ປະທານ ກກໝ ໃຫ້ສໍາພາດ ເນື່ອງໃນໂອກາດວັນສ້າງຕັ້ງວັນລັດຖະທໍາມະນູນ ຄົບຮອບ 29 ປີ

18/08/2020 00:00 -

        ໃນຕອນບ່າຍວັນທີ 13 ສິງຫາ 2020 ທີ່ຫ້ອງຮັບແຂກສະພາແຫ່ງຊາດ ທ່ານ ສາຍທອງ ແກ້ວດວງດີ ປະທານກໍາມາທິການກົດໝາຍ (ກກໝ) ໄດ້ໃຫ້ສໍາພາດຕໍ່ສື່ມວນຊົນ ເນື່ອງໃນໂອກາດວັນສ້າງຕັ້ງວັນລັດຖະທໍາມະນູນ ຄົບຮອບ 29 ປີ (15 ສິງຫາ 1991-15 ສິງຫາ 2020) ບາງຕອນສໍາຄັນວ່າ: ພາຍຫລັງປະເທດຊາດ ໄດ້ຮັບການສະຖາປະນາເປັນ ສປປ ລາວ ພັກໄດ້ວາງແນວທາງ ແລະ ນຳພາປະຊາຊົນປະຕິບັດສອງໜ້າທີ່ຍຸດທະສາດຄື: ປົກປັກຮັກສາ ແລະ ສ້າງສາພັດທະນາ ປະເທດຊາດ ປີ 1986 ພັກໄດ້ວາງແນວທາງປ່ຽນແປງໃໝ່ຮອບດ້ານ ໂດຍເລີ່ມຈາກການປ່ຽນແປງທາງດ້ານເສດຖະກິດ, ຫັນຈາກການຄຸ້ມຄອງລວມສູນບໍລິຫານເກື້ອກູນ ໄປສູ່ການຄຸ້ມຄອງຕາມກົນໄກຕະຫລາດ ທີ່ມີການໄລ່ລຽງເສດຖະກິດ ແລະ ມີການດັດສົມຂອງລັດ ໂດຍອີງໃສ່ຄວາມຮຽກຮ້ອງຕ້ອງການແຫ່ງການປ່ຽນແປງໃໝ່ດັ່ງກ່າວ ຈຶ່ງມີຄວາມຈຳເປັນ ຕ້ອງຫັນໄປສູ່ການຄຸ້ມຄອງລັດດ້ວຍລັດຖະທຳມະນູນ ແລະ ກົດໝາຍ ຢ່າງເປັນເອກະພາບດ້ວຍເຫດນັ້ນ ກອງປະຊຸມ ເທື່ອທີ 6 ຂອງສະພາປະຊາຊົນສູງສຸດ ຊຸດທີ 2 ປີ 1991 ຈຶ່ງໄດ້ພິຈາລະນາ, ຮັບຮອງເອົາລັດຖະທຳມະນູນ ສະບັບທຳອິດ ຂອງ ສປປລາວ ເຊິ່ງໄດ້ປະກາດໃນວັນທີ 15 ສິງຫາ 1991.
        ລັດຖະທຳມະນູນ ເປັນກົດໝາຍພື້ນຖານຂອງຊາດ, ທັງເປັນການຫັນແນວທາງປ່ຽນແປງໃໝ່ຢ່າງຮອບດ້ານ ທີ່ມີຫລັກການຂອງພັກປະຊາຊົນປະຕິວັດລາວ ມາເປັນກົດໝາຍພື້ນຖານຂອງລະບອບປະຊາທິປະໄຕປະຊາຊົນ ເພື່ອສຶກສາອົບຮົມປະຊາຊົນລາວບັນດາເຜົ່າ ໃຫ້ຍົກສູງນ້ຳໃຈຮັກຊາດ, ຮັກລະບອບໃໝ່ ເພີ່ມທະວີຄວາມສາມັກຄີປວງຊົນລາວທັງຊາດ, ເຊີດຊູບົດບາດເປັນເຈົ້າການປົກປັກຮັກສາ ແລະ ສ້າງສາພັດທະນາປະເທດຊາດ ຕາມຈຸດໝາຍທີ່ພັກໄດ້ກຳນົດໄວ້; ລັດຖະທຳມະນູນ ແຫ່ງ ສປປລາວ ໃນດ້ານທາດແທ້ ກໍແມ່ນການສ້າງສະຕິຊາດ ເອກະພາບອັນໜຶ່ງອັນດຽວ ພາຍໃຕ້ການນຳພາຂອງພັກ, ຮັບຮູ້ ແລະ ປົກປ້ອງການດຳລົງຄົງຕົວ ທີ່ບໍ່ຕັດແຍກອອກຈາກກັນໄດ້ ຂອງປະຊາຊົນລາວບັນດາເຜົ່າ, ເປັນພາຫະນະທີ່ສຳຄັນ ເພື່ອສຶກສາອົບຮົມປະຊາຊົນ ໃນການຍົກສູງນ້ຳໃຈຮັກຊາດ, ຮັກລະບອບປະຊາທິປະໄຕປະຊາຊົນ, ເພີ່ມທະວີຄວາມສາມັກຄີປອງດອງທົ່ວປວງຊົນທັງຊາດ, ເຊີດຊູບົດບາດ ແລະ ຄວາມສາມາດເປັນເຈົ້າປະເທດຊາດ ຂອງປະຊາຊົນລາວບັນດາເຜົ່າ ເພື່ອພ້ອມກັນສຸມທຸກກຳລັງວັງຊາ ແລະ ຄວາມສາມາດຂອງຕົນ ປະກອບສ່ວນເຂົ້າໃນພາລະກິດປົກປັກຮັກສາ ແລະ ສ້າງສາປະເທດຊາດຂອງພວກເຮົາ ຕາມແນວທາງການປ່ຽນແປງໃໝ່ ແນໃສ່ເຮັດໃຫ້ປະເທດລາວ ເປັນປະເທດ ສັນຕິພາບ ເອກະລາດ ປະຊາທິປະໄຕ ເອກະພາບ ແລະ ວັດທະນະຖາວອນ ແລະ ທ່ານຍັງໄດ້ຍົກໃຫ້ເຫັນ ໃນຕະຫລອດໄລຍະການຈັດຕັ້ງປະຕິບັດລັດຖະທຳມະນູນ 29 ປີຜ່ານມາ ສະພາແຫ່ງຊາດ ໄດ້ຈັດຕັ້ງປະຕິບັດ 2 ໜ້າທີ່ຍຸດທະສາດ ໃນການປົກປັກຮັກສາ ແລະ ສ້າງສາພັດທະນາປະເທດຊາດ ໃຫ້ເຕີບໃຫຍ່ເຂັ້ມແຂງ ໃນຫລາຍດ້ານ ເຊິ່ງສະແດງອອກ ດັ່ງນີ້:
        1. ດ້ານຄວາມໝັ້ນຄົງ ແລະ ເສດຖະກິດ ປະເທດຊາດມີສະຖຽນລະພາບທາງດ້ານການເມືອງຢ່າງໜັກແໜ້ນ, ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍໂດຍພື້ນຖານ, ເສດຖະກິດ-ສັງຄົມ ມີການເຕີບໃຫຍ່ຂະຫຍາຍຕົວ ຢ່າງຕໍ່ເນື່ອງ.
        2. ດ້ານອົງການຈັດຕັ້ງລັດ ລະບົບອົງການອຳນາດລັດ ໄດ້ຮັບການປັບປຸງບູລະນະໃຫ້ດີຂຶ້ນເປັນກ້າວໆ ເຊິ່ງສະແດງອອກດັ່ງນີ້: ລະບົບກົງຈັກການຈັດຕັ້ງຂອງລັດ ໄດ້ຮັບການສ້າງຕັ້ງ ແລະ ປັບປຸງ ໃຫ້ໄປຕາມທິດກະທັດຮັດ ຢ່າງມີປະສິດທິພາບສົມເຫດສົມຜົນເທື່ອລະກ້າວ; ມີກົນໄກການແບ່ງຂັ້ນຄຸ້ມຄອງຕາມທິດຂັ້ນສູນກາງ ເຮັດພາລະບົດບາດຄຸ້ມຄອງມະພາກເປັນຕົ້ນຕໍ, ຂັ້ນທ້ອງຖິ່ນເຮັດພາລະບົດບາດຄຸ້ມຄອງຈຸລະພາກ ເຊິ່ງໄດ້ປະຕິບັດນິຕິກຳສະເພາະ; ໄດ້ປັບປຸງອົງການນິຕິບັນຍັດ, ອົງການບໍລິຫານ ແລະ ອົງການຕຸລາການ (ສານປະຊາຊົນ, ອົງການໄອຍະການປະຊາຊົນ), ເພື່ອເຮັດໃຫ້ອົງການດັ່ງກ່າວ ມີຄຸນນະພາບນັບມື້ສູງຂຶ້ນ ຕາມທິດກະທັດຮັດສົມເຫດສົມຜົນ ແລະ ມີປະສິດທິຜົນ, ປະສານສົມທົບກັນ ເພື່ອແກ້ໄຂຂໍ້ຂັດແຍ່ງ ແລະ ຄະດີຄວາມຕ່າງໆ ຕາມກົດໝາຍ, ສາມາດປົກປັກຮັກສາສິດ ແລະ ຜົນປະໂຫຍດຂອງລັດ, ຂອງລວມໝູ່ ແລະ ຂອງພົນລະເມືອງໄດ້ດີຂຶ້ນກວ່າເກົ່າ; ໄດ້ສ້າງຕັ້ງສະພາປະຊາຊົນຂັ້ນແຂວງຂຶ້ນ ເພື່ອເປັນອົງການຕົວ ແທນແຫ່ງສິດ ແລະ ຜົນປະໂຫຍດຂອງປະຊາຊົນລາວບັນດາເຜົ່າ, ເປັນອົງການອຳນາດລັດຂັ້ນທ້ອງຖິ່ນ, ປະຕິບັດພາລະບົດບາດ ພິຈາລະນາ ແລະ ຮັບຮອງເອົານິຕິກຳທີ່ສຳຄັນຂອງທ້ອງຖິ່ນ, ຕົກລົງບັນຫາສຳຄັນພື້ນຖານຂອງທ້ອງຖິ່ນ ແລະ ຕິດຕາມກວດກາການເຄົາລົບ, ປະຕິບັດລັດຖະທຳມະນູນ ແລະ ກົດໝາຍຂອງບັນດາອົງການລັດຂັ້ນທ້ອງຖິ່ນ.
       3. ການຜັນຂະຫຍາຍລັດຖະທຳມະນູນ ໄດ້ຫັນເອົາເນື້ອໃນຈິດໃຈຂອງລັດຖະທຳມະນູນ ເປັນກົດໝາຍໃນຂະແໜງການຕ່າງໆ ໄດ້ 147 ສະບັບ ແລະ ນິຕິກໍາຈຳນວນໜຶ່ງ (ປີ 2020), ລັດຖະບັນຍັດ ແລະ ດຳລັດໄດ້ຫລາຍຮ້ອຍສະບັບ ເຮັດໃຫ້ການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມດ້ວຍກົດໝາຍ ນັບມື້ເປັນລະບົບຄົບຊຸດຂຶ້ນເທື່ອລະກ້າວ, ເປັນ ພື້ນຖານຄໍ້າປະກັນໃຫ້ແກ່ການປະຕິບັດ ແລະ ເສີມຂະຫຍາຍສິດເປັນເຈົ້າຂອງປະຊາຊົນລາວບັນດາເຜົ່າ; ໄດ້ໂຄສະນາ ເຜີຍແຜ່ລັດຖະທຳມະນູນ ແລະ ກົດໝາຍກວ້າງຂວາງດ້ວຍຫລາຍຮູບ, ຫລາຍແບບ, ຫລາຍສີ, ເປັນການປະກອບສ່ວນ ໃນການຍົກສູງສະຕິເຄົາລົບລັດຖະທຳມະນູນ ແລະ ກົດໝາຍຂອງສັງຄົມໃຫ້ນັບມື້ສູງຂຶ້ນ; ໄດ້ເອົາໃຈໃສ່ຊຸກຍູ້ການຈັດຕັ້ງປະຕິບັດລັດຖະທຳມະນູນ ແລະ ກົດໝາຍ ເຮັດໃຫ້ການຈັດຕັ້ງໃນລະບົບການເມືອງຂອງລະບອບປະຊາທິປະໄຕປະຊາຊົນ ແລະ ປະຊາຊົນລາວບັນດາເຜົ່າມີບ່ອນອີງໃນການເຄື່ອນໄຫວທຳການຜະລິດ, ດຳເນີນທຸລະກິດ, ທຳມາຫາກິນຕາມກົດໝາຍ ແລະ ລະບຽບການຫລາຍຂຶ້ນ, ເຮັດໃຫ້ປະເທດຊາດມີສະຖຽນລະພາບ, ສັງຄົມມີຄວາມສະຫງົບ ແລະ ມີຄວາມເປັນລະບຽບຮຽບຮ້ອຍໂດຍພື້ນຖານ.
ດັ່ງນັ້ນ, ໃນການປົກຄອງລັດດ້ວຍລັດຖະທໍາມະນູນ ແລະ ກົດໝາຍ ຕ້ອງອີງໃສ່ສະພາບແວດລ້ອມ, ເງື່ອນໄຂ ແລະ ສິ່ງອໍານວຍຄວາມສະດວກຕ່າງໆ ຂອງປະເທດເຮົາ ເຊິ່ງມີອົງປະກອບດັ່ງນີ້: ສ້າງລະບົບກົດໝາຍຂອງ ສປປລາວ ໃຫ້ເປັນລະບົບຄົບຊຸດ ແລະ ມີຄວາມສັກສິດ; ບູລະນະອົງການຈັດຕັ້ງ ປະຕິບັດກົດໝາຍ ຢູ່ ສປປລາວ ໃຫ້ມີຄວາມໜັກແໜ້ນ, ເຂັ້ມແຂງ, ໂປ່ງໃສ ໂດຍເນັ້ນໃສ່ປັບປຸງ ລະບອບ, ລະບຽບ, ວິທີການເຮັດວຽກ; ສ້າງບຸກຄະລາກອນ ໃນຂົງເຂດກົດໝາຍ ແລະ ຍຸຕິທໍາ ໃຫ້ມີຄວາມເຂັ້ມແຂງ ແລະ ເຂັ້ມງວດ; ສ້າງສູນຂໍ້ມູນ-ຂ່າວສານດ້ານກົດໝາຍ, ການມີສ່ວນຮ່ວມຂອງປະຊາຊົນ ໃນວຽກງານກົດໝາຍ ແລະ ຍຸຕິທໍາ ໃຫ້ປະຊາຊົນເຂົ້າເຖິງຂະບວນການຍຸຕິທໍາ; ສ້າງລະບົບໂຄງລ່າງພື້ນຖານ ຂອງບັນດາອົງການຍຸຕິທໍາ ແລະ ກົດໝາຍ ແລະ ໃຫ້ມີຄວາມທັນສະໄໝ.
ໃນໂອກາດວັນສ້າງຕັ້ງລັດຖະທໍາມະນູນ ຄົບຮອບ 29 ປີ ທ່ານຍັງໄດ້ຮຽກຮ້ອງໃຫ້ປະຊາຊົນລາວບັນດາເຜົ່າ ກໍຄືທຸກພາກສ່ວນໃນສັງຄົມ ກໍຄືທຸກພາກສ່ວນ, ທຸກອົງການຈັດຕັ້ງ ຕ້ອງເປັນເຈົ້າການຍົກສູງສະຕິການເຄົາລົບ ແລະ ປະຕິບັດລັດຖະທໍາມະນູນ, ກົດໝາຍ, ລະບຽບການຕ່າງໆທີ່ວາງອອກ ຢ່າງເຂັ້ມງວດ ພ້ອມທັງຊ່ວຍເປັນຫູເປັນຕາ, ເປັນກະບອກສຽງ ເພື່ອປາບປາມກຸ່ມຄົນ ຫລື ບຸກຄົນບໍ່ດີ ທີ່ສວຍໂອກາດ ແລະ ບໍ່ຫວັງດີຕໍ່ປະເທດຊາດ ແລະ ເປັນເຈົ້າການ ໃນການປົກປັກຮັກສາ ແລະ ປະກອບສ່ວນສ້າງສາພັດທະນາປະເທດຊາດ.

                                                                                    ​ແຫຼ່ງຂ່າວທີ່ມາ: ສະພາແຫ່ງຊາດ