ກບຜ ປຶກສາຫາລືກະກຽມສຳມະນາວຽກງານສາສະໜາຮ່ວມກັບບັນດາກະຊວງ

08/07/2020 00:00 -

        (ສພຊ) ວັນທີ 6 ກໍລະກົດຜ່ານມາ ທີ່ສະພາແຫ່ງຊາດ ນະຄອນຫລວງວຽງຈັນ ກໍາມາທິການບັນດາເຜົ່າ (ກບຜ) ໄດ້ຈັດກອງປະຊຸມປຶກສາຫາລືກ່ຽວກັບການເປັນວິທະຍາກອນ ໃນກອງປະຊຸມສໍາມະນາວຽກງານສາສະໜາ ແລະ ການຄຸ້ມຄອງສາສະໜາ ຮ່ວມກັບບັນດາກະຊວງ ໂດຍການເປັນປະທານຂອງທ່ານ ນາງ ບົວພັນ ລີໄກຢາ ຄະນະປະຈໍາສະພາແຫ່ງຊາດ, ປະທານ ກບຜ; ເຂົ້າຮ່ວມມີບັນດາທ່ານຮອງປະທານກໍາມາທິການ, ຮອງລັດຖະມົນຕີກະຊວງພາຍໃນ, ຮອງສູນກາງແນວລາວສ້າງຊາດ, ຕາງໜ້າຈາກກະຊວງການຕ່າງປະເທດ, ກະຊວງປ້ອງກັນຄວາມສະຫງົບ ພ້ອມດ້ວຍພາກສ່ວນທີ່ກ່ຽວຂ້ອງ.

        ກອງປະຊຸມຄັ້ງນີ້, ກໍເພື່ອແຈ້ງຫົວຂໍ້ໃຫ້ແຕ່ລະພາກສ່ວນກະກຽມເນື້ອໃນກ່ຽວກັບການເປັນ ວິທະຍາກອນ ໃນກອງປະຊຸມສໍາມະນາວຽກງານສາສະໜາ ແລະ ການຄຸ້ມຄອງສາສະໜາ ໂດຍມີນັກສໍາມະນາກອນທີ່ມາຈາກ 18 ແຂວງທົ່ວປະເທດ ໂດຍຈະແມ່ນພະແນກພາຍໃນແຂວງ ແລະ ແນວລາວສ້າງຊາດແຂວງ.

        ໃນວັນດຽວກັນ, ທ່ານ ນາງ ບົວພັນ ລີໄກຢາ ໄດ້ມອບ ໃບຂອບໃຈ ໃຫ້ທ່ານ ນາງ ອາລີ ພົນເສນາ ອໍານວຍການໂຮງຮຽນສິນໄຊ ທີ່ໄດ້ມອບເຄື່ອງຊ່ວຍເຫລືອໃຫ້ໂຮງຮຽນປະຖົມສາມັນ ກິນນອນຊົນເຜົ່າ ຢູ່ເມືອງວຽງໄຊ ແຂວງຫົວພັນ, ເຄື່ອງທີ່ນໍາໄປມອບ ແມ່ນເຄື່ອງນຸ່ງກັນໜາວ ຈໍານວນ 200 ຊຸດ ລວມມູນຄ່າ 4 ລ້ານກວ່າກີບ ເຄື່ອງດັ່ງກ່າວ ແມ່ນໄດ້ໄປມອບໃຫ້ໂຮງຮຽນກິນ ນອນຊົນເຜົ່າເປັນທີ່ຮຽບຮ້ອຍແລ້ວ.