ກອງປະຊຸມຄະນະປະສານງານສະມັດຊາລັດຖະສະພາລະຫວ່າງ ຊາດອາຊຽນ ຄັ້ງທີ 11

25/08/2020 00:00 -

               (ສພຊ) ໃນວັນທີ 14 ສິງຫາ 2020, ຄະນະຜູ້ແທນສະມາຊິກສະພາແຫ່ງຊາດລາວ ນໍາໂດຍທ່ານ ສັນຍາ ປຣະເສີດ ຮອງປະທານກຳມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ ພ້ອມດ້ວຍທ່ານ ອຳໄພ ຈິດມານົນ ຮອງປະທານກຳມາທິການກົດໝາຍ ໄດ້ເຂົ້າຮ່ວມກອງປະຊຸມຄະນະປະສານງານສະມັດຊາລັດຖະສະພາລະຫວ່າງ ຊາດອາຊຽນ ຫລື AIPA Caucus ຄັ້ງທີ 11 ແບບທາງໄກ ພາຍໃຕ້ຫົວຂໍ້ກອງປະຊຸມ “ພວກເຮົາຮັກສາຄວາມສາມັກຄີເປັນໜຶ່ງດຽວ: ການຮ່ວມມືລັດຖະສະພາເພື່ອຫລຸດຜ່ອນຄວາມສ່ຽງ ແລະ ເພີ່ມທະວີຄວາມເຂັ້ມແຂງທາງດ້ານເສດຖະກິດໃນໄລຍະການແຜ່ລະບາດຂອງພະຍາດ (We Heal as One: Parliamentary Cooperation Towards Mitigating Risks and Strengthening Economic Resilience in the Period of Pandemic)”, ໂດຍການເປັນເຈົ້າພາບຂອງລັດຖະສະພາຕໍ່າຟີລິບປິນ ແລະ ພາຍໃຕ້ການນຳພາກອງປະຊຸມໂດຍທ່ານ ຣານີໂອ ດາບູ ຮອງປະທານສະພາຕ່ຳຟີລິບປິນ ພ້ອມດ້ວຍສະມາຊິກລັດຖະສະພາຈາກບັນດາປະເທດສະມາຊິກອາຊຽນ, ເລຂາທິ ການໃຫຍ່ໄອປາ ແລະ ເລຂາທິການໃຫຍ່ອາຊຽນກວ່າ 30 ທ່ານເຂົ້າຮ່ວມໃນຄັ້ງນີ້.

               ການເຂົ້າຮ່ວມກອງປະຊຸມຄະນະປະສານງານລັດຖະສະພາລະຫວ່າງຊາດອາຊຽນ ຄັ້ງທີ 11 ໃນຮູບແບບ ທາງໄກຄັ້ງນີ້, ຄະນະຜູ້ແທນລາວ ໄດ້ນຳສະເໜີບົດລາຍງານກ່ຽວກັບຄວາມຄືບໜ້າຂອງສະພາແຫ່ງຊາດລາວ ຕໍ່ການ ຈັດຕັ້ງປະຕິບັດບັນດາມະຕິຂອງກອງປະຊຸມສະມັດຊາໄອປາ ຄັ້ງທີ 40 ທີ່ໄດ້ຮັບຮອງເອົາ ທີ່ບາງກອກ, ປະເທດໄທ ໃນປີ 2019, ການຈັດຕັ້ງປະຕິບັດບັນດາມະຕິຂອງສະພາແຫ່ງຊາດລາວ ຈຳນວນ 11 ສະບັບ ໃນຂົງເຂດເສດຖະກິດ-ສັງຄົມ ແລະ ວຽກງານສະມາຊິກລັດຖະສະພາເພດຍິງ ແມ່ນໄດ້ບັນລຸຕາມເນື້ອໃນຈິດໃຈຂອງມະຕິຕົກລົງຂອງກອງ ປະຊຸມສະມັດຊາໃຫຍ່ໄອປາ ອັນໄດ້ສະແດງອອກໃນການຜັນຂະຫຍາຍເຂົ້າໃນກົດໝາຍ, ນິຕິກຳລຸ່ມກົດໝາຍ ແລະ ແຜນງານການພັດທະນາເສດຖະກິດ-ສັງຄົມຂອງ ສປປລາວ.

               ນອກຈາກຮັບຟັງການລາຍງານຄວາມຄືບໜ້າໃນການຈັດຕັ້ງປະຕິບັດບັນດາມະຕິ ຂອງລັດຖະສະພາສະ ມາຊິກໄອປາ ຈາກທັງ 10 ປະເທດແລ້ວ, ສະມາຊິກລັດຖະສະພາຍັງໄດ້ປຶກສາຫາລືຕໍ່ໃນຫົວຂໍ້: ການຮ່ວມມືລັດຖະສະພາເພື່ອຫລຸດຜ່ອນຄວາມສ່ຽງ ແລະ ເພີ່ມທະວີຄວາມເຂັ້ມແຂງທາງດ້ານເສດຖະກິດໃນໄລຍະການແຜ່ລະບາດຂອງພະຍາດ ເຊິ່ງສະມາຊິກສະພາແຫ່ງຊາດລາວ ໄດ້ແລກປ່ຽນບາງມາດຕະການ ແລະ ນະໂຍບາຍທາງດ້ານການເງິນ ແລະ ເສດຖະກິດມະຫາພາກຂອງ ສປປລາວ ເພື່ອຫລຸດຜ່ອນຜົນກະທົບ ແລະ ຟື້ນຟູເສດຖະກິດຈາກວິກິດການຂອງການແຜ່ລະບາດຂອງພະຍາດ COVID-19 ເປັນຕົ້ນ ມາດຕະການຍົກເວັ້ນອາກອນກຳໄລໃຫ້ແກ່ຂະແໜງການທີ່ຖືກ ກະທົບຫລາຍເປັນໄລຍະ 3 ເດືອນ, ການປັບລາຄາໄຟຟ້າໃຫ້ຫລຸດລົງ ແລະ ມາດຕະການກະຕຸ້ນເສດຖະກິດມະຫາພາກ ແລະ ສ້າງສະພາບແວດລ້ອມທຸລະກິດໃຫ້ດີຂຶ້ນ.

                                                                    ແຫຼ່ງຂ່າວທີ່ມາ: ສະພາແຫ່ງຊາດ