ປະທານສະພາແຫ່ງຊາດ ສືບຕໍ່ພົບປະຢ້ຽມຢາມປະຊາຊົນຜູ້ປະສົບໄພນຳ້ຖ້ວມ  ຢູ່ເມືອງວຽງໄຊ ແຂວງຫົວພັນ
13/08/2018

(ສພຊ) ດ້ວຍເນື້ອໃນຈິດໃຈແຫ່ງຄວາມເປັນຫ່ວງເປັນໄຍຂອງການນໍາພັກ-ລັດ ກໍຄື ສະພາແຫ່ງຊາດ ທີ່ມີຕໍ່ຊີວິດການເປັນຢູ່ຂອງປະຊາຊົນ ໂດຍສະເພາະຜູ້ປະສົບໄພນໍ້າຖ້ວມ, ວັນອັງຄານ ທີ 07 ສິງຫາ 2018,​ ທ່ານ ນາງ ປານີ ຢາທໍ່ຕູ້ ກໍາມະການກົມການເມືອງສູນກາງພັກ, ປະທານສະພາແຫ່ງຊາດ ພ້ອມດ້ວຍຄະນະ ໄດ້ເດີນທາງດ້ວຍເຮືອບິນພິເສດ ຮອດເມືອງວຽງໄຊ ແຂວງຫົວພັນ ໂດຍການຕ້ອນຮັບຂອງທ່ານ ວັນໄຊ ແພງຊຸມມາ ເຈົ້າແຂວງໆຫົວພັນ, ທ່ານ ຄໍາວອນ ບຸນທະວົງ ປະທານສະພາປະຊາຊົນແຂວງຫົວພັນ, ທ່ານ ແພງວັນ ນາມມະນີລິນ ເຈົ້າເມືອງໆວຽງໄຊ ພ້ອມດ້ວຍຄະນະ.

ຈາກນັ້ນ ທ່ານ ປະທານສະພາແຫ່ງຊາດ ພ້ອມດ້ວຍຄະນະ ໄດ້ເດີນທາງດ້ວຍທາງລົດ ໄປເບິ່ງສະພາບຜົນເສຍ ຫາຍຈາກໄພນໍ້າຖ້ວມ ຕາມເສັ້ນທາງ ບ້ານນາວຍາວ ເມືອງວຽງໄຊ ແລະ ສະພາບການພັດທະນາເສດຖະກິດ-ສັງຄົມ ເມືອງວຽງໄຊ.

ທ່ານ ແພງວັນ ນາມມະນີລິນ ໄດ້ລາຍງານການພັດທະນາເສດຖະກິດ-ສັງຄົມ ແລະ ສະພາບຜົນເສຍຫາຍຈາກ ໄພນໍ້າຖ້ວມຢູ່ເມືອງວຽງໄຊ: ເມືອງວຽງໄຊ ຫ່າງຈາກເທດສະບານແຂວງຫົວພັນ 28 ກິໂລແມັດ, ທົ່ວເມືອງມີ 14 ກຸ່ມບ້ານ, ປະກອບດ້ວຍ 104 ບ້ານ, ມີພົນລະເມືອງທັງໝົດ 32.697 ຄົນ ຍິງ 15.988 ຄົນ, ມີເນື້ອທີ່ທັງໝົດ 1.624,54 ກິໂລຕາແມັດ; ເປັນເມືອງພູດອນ ມີພູຜາ ດິນຄ້ອຍ ກວມ 80%, ມີ 5 ເຜົ່າຢູ່ຮ່ວມກັນ ຄື: ເຜົ່າລາວ, ໄຕແດງ, ມົ້ງ, ກຶມມຸ ແລະ ອິວມຽນ; ການເກັບລາຍຮັບເຂົ້າງົບປະມານ ສົກປີ 2016-2017 ຕາມແຜນການທີ່ກໍານົດໄວ້ 2,7 ຕື້ກີບ ເກັຍໄດ້ຕົວຈິງ 2.837.474.000 ກີບ ເທົ່າກັບ 105,9%, ປະກາດເປັນ ບ້ານພັດທະນາໄດ້ 39 ບ້ານ ເທົ່າ 37,5 ຂອງບ້ານທັງໝົດ.

ຈາກເຫດການຝົນຕົກຕິດຕໍ່ກັນຫລາຍວັນໃນລະຫວ່າງທ້າຍເດືອນກໍລະກົດຜ່ານມາ, ເມືອງວຽງໄຊກໍໄດ້ຮັບ ຜົນກະທົບ ແລະ ມີຜົນເສຍຫາຍພໍສົມຄວນ; ທາງດ້ານຄົມມະນາຄົມ ມີຂົວເປ່ເພ ໄປມາບໍ່ໄດ້ 3 ຈຸດ ຄື: ຂົວບ້ານດ່ານເພົ້າ 1, ຂົວບ້ານດ່ານເພົ້າ 2 ແລະ ຂົວຄຸ້ມບ້ານນາ; ຜົນກະທົບທາງດ້ານກະສິກໍາ ໂດຍສະເພາະຜົນກະທົບ ຕໍ່ນາຂອງປະຊາຊົນ ມີ 28 ບ້ານ, ມີ 534 ຄອບຄົວ, ເນື້ອທີ່ນາຖືກນໍ້າຖ້ວມ 116,54 ເຮັກຕາ, ເນື່ອທີ່ນາຖືກເຊາະເຈື່ອນ 29, 7 ເຮັກຕາ, ເນື້ອທີ່ນາເສຍຫາຍຕົວຈິງ 111,29 ເຮັກຕາ.

ໃນໂອກາດນີ້ ທ່ານ ປະທານສະພາແຫ່ງຊາດ ຍັງໄດ້ມີຄໍາເຫັນໂອ້ລົມ ອໍານາດການປົກຄອງ ແລະ ພໍ່ແມ່ປະຊາຊົນ ເຊິ່ງທ່ານໄດ້ສະແດງຄວາມຊົມເຊີຍ ທີ່ເມືອງວຽງໄຊສາມາດເກັບລາຍຮັບໄດ້ລື່ນຄາດໝາຍ ແລະ  ສະເໜີໃຫ້ສືບຕໍ່ປະຕິບັດຄາດໝາຍ ໂດຍການມີແຜນການລະອຽດ ຢ່າງມີຈຸດສຸມ, ເສີມຂະຫຍາຍທ່າແຮງຂອງເມືອງ ໂດຍສະເພາະການບໍລິການການທ່ອງທ່ຽວ, ການບໍລິການເຮືອນພັກ, ເສີມຂະຫຍາຍທ່າແຮງທີ່ເປັນເອກະລັກ ຂອງທ້ອງຖິ່ນ ເຊັ່ນ: ອາຫານທີ່ເປັນເອກະລັກ ແລະ ການຜະລິດຫັດຖະກໍາເປັນສິນຄ້າ ແລະ ອື່ນໆ; ທ່ານຍັງໄດ້ຮຽກຮ້ອງໃຫ້ ທຸກພາກສ່ວນທີ່ກ່ຽວຂ້ອງ ເລັ່ງເກັບກໍາຜົນເສຍຫາຍລະອຽດ ແລ້ວຮີບຮ້ອນຟື້ນຟູ ຊີວິດການເປັນຢູ່ຂອງປະຊາຊົນ,​ ໃຫ້ທາງແຂວງ ເມືອງ ແລະ ບ້ານ ຈັດສັນທີ່ຢູ່ປະຊາຊົນໃໝ່ ລວມທັງມີການວາງແຜນຈັດສັນຍາວນານ ເພື່ອຮັບປະກັນບໍ່ສ່ຽງຕໍ່ໄພພິບັດໃນຕໍ່ໜ້າ, ຕ້ອງມີແຜນການຟື້ນຟູ ການຜະລິດຂອງປະຊາຊົນ ໂດຍສະເພາະແມ່ນການປູກຝັງພືດທົດແທນຜົນລະປູກທີ່ເສຍຫາຍໄປ, ເລັ່ງຟື້ນຟູພື້ນຖານ ໂຄງລ່າງ ທາງດ້ານເສັ້ນທາງຄົມມະນາຄົມ, ເອົາໃຈໃສ່ວຽກງານສາທາລະນະສຸກ ກວດກາສຸຂະພາບປະຊາຊົນ ກວດການໍ້າກິນນໍ້າໃຊ້ ຮັບປະກັນໃຫ້ມີຄວາມສະອາດຖືກຫລັກອານາໄມ ແລະ ປ້ອງກັນພະຍາດຕິດຕໍ່ ທີ່ອາດຈະເກີດຂຶ້ນ ພ້ອມດຽວກັນນັ້ນ ກໍໃຫ້ກວດກາຄືນ ສະພາບຂອງບັນດາໂຮງຮຽນ ເພື່ອຮັບປະກັນໃຫ້ລູກຫລານ ມີບ່ອນຮໍ່າຮຽນສຶກສາ ໃນສົກຮຽນທີ່ຈະມາເຖິງ.

ທ່ານ ປະທານສະພາແຫ່ງຊາດ ພ້ອມດ້ວຍຄະນະ ຍັງໄດ້ມອບເຄື່ອງອຸປະໂພກ-ບໍລິໂພກ ມູນຄ່າ 9.160.000 ກີບ ໃຫ້ປະຊາຊົນຜູ້ປະສົບໄພພິບັດ ເມືອງວຽງໄຊ ແຂວງຫົວພັນ.

# ບຸນເກີດ ວົງໄຊຍາ