ສພຂ ຫຼວງນຳ້ທາ ເຜີຍແຜ່ຜົນສຳເລັດ ກອງປະຊຸມສະໄໝສາມັນເທືອທີ່ 5
13/08/2018

(ສພຊ) ວັນທີ 3 ສິງຫາຜ່ານມາ, ສະພາປະຊາຊົນແຂວງຫລວງນໍ້າທາ ໄດ້ຈັດພິທີເຜີຍແຜ່ຜົນສໍາເລັດຂອງກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດ ຊຸດທີ VIII ແລະ ກອງປະຊຸມສະໄໝສາມັນເທື່ອທີ 5 ຂອງສະພາປະຊາຊົນແຂວງຫລວງນໍ້າທາ ຊຸດທີ I ຢູ່ທີຫໍວັດທະນາທຳຂອງແຂວງຫລວງນໍ້າທາ ໃຫ້ກຽດເຜີຍແຜ່ໂດຍທ່ານ ສົມພັນ ແພງຄໍາມີ ກຳມະການສູນກາງພັກ, ຮອງປະທານສະພາແຫ່ງຊາດ ເຂົ້າຮ່ວມມີທ່ານ ໄຊພອນ ຄຸນສີລິເຮືອງ ຮອງເລຂາພັກແຂວງ ປະທານສະພາປະຊາຊົນແຂວງ, ຄະນະປະຈໍາພັກແຂວງ, ສະມາຊິກສະພາແຫ່ງຊາດປະຈໍາເຂດເລືອກຕັ້ງ (ສສຊ), ສະມາຊິກສະພາປະຊາຊົນແຂວງ (ສສຂ), ເຈົ້າເມືອງ 5 ເມືອງ, ອົງການລັດທຽບເທົ່າ ແລະ ພະແນກການອ້ອມຂ້າງແຂວງ ເຂົ້າຮ່ວມທັງໝົດ 600 ກວ່າຄົນ.

       ການໂຄສະນາເຜີຍແຜ່ໃນຄັ້ງນີ້, ແມ່ນເພື່ອນຳເອົາເນື້ອໃນຈິດໃຈຜົນສໍາເລັດຂອງກອງປະຊຸມທີ່ໄດ້ຄົ້ນຄວ້າ, ພິຈາລະນາ ແລະ ຮັບຮອງໃນກອງປະຊຸມສະໄໝສາມັນເທື່ອທີ5 ຂອງສະພາແຫ່ງຊາດ ຊຸດທີ VIII ແລະ ກອງປະຊຸມສະໄໝສາມັນເທື່ອທີ 5 ຂອງສະພາປະຊາຊົນແຂວງ ຊຸດທີ I ມາຈັດຕັ້ງຜັນຂະຫຍາຍ ເພື່ອໃຫ້ຮັບຮູ້ ແລະ ເຊື່ອມຊຶມ ຢ່າງກວ້າງຂວາງ.

       ໃນພິທີ, ທ່ານ ສົມພັນ ແພງຄຳມີ ໄດ້ເຜີຍແຜ່ໃຫ້ຮັບຮູ້ກ່ຽວກັບຜົນສຳເລັດຂອງກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດຊຸດທີ VIII ເຊິ່ງໄດ້ພິຈາລະນາ ແລະ ຮັບຮອງເອົາບັນຫາພື້ນຖານອັນສຳຄັນຂອງຊາດ ເປັນຕົ້ນ: ພິຈາລະນາເອົາມະຕິຂອງສະພາແຫ່ງຊາດ ວ່າດ້ວຍການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ ປະຈຳ 4 ເດືອນ, ຄາດຄະເນການປະຕິບັດແຜນ 6 ເດືອນຕົ້ນປີ 2018 ແລະ ທິດທາງວຽກງານຈຸດສຸມປະຈຳ 6 ເດືອນທ້າຍປີ 2018; ມະຕິຂອງສະພາແຫ່ງຊາດ ວ່າດ້ວຍການຊີ້ແຈງຂອງລັດຖະບານຕໍ່ກັບຄຳຊັກຖາມຂອງສະພາແຫ່ງຊາດ; ມະຕິຂອງສະພາແຫ່ງຊາດ ວ່າດ້ວຍແຜນແມ່ບົດຈັດສັນທີ່ດິນແຫ່ງຊາດຮອດປີ 2030; ມະຕິຂອງສະພາແຫ່ງຊາດ ວ່າດ້ວຍການແຕ່ງຕັ້ງສະມາຊິກສະພາຜູ້ພິພາກສາຂອງສານປະຊາຊົນສູງສຸດ; ຮັບຟັງລາຍງານຂອງລັດຖະບານກ່ຽວກັບການຈັດຕັ້ງປະຕິບັດມະຕິຂອງກອງປະຊຸມສະພາແຫ່ງຊາດ ວ່າດ້ວຍການອອກນິຕິກຳໃຕ້ກົດໝາຍ ແລະ ຜົນກະທົບຈາກການນຳໃຊ້ເຄມີອັນຕະລາຍເກີນຄ່າມາດຖານເງື່ອນໄຂຕໍ່ສິງແວດລ້ອມ, ສັງຄົມ ແລະ ທຳມະຊາດ; ຮັບຟັງການລາຍງານກ່ຽວກັບການເຄື່ອນໄຫວວຽກງານ 6 ເດືອນຕົ້ນປີ ແລະ ທິດທາງວຽກງານຈຸດສຸມ 6 ເດືອນທ້າຍປີ 2018 ຂອງສະພາແຫ່ງຊາດ ແລະ ໄດ້ພິຈາລະນາຮັບຮອງເອົາແຜນການສ້າງກົດໝາຍສ້າງໃໝ່ 5 ສະບັບຄື: ກົດໝາຍວ່າດ້ວຍການສັກວັກຊີນກັນພະຍາດ, ກົດໝາຍວ່າດ້ວຍການຈັດສັນພູມລຳເນົາ ແລະ ອາຊີບ, ກົດໝາຍວ່າດ້ວຍປ້າຍ, ກົດໝາຍວ່າດ້ວຍການຄຸ້ມຄອງໜີ້ສິນສາທາລະນະ, ກົດໝາຍວ່າດ້ວຍສະຫະພັນນັກຮົບເກົ່າ ແລະ ກົດໝາຍປັບປຸງ 8 ສະບັບຄື: ກົດໝາຍວ່າດ້ວຍການຂັດແຍ່ງທາງດ້ານເສດຖະກິດ, ກົດໝາຍວ່າດ້ວຍອາກອນມູນຄ່າເພີ່ມ, ກົດໝາຍວ່າດ້ວຍທະນາຄານແຫ່ງ ສປປລາວ, ກົດໝາຍວ່າດ້ວຍການປະກັນສັງຄົມ, ກົດໝາຍວ່າດ້ວຍຖະບຽນຄອບຄົວ, ກົດໝາຍວ່າດ້ວຍການບິນພົນລະເຮືອນ, ກົດໝາຍວ່າດ້ວຍນາຍທະຫານກອງທັບປະຊາຊົນລາວ ແລະ ກົດໝາຍວ່າດ້ວຍແນວລາວສ້າງຊາດ; ພ້ອມນັ້ນ, ທ່ານຮອງປະທານສະພາແຫ່ງຊາດ ຍັງໄດ້ເຜີຍແຜ່ເນື້ອໃນຜົນສຳເລັດຂອງກອງປະຊຸມສະໄໝສາມັນເທື່ອທີ 5 ຂອງສະພາປະຊາຊົນແຂວງ ຊຸດທີ I ເຊິ່ງກອງປະຊຸມໄດ້ຮັບຟັງ ແລະ ພິຈາລະນາຮັບຮອງເອົາບັນຫາສຳຄັນພື້ນຖານຂອງແຂວງເປັນຕົ້ນ: ພິຈາລະນາ ແລະ ຮັບຮອງເອົາບຸກຄະລາກອນຂອງອົງການປົກຄອງແຂວງຕາມການສະເໜີຂອງທ່ານເຈົ້າແຂວງ; ຮັບຟັງ ແລະ ພິຈາລະນາຮັບຮອງເອົາບົດລາຍງານໂດຍສັງເຂບຂອງທ່ານເຈົ້າແຂວງກ່ຽວກັບການຕີລາຄາສະພາບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດປະຈຳ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2018 ຂອງແຂວງ; ຮັບຟັງບົດລາຍງານຂອງຫົວໜ້າອົງການໄອຍະການປະຊາຊົນແຂວງ ກ່ຽວກັບການຕິດຕາມກວດກາຄ້າຍຄຸມຂັງດັດສ້າງແຂວງ; ພິຈາລະນາ ແລະ ຮັບຮອງບົດລາຍງານຂອງຄະນະປະຈຳສະພາປະຊາຊົນແຂວງ ກ່ຽວກັບການຈັດຕັ້ງປະຕິບັດແຜນການເຄື່ອນໄຫວວຽກງານຂອງສະພາປະຊາຊົນແຂວງ ໃນລະຫວ່າງສອງກອງປະຊຸມ (ກອງປະຊຸມສະໄໝສາມັນເທື່ອທີ 4 ຫາ ກອງປະຊຸມສະໄໝສາມັນເທື່ອທີ 5 ແລະ ທິດທາງແຜນການລະຫວ່າງກອງປະຊຸມສະໄໝສມມັນເທື່ອທີ 5 ຫາ ກອງປະຊຸມສະໄໝສາມັນເທື່ອທີ 6); ຮັບຟັງບົດລາຍງານຂອງກອງບັນຊາການ ປກສ ແຂວງກ່ຽວກັບການສະກັດກັ້ນ ແລະ ການຕ້ານການຄ້າມະນຸດຢູ່ແຂວງຫລວງນ້ຳທາ; ທາບທາມຮ່າງຂໍ້ຕົກລົງຂອງທ່ານເຈົ້າແຂວງວ່າດ້ວຍ ການຄຸ້ມຄອງສິ່ງປຸກສ້າງທີ່ຢູ່ອາໃສ, ການຂົນສົ່ງ ແລະ ການສະຫງວນທາງພາຍໃນເທສະບານແຂວງ ແລະ ບັນດາຕົວເມືອງຂອງແຂວງ.

(ນາງ ວັນນີ ແຝງບົວວັນ)