ເລຂາທິການພັກຮາກຖານ ຄລສ ໃຫ້ສຳພາດເນື່ອງໃນໂອກາດ ວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 65 ປີ

22/05/2020 00:00 -

ເລຂາທິການພັກຮາກຖານ ຄລສ ໃຫ້ສຳພາດເນື່ອງໃນໂອກາດ ວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 65 ປີ

ວັນທີ 20 ມີນາ ຜ່ານມາ, ສະຫາຍ ສຸບັນ ສະວະບຸດ ເລຂາຄະນະພັກຮາກຖານຄະນະເລຂາ ທິການສະພາແຫ່ງຊາດ ໄດ້ໃຫ້ສໍາພາດຕໍ່ສື່ມວນຊົນ ເນື່ອງໃນໂອກາດວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 65 ປີ (22 ມີນາ 1955-22 ມີນາ 2020) ວ່າ: ປະຫວັດສາດແຫ່ງການຕໍ່ສູ້ປະຕິວັດ ຂອງປະຊາຊົນລາວບັນດາເຜົ່າ ໃນກວ່າເຄິ່ງສະຕະວັດທີ່ຜ່ານມາ ໄດ້ຕິດພັນກັບການກຳເນີດ ແລະ ເຕີບໃຫຍ່ຂະຫຍາຍຕົວຂອງ ພັກປະຊາຊົນປະຕິວັດລາວ ຕະຫລອດມາ, ທຸກບາດກ້າວເດີນ, ທຸກໄຊຊະນະຂອງປະຊາຊົນລາວໃນການຕໍ່ສູ້ປົດປ່ອຍຊາດໃນເມື່ອກ່ອນ ກໍຄືໄລຍະປົກປັກຮັກສາ ແລະ ສ້າງສາພັດທະນາປະເທດຊາດໃນປັດຈຸບັນ ລ້ວນແຕ່ພົວພັນກັບການນຳພາຂອງພັກ.

ສະຫາຍໄດ້ກ່າວວ່າ: ການກຳເນີດຂຶ້ນ ຂອງພັກປະຊາຊົນປະຕິວັດລາວ ແມ່ນໝາກຜົນແຫ່ງການສົມທົບ ລະຫວ່າງຂະບວນການຕໍ່ສູ້ຮັກຊາດຂອງປະຊາຊົນລາວບັນດາເຜົ່າ ກັບຂະບວນການຕໍ່ສູ້ປະຕິວັດ ຂອງກຳມະກອນ ແລະ ລັດທິມາກ-ເລນິນ, ການກຳເນີດຂອງພັກເຮົາ ແມ່ນຄວາມຮຽກຮ້ອງຕ້ອງການພາວະວິໄສ ຂອງຂະບວນການຕໍ່ສູ້ຂອງປະຊາຊົນລາວເຮົາ; ນັບແຕ່ພັກໄດ້ຮັບການສ້າງຕັ້ງຂຶ້ນ ເຊິ່ງສືບທອດພາລະກິດອັນມີກຽດສະຫງ່າຂອງພັກກອມມູນິດອິນດູຈີນ, ຮັບເອົາພາລະກຳປະຫວັດສາດອັນແສນຫຍຸ້ງຍາກລຳບາກ ແຕ່ສະຫງ່າລາສີທີ່ສຸດ ແຫ່ງການນຳພາຂະບວນການຕໍ່ສູ້ຂອງປະຊາຊົນລາວ, ສາມາດຕໍ່ສູ້ຕີສັດຕູໃຫ້ຖອຍໄປ, ຍາດເອົາໄຊຊະນະຢ່າງສົມບູນ, ລົບລ້າງແອກຄອບຄອງຂອງພວກລ່າເມືອງຂຶ້ນ ແລະ ສັກດີນາຢ່າງສິ້ນເຊີງ, ສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ ຂຶ້ນ ໃນວັນທີ 2 ທັນວາ 1975 ເຊິ່ງເປັນການໄຂສັງກາດໃໝ່ ອັນສະຫວ່າງສະໄຫວ ແຫ່ງຄວາມເປັນ ເອກະລາດ, ອິດສະຫລະພາບ ແລະ ວັດທະນະຖາວອນ ຂອງຊາດລາວ; ພາຍຫລັງທີ່ສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ ພັກ ກໍໄດ້ນຳພາປວງຊົນລາວທັງຊາດ ປົກປັກຮັກສາໝາກຜົນຂອງການປະຕິວັດລາວ ທີ່ຍາດມາໄດ້ ແລະ ນຳພາການສ້າງສາພັດທະນາປະເທດຊາດ ໃຫ້ຂະຫຍາຍຕົວຢ່າງຕໍ່ເນື່ອງ, ພັກ ຍັງສະດຸ້ງໄວ, ໄດ້ເປັນຜູ້ລິເລີ່ມ ແລະ ຈັດຕັ້ງນຳພາທົ່ວປວງຊົນ ດຳເນີນພາລະກິດປ່ຽນແປງໃໝ່ ໂດຍເລີ່ມຈາກການປ່ຽນແປງໃໝ່ທາງດ້ານເສດຖະກິດ ໄປສູ່ການດຳເນີການນປ່ຽນແປງໃໝ່ຮອບດ້ານ ຢ່າງມີຫລັກການ. ເວົ້າລວມແລ້ວ ພັກເຮົາແມ່ນມີຜົນງານອັນໃຫຍ່ຫລວງ ໃນການຊີ້ນຳ-ນຳພາ ປວງຊົນລາວທັງຊາດ ຕະຫລອດ 65 ປີມານີ້. ກ່ອນອື່ນແມ່ນຍ້ອນພັກມີແນວທາງອັນຖືກຕ້ອງ ຍ້ອນກຳລັງແຮງມະຫາສາມັກຄີຂອງທົ່ວພັກ, ທົ່ວກຳລັງປະກອບອາວຸດ ແລະ ທົ່ວປວງຊົນ, ຍ້ອນການປະສານສົມທົບແໜ້ນ ລະຫວ່າງກຳລັງແຮງຂອງຊາດ ກັບກຳລັງແຮງຂອງຍຸກສະໄໝ, ຍ້ອນພັກເຮົາເວລາໃດກໍຕິດພັນກັບປະຊາຊົນ ອີງໃສ່ກຳລັງແຮງຂອງປະຊາຊົນລາວບັນດາເຜົ່າ ແລະ ເຮັດທຸກສິ່ງທຸກຢ່າງ ເພື່ອຜົນປະໂຫຍດຂອງປະຊາຊົນ.

ຄະນະພັກຮາກຖານຄະນະເລຂາທິການສະພາແຫ່ງຊາດ ມີພາລະບົດບາດ ເປັນເສນາທິການ ໃຫ້ຄະນະບໍລິຫານງານພັກສະພາແຫ່ງຊາດ, ຊີ້ນຳ-ນຳພາວຽກງານຢູ່ໃນຂົງເຂດ ຄະນະເລຂາທິ ການສະພາແຫ່ງຊາດ ເຊິ່ງຄະນະເລຂາທິການສະພາແຫ່ງຊາດ ມີພາລະບົດບາດເປັນເສນາທິການໃຫ້ຄະນະປະຈຳສະພາແຫ່ງຊາດ ໃນວຽກງານຄົ້ນຄວ້າ-ສັງລວມເນື້ອໃນ, ສ້າງສິ່ງອຳນວຍຄວາມສະດວກໃຫ້ແກ່ການເຄື່ອນໄຫວຂອງສະພາແຫ່ງຊາດ, ຄະນະປະຈຳສະພາແຫ່ງຊາດ ໃນວຽກງານບໍລິຫານ-ພິທິການ, ການເງິນ ແລະ ອື່ນໆ. ປັດຈຸບັນ, ຄະນະພັກຮາກຖານຄະນະເລຂາທິການສະພາແຫ່ງຊາດ ປະກອບມີ 5 ໜ່ວຍພັກຂຶ້ນກັບ ເຊິ່ງຊີ້ນຳ-ນຳພາວຽກງານ ຢູ່ 6 ກົມ ຄື: ກົມເລຂານຸການ, ກົມຈັດຕັ້ງ-ພະນັກງານ, ກົມກວດກາ, ກົມບໍລິຫານ-ພິທີການ, ກົມສື່ມວນຊົນ ແລະ ກົມການເງິນ.

ສະຫາຍຍັງໃຫ້ຮູ້ຕື່ມວ່າ: ໄລຍະຜ່ານມາ ກໍໄດ້ເອົາໃຈໃສ່ຊີ້ນຳ-ນຳພາບັນດາໜ່ວຍພັກ ເອົາໃຈໃສ່ປະຕິບັດຕາມສິດ ແລະ ໜ້າທີ່ຂອງຕົນ ເຊິ່ງມີຜົນສຳເລັດໃນຫລາຍດ້ານ ສະແດງອອກດັ່ງນີ້: 1. ວຽກງານຈັດຕັ້ງ-ພະນັກງານ: ໃນນາມເຮັດໜ້າທີ່ເສນາທິການໂດຍກົງ ໃຫ້ຄະນະພັກສະພາແຫ່ງຊາດ ໄດ້ອຳນວຍຄວາມສະດວກຮອບດ້ານແກ່ການເຄື່ອນໄຫວ ຂອງຄະນະບໍລິ ຫານງານພັກສະພາແຫ່ງຊາດ ເປັນຕົ້ນການຄົ້ນຄວ້າບັນຫາບຸກຄະລາກອນ ໂດຍສະເພາະການກຳນົດແຜນສ້າງພະນັກງານນຳພາ-ຄຸ້ມຄອງ ຕາມສິດຂອງຄະນະພັກສະພາແຫ່ງຊາດ, ສູນກາງຄຸ້ມຄອງ (ກົມການເມືອງ ແລະ ຄະນະເລຂາທິການສູນກາງພັກ ຄຸ້ມຄອງ), ໄດ້ນຳພາການຂຽນຕຳແໜ່ງງານ ຂອງບັນດາກົງຈັກເສນາທິການ ຢູ່ໃນສະພາແຫ່ງຊາດ, ການຄົ້ນຄວ້າເພື່ອສະເໜີຂັ້ນເທິງສັບຊ້ອນ, ຍົກຍ້າຍພະນັກງານ, ແຕ່ງຕັ້ງຕຳແໜ່ງບໍລິຫານປະເພດຕ່າງໆ ເພື່ອຮັບປະກັນເຮັດໃຫ້ລະບົບກົງຈັກການຈັດຕັ້ງ ເປັນລະບົບຄົບຊຸດ, ພະນັກ ງານຖືກບັນຈຸສັບຊ້ອນຕາມຕຳແໜ່ງງານທີ່ກຳນົດໄວ້ ລວມທັງຄົ້ນຄວ້າດ້ານນະໂຍບາຍອື່ນໆ; 2. ວຽກງານກວດກາ: ເຖິງວ່າໄດ້ຮັບການສ້າງຕັ້ງເປັນກົງຈັກສະເພາະ ໃນສະພາແຫ່ງຊາດ ຊຸດທີ VIII ນີ້, ບຸກຄະລາກອນເຮັດວຽກໃນຂົງເຂດນີ້ມີໜ້ອຍ ແຕ່ກໍມີຄວາມພະຍາຍາມປະຕິບັດໜ້າທີ່ ມີຜົນສຳເລັດບໍ່ໜ້ອຍ ໂດຍສະເພາະແມ່ນການກວດກາປົກກະຕິຕໍ່ການເຄື່ອນໄຫວວຽກງານພັກ ແລະ ລະບອບແບບແຜນການເຮັດວຽກຂອງກົງຈັກລັດ, ການປະຕິບັດແຜນການສ້າງພັກປອດໃສ, ເຂັ້ມແຂງ ແລະ ໜັກແໜ້ນ, ການແຈ້ງຊັບສິນຂອງພະນັກງານ-ລັດຖະກອນ; ກວດກາໂຄງການລົງທຶນກໍ່ສ້າງພື້ນຖານໂຄງລ່າງ ຂອງສະພາແຫ່ງຊາດ ແລະ ກວດກາສະເພາະກິດໄດ້ຈຳນວນໜຶ່ງ; 3. ວຽກງານເລຂານຸການ: ໄດ້ເປັນເສນາທິການໃຫ້ຄະນະປະຈຳສະພາແຫ່ງຊາດ ໃນດ້ານຕ່າງໆເຊັ່ນ: ຮັບໃຊ້ກອງປະຊຸມສະພາແຫ່ງຊາດ ໂດຍສະເພາະການກະກຽມບົດສະຫລຸບວຽກງານສະພາແຫ່ງຊາດໃນແຕ່ລະໄລຍະ, ເອກະສານປິ່ນອ້ອມອື່ນໆ, ການປະສານງານກັບບັນດາກົງຈັກພາຍໃນສະພາແຫ່ງຊາດ, ຫ້ອງວ່າການສຳນັກງານນາຍົກລັດຖະມົນຕີ ແລະ ພາກສ່ວນກ່ຽວຂ້ອງ ເພື່ອຮັບປະກັນດ້ານເນື້ອໃນໃຫ້ແກ່ກອງປະຊຸມສະພາແຫ່ງຊາດ ແລະ ກອງປະຊຸມຄະນະປະຈຳສະພາແຫ່ງຊາດ; 4. ວຽກງານສື່ມວນຊົນ-ຂໍ້ມູນຂ່າວສານ: ກໍໄດ້ຕັ້ງໜ້າປະຕິບັດວຽກງານ ຕາມຄວາມຮັບຜິດຊອບ ເຊິ່ງປັດຈຸບັນສະພາແຫ່ງຊາດ ມີສື່ເປັນຂອງຕົນເອງ ເຊັ່ນ: ໜັງສືພິມ “ຜູ້ແທນປະຊາຊົນ”, ລາຍການວິທະຍຸຜູ້ “ແທນປະຊາຊົນ” ແລະ ລາຍການໂທລະພາບ “ຜູ້ແທນປະຊາຊົນ” ທັງສາມສື່ນີ້ ກໍຢູ່ໃນຄວາມຮັບຜິດຊອບຂອງຄະນະເລຂາທິການ ແລະ ກໍໄດ້ເອົາໃຈໃສ່ໂຄສະນາພາລະບົດບາດ, ການເຄື່ອນໄຫວຂອງສະພາແຫ່ງຊາດ ຕິດພັນກັບການເຄື່ອນໄຫວຂອງສະພາປະຊາຊົນຂັ້ນແຂວງ. ນອກນັ້ນ, ກໍຍັງມີເວັບໄຊຂອງສະພາແຫ່ງຊາດ ເຊິ່ງສາມາດໂຄສະນາການເຄື່ອນໄຫວໃຫ້ສັງຄົມ ທັງພາຍໃນ ແລະ ຕ່າງປະເທດ ໄດ້ຮັບຮູ້ເຂົ້າໃຈຕໍ່ສິດ ແລະ ໜ້າທີ່ຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ ນັບມື້ສູງຂຶ້ນ; 5. ວຽກງານບໍລິຫານ-ພິທີການ ແລະ ການເງິນ: ກໍໄດ້ມີຜົນສຳເລັດດີສົມຄວນ ໃນການສ້າງສິ່ງອຳນວຍຄວາມສະດວກດ້ານຕ່າງໆ ເຊັ່ນ: ສະຖານທີ່, ໄຟຟ້າ, ນ້ຳປະປາ, ໂທລະສັບ, ພາຫະນະຮັບໃຊ້, ການຈໍລະຈອນເອກະສານ, ພິທີການ ແລະ ອື່ນໆ ລວມທັງການສະໜອງງົບປະມານຮັບໃຊ້ການເຄື່ອນໄຫວ ທັງພາຍໃນ ແລະ ຕ່າງປະເທດ ເຊິ່ງເຮັດໃຫ້ ສະພາແຫ່ງຊາດ, ຄະນະປະຈຳສະພາແຫ່ງຊາດ, ບັນດາກຳມາທິການ, ກົງຈັກທີ່ຄະນະປະຈຳສະພາແຫ່ງຊາດສ້າງຕັ້ງ ສາມາດເຄື່ອນໄຫວປະຕິບັດສິດ ແລະ ໜ້າທີ່ຂອງຕົນມີປະສິດທິຜົນສູງຂຶ້ນເລື້ອຍໆ. ທັງໝົດນັ້ນແມ່ນຜົນງານໂດຍສັງເຂບ ໃນການຊີ້ນຳ-ນຳພາ ຂອງຄະນະພັກຮາກຖານຄະນະເລຂາທິການສະພາແຫ່ງຊາດ ໄລຍະກວ່າ 4 ປີມານີ້.

ຕອນທ້າຍ ສະຫາຍໄດ້ກ່າວຕື່ມວ່າ: ປີ 2020 ແມ່ນໄລຍະທ້າຍຂອງການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ X ຂອງພັກ, ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ VIII, ເປັນໄລຍະທ້າຍອາຍຸການຂອງສະພາແຫ່ງຊາດ ຊຸດທີ VIII ທັງມີຫລາຍວັນປະຫວັດສາດສໍາຄັນຂອງຊາດ, ຂອງພັກ ເປັນຕົ້ນ ວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 65 ປີ, ວັນສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ ຄົບຮອບ 45 ປີ ທັງແມ່ນມື້ຄົບຮອບ 45 ປີ ວັນສ້າງຕັ້ງສະພາແຫ່ງຊາດ, ວັນຄ້າຍວັນເກີດປະທານໄກສອນ ພົມວິຫານ ຜູ້ນຳທີ່ແສນເຄົາລົບຮັກຂອງປວງຊົນລາວທັງຊາດ ຄົບຮອບ 100 ປີ ແລະ ເປັນໄລຍະທີ່ທົ່ວພັກ, ກຳລັງປະກອບອາວຸດ, ປວງຊົນລາວທັງຊາດ ສຸມໃສ່ຫ້າງຫາກະກຽມ ແລະ ສ້າງຂະບວນການ ເພື່ອຂໍ່ານັບຮັບຕ້ອນກອງປະຊຸມໃຫຍ່ ຄັ້ງທີ XI ຂອງພັກ ທີ່ຈະໄຂຂຶ້ນໃນຕໍ່ໜ້ານີ້. ສະນັ້ນ, ກໍເປັນປີທີ່ມີຄວາມໝາຍສຳຄັນທີ່ສຸດ. ສຳລັບຄະນະພັກຮາກຖານຄະນະເລຂາທິການສະພາແຫ່ງຊາດ ກໍໄດ້ມີການກຳນົດແຜນການຂອງຕົນ ເພື່ອຊີ້ນຳ-ນຳພາບັນດາໜ່ວຍພັກ, ສະມາຊິກພັກ ກໍຄືພະນັກງານ-ລັດຖະກອນ ຢູ່ໃນຄະນະເລຂາທິການສະພາແຫ່ງຊາດ ປະຕິບັດວຽກຕ່າງໆ ເປັນຕົ້ນ: ສືບຕໍ່ສຶກສາອົບຮົມການເມືອງ-ແນວຄິດ ໃຫ້ສະມາຊິກພັກ, ພະນັກງານ-ລັດຖະກອນຂອງຕົນ ເຮັດໃຫ້ມີຄວາມໜັກແໜ້ນທາງດ້ານການເມືອງ, ມີຄວາມອຸ່ນອຽນທຸ່ນທ່ຽງ ເຊື່ອໝັ້ນຕໍ່ການນຳພາຂອງພັກ ຕັ້ງໜ້າປະຕິບັດວຽກງານທີ່ໄດ້ຮັບມອບໝາຍ; ສືບຕໍ່ຈັດຕັ້ງວຽກງານເສນາທິການໃຫ້ແກ່ຄະນະພັກຢ່າງຮອບດ້ານ, ນຳພາໜ່ວຍພັກຈັດຕັ້ງຜັນຂະຫຍາຍເນື້ອໃນຂໍ້ແຂ່ງຂັນສ້າງພັກປອດໃສ, ເຂັ້ມແຂງ ແລະ ໜັກແໜ້ນ ໃຫ້ປາກົດຜົນເປັນຈິງ ແລະ ເຂົ້າສູ່ລວງເລິກ ຕິດພັນກັບການຈັດຕັ້ງປະຕິບັດຂໍ້ແຂ່ງຂັນຂະບວນການ “ຮັກຊາດ ແລະ ພັດທະນາ” ຢູ່ພາຍໃນຄະນະເລຂາທິການສະພາແຫ່ງຊາດ. ຍັງຈະໄດ້ເປັນເຈົ້າການສະຫລຸບສັງລວມການຈັດຕັ້ງປະຕິບັດວຽກງານດັ່ງກ່າວ ຢູ່ພາຍໃນສະພາແຫ່ງຊາດ ເພື່ອລາຍງານຕໍ່ຄະນະຊີ້ນຳລະດັບຊາດ ໃນທ້າຍປີນີ້; ຊີ້ນຳ-ນຳພາການຈັດຕັ້ງປະຕິບັດວຽກງານວິຊາສະເພາະ ຕາມຄວາມຮັບຜິດຊອບຂອງຄະນະເລຂາທິການສະພາແຫ່ງຊາດ ໂດຍສະເພາະການປະສານສົມທົບກັບພາກສ່ວນກ່ຽວຂ້ອງຕ່າງໆ ເພື່ອກະກຽມ ແລະ ດຳເນີນກອງປະຊຸມສະໄໝສາມັນເທື່ອທີ 9 ແລະ 10 ຂອງສະພາແແຫ່ງຊາດຊຸດທີ VIII ຮັບປະກັນເຮັດໃຫ້ກອງປະຊຸມດັ່ງກ່າວ ສາມາດບັນລຸຕາມແຜນການທີ່ວາງໄວ້. ພ້ອມດຽວກັນນັ້ນ, ກໍແມ່ນການຮັບໃຊ້ກອງປະຊຸມຄະນະປະຈຳສະພາແຫ່ງຊາດ ໃນແຕ່ລະເດືອນ. ສອງກອງປະຊຸມສະພາແຫ່ງຊາດ ທີ່ຍັງເຫລືອ ແລະ ກອງປະຊຸມຄະນະປະຈຳສະພາແຫ່ງຊາດ ແມ່ນສຳຄັນຫລາຍ ເພາະຈະໄດ້ພິຈາລະນາຕົກລົງບັນຫາສຳຄັນຕ່າງໆຂອງຊາດ. ສະນັ້ນ, ຄະນະເລຂາທິການສະພາແຫ່ງຊາດ ເຊິ່ງເປັນເສນາທິການ ທັງດ້ານເນື້ອໃນ ແລະ ການອຳນວຍຄວາມສະດວກ ຈະຕ້ອງປະຕິບັດໜ້າທີ່ຂອງຕົນໃຫ້ດີທີ່ສຸດ; ຊີ້ນຳ-ນຳພາສະມາຊິກພັກ, ພະນັກງານ-ລັດຖະກອນໃນຂົງເຂດຕົນ ປະກອບສ່ວນເຂົ້າໃນການກະກຽມໃຫ້ແກ່ການເລືອກຕັ້ງສະມາຊິກສະພາແຫ່ງຊາດ ຊຸດທີ IX ແລະ ສະມາຊິກສະພາປະຊາຊົນຂັ້ນແຂວງ ຊຸດທີ II ເຊິ່ງຄາດວ່າຈະມີການເລືອກຕັ້ງ ໃນຕົ້ນປີ 2021.

           ໃນໂອກາດວັນສ້າງຕັ້ງພັກຄົບຮອບ 65 ປີ, ຖານະທີ່ເປັນສະມາຊິກພັກຜູ້ໜຶ່ງ ທັງເປັນເລຂາຄະນະພັກຮາກຖານຄະນະເລຂາທິການສະພາແຫ່ງຊາດ ໃນນາມສ່ວນຕົວ ແລະ ຕາງໜ້າໃຫ້ສະມາຊິກພັກ, ພະນັກງານ-ລັດຖະກອນ ຂອງຄະນະເລຂາທິການສະພາແຫ່ງຊາດ ຂໍມີບາງຄຳເຫັນ ຄື: ພວກເຮົາໄດ້ມີໂອກາດຮໍ່າຮຽນ, ປະຕິບັດໜ້າທີ່ວຽກງານຕ່າງໆ, ຊີວິດການເປັນຢູ່ໄດ້ຮັບການພັດທະນາດີຂຶ້ນເລື້ອຍໆ ທັງໝົດນີ້ ແມ່ນຍ້ອນພັກໄດ້ມີແນວທາງນະໂຍບາຍທີ່ຖືກຕ້ອງ, ເປັນຄັນທຸງທີ່ສະຫວ່າງສະໄຫວ, ໃຫ້ການຊີ້ນຳ-ນຳພາ ຢ່າງໃກ້ຊິດ ແລະ ແທດເຖິງ; ໂອກາດ 65 ປີ ແຫ່ງການສ້າງຕັ້ງພັກປະຊາຊົນປະຕິວັດລາວ ຂໍອວຍພອນໄຊອັນປະເສີດ ມາຍັງຜູ້ນຳພັກ-ລັດ ຕະຫລອດຮອດສະມາຊິກພັກ, ພະນັກງານ-ລັດຖະກອນ, ທະຫານ, ຕຳຫລວດ ປວງຊົນລາວບັນດາເຜົ່າ ໃນທົ່ວປະເທດ ຈົ່ງມີສຸຂະພາບແຂງແຮງ, ພ້ອມກັນປະຕິບັດໜ້າທີ່ ແລະ ພັນທະຂອງຕົນ ຕາມແນວທາງຂອງພັກ, ລັດຖະທຳມະນູນ ແລະ ກົດໝາຍວາງໄວ້. ເຊື່ອໝັ້ນວ່າ ພາຍໃຕ້ການນຳພາຂອງພັກ, ຄວາມສາມັກຄີທົ່ວປວງຊົນລາວທັງຊາດ ປະເທດຊາດຂອງພວກເຮົາ ຈະໄດ້ຮັບການພັດທະນາສູ່ຈຸດໝາຍສັງຄົມນິຍົມ ຢ່າງໜັກແໜ້ນ.