ຮອງລັດຖະມົນຕີກະຊວງກໍ່ສ້າງ ສສ ຫວຽດນາມ ເຮັດວຽກຮ່ວມກັບສະພາແຫ່ງຊາດລາວ

10/07/2018 00:00 -

(ສພຊ) ວັນ​ທີ 29 ມິຖຸນາ​ຜ່ານ​ມາ, ທີ່​ສະພາ​ແຫ່ງ​ຊາດ​ໄດ້​ມີ​ການ​ພົບ​ປະ​ເຮັດ​ວຽກລະຫວ່າງ​ ຄະນະ​ຜູ້​ແທນ​ກະຊວງ​ກໍ່ສ້າງ ສສ ຫວຽດນາມ ​ແລະ ຕາງໜ້າ​ສະພາ​ແຫ່ງ​ຊາດ​ລາວ ​ເພື່ອ​ປຶກສາ​ຫາລືກ່ຽວກັບ​ໂຄງການ​ກໍ່ສ້າງ​ຫໍ​ປະຊຸມ​ສະພາ​ແຫ່ງ​ຊາດ​ຫລັງ​ໃໝ່ຂອງ​ລາວ; ຝ່າຍ​ລາວ​ນຳ​ໂດຍສະຫາຍ ນາງ ສວນ​ສະຫວັນ​ ວິ​ຍະ​ເກດ ​ເລຂາທິການ​ສະພາ​ແຫ່ງ​ຊາດ, ຫົວໜ້າ​ຄຸ້ມ​ຄອງ​ໂຄງການ​ປຸກ​ສ້າງ​ຫໍ​ສະພາ​ແຫ່ງ​ຊາດ​ລາວ​ຫລັງ​ໃໝ່ ​ແລະ ຝ່າຍ​ຫວຽດນາມ​ນຳ​ໂດຍສະຫາຍ ​ເລ ກວາງ ຮຸ່ງ ຮອງ​ລັດຖະມົນຕີ​ກະຊວງ​ກໍ່ສ້າງ ສສ. ຫວຽດນາມ ​​ໃນ​ໂອກາດ​ທີ່​ເດີ່ນ​ທາງ​ມາ​ຢ້ຽມຢາມ ​ແລະ ​ເຮັດ​ວຽກ ລະຫວ່າງ​ວັນ​ທີ 29-30 ມິຖຸນາ 2018.

          ​ໃນ​ກາ​ນພົບ​ປະ​ຄັ້ງ​ນີ້, ​ທັງ​ສອງ​ຝ່າຍ​ໄດ້​ປຶກສາ​ຫາລື​ກ່ຽວກັບ​ເນື້ອ​ໃນ​ທີ່​ພົວພັນ​ເຖິງ​ໂຄງການ ​​ເປັນ​ຕົ້ນ​ແມ່ນ​ການ​ປຶກສາ​ຫາລື​ເພື່ອ​ຄວາມ​ເປັນ​ເອກະ​ພາບ​ກັນ​ບາງ​ບັນຫາ​ດ້ານ​ນິຕິ​ກຳ​ທີ່​ຍັງ​ຄົງ​ຄ້າງ ກ່ຽວກັບ​ໂຄງການ​ກໍ່ສ້າງ​ຫໍ​ສະພາ​ແຫ່ງ​ຊາດລາວ​ຫລັງ​ໃໝ່​ເຊັ່ນ: ການ​ນຳ​ໃຊ້​ນິຕິ​ກຳ​​ເພື່ອ​ຄຸ້ມ​ຄອງ​ໂຄງການ, ການ​ແບ່ງ​ຄວາມ​ຮັບຜິດຊອບ ລະ​ຫວ່າງ​ຄະນະ​ຄຸ້ມ​ຄອງ​ໂຄງການ​ຝ່າຍ​ລາວ ​ແລະ ຫວຽດນາມ (​ເຈົ້າ​ຂອງ​ໂຄງການ) ​ແລະ ບັນຫາ​ຍ່ອຍ​ອື່ນໆ; ​ເພື່ອ​ອຳນວຍ​ຄວາມ​ສະດວກ​ໃຫ້​ຜູ້​ຮັບ​ເໝົາ​ໄດ້​ລົງມື​ກໍ່ສ້າງ​ໃນ​ຕົ້ນ​ເດືອນ​ກໍ​ລະ​ກົດ ປີ 2018 ນີ້; ພ້ອມ​ກັນ​ນີ້, ຍັງ​ໄດ້​ກຳນ​ົດ​ໄລຍະ​ເວລາ​ການກໍ່ສ້າງ​ແມ່ນ 29 ​ເດືອນ ​ເຊິ່ງໝາຍວ່າ​ໂຄງການ​ໃຫ້​ສຳ​ເລັດ​ໃນ​ທ້າຍ​ປີ 2020;  ພ້ອມ​ທັງ​ລາຍ​ງານ​​ໃຫ້​ຮູ້ຄວາມ​ຄືບ​ໜ້າ​ລວມຂອງ​ການຈັດ​ຕັ້ງ​ປະຕິບັດ​ໂຄງການວ່າ ຈະ​ມີ​ການດຳ​ເນີນ​ການ​ຕອກ​ເສົາ​ເຂັມ ​ແລະ ກໍ່ສ້າງພາກສ່ວນ​ຮາກ​ຖານ​ຂອງ​ໂຄງການ​ໃນ​ຕົ້ນ​ເດືອນ​ກໍລະກົດນີ້ ​​ແລະ​ຈະ​ສູ້​ຊົນ​ໃຫ້​ສຳ​ເລັດ​ໂຄງການ​ໃນ​ໄລຍະ​ເວລາ 29 ​ເດືອນ ​​ເພື່ອ​ໃຫ້​ສາມາດ​ນຳ​ໃຊ້​​ໂຄງການ​ໃນ​ທ້າຍ​ປີ 2020 ພ້ອມ​ນີ້, ສອງ​ຝ່າຍ​ຍັງ​ໄດ້​​ເນັ້ນ​ໜັກ​ວ່າການ​ກໍ່ສ້າງ​ໂຄງການ​ດັ່ງກ່າວ​ນີ້​ແມ່ນ​ໂຄງການ​ພິ​ເສດ​ສຳຄັນ ທີ່​ສະ​ແດງ​ເຖິງ​ສາຍ​ພົວພັນ​ມິດຕະພາບ​ການ​ຮ່ວມ​ມື​ຮອບດ້ານ​ຂອງ​ສອງ​ຊາດ​ລາວ-ຫວຽດນາມ; ສະ​ນັ້ນ, ​ໂຄງການ​ຕ້ອງ​ຮັບປະກັນ, ສວຍ​ງາມ ​ແລະ ຮັກສາ​ເອກະລັກ​ຂອງ​ລາວ; ​ພ້ອມ​ດຽວກັນ​ນັ້ນ​ກໍ​ໄດ້​ມີ​ການ​ເຊັນ​ບົດ​ບັນທຶກ​ການ​ເຮັດ​ວຽກລະຫວ່າງ ຄະນະ​ຄຸ້ມ​ຄອງ​ໂຄງການ​ກໍ່ສ້າງ​ຫໍ​ສະພາ​ແຫ່ງ​ຊາດ​ຫລັງ​ໃໝ່ຂອງ​ລາວ ​ແລະ ກະຊວງ​ກໍ່ສ້າງ ສສ ຫວຽດນາມ ຕື່ມ​ອີກ.

          ​ໃນ​ວັນ​ດຽວກັນ​ນັ້ນ, ສະຫາຍ ​ເລ ກວາງ ຮຸ່ງ ​ຍັງ​ໄດ້​ເຂົາ​ຢ້ຽມຂໍ່ານັບສະຫາຍ ນາງ ປານີ ຢາທໍ່​ຕູ້ ປະທານ​ສະພາ​ແຫ່ງ​ຊາດລາວ ​ແລະ ສະຫາຍ ສົມ​ພັນ ​ແພງ​ຄຳ​ມີ ຮອງ​ປະທານ​ສະພາ​ແຫ່ງ​ຊາດ​ລາວ ​ເພື່ອ​ລາຍງານ​ການ​ເຮັດ​ວຽກຮ່ວມ​ກັບ ຄະນະຄຸ້ມ​ຄອງ​ໂຄງການ​ປຸກ​ສ້າງ​ຫໍ​ສະພາ​ແຫ່ງ​ຊາດ​ລາວ​ຫລັງ​ໃໝ່; ​ເຊິ່ງທັງ​ສອງ​ສະຫາຍ​ໄດ້​ຕີ​ລາຄາ​ສູງ​ຕໍ່ການ​ມາ​ເຮັດ​ວຽກຂອງ​ສະຫາຍຮອງ​ລັດຖະມົນຕີ​ກໍ່ສ້າງ​ຫວຽດນາມ​ໃນ​ຄັ້ງ​ນີ້; ພ້ອມ​ທັງ​ສະ​ແດງ​ຄວາມ​ຂອບ​ໃຈ​ຕໍ່ການ​ຊ່ວຍ​ເຫລືອ​ຂອງ​ພັກ-ລັດ ​ແລະ ປະຊາຊົນຫວຽດນາມ​​ອ​້າຍນ້ອງໃນຄັ້ງ​ນີ້.

(ນາງ ອາ​ລິນ ສຸ​ພິມ​ມະ​ປະດິດ)