ສະພາແຫ່ງຊາດ ມອບເຄື່ອງຊ່ວຍເຫຼືອໃຫ້ຜູ້ປະສົບໄພນ້ຳຖ້ວມ ຢູ່ແຂວງບໍລິຄຳໄຊ
20/08/2018

(ສພຊ) ​ວັນ​ທີ 14 ສິງຫາ 2018, ​ສະພາ​ແຫ່ງຊາດ ​ໄດ້​ນຳ​ເອົາ​ເຄື່ອງນຸ່ງ​ຫົ່ມ ພ້ອມ​ດ້ວຍ​ເຄື່ອງ​ອຸປະ​ໂພ​ກ-ບໍລິ​ໂພ​ກ ເພື່ອຊ່ວຍເຫລືອຜູ້ປະສົບໄພນ້ຳຖ້ວມ ລວມມູນຄ່າ 40 ລ້ານກີບ ມອບໃຫ້ສະພາປະຊາຊົນແຂວງບໍລິຄຳໄຊ ເຊິ່ງ​​ກ່າວມອບ​ໂດຍ​ທ່ານ ນາງ ສີ​ໃສ ລື​ເດດ​ມູນ​ສອນ ຮອງ​ປະທານ​ສະພາ​ແຫ່ງ​ຊາດ, ກ່າວຮັບ​ໂດຍ​ທ່ານ ສຸວັນ​ນີ ​ໄຊຊະນະ ປະທານ​ສະພາ​ປະຊາຊົນ​ແຂວງ, ມີ​ບັນດາ​ທ່ານ​ຄະນະ​ປະປະຈຳ​ສະພາ​ປະຊາຊົນ​ແຂວງ ​ແລະ ສະ​ມາ​ຊິກ​ສະພາ​ປະຊາຊົນ​ແຂວງ​ເຂົ້າ​ຮ່ວມ​ເປັນສັກຂີ​ພິຍານ.

ໂອກາດນີ້, ທ່ານປະ​ທານ​ສະພາ​ປະຊາຊົນແຂວງບໍລິຄຳໄຊ ໄດ້ຕາງໜ້າໃຫ້ການນຳຂອງແຂວງ ກໍຄືພໍ່ແມ່ປະຊາຊົນຜູ້ທີ່ປະສົບໄພນ້ຳຖ້ວມ ໄດ້ສະແດງຄວາມຂອບໃຈມາຍັງ ຄະນະ​ນຳ​ຂອງ​ສະພາ​ແຫ່ງ​ຊາດ ກໍຄືນ້ຳໃຈທຸກພາກສ່ວນຂອງສະພາ​ແຫ່ງ​ຊາດ ທີ່ໄດ້ມີຄວາມເປັນຫ່ວງເປັນໃຍຕໍ່ໄພພິບັດທີ່ເກີດຂຶ້ນ ແລະ ໃຫ້ການຊ່ວຍເຫລືອຄັ້ງນີ້ ພ້ອມທັງຢືນຢັນວ່າ: ຈະນຳເອົາເຄື່ອງຊ່ວຍເຫລືອຈຳນວນດັ່ງກ່າວ ສົ່ງໃຫ້ເຖິງຜູ້ທີ່ຖືກຜົນກະທົບຈາກໄພນໍ້າຖ້ວມຢູ່ບັນດາເມືອງ ແລະ ບັນດາບ້ານພາຍໃນແຂວງໃນໄວໆນີ້.