ຄລສ ສະຫລຸບວຽກງານປະຈຳ 8 ເດືອນຕົ້ນປີ 2018 ແລະ ກຳນົດທິດທາງແຜນການໃນຕໍ່ໜ້າ

24/09/2018 00:00 -

(ສພຊ) ໃນວັນທີ 14 ກັນຍາ 2018, ທີ່ຫ້ອງປະຊຸມຄະນະເລຂາທິການສະພາແຫ່ງຊາດ (ຄລສ) ຫລັກ 6; ໄດ້ຈັດກອງປະຊຸມສະຫລຸບການເຄື່ອນໄຫວວຽກງານ ປະຈຳ 8 ເດືອນຕົ້ນປີ 2018 ແລະ ກຳນົດທິດທາງແຜນການໃນຕໍ່ໜ້າ ຂອງ ຄລສ; ໂດຍການເປັນປະທານຂອງທ່ານ ນາງ ສີໃສ ລືເດດມູນສອນ  ຮອງປະທານຄະນະປະຈຳສະພາແຫ່ງຊາດ, ຮອງປະທານສະພາແຫ່ງຊາດ; ເຂົ້າຮ່ວມມີບັນດາຮອງເລຂາທິການ, ຫົວໜ້າ-ຮອງຫົວໜ້າກົມ, ຫົວໜ້າ-ຮອງຫົວໜ້າພະແນກ ທີ່ຂຶ້ນກັບ ຄລສ ແລະ ພະນັກງານ-ວິຊາການພາຍໃນກົມທີ່ກ່ຽວຂ້ອງເຂົ້າຮ່ວມ 70 ກວ່າຄົນ.

       ຈຸດປະສົງແມ່ນເພື່ອສະຫລຸບຕີລາຄາການເຄື່ອນໄຫວວຽກງານວຽກງານ ປະຈຳ 8 ເດືອນຕົ້ນປີ 2018  ແລະ ກຳນົດທິດທາງແຜນການໃນຕໍ່ໜ້າຂອງ ຄລສ, ການຈັດຕັ້ງພາລະບົດບາດຂອງ ຄລສ ຕາມທີ່ໄດ້ກຳນົດໄວ້ກົດໝາຍວ່າດ້ວຍ ສະພາແຫ່ງຊາດ  ຮັບປະກັນໃຫ້ມີປະສິດທິພາບ, ປະສິດທິຜົນ ແລະ ບັນລຸຕາມຄາດໝາຍທີ່ວາງໄວ້ ແລະ ເພື່ອເປັນບ່ອນອີງໃຫ້ແກ່ ຄລສ ລົງເລິກຊີ້ນຳ-ນຳພາ, ຊຸກຍູ້ບັນດາກົມທີ່ກ່ຽວຂ້ອງໄດ້ນຳໄປຈັດຕັ້ງປະຕິບັດທິດທາງວຽກງານຂອງ ຄລສ ເປັນແຜນວຽກລະອຽດ, ມີຈຸດສຸມ ແລະ ມີປະສິດທິຜົນ.

       ກອງປະຊຸມໃນຄັ້ງນີ້, ທ່ານ ນາງ ສວນສະຫວັນ ວິຍະເກດ ເລຂາທິການສະພາແຫ່ງຊາດ ໄດ້ກ່າວຕ້ອນຮັບ ແລະ ມີຄຳເຫັນໂດຍຫຍໍ້ ກ່ຽວກັບບົດສະຫລຸບການເຄື່ອນໄຫວວຽກງານ ປະຈຳ 8 ເດືອນຕົ້ນປີ 2018 ແລະ ກຳນົດທິດທາງແຜນການ 4 ເດືອນໃນຕໍ່ໜ້າ ຂອງ ຄລສ ແລະ ທ່ານ ສຸບັນ ສະວະບຸດ ຮອງເລຂາທິການສະພາແຫ່ງຊາດ ໄດ້ສະເໜີ   ກ່ຽວກັບບົດສະຫລຸບການເຄື່ອນໄຫວວຽກງານ ປະຈຳ 8 ເດືອນຕົ້ນປີ 2018 ແລະ ກຳນົດທິດທາງແຜນການ 4 ເດືອນໃນຕໍ່ໜ້າ ຂອງ ຄລສ ແລະ ມີຄຳເຫັນເຈາະຈີ້ມຕໍ່ກອງປະຊຸມ; ພ້ອມດຽວກັນນັ້ນ, ຜູ້ເຂົ້າຮ່ວມກອງປະຊຸມຍັງໄດ້ປະກອບຄຳຄິດຄຳເຫັນເພື່ອແລກປ່ຽນບົດຮຽນເຊິ່ງກັນ ແລະ ກັນ.

       ທ່ານຮອງປະທານສະພາແຫ່ງຊາດ ໄດ້ມີຄໍາເຫັນວ່າ: ເພື່ອເຮັດແນວໃດໃຫ້ພະນັກງານ-ລັດຖະກອນ ເປັນເຈົ້າການໃນການປະຕິບັດໜ້າທີ່ຄວາມຮັບຜິດຊອບຂອງຕົນ ດ້ວຍຄວາມຮັບຜິດຊອບສູງ ໂດຍສະເພາະແມ່ນຄວາມເປັນເອກະພາບພາຍໃນ ກໍຄືຄວາມເປັນເອກະພາບຂອງຄະນະ ຄລສ, ຄະນະກົມ, ຄະນະພະແນກ ແລະ ຄວາມເປັນເອກະພາບຂອງບັນດາພະນັກງານ-ລັດຖະກອນ ເພື່ອພ້ອມກັນຈັດຕັ້ງປະຕິບັດໜ້າທີ່ທີ່ໄດ້ຮັບມອບໝາຍຈາກຂັ້ນເທິງ ແລະ ການເປັນເສນາທິການຂອງບັນດາ 6 ກົມ ທີ່ຂຶ້ນກັບ ຄລສ ຕ້ອງໄດ້ຮັບຮູ້ວ່າວຽກຂອງ ຄລສ ແມ່ນວຽກທີ່ໜັກ ເພາະເປັນກົງຈັກທີ່ເປັນເສນາທິການຮັບໃຊ້ ຮອບດ້ານໃຫ້ແກ່ວຽກງານການເຄື່ອນໄຫວຂອງສະພາແຫ່ງຊາດ ກໍຄືຄະນະປະຈຳສະພາແຫ່ງຊາດ ແລະ ທ່ານຍັງໄດ້ຊີ້ນຳໃຫ້ແຕ່ລະກົມເອົາໃຈໃສ່ໃນການປະຕິບັດໜ້າທີ່ວຽກງານດ້ວຍຄວາມຮັບຜິດຊອບສູງ ເພື່ອເຮັດໃຫ້ການປະຕິບັດໜ້າທີ່ວຽກງານໄດ້ມີການປັບປຸງ ແລະ ພັດທະນາໃຫ້ດີຂຶ້ນກວ່າເກົ່າ.