ຮອງຫົວໜ້າຄະນຮັບຜິດຊອບວຽກງານເຂດເລືອກຕັ້ງ ເຮັດວຽກຮ່ວມກັບ ສພຂ ຫົວພັນ

14/05/2018 00:00 -

(ສພຊ) ວັນທີ 3 ພຶດສະພາຜ່ານມາ, ທີ່ຫ້ອງປະຊຸມຄະນະປະຈໍາສະພາປະຊາຊົນແຂວງ (ສພຂ) ຫົວພັນ ໄດ້ຈັດກອງປະຊຸມປຶກສາຫາລືຮ່ວມກັບ ຄະນະຮັບຜິດຊອບວຽກງານເຂດເລືອກຕັ້ງ ສະພາແຫ່ງຊາດ ໂດຍການເຂົ້າຮວ່ມຂອງທ່ານ ນາງ ອຳໄພວອນ ລ້ອມບຸນແພງ ຮອງປະທານ ສພຂ ຫົວພັນ, ທ່ານ ຄຳສິງ ໄຊສົມແພງ ຮອງຫົວໜ້າຄະນະຮັບຜິດຊອບວຽກງານເຂດເລືອກຕັ້ງ ສະພາແຫ່ງຊາດ ພ້ອມດ້ວຍຄະນະ, ມີບັນດາທ່ານຄະນະປະຈຳ ສພຂ, ຄະນະເລຂາທິການ, ຫົວໜ້າ-ຮອງຫົວໜ້າຂະແໜງ ຕະຫລອດຮອດພະນັກງານວິຊາການທີ່ກ່ຽວຂ້ອງຂອງ ສພຂ.

ຈຸດປະສົງຂອງກອງປະຊຸມຄັ້ງນີ້ ແມ່ນເພື່ອຄົ້ນຄວ້າ, ປຶກສາຫາລື ແລະ ເກັບກຳຂໍ້ມູນ ກ່ຽວກັບການ ເຄື່ອນໄຫວວຽກງານຂອງຄະນະສະມາຊິກສະພາແຫ່ງຊາດປະຈຳເຂດເລືອກຕັ້ງ; ການສ້າງຕັ້ງ, ການຈັດຕັ້ງ ແລະ ການເຄື່ອນໄຫວວຽກງານຂອງໜ່ວຍສະມາຊິກສະພາປະຊາຊົນແຂວງປະຈຳແຕ່ລະເມືອງ, ຂະແໜງຊ່ວຍວຽກຂອງຄະນະສະມາຊິກສະພາແຫ່ງຊາດປະຈຳເຂດເລືອກຕັ້ງ ຢູ່ບັນດາເຂດເລືອກຕັ້ງທີ່ຫາກໍສ້າງຕັ້ງຂຶ້ນ. ຜ່ານການຈັດຕັ້ງການເຄື່ອນໄຫວ ແລະ ປະຕິບັດໄປແລ້ວໃນໄລຍະຜ່ານມາ ຍັງພົບຄວາມຫຍຸ້ງຍາກ ແລະ ຢາກສະເໜີໃຫ້ສະພາແຫ່ງຊາດ ກໍຄືຄະນະຮັບຜິດຊອບວຽກງານເຂດເລືອກຕັ້ງ ຈັດຊຸດເຝິກອົບຮົມໃນວຽກດັ່ງກ່າວ ທີ່ເຫັນວ່າມີຄວາມຈຳເປັນ ແລະ ຮີບດ່ວນ ເພື່ອເປັນຂໍ້ມູນເບື້ອງຕົ້ນທີ່ຈະນຳໄປສະເໜີຕໍ່ຄະນະປະຈຳສະພາແຫ່ງຊາດ ພິຈາລະນາ ແລະ ຈັດເຝິກອົບຮົມໃຫ້ສະມາຊິກສະພາແຫ່ງຊາດປະຈຳເຂດເລືອກຕັ້ງ ແລະ ສະມາຊິກສະພາປະຊາຊົນແຂວງ ຕະຫລອດຮອດພະນັກງານວິຊາການທີ່ຊ່ວຍວຽກຢູ່ໜ່ວຍເລືອກຕັ້ງຂອງເມືອງໃຫ້ເຂົ້າໃຈ ເພື່ອນຳໄປຈັດຕັ້ງປະຕິບັດໜ້າທີ່ວຽກງານໃນຕໍ່ໜ້າໃຫ້ມີປະສິດທິພາບ ແລະ ປະສິດທິຜົນສູງກວ່າເກົ່າ.

(ເວີນ ແກ້ວບຸນມີ)