ສະພາແຫ່ງຊາດແຫ່ງ ສປປ ລາວ-ລາຍລະອຽດຂອງຂ່າວສານ
 

ປະທານສະພາແຫ່ງຊາດ ມອບເຄື່ອງຊ່ວຍເຫຼືອໃຫ້ຜູ້ປະສົບເຄາະຮ້າຍ
02/08/2018

(ສພຊ) ໃນລະຫວ່າງ​ວັນທີ 27-28 ກໍລະກົດຜ່ານມາ,  ຄະນະຜູ້ແທນຈາກສະພາແຫ່ງຊາດ (ສພຊ) ນຳໂດຍທ່ານ ນາງ ປານີ ຢາທໍ່ຕູ້ ປະທານ ສພຊ ພ້ອມດ້ວຍທ່ານ ສົມພູ ດວງສະຫວັນ ປະທານກຳມາທິການວັດທະນະທຳ-ສັງຄົມ, ທ່ານ ນາງ ສວນສະຫວັນ ວິຍະເກດ ເລຂາທິການສະພາແຫ່ງຊາດ ແລະ ຄະນະຕິດຕາມ ໄດ້ເຄື່ອນໄຫວພົບປະຢ່າງໃກ້ຊິດກັບຜູ້ປະສົບອຸທົກກະໄພນໍ້າຖ້ວມໃນເມືອງສະໜາມໄຊ ແຂວງອັດຕະປື ທີ່ໄດ້ຮັບຜົນກະທົບຈາກອຸບັດເຫດເຂື່ອນກັ້ນນໍ້າເຊປຽນ-ເຊນໍ້ານ້ອຍແຕກ ປະຊາຊົນຊາວເມືອງສະໜາມໄຊທີ່ໄດ້ຮັບຜົນກະທົບແລ້ວຍົກຍ້າຍມາປິ່ນປົວ ແລະ ອາໄສຢູ່ທີ່ເມືອງປາກຊ່ອງ ແຂວງຈຳປາສັກ ເປັນການຊົ່ວຄາວ ​ແລະ ປະຊາຊົນ​ທີ່​ຍັງ​ອາ​ໄສ​ຢູ່​ບັນດາ​ສູນ​ພັກຊົ່ວຄາວຕ່າງໆ​ຂອງ​ເມືອງສະໜາມ​ໄຊ.

​ການ​ເຄື່ອນ​ໄຫວ​ຢູ່ເມືອງ​ປາກ​ຊ່ອງ, ປະທານ​ສະພາ​ແຫ່ງ​ຊາດ ພ້ອມ​ດ້ວຍຄະນະ ​ໄດ້ສົມທົບກັບທ່ານ ເມກສະຫວັນ ພົມພິທັກ ປະທານ​ສະພາ​ປະຊາຊົນ​​ແຂວງ​ (ສພຂ) ຈຳປາ​ສັກ, ສ່ວນ​ການ​ເຄື່ອນ​ໄຫວ​ຢູ່​ເມືອງ​ສະໜາມ​ໄຊ ​ແມ່ນ​ໄດ້​ສົມທົບ​ກັບ​ທ່ານ ​ເພັດ​ແກ້ວ ​ເຮືອງ​ປັນຍາ ​ໂດຍ​ມີຄະນະ​ເລຂາທິການ ​ແລະ ພະນັກງານ​ວິຊາ​ການພາຍ​ໃນ ສພຂ ສອງ​ແຂວງ​​ເຂົ້າ​ຮ່ວມ​ຕິດຕາມ ເຊິ່ງໄດ້ເຄື່ອນໄຫວທັງໝົດ 8 ຈຸດ ປະກອບມີ: ຢູ່ເມືອງປາກຊ່ອງ ແຂວງຈຳປາສັກ 3 ຈຸດຄື: ຈຸດສາງບໍລິສັດດາວເຮືອງ, ໂຮງໝໍເມືອງປາກຊ່ອງ ແລະ ຈຸດໂຮງຮຽນມັດທະຍົມບ້ານປາກບ້ອງ, ຢູ່ແຂວງອັດຕະປື 5 ຈຸດຄື: ໂຮງຮຽນມັດທະຍົມສະໜາມໄຊ, ໂຮງໝໍແຂວງອັດຕະປື, ບ້ານດອນບົກ, ບ້ານຕາມໍຢອດ ແລະ ບ້ານປິ່ນດົງ.

          ​ໃນ​ການ​ເຄື່ອນ​ໄຫວ​ດັ່ງກ່າວ, ຄະນະ​ໄດ້​ຮັບ​ຟັງ​ການ​ລາຍ​ງານກ່ຽວກັບສະພາບການໂດຍຫຍໍ້ຂອງໄພພິບັດ ແລະ ຄວາມຄືບໜ້າໃນການປະຕິບັດງານພາກສະໜາມ ຈາກທ່ານ ອຸ່ນຫລ້າ ໄຊຍະສິດ ຮອງເຈົ້າແຂວງໆອັດຕະປື ຫົວໜ້າຄະນະຊີ້ນຳພາກສະໜາມການປະຕິບັດວຽກກູ້ໄພພິບັດນໍ້າຖ້ວມ; ພ້ອມ​ນັ້ນ, ປະທານ​ສະພາ​ແຫ່ງ​ຊາດ​ໄດ້​ລົງ​ໄປ​ມອບເງິນ, ​ເຄື່ອງຊ່ວຍ​ເຫລືອ ​ແລ​ະ ​ໄປ​ໃຫ້​ກຳລັງ​ໃຈ​ແກ່​ຜູ້​ປະສົບ​ໄພ​ທີ່​ໄດ້​ຮັບ​ບາດ​ເຈັບ ​ແລະ ​ເຂົ້າ​ຮັບ​ການ​ປິ່ນປົວ​ຢູ່​ຕາມ​ໂຮງໝໍ​ຕ່າງໆ ​ແລະ ປະຊາຊົນ​ທີ່​​ອາ​ໄສ​ຢູ່​ສູນ​ພັກຊົ່ວຄາວ​ຕ່າງໆ ລວມທັງ​​ເຂດ​ທີ່​​ເສັ້ນທາງລົດ​ຖືກ​ຕັດຂາດ ສາມາດ​ລຳລຽງ​ການ​ຊ່ວຍ​ເຫລືອ​ໄດ້​ດ້ວຍ​ເຮືອບິນ​ເທົ່າ​ນັ້ນ; ນອກນັ້ນ, ຍັງ​ໄດ້​ພົບ​ປະ​ກັບ​ບັນດາ​ນາຍ​ທະຫານ, ໜ່ວຍ​ກູ້​ໄພ ​ແລະ ທີ​ມອາສາ​ສະໝັກ​ຈາກ​ທັງ​ພາຍ​ໃນ ​ແລະ ຕ່າງປະ​ເທດອີກ​ດ້ວຍ.

ໂອກາດດຽວກັນນີ້, ປະທານສະພາແຫ່ງຊາດ ​ໄດ້ສະແດງຄວາມເຫັນອົກເຫັນໃຈ,  ຄວາມຫ່ວງໃຍ ແລະ ໃຫ້ກຳລັງໃຈແກ່ປະຊາຊົນທີ່ໄດ້ຮັບຜົນກະທົບຕໍ່ເຫດການດັ່ງກ່າວ ​ທັງໄດ້ໃຫ້ທິດຊີ້ນຳ ແລະ ໃຫ້ກຳລັງໃຈຕໍ່ປະຊາຊົນທຸກຄົນ ຈົ່ງອົດທົນຜ່ານຜ່າອຸປະສັກອັນໂຫດຮ້າຍນີ້ ເຊື່ອວ່າອີກບໍ່ດົນຈະສາມາດກູ້ວິກິດນີ້ເຂົ້າສູ່ສະພາວະປົກກະຕິໄດ້ ແລະ ສະແດງຄວາມຊົມເຊີຍຕໍ່ຄະນະທີ່ປະຈຳຢູ່ພາກສະໜາມ ແລະ ໜ່ວຍ​ງານ​ຕ່າງໆ ທັງ​ພາຍ​ໃນ ​ແລະ ຕ່າງປະ​ເທດ ທີ່​​ເຂົ້າ​ມາ​ຊ່ວຍ​ເຫລືອ​ແກ້​ວິ​ກິດ​ການ​ໃນ​ຄັ້ງ​ນີ້; ພ້ອມນັ້ນ, ຍັງໄດ້ເນັ້ນໜັກບາງຈຸດຕື່ມເພື່ອຮັບປະກັນໄດ້ການຊ່ວຍເຫລືອ ແລະ ບັນເທົາທຸກໃຫ້ປະຊາຊົນ ເປັນຕົ້ນແມ່ນການຮັກສາອະນາໄມບ່ອນພັກເຊົາຂອງຜູ້ຖືກເຄາະຮ້າຍ ແລະ ໃຫ້ເອົາໃຈໃສ່ເປັນພິເສດຕໍ່ຜູ້ທີ່ມີອາຍຸສູງເຖ້າແກ່, ແມ່ຍິງ ແລະ ເດັກນ້ອຍ, ເອົາໃຈໃສ່ໃນການເກັບຮັກສາບັນດາເຄື່ອງບັນເທົາທຸກທີ່ບັນດາພາກລັດ-ເອກະຊົນມອບຮັບຊ່ວຍເຫລືອເພື່ອຮັບປະກັນຄຸນນະພາບໃນການຊົມໃຊ້ ແລະ ແຈກຍາຍໃນຕໍ່ໜ້າ ໂດຍຄະນະ​ຮັບຜິດຕ້ອງຮີບດ່ວນໃນການຊ່ວຍເຫລືອແກ່ຜູ້ທີ່ຖືກຜົນກະທົບ ແລະ ຂໍໃຫ້ຄຸ້ມຄອງເຄື່ອງຊ່ວຍເຫລືອໃຫ້ທົ່ວເຖິງກັນ.

ໃນການເຄື່ອນໄຫວຄັ້ງນີ້, ຄະນະໄດ້ນຳເອົາ​ເງິນສົດ ຈຳນວນ 19 ລ້ານ​ກີບ ​ແລະ ​ເຄື່ອງ​ບໍລິ​ໂພ​ກ, ອຸປະ​​ໂພ​ກຈຳນວນ​ໜຶ່ງທີ່​ໄດ້ຈາກ​ການລະດົມທຶນຈາກພະນັກງານນັບ​ແຕ່​ຂັ້ນ​ການ​ນຳຕ່າງໆ ຈົນ​ເຖິງ​ພະນັກງານ​ວິຊາ​ການພາຍໃນສະພາແຫ່ງຊາດ; ພ້ອມ​ນັ້ນ, ຍັງ​ໄດ້​ຮັບ​ຈາກ​ການ​ລະດົມໄດ້ຈາກບໍລິສັດ ແສງເພັດ ກໍ່ສ້າງ ຂົວ-ທາງ ເກັບກູ້ລະເບີດ ຊ່ວຍ​ເຫລືອ​ເຂົ້າສານ ຈຳນວນ 30 ​ໂຕນ ມູນ​ຄ່າ 180 ລ້ານກີບ, ​ເຄື່ອງ​ບໍລິ​ໂພ​ກ ​ແລະ ອຸປະ​​ໂພ​ກຈາກບໍລິສັດ BKK ອຸດສາຫະກຳ​ການ​ຄ້າ ຊ່ວຍ​ເຫລືອ​ມູນ​ຄ່າ​ປະມານ 50 ລ້ານກວ່າ​​ກີບ ແລະ ທະນາຄານລາວ-ຫວຽດ ປະມານ 90 ລ້ານກວ່າ​ກີບ ລວມມູນຄ່າທັງໝົດ 300 ລ້ານກວ່າກີບ.

(ນາງ ປາກາລັກ ພົມມີໄຊ)