫຼືອ

22/05/2020 00:00 -

(ສພຊ) ວັນທີ 27 ມີນາ 2020 ທີ່ສະພາແຫ່ງຊາດ ນະຄອນຫລວງວຽງຈັນ ໄດ້ມີພິທີມອບ-ຮັບເຄື່ອງຊ່ວຍເຫລືອເພື່ອຊ່ວຍສະກັດກັັ້ນ ແລະ ຕ້ານການແຜ່ລະບາດຂອງພະຍາດໂຄວິດ-19;  ກ່າວມອບໂດຍຕາງໜ້າລັດຖະມົນຕີ-ຮອງລັດຖະມົນຕີກະຊວງກໍ່ສ້າງ ສສ.ຫວຽດນາມ ແລະ ຄະນະຮັບຜິດຊອບກໍ່ສ້າງຫໍສະພາແຫ່ງຊາດ ຫລັງໃໝ່ ແລະ ກ່າວຮັບໂດຍສະຫາຍ ນາງ ສວນສະຫວັນ ວິຍະເກດ ເລຂາທິການສະພາແຫ່ງຊາດ, ເຄື່ອງຈຳນວນດັ່ງກ່າວ ແມ່ນມອບໃຫ້ນຳໃຊ້ພາຍໃນສະພາແຫ່ງຊາດ.

          ໃນພິທີ, ສະຫາຍ ນາງ ສວນສະຫວັນ ວິຍະເກດ ໄດ້ສະແດງຄວາມຂອບອົກຂອບໃຈຕໍ່ຄວາມເປັນຫ່ວງເປັນໃຍຕໍ່ການລະບາດຂອງພະຍາດໂຄວິດ-19 ເຊິ່ງສະແດງໃຫ້ເຫັນເຖິງຄວາມເປັນຫ່ວງເປັນໃຍຂອງສອງພັກ-ສອງລັດ ແລະ ປະຊາຊົນສອງປະເທດ ທີ່ຍາມໃດກໍຢູ່ຄຽງບ່າຄຽງໄຫລ່ກັນຕະຫລອດມາ ເຖິງວ່າປະເທດຊາດຈະມີຄວາມຫຍຸ້ງຍາກສັບສົນພຽງໃດກໍຕາມ; ພ້ອມທັງສັນຍາວ່າຈະນຳໃຊ້ເຄື່ອງຊ່ວຍເຫລືອໃນຄັ້ງນີ້ ໃຫ້ມີປະສິດທິພາບຫລາຍທີ່ສຸດ ແລະ ຫວັງຢ່າງຍິ່ງວ່າການແຜ່ລະບາດດັ່ງກ່າວ ຈະສິ້ນສຸດລົງໃນໄວໆນີ້.

          ພ້ອມນັ້ນ, ຜູ້ຕາງໜ້າມອບເຄື່ອງໄດ້ສະແດງຄວາມເປັນຫ່ວງເປັນໃຍຕໍ່ການລະບາດເຊື້ອພະຍາດໂຄວິດ-19 ຢູ່ໃນ ສປປລາວ; ພ້ອມທັງລາຍງານມາດຕະການປ້ອງກັນ ແລະ ສະກັດກັ້ນພະຍາດດັ່ງກ່າວ ຢູ່ໃນເຂດກໍ່ສ້າງຫໍສະພາແຫ່ງຊາດ ຫລັງໃໝ່ ເຊິ່ງໄດ້ວາງມາດຕະການຢ່າງເຂັ້ມງວດ ເພື່ອຕ້ານ ແລະ ສະກັດກັ້ນ ການແຜ່ລະບາດຂອງເຊື້ອພະຍາດ.

          ເຄື່ອງທີ່ນຳມາມອບໃນຄັ້ງນີ້ ປະກອບມີຜ້າອັດປາກຈຳນວນ 10 ກັບ ເທົ່າກັບ 1.500 ແຜ່ນ ໃນເບື້ອງຕົ້ນ ແລະ ກຳລັງຂົນສົ່ງມາຕື່ມອີກ.