ສສຊ ປະຈຳເຂດເລືອກຕັ້ງທີ 8 ເຜີຍແຜ່ຜົນສຳເລັດກອງປະຊຸມສະໄໝສາມັນເທື່ອທີ 9

07/08/2020 00:00 -

         (ສພຊ) ລະຫວ່າງວັນທີ 24-27 ກໍລະກົດ 2020, ທ່ານ ທັນຕາ ກອງຜາລີ ຮອງປະທານກຳມາທິການແຜນການ, ການເງິນ ແລະ ການກວດສອບ (ກຜງສ) ສະພາແຫ່ງຊາດ, ສະມາຊິກສະພາແຫ່ງຊາດ (ສສຊ) ປະຈຳເຂດເລືອກຕັ້ງທີ 8 ແຂວງຫົວພັນ  ໄດ້ເຄື່ອນໄຫວເຮັດວຽກຢູ່ບ້ານ ພັນລໍ, ບ້ານນາແລ ເມືອງຮ້ຽມ ແລະ ບ້ານປ່າຄາເໜືອ, ບ້ານປ່າຄາໃຕ້ ເມືອງຫົວເມືອງ ໂດຍການເຂົ້າຮ່ວມຂອງຄະນະພັກບ້ານ, ນາຍບ້ານ, ຮອງນາຍບ້ານ, ຕະຫລອດຮອດພໍ່ແມ່ປະຊາບັນດາເຜົ່າ ນັບແຕ່ອາຍຸ 18 ປີຂຶ້ນໄປ ເຊິ່ງມີຜູ້ເຂົ້າຮ່ວມຮັບຟັງທັງໝົດ 338 ຄົນ ຍິງ 155 ຄົນ.

         ການລົງເຄື່ອນໄຫວເຮັດວຽກຄັ້ງນີ້ ທ່ານໄດ້ນຳເອົາຜົນສຳເລັດກອງປະຊຸມສະໄໝສາມັນເທື່ອທີ 9 ຂອງສະພາແຫ່ງຊາດຊຸດທີ VIII ລົງເຜີຍແຜ່ ເປັນຕົ້ນບົດລາຍງານຂອງລັດຖະບານ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ ແລະ ແຜນເງິນຕາ 5 ເດືອນ, ຄາດຄະເນ 6 ເດືອນຕົ້ນປີ ແລະ ທິດທາງວຽກງານຈຸດສຸມ 6 ເດືອນທ້າຍປີ 2020; ພິຈາລະນາຮັບຮອງເອົາການແຕ່ງຕັ້ງ ປະທານກຳມາທິການແຜນການ ການເງິນ ແລະ ການກວດສອບ ຕາມການສະເໜີຂອງຄະນະປະຈຳສະພາແຫ່ງຊາດ; ບົດລາຍງານການເຄື່ອນໄຫວ 6 ເດືອນຕົ້ນປີ 2020 ແລະ ແຜນການເຄື່ອນໄຫວວຽກງານຮອດກອງປະຊຸມຄັ້ງປະຖົມມະລືກ ຂອງສະພາແຫ່ງຊາດຊຸດທີ IX; ການສະເໜີຮ່າງກົດໝາຍວ່າດ້ວຍພາສີ ແລະ ຮ່າງກົດໝາຍວ່າດ້ວຍການປັບປຸງບາງມາດຕາ ຂອງກົດໝາຍວ່າດ້ວຍສະພາແຫ່ງຊາດ ກົດໝາຍວ່າດ້ວຍສະພາປະຊາຊົນຂັ້ນແຂວງ, ກົດໝາຍວ່າດ້ວຍການເລືອກຕັ້ງສະມາຊິກສະພາແຫ່ງຊາດ ແລະ ສະພາປະຊາຊົນຂັ້ນແຂວງ; ຮ່າງກົດໝາຍວ່າດ້ວຍການປັບປຸງບາງມາດຕາ ຂອງກົດໝາຍວ່າດ້ວຍນ້ຳ ແລະ ຊັບພະຍາກອນນ້ຳ ແລະ ກົດໝາຍວ່າດ້ວຍການປົກປັກຮັກສາສິ່ງແວດລ້ອມ; ບົດລາຍງານຜົນການຕິດຕາມກວດກາຂອງຄະນະປະຈຳສະພາແຫ່ງຊາດ ກ່ຽວກັບການຄຸ້ມຄອງການສຳຫລວດ ແລະ ການຂຸດຄົ້ນແຮ່ທາດ, ຫີນແຮ່ ແລະ ຫີນຜາ. ຫລັງຈາກນັ້ນ ໄດ້ເປີດໂອກາດໃຫ້ຜູ້ມີສິດເລືອກຕັ້ງໄດ້ສະເໜີຄວາມຄິດຄວາມເຫັນ, ຄວາມມຸ່ງມາດປາຖະໜາຂອງຕົນ ຕໍ່ສະມາຊິກສະພາແຫ່ງຊາດ ຄຳສະເໜີຂອງພໍ່ແມ່ປະຊາຊົນສ່ວນຫລາຍຈະກ່ຽວພັນກັບວຽກງານໂຍທາທິການ-ຂົນສົ່ງ, ວຽກງານສາທາລະນະສຸກ, ວຽກງານສະຫວັດດີການສັງຄົມ ແລະ ບັນຫາປາກົດການຫຍໍ້ທໍ້ຕ່າງໆ ທີ່ເກີດຂຶ້ນໃນບ້ານ, ຈາກນັ້ນ ສະມາຊິກສະພາແຫ່ງຊາດ, ສະມາຊິກສະພາປະຊາຊົນແຂວງ ໄດ້ຊີ້ແຈງກັບທີ່ບາງຄໍາສະເໜີໃຫ້ປະຊາຊົນຮັບຊາບ ແລະ ບາງຄຳສະເໜີ ແມ່ນໄດ້ນຳໄປປະສານສົມທົບກັບພາກສ່ວນກ່ຽວຂ້ອງເພື່ອແກ້ໄຂ.

        ຕອນທ້າຍ ທ່ານ ທັນຕາ ກອງຜາລີ ຍັງໄດ້ຮຽກຮ້ອງມາຍັງພໍ່ແມ່ປະຊາຊົນບັນດາເຜົ່າ ຈົ່ງພ້ອມກັນສາມັກຄີຮັກແພງເບິ່ງແຍງ ຊ່ວຍເຫລືອເຊິ່ງກັນແລະກັນ, ເອົາໃຈໃສ່ສືບຕໍ່ໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ຕິດພັນກັບວຽກງານການພັດທະນາຊົນນະບົດ, ລຶບລ້າງຄວາມທຸກຍາກ ຂອງປະຊາຊົນບັນດາເຜົ່າ ໃຫ້ນັບມື້ພັດທະນາຂຶ້ນເລື້ອຍໆ.               ​                                                                                  

                                                                                        ແຫຼ່ງຂ່າວທີ່ມາ: ສະພາແຫ່ງຊາດ