ຄະນະຜູ້ແທນ ສພຊ ສຳເລັດການເຂົ້າຮ່ວມກອງປະຊຸມ AIPACODD

08/07/2020 00:00 -

             (ສພຊ) ໃນວັນທີ 29 ມິຖຸນາ 2020, ທີ່ສະພາແຫ່ງຊາດ, ຄະນະຜູ້ແທນສະພາແຫ່ງຊາດ ນໍາໂດຍທ່ານ ອຳໄພ ຈິດມານົນ ຮອງປະທານກຳມາທິການກົດໝາຍ ໄດ້ເຂົ້າຮ່ວມກອງປະຊຸມສະພາທີ່ປຶກສາຂອງໄອປາ ກ່ຽວກັບໄພອັນຕະລາຍຂອງຢາເສບຕິດ (The 3rd Meeting of the AIPA Advisory Council on Dangerous Drug-AIPACODD) ຄັ້ງທີ 3 ໂດຍຜ່ານລະບົບອອນລາຍ ເຊິ່ງຈັດໂດຍສະພາແຫ່ງຊາດ ສສ.ຫວຽດນາມ ໃນຖານະເປັນປະທານສະມັດຊາລັດຖະສະພາລະຫວ່າງຊາດອາຊຽນ (AIPA). ກ່າວໄຂກອງປະຊຸມຄັ້ງນີ້ ໂດຍ ທ່ານ ນາງ ຕ໋ອງ ທິ ຝອງ ຮອງປະທານສະພາແຫ່ງຊາດ ແຫ່ງ ສສ.ຫວຽດນາມ ໂດຍການເຂົ້າຮ່ວມຂອງບັນດາສະມາຊິກສະພາແຫ່ງຊາດຈາກປະເທດສະມາຊິກສະມັດຊາລັດຖະສະພາລະຫວ່າງຊາດອາຊຽນ (AIPA), ຜູ້ຕາງໜ້າຈາກອົງການສະຫະປະຊາຊາດປະຈຳພາກພື້ນກ່ຽວກັບຢາເສບຕິດ ແລະ ອາດສະຍາກຳ (UNODC), ຜູ້ຕາງໜ້າຈາກເຈົ້າໜ້າທີ່ອາວຸໂສອາຊຽນກ່ຽວກັບຢາເສບຕິດ (ASOD) ແລະ ຕາງໜ້າສະຖານທູດຈາກປະເທດອາຊຽນ.

             ຄະນະຜູ້ແທນໄດ້ພ້ອມກັນປຶກສາຫາລື ແລະ ແລກປຽນຂໍ້ມູນ-ຂ່າວສານກ່ຽວກັບມາດຕະການໃນການຄວບຄຸມຢາເສບຕິດໃນປະເທດຂອງຕົນ ແລະ ການນຳໃຊ້ມາດຕະການໄລຍະການແຜ່ລະບາດພະຍາດ Covid-19 ທີ່ໄດ້ສົ່ງຜົນກະທົບ ແລະ ເປັນສິ່ງທ້າທາຍອັນໜັກໜ່ວງຕໍ່ພາກພື້ນ ແລະ ສາກົນ ທີ່ຕ້ອງໄດ້ເພີ່ມທະວີການຮ່ວມມືກັນໃນການຕ້ານໄພຂົ່ມຂູ່ຈາກຢາເສບຕິດ ແລະ ນຳໃຊ້ສານເຄມີເຂົ້າໃນທາງການແພດ ໃຫ້ມີຄວາມເຂັ້ມງວດ ບໍ່ໃຫ້ສວຍໃຊ້ໄປຜະລິດຢາເສບຕິດ. ກອງປະຊຸມຄັ້ງນີ້ ຍັງໄດ້ຮັບຮອງເອົາມະຕິວ່າດ້ວຍການຫັນຄຳເວົ້າທີ່ເປັນນາມມະທຳໃຫ້ເປັນການກະທຳເພື່ອກ້າວສູ່ປະຊາຄົມອາຊຽນທີ່ປອດຢາເສບຕິດ ໂດຍສົ່ງເສີມການຮ່ວມມືສອງຝ່າຍ, ພາກພື້ນ ແລະ ສາກົນ ໂດຍຜ່ານການແລກປ່ຽນຂໍ້ມູນ-ຂ່າວສານ, ການຮ່ວມມືຜ່ານແດນ, ບັນດາໂຄງການຕ່າງໆ, ການຊ່ວຍເຫລືອທາງດ້ານເຕັກນິກ ແລະ ປັບປຸງນິຕິກຳຕ່າງໆທີ່ກ່ຽວຂ້ອງກັບການຄວບຄຸມຢາເສບຕິດໃນພາກພື້ນ ແລະ ໃນໂລກ ໃຫ້ມີປະສິດທິຜົນກວ່າເກົ່າ ໂດຍສະເພາະໃນໄລຍະການແຜ່ລະບາດຂອງພະຍາດ Covid-19. ມະຕິດັ່ງກ່າວ ຈະໄດ້ນໍາສະເໜີຕໍ່ກອງປະຊຸມໃຫຍ່ AIPA ຄັ້ງທີ 41 ທີ່ ສສ.ຫວຽດນາມ ຈະເປັນເຈົ້າພາບໃນທ້າຍປີ 2020 ນີ້.