ສສຊ ປະຈຳເຂດເລືອກຕັ້ງທີ 15 ເຜີຍແຜ່ຜົນສຳເລັດກອງປະຊຸມສະໄໝສາມັນເທື່ອທີ 9

09/09/2020 00:00 -

          ລະຫວ່າງວັນທີ 24-28 ສິງຫາ 2020 ເດືອນຜ່ານມາ, ທ່ານ ສຸບັນ ສະວະບຸດ ຮອງເລຂາທິການສະພາແຫ່ງ ຊາດ, ສະມາຊິກສະພາແຫ່ງຊາດປະຈຳເຂດເລືອກຕັ້ງທີ 15 ແຂວງຈຳປາສັກ ໄດ້ລົງເຄື່ອນໄຫວພົບປະຜູ້ມີສິດເລືອກຕັ້ງ ແລະ ເຜີຍແຜ່ຜົນສຳເລັດກອງປະຊຸມສະໄໝສາມັນເທື່ອທີ 9 ຂອງສະພາແຫ່ງຊາດ ຊຸດທີ VIII ຢູ່ເມືອງປະທຸມພອນ, ແຂວງຈຳປາສັກ ໂດຍມີທ່ານ ນາງ ປະທຸມມາ ແກ້ວມະນີ ກຳມະການພັກເມືອງ, ປະທານສະຫະພັນແມ່ຍິງເມືອງ, ສະມາຊິກສະພາປະຊາຊົນແຂວງຈຳປາສັກ ປະຈຳເຂດເລືອກຕັ້ງເມືອງປະທຸມພອນ ພ້ອມຄະນະເຂົ້າຮ່ວມ.

          ການລົງພົບປະຄັ້ງນີ້ ແມ່ນປະຕິບັດຕາມສິດ ແລະ ໜ້າທີ່ຂອງສະມາຊິກສະພາແຫ່ງຊາດ ທີ່ໄດ້ກຳນົດໄວ້ໃນກົດໝາຍວ່າດ້ວຍສະພາແຫ່ງຊາດ ໃນຖານະທີ່ເປັນຕົວແທນແຫ່ງສິດ ແລະ ຜົນປະໂຫຍດຂອງປະຊາຊົນລາວບັນດາເຜົ່າ ຊຶ່ງມີ 2 ຈຸດປະສົງຕົ້ນຕໍ ຄື: ລາຍງານການເຄື່ອນໄຫວວຽກງານໄລຍະຜ່ານມາ ຂອງສະມາຊິກສະພາແຫ່ງຊາດ ຕໍ່ຜູ້ມີສິດເລືອກຕັ້ງ ໂດຍສະເພາະ ແມ່ນລາຍງານຜົນສຳເລັດຂອງກອງປະຊຸມສະໄໝສາມັນເທື່ອທີ 9 ຂອງສະພາແຫ່ງຊາດ ຊຸດທີ VIII ແລະ ຢ້ຽມຢາມຖາມຂ່າວ, ຮັບຟັງຄໍາຄິດຄໍາເຫັນ ຄວາມມຸ້ງມາດປາຖະໜາຂອງປະຊາຊົນ.

         ການລົງພົບປະ ແມ່ນໄດ້ເຄື່ອນໄຫວຢູ່ 7 ຈຸດ ຄື: ບ້ານເຫຼົ່າຫຍ້າ, ບ້ານທົ່ງພະ, ບ້ານຕາອອງ, ບ້ານຜັກຂະ, ບ້ານໝໍ້ພູ, ບ້ານຜັກແຜວ ແລະ ບ້ານປະທຸມພອນ-ບ້ານຫຼັກ 40. ມີຄະນະພັກຮາກຖານກຸ່ມ, ອົງການປົກຄອງບ້ານ, ພະນັກ ງານອາວຸໂສບຳນານ, ເຖົ້າແກ່ແນວໂຮມ ແລະ ພໍ່ແມ່ປະຊາຊົນເຂົ້າຮ່ວມ ຈໍານວນ 709 ຄົນ, ຍິງ 345 ຄົນ. ຜ່ານການລົງພົບປະ ພໍ່ແມ່ປະຊາຊົນໄດ້ມີຂໍ້ສະເໜີຕ່າງໆ ທີ່ພົວພັນກັບຊີວິດການເປັນຢູ່ຂອງເຂົາເຈົ້າ ເພື່ອປັບປຸງຄຸນນະພາບການດຳລົງຊີວິດໃຫ້ນັບມື້ດີຂຶ້ນ ເປັນຕົ້ນ ການສ້າງເສັ້ນທາງເຂົ້າບ້ານ-ເສັ້ນທາງລະຫວ່າງບ້ານຕໍ່ບ້ານທີ່ໄດ້ມາດຕະຖານ, ການສ້າງໂຮງຮຽນມັດທະຍົມຕອນຕົ້ນ ຢູ່ບາງຈຸດທີ່ຫ່າງໄກ ເພື່ອໃຫ້ລູກຫຼານທີ່ຍັງນ້ອຍສາມາດເດີນທາງໄປເຂົ້າຮຽນສະດວກ ແລະ ປອດໄພ, ການສ້າງສຸກສາລາປະຈຳບ້ານ ເພື່ອໃຫ້ສາມາດເຂົ້າເຖິງການບໍລິການດ້ານສາທາລະນະສຸກໄດ້ຢ່າງສະ ດວກວ່ອງໄວ, ການສ້າງ ແລະ ສ້ອມແປງຊົນລະປະທານ, ການຈັດສັນທີ່ດິນໃຫ້ກັບປະຊາຊົນ ເພື່ອທຳການຜະລິດ ແລະ ການຊົດເຊີຍຕໍ່ທີ່ດິນທີ່ຖືກໂຄງການພັດທະນາຂອງລັດ ເຫຼົ່ານີ້ເປັນຕົ້ນ.

        ຜ່ານການສະເໜີຂອງປະຊາຊົນ, ສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ ກໍໄດ້ໃຫ້ການຊີ້ແຈງ, ອະທິບາຍ ຕາມແຜນການຂອງລັດຖະບານ ກໍຄືແຂວງ ແລະ ເມືອງ ຕິດພັນກັບເນື້ອໃນກອງປະຊຸມສະ  ໄໝສາມັນເທື່ອທີ 9 ຂອງສະພາແຫ່ງຊາດ ຊຸດທີ VIII ແລະ ກອງປະຊຸມສະໄໝສາມັນເທື່ອທີ 9 ຂອງສະພາປະຊາຊົນແຂວງຈໍາປາສັກ ຊຸດທີ I ຊຶ່ງຍົກໃຫ້ເຫັນຂໍ້ສະດວກ, ຂໍ້ຫຍຸ້ງຍາກ, ສິ່ງທ້າທາຍໃນການພັດທະນາເສດຖະກິດ-ສັງຄົມ ຂອງປະເທດເຮົາປະຈຸບັນ ໂດຍສະເພາະ ຜົນກະທົບຈາກພະຍາດໂຄວິດ-19, ໄພທຳມະຊາດ, ສັດຕູພືດ ແລະ ຍັງໄດ້ຍົກໃຫ້ເຫັນນະໂຍບາຍ, ມາດຕະການທີ່ລັດຖະບານ ກໍຄືທ້ອງຖິ່ນວາງອອກ ເພື່ອສູ້ຊົນຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດໃນທ້າຍປີ 2020. ພ້ອມດຽວກັນນັ້ນ ກໍໄດ້ຮຽກຮ້ອງໃຫ້ຄະນະພັກ, ອົງ ການປົກຄອງ ແລະ ປະຊາຊົນບັນດາເຜົ່າ ຈົ່ງໄດ້ເປັນເຈົ້າການເຂົ້າຮ່ວມ, ປະກອບສ່ວນຈັດຕັ້ງປະຕິບັດທິດທາງວຽກງານທີ່ລັດຖະບານ ກໍຄືທ້ອງຖິ່ນວາງອອກ ເປັນຕົ້ນ ການດຳລົງຊີວິດປົກກະຕິແບບໃໝ່, ເປັນເຈົ້າການໃນວຽກງານປ້ອງກັນຊາດ-ປ້ອງກັນຄວາມສະຫງົບ, ເພີ່ມທະວີການເຕົ້າໂຮມຄວາມສາມັກຄີປະຊາຊົນລາວບັນດາເຜົ່າໃຫ້ເປັນປຶກແຜ່ນ, ສືບຕໍ່ເສີມຂະຫຍາຍ ແລະ ຮັກສາມູນເຊື້ອຮີດຄອງປະເພນີອັນດີງາມຂອງເຜົ່າ, ຂອງທ້ອງຖິ່ນ ແລະ ຂອງຊາດ, ປະຕິບັດສິດ, ໜ້າທີ່ ແລະພັນທະຂອງພົນລະເມືອງ ປະກອບສ່ວນເຂົ້າໃນການປົກປັກຮັກສາ ແລະ ສ້າງສາພັດທະນາປະເທດຊາດ ເພື່ອເປັນຜົນງານຂໍ່ານັບຮັບຕ້ອນວັນສໍາຄັນຕ່າງໆຂອງຊາດ ເຊັ່ນ: ວັນສະຖາປະນາ ສປປ ລາວ ຄົບຮອບ 45 ປີ, ວັນສ້າງຕັ້ງສະພາແຫ່ງຊາດ ຄົບຮອບ 45 ປີ, ວັນຄ້າຍວັນເກີດປະທານ ໄກສອນ ພົມວິຫານ ຄົບຮອບ 100 ປີ ຕິດພັນກັບການສ້າງຂະບວນການຮັບຕ້ອນກອງປະຊຸມໃຫຍ່ ຄັ້ງທີ VIII ຂອງອົງຄະນະພັກແຂວງຈຳປາສັກ ແລະ ກອງປະຊຸມໃຫຍ່ຄັ້ງທີ XI ຂອງພັກ ທີ່ຈະໄຂຂຶ້ນໃນຕໍ່ໜ້ານີ້. 

                                                                           ແຫຼ່ງຂ່າວທີ່ມາ: ສະພາແຫ່ງຊາດ