ກບຜ ຈັດສຳມະນາການຄຸ້ມຄອງການເຄື່ອນໄຫວວຽກງານສາສະໜາ

22/07/2020 00:00 -

           (ສພຊ) ກອງປະຊຸມສໍາມະນາຂອງກໍາມາທິການບັນດາເຜົ່າ (ກບຜ) ສະພາແຫ່ງຊາດ ກ່ຽວກັບການຄຸ້ມຄອງການເຄື່ອນໄຫວວຽກງານສາສະໜາ ໄດ້ຈັດຂຶ້ນໃນລະຫວ່າງວັນທີ 20-21 ກໍລະກົດ 2020 ທີ່ເມືອງແກ້ວອຸດົມ ແຂວງວຽງຈັນ ພາຍໃຕ້ການປະທານເປັນຂອງທ່ານ ນາງ ບົວພັນ ລີໄກຢາ ປະທານ ກບຜ ແລະ ເຂົ້າຮ່ວມເປັນປະທານໃນພິທີເປີດໂດຍທ່ານ ແສງນວນ ໄຊຍະລາດ ຮອງປະທານສະພາແຫ່ງຊາດ ຜູ້ຊີ້ນຳວຽກງານ ກບຜ; ເຂົ້າຮ່ວມມີທ່ານ ຄຳສຸກ ວີອິນທະວົງ ປະທານກຳມາທິການປ້ອງກັນຊາດ-ປ້ອງກັນຄວາມສະຫງົບ (ປກຊ-ປກສ) ສະພາແຫ່ງຊາດ, ຄະນະນຳຂອງ ກບຜ, ບັນດາວິທະຍາກອນຜູ້ຊົງຄຸນທິຈາກສູນກາງແນວລາວສ້າງຊາດ, ກະຊວງພາຍໃນ, ກະຊວງ ປກສ  ແລະ ກະຊວງການຕ່າງປະເທດ, ມີຮອງປະທານສະພາປະຊາຊົນແຂວງວຽງຈັນ, ຄະນະພະແນກພາຍໃນແຂວງ, ຄະນະປະທານແນວລາວສ້າງຊາດ, ປກສ ແຂວງ ຈາກ 6 ແຂວງຄື: ຫລວງນໍ້າທາ, ຫົວພັນ, ຊຽງຂວາງ, ວຽງຈັນ, ບໍລິຄຳໄຊ ແລະ ອັດຕະປື ຕະຫລອດຮອດຄະນະກົມ, ຄະນະພະແນກ, ວິຊາການພາຍໃນ ກບຜ, ກົມກ່ຽວຂ້ອງຂອງສະພາແຫ່ງຊາດ ແລະ ແຂກຖືກເຊີນເຂົ້າຮ່ວມ.

           ທັງນີ້, ກໍເພື່ອຕີລາຄາຄືນການຈັດຕັ້ງປະຕິບັດພາລະບົດບາດຂອງພາກສ່ວນກ່ຽວຂ້ອງຕ່າງໆ ຕໍ່ການຄຸ້ມຄອງການເຄື່ອນໄຫວວຽກງານສາສະໜາ ແລະ ການແກ້ໄຂບັນຫາດັ່ງກ່າວໃນໄລຍະຜ່ານມາ ແລະ ທັງເພື່ອຖອດຖອນບົດຮຽນ ກ່ຽວກັບການພົວພັນປະສານງານລະຫວ່າງອົງການຕ່າງໆທີ່ກ່ຽວຂ້ອງດ້ວຍກັນ ແລະ ລະຫວ່າງບັນດາພາກສ່ວນທີ່ກ່ຽວຂ້ອງກັບກຳມາທິການບັນດາເຜົ່າຕໍ່ກັບການຄຸ້ມຄອງກັບກຳມາທິການການເຄື່ອນໄຫວວຽກງານສາສະໜາ.

          ໃນກອງປະຊຸມ, ວິທະຍາກອນໄດ້ຂຶ້ນສະເໜີຫົວຂໍ້ເນື້ອໃນຕ່າງໆ ຄື: ການຕີລາຄາການຈັດຕັ້ງປະຕິບັດ ດຳລັດວ່າດ້ວຍການຄຸ້ມຄອງ ແລະ ການປົກປ້ອງການເຄື່ອນໄຫວສາສະໜາ ຢູ່ ສປປລາວ ສະບັບເລກທີ 315/ລບ, ລົງວັນທີ 16/8/2016 ຕິດພັນກັບສະພາບຕົວຈິງໃນການຈັດຕັ້ງປະຕິບັດພາລະບົດບາດຂອງກະຊວງພາຍໃນ ໃນການຄຸ້ມຄອງວຽກສາສະໜາ; ການປະຕິບັດພາລະບົດບາດຂອງສູນກາງແນວລາວສ້າງຊາດ ກ່ຽວກັບວຽກງານສາສະໜາໃນໄລຍະຜ່ານມາ; ການຄຸ້ມຄອງອົງການ INGOs ທີ່ເຄື່ອນໄຫວຢູ່ໃນ ສປປລາວ ແລະ ພັນທະໃນການຈັດຕັ້ງປະຕິບັດສົນທິສັນຍາສາກົນທີ່ ສປປລາວ ເປັນພາຄີ; ການປະຕິບັດພາລະບົດບາດຂອງກົມໃຫຍ່ສັນຕິບານ, ກະຊວງ ປກສ ຕໍ່ກັບການແກ້ໄຂປາກົດການຫຍໍ້ທໍ້ທາງດ້ານສາສະໜາທີ່ເກີດຶ້ນຜ່ານມາ ແລະ ບົດລາຍງານຜົນການຕິດຕາມກວດກາຂອງກຳມາທິການບັນດາເຜົ່າ ກ່ຽວກັບການແກ້ໄຂປາກົດການຫຍໍ້ທໍ້ຂອງສາສະໜາທີ່ເກີດຂຶ້ນໃນລາວ 5 ປີຜ່ານມາ; ພ້ອມນັ້ນ, ຜູ້ເຂົ້າຮ່ວມຍັງໄດ້ມີການສົນທະນາປະກອບຄຳຄິດຄຳເຫັນ ແລະ ແລກປ່ຽນບົດຮຽນເຊິ່ງກັນ ແລະ ກັນຢ່າງກົງໄປກົງມາ ເຮັດໃຫ້ກອງປະຊຸມຄັ້ງນີ້ປະສົບຜົນສຳເລັດໄດ້ຕາມລະດັບຄາດໝາຍທີ່ວາງໄວ້.

          ໂອກາດດັ່ງກ່າວ, ທ່ານ ແສງນວນ ໄຊຍະລາດ ໄດ້ມີຄຳເຫັນໃຫ້ທິດຊີ້ນຳຕໍ່ກອງປະຊຸມວ່າ: ບັນຫາສາສະໜາເປັນບັນຫາທີ່ລະອຽດອ່ອນ ເຊິ່ງຕິດພັນກັບຄວາມເຊື່ອທາງດ້ານຈິດໃຈ ຂອງປະຊາຊົນບັນດາເຜົ່າ ທັງຍັງຕິດພັນກັບພາລະບົດບາດຄວາມຮັບຜິດຊອບຂອງຫລາຍພາກສ່ວນ ການແກ້ໄຂບັນຫາສາສະໜາ ຈຶ່ງຕ້ອງໄດ້ແກ້ດ້ວຍຄວາມເຂົ້າໃຈ, ນີ້ມນວນ ແລະ ມີຫລັກການຕາມລວງດຽວ, ພາກສ່ວນທີ່ຮັບຜິດຊອບໃນການຄຸ້ມຄອງ ແລະ ປົກປ້ອງການເຄື່ອນໄຫວສາສະໜາ ນອກຈາກຕ້ອງກຳແໜ້ນບັນດານິຕິກຳທີ່ກ່ຽວຂ້ອງ ແລະ ມີຄວາມເປັນເອກະພາບສູງ ໃນການແກ້ໄຂໃຫ້ຖືກຕ້ອງຕາມກົດໝາຍແລ້ວ ຍັງຈະຕ້ອງໄດ້ເອົາໃຈໃສ່ສຶກສາເພື່ອເຂົ້າໃຈຢ່າງເລິກເຊິ່ງຕໍ່ປັດຊະຍາ, ຫລັກທຳຄຳສອນດັ້ງເດີມຂອງແຕ່ລະສາສະໜາທີ່ມີຄວາມແຕກຕ່າງກັນໃນແຕ່ລະນິກາຍ ເມື່ອເຂົ້າໃຈໄດ້ເລິກເຊິ່ງກໍຈະຊ່ວຍໃຫ້ການແກ້ໄຂບັນຫາໄດ້ຢ່າງຖືກຕ້ອງ ຫລີກລ່ຽງການຕີລາຄາ ແລະ ແກ້ໄຂແບບແຂງກະດ້າງແຕ່ຝ່າຍດຽວ; ຕ້ອງໄດ້ສືບຕໍ່ເຜີຍແຜ່ ດຳລັດ 315/ລບ ຢ່າງກວ້າງຂວາງ ໃຫ້ອຳນາດການປົກຄອງຂັ້ນບ້ານ  ກໍຄືພີ່ນ້ອງປະຊາຊົນບັນດາເຜົ່າ ໂດຍສະເພາະແມ່ນຜູ້ເຊື່ອຖືສາສະໜາຕ່າງໆ ໃຫ້ມີຄວາມເຂົ້າໃຈຢ່າງເລິກເຊິ່ງ ຈຶ່ງຈະເຮັດໃຫ້ການຈັດຕັ້ງປະຕິບັດຕົວຈິງຖືກຕ້ອງສອດຄ່ອງກັນດີ; ພ້ອມນັ້ນ, ທ່ານໄດ້ເນັ້ນໜັກວ່າ: ແນວລາວສ້າງຊາດແຂວງ, ພະແນກພາຍໃນແຂວງ, ເຈົ້າໜ້າທີ່ ປກສ  ແລະ ພາກສ່ວນທີ່ກ່ຽວຂ້ອງ ຕ້ອງປະສານສົມທົບແໜ້ນກັບສະພາປະຊາຊົນແຂວງ ເມື່ອມີປາກົດການຫຍໍ້ທໍ້ທາງສາສະໜາເກີດຂຶ້ນກ່ອນຈະລົງໄປແກ້ໄຂສະເໜີໃຫ້ ແນວລາວສ້າງຊາດແຂວງ, ພະແນກພາຍໃນ, ປກສ ແລະ ພາກສ່ວນທີ່ກ່ຽວຂ້ອງຕ້ອງຮີບຮ້ອນສົມທົບກັບກຳມະການຂອງ ກບຜແລະ ສະມາຊິກສະພາປະຊາຊົນແຂວງປະຈຳເມືອງດັ່ງກ່າວ ເພື່ອພ້ອມກັນປຶກສາຫາລື ແລະ ມີຄວາມເປັນເອກະພາບສູງຕໍ່ຮູບແບບ ແລະ ວິທີການແກ້ໄຂພາຍຫລັງເປັນເອກະພາບກັນແລ້ວຈຶ່ງພ້ອມກັນລົງໄປແກ້ໄຂ ແລະ ບັນຫາອື່ນໆ.

                                                                             ແຫຼ່ງຂ່າວທີ່ມາ: ສະພາແຫ່ງຊາດ