ເລຂາທິການສະພາແຫ່ງຊາດ ອວຍພອນວັນຊາດຫວຽດນາມ ຄົບຮອບ 75 ປີ

09/09/2020 00:00 -

             (ສພຊ) ໃນວັນທີ 2 ກັນຍາຜ່ານມາ, ທີ່ຫ້ອງການຄຸ້ມຄອງໂຄງການກໍ່ສ້າງ ຫໍສະພາແຫ່ງຊາດລາວ ຫລັງໃໝ່ ສະຫາຍ ນາງ ສວນສະຫວັນ ວິຍະເກດ ເລຂາທິການສະພາແຫ່ງຊາດ ພ້ອມດ້ວຍຄະນະ ໄດ້ອວຍພອນວັນຊາດ ສສ.ຫວຽດນາມ ຄົບຮອບ 75 ປີ (ກັນຍາ 1945-ກັນຍາ 2020) ໂດຍການຕ້ອນຮັບຂອງສະຫາຍ ພັອ. ຫງຽນ ຈຽນ ຮອງຫົວໜ້າຜູ້ບັນຊາການແມ່ທັບນ້ອຍ 11 ກະຊວງປ້ອງກັນປະເທດ ສສ.ຫວຽດນາມ (ຜູ້ຮັບເໝົາກໍ່ສ້າງຫໍສະພາແຫ່ງຊາດລາວ ຫລັງໃໝ່) ມີບັນດາຕາງໜ້າ ຜູ້ຮັບຜິດຊອບໂຄງການກໍ່ສ້າງດັ່ງກ່າວ ທັງລາວ ແລະ ຫວຽດນາມ ເຂົ້າຮ່ວມ.

            ສະຫາຍ ພັອ. ຫງຽນ ຈຽນ ໄດ້ກ່າວສະແດງຄວາມຕ້ອນຮັບຢ່າງອົບອຸ່ນ ພ້ອມທັງສະແດງຄວາມຂອບໃຈ ແລະ ຕີລາຄາສູງຕໍ່ສະຫາຍ ນາງ ສວນສະຫວັນ ວິຍະເກດ ພ້ອມດ້ວຍຄະນະ ທີ່ເຫັນໄດ້ຄວາມສໍາຄັນເຂົ້າອວຍພອນເນື່ອງໃນໂອກາດສະເຫລີມສະຫລອງວັນຊາດ ສສ.ຫວຽດນາມ ຄົບຮອບ 75 ປີ ເຊິ່ງສະແດງເຖິງການຮ່ວມມືຄຽງບ່າຄຽງໄຫລ່ລະຫວ່າງສອງປະເທດເພື່ອນມິດລາວ-ຫວຽດນາມ ບໍ່ວ່າຈະໄລຍະຜ່ານມາ ກໍຄືປັດຈຸບັນ.

            ສະຫາຍ ນາງ ສວນສະຫວັນ ວິຍະເກດ ກໍໄດ້ກ່າວສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນຂອງສະຫາຍຮອງຜູ້ບັນຊາການແມ່ທັບນ້ອຍ 11 ພ້ອມທັງກ່າວຊົມເຊີຍຕໍ່ການນໍາພາຂອງພັກ ແລະ ລັດຖະບານ ສສ.ຫວຽດນາມ ທີ່ໄດ້ສືບຕໍ່ນໍາພາການສ້າງສາພັດທະນາປະເທດຊາດຢ່າງບໍ່ຢຸດຢັ້ງ ເຮັດໃຫ້ ສສ.ຫວຽດນາມ ສືບຕໍ່ມີສະຖຽນລະພາບທາງດ້ານການເມືອງຢ່າງໜັກແໜ້ນ ສັງຄົມມີຄວາມສະຫງົບປອດໄພ ວຽກງານປ້ອງກັນຊາດ-ປ້ອງກັນຄວາມສະຫງົບນັບມື້ນັບເຂັ້ມແຂງ, ເສດຖະກິດມີການຂະຫຍາຍຕົວສູງຢ່າງຕໍ່ເນື່ອງ ຊີວິດການເປັນຢູ່ຂອງປະຊາ ຊົນໄດ້ຮັບການປັບປຸງດີຂຶ້ນເລື້ອຍໆ ການພົວພັນກັບຕ່າງປະເທດໄດ້ຮັບການເປີດກວ້າງ ປະກອບສ່ວນເຮັດໃຫ້ບົດ ບາດ ແລະ ອິດທິພົນຂອງພັກຂອງລັດຫວຽດນາມນັບມື້ສູງເດັ່ນຂຶ້ນໃນເວທີພາກພື້ນ ແລະ ສາກົນ, ສະແດງຄວາມຊົມເຊີຍໃນການປະຕິບັດໜ້າທີ່ແມ່ທັບນ້ອຍ 11 ໃນນາມຜູ້ຮັບເໝົາໂຄງການກໍ່ສ້າງຫໍສະພາແຫ່ງຊາດລາວຫລັງໃໝ່ ໃນປີນີ້ ມີສະພາບໂຄວິດ-19 ເກີດຂຶ້ນທົ່ວໂລກ ອັນມີຜົນກະທົບໃຫ້ແກ່ການດໍາເນີນວຽກງານກໍ່ສ້າງ ແຕ່ບັນດາສະຫາຍໄດ້ສູ້ຊົນເອົາໃຈໃສ່ເຮັດໃຫ້ການປະຕິບັດໜ້າທີ່ໂຄງການມີຄວາມຄືບໜ້າ ເຖິງຈະຊ້າ ແຕ່ກໍຍັງຮັບປະກັນໄດ້ຕາມແຜນການຊີ້ນໍາຂອງການນໍາຂັ້ນສູງຂອງສອງປະເທດ ເຊິ່ງທັງໝົດນີ້ ໄດ້ສະແດງໃຫ້ເຫັນວ່າ ສາຍພົວພັນມິດຕະ ພາບທີ່ຍິ່ງໃຫຍ່ ຄວາມສາມັກຄີພິເສດຂອງສອງຊາດ ລາວ-ຫວຽດນາມ ບໍ່ວ່າຍາມໃດກໍໄດ້ມີການສືບຕໍ່ຮັກສາ ແລະ ພັດທະນາໃຫ້ຍືນຍົງຕະຫລອດໄປ ພິເສດໃນນາມຕາງໜ້າຄະນະນໍາຄະນະເລຂາທິການ ກໍຄືຄະນະຊີ້ນໍາໂຄງການຝ່າຍລາວ ຂໍສະແດງຄວາມຊົມເຊີຍອ້າຍທະຫານ, ບັນດາພະນັກງານ ວິຊາການ, ຊ່ຽວຊານທຸກສະຫາຍ ທີ່ໄດ້ຕັດສິນໃຈຢ່າງສູງຫ່າງໄກຄອບຄົວເພື່ອມາປະຕິບັດໜ້າທີ່ທີ່ມີຄວາມຫຍຸ້ງຍາກ ເພື່ອເຮັດໜ້າທີ່ໃນການກໍ່ສ້າງໂຄງການຕຶກຫໍສະພາແຫ່ງຊາດລາວ ຫລັງໃໝ່ ເຊິ່ງທັງໝົດນີ້ ຕີລາຄາໄດ້ວ່າ ບໍ່ວ່າເວລາໃດ, ບໍ່ວ່າໃນໄລຍະທີ່ມີຄວາມຫຍຸ້ງຍາກ ໄລຍະຕໍ່ສູ້ໃນແປວໄຟສົງຄາມ ກໍຄືໃນໄລຍະສ້າງສາພັດທະນາປະເທດຊາດ ພວກສະຫາຍກໍໄດ້ມີຄວາມເສຍສະຫລະເພື່ອການພັດທະນາປະເທດລາວຕະຫລອດມາ ແລະ ເຊື່ອໝັ້ນວ່າໂຄງການຫໍສະພາແຫ່ງຊາດ ຫລັງໃໝ່ ຈະໄດ້ຮັບການກໍ່ສ້າງສໍາເລັດຕາມລະດັບຄາດໝາຍ ແລະ ຈະເປັນສັນຍາລັກອັນຍິ່ງໃຫຍ່ ຕໍ່ກັບການພົວພັນຮ່ວມມືອັນຍິ່ງໃຫຍ່ຄວາມສາມັກຄີພິເສດຂອງສອງຊາດ ລາວ-ຫວຽດນາມ ຖືໂອກາດທີ່ມີຄວາມໝາຍຄວາມສໍາຄັນນີ້ ຂໍອວຍພອນໄຊອັນປະເສີດມາຍັງບັນດາສະຫາຍ ພິເສດອວຍພອນໃຫ້ສະຫາຍຮອງຜູ້ບັນຊາການທະຫານແມ່ທັບນ້ອຍ 11 ແລະ ບັນ ດາສະຫາຍພະນັກງານລັດຖະກອນທີ່ປະຕິບັດໜ້າທີ່ໂຄງການກໍ່ສ້າງຫໍສະພາແຫ່ງຊາດລາວ ຫລັງໃໝ່ ຈົ່ງມີສຸຂະພາບເຂັ້ມແຂງ ມີຜົນສໍາເລັດອັນຍິ່ງໃຫຍ່ທີ່ພັກ-ລັດ ໄດ້ມອບໝາຍໃຫ້ ແລະ ມີຄວາມສຸກໃນຊີວິດສ່ວນຕົວ ແລະ ຄອບຄົວ.

                                                                            ແຫຼ່ງຂ່າວທີ່ມາ: ສະພາແຫ່ງຊາດ