ປະທານສະພາແຫ່ງຊາດຕ້ອນຮັບປະທານສານປະຊາຊົນສູງສຸດ ສສ.ຫວຽດນາມ
04/09/2018

(ສພຊ) ໃນຕອນບ່າຍວັນຈັນທີ 27 ສິງຫາຜ່ານມາ ທີ່ສະພາແຫ່ງຊາດ ສະຫາຍ ນາງ ປານີ ຢາທໍ່ຕູ້ ກໍາມະການກົມການເມືອງສູນກາງພັກ, ປະທານສະພາແຫ່ງຊາດ ໄດ້ ຕ້ອນຮັບການເຂົ້າຢ້ຽມຂໍ່ານັບຂອງສະຫາຍ ຫງວຽນ ຮວາ ບິງ ເລຂາທິການສູນກາງ ພັກກອມມູນິດຫວຽດນາມ, ປະທານສານປະຊາຊົນສູງສຸດ ແຫ່ງ ສສ.ຫວຽດນາມ ພ້ອມດ້ວຍຄະນະ ໃນໂອກາດທີ່ທ່ານເດີນທາງມາຢ້ຽມຢາມ ແລະ ເຮັດວຽກກັບສານປະ ຊາຊົນສູງສຸດ ສປປລາວ ລະຫວ່າງວັນທີ 26-28 ສິງຫາ 2018.

       ສະຫາຍ ນາງ ປານີ ຢາທໍ່ຕູ້ ໄດ້ສະແດງຄວາມຍິນດີຕ້ອນຮັບຕໍ່ການມາຢ້ຽມຢາມ ແລະ ເຮັດວຽກຢູ່ ສປປລາວ ໃນຄັ້ງນີ້, ພ້ອມທັງຕີລາຄາສູງຕໍ່ການພົວພັນຮ່ວມມື, ແລກ ປ່ຽນຂໍ້ມູນ-ຂ່າວສານ ແລະ ບົດຮຽນຢ່າງເປັນປົກກະຕິ ຂອງສານປະຊາຊົນສູງສຸດຂອງ ສອງປະເທດ, ທັງເປັນການປະກອບສ່ວນອັນສໍາຄັນເຂົ້າໃນການສືບຕໍ່ເສີມຂະຫຍາຍ ສາຍພົວພັນມິດຕະພາບ ແລະ ການຮ່ວມມືຮອບດ້ານ ທີ່ເປັນມູນເຊື້ອລະຫວ່າງສອງພັກ ສອງລັດ ແລະ ປະຊາຊົນສອງຊາດ ເວົ້າລວມ ເວົ້າສະເພາະ ກໍຄືສອງສານປະຊາຊົນສູງສຸດ ລາວ-ຫວຽດນາມ; ສະຫາຍປະທານສະພາແຫ່ງຊາດລາວ ໄດ້ສະແດງຄວາມຊົມເຊີຍ ແລະ ຕີລາຄາສູງຕໍ່ການພົບປະເຮັດວຽກຮ່ວມກັນຂອງສອງສານປະຊາຊົນສູງສຸດ ເຊິ່ງສາ ມາດປະສົບຜົນສໍາເລັດເປັນຢ່າງດີ ເປັນຕົ້ນການຕີລາຄາຄືນການຮ່ວມມື ແລະ ທິດທາງ ໃນການຮ່ວມມືໃນຕໍ່ໜ້າ, ພ້ອມທັງສະແດງຄວາມຂອບໃຈຕໍ່ການເຊື່ອໃຫຍ່ຜູ້ປະສົບ ໄພພິບັດໃນບັນດາແຂວງພາກໃຕ້ ໂດຍສະເພາະແຂວງອັດຕະປື; ຢູ່ ສປປລາວ ບັນດາຂໍ້ ຂັດແຍ່ງມີຫລາຍ ສະນັ້ນ ມັນຮຽກຮ້ອງໃຫ້ລະບົບສານຕ້ອງມີການພັດທະນາ, ມີຄວາມ ເຂັ້ມແຂງ, ມີຄຸນນະພາບໃນການປະຕິບັດໜ້າທີ່ວຽກງານ ໃນນັ້ນ ຕ້ອງຮັບປະກັນໃຫ້ມີ ຄຸນນະທຳ, ດັ່ງນັ້ນ ເຫັນວ່າການພົວພັນຮ່ວມມືຂອງສານປະຊາຊົນສູງສຸດຂອງສອງປະ ເທດ ແມ່ນມີຄວາມຈໍາເປັນຫລາຍໃນໄລຍະໃຫມ່ ພ້ອມທັງສະໜັບສະໜູນໃຫ້ມີການ ຮ່ວມມືໃນຕໍ່ໜ້າ. ນອກນຈາກນັ້ນ, ສະຫາຍ ນາງ ປານີ ຢ່າທໍ່ຕູ້ ໄດ້ສະເໜີທິດທາງໃນ ແຜນການຮ່ວມມືໃນຕໍ່ໜ້າຕື່ມດັ່ງນີ້: ສະເໜີສືບຕໍ່ພົວພັນຮ່ວມມືສ້າງບຸກຄະລາກອນ ກ່ຽວກັບຜູ້ພິພາກສາ ສປປລາວ, ສະເໜີໃຫ້ສານປະຊາຊົນສູງສຸດຫວຽດນາມ ພິຈາລະ ນາສືບຕໍ່ຈັດສົ່ງຊ່ຽວຊານຜູ້ພິພາກສາຫວຽດນາມ ມາເຝິກອົບຮົບ, ຖ່າຍທອດບົດຮຽນ ໃຫ້ຜູ້ພິພາກສາລາວ;  ສະເໜີໃຫ້ຊ່ວຍສ້າງສານປົກຄອງຂອງລາວ ເພາະເປັນຄວາມ ຮຽກຮ້ອງຂອງປະຊາຊົນ ເພື່ອຮັກສາຄວາມຍຸຕິທໍາໃນສັງຄົມ ຄຽງຄູ່ກັບການສ້າງຕັ້ງ ສານປົກຄອງນັ້ນ ກໍຈະຕ້ອງ ສ້າງກົດໝາຍຈໍານວນໜຶ່ງຂຶ້ນມາ.

       ສະຫາຍ ຫງວຽນ ຮວາ ບິງ ໄດ້ສະແດງຄວາມຂອບໃຈ ແລະ ດີໃຈຕໍ່ການຕ້ອນ ຮັບຢ່າງອົບອຸ່ນຂອງພັກ ແລະ ລັດຖະບານ ສປປລາວ, ພ້ອມທັງຝາກຄວາມຍື້ຢາມ ຖາມຂ່າວຈາກສະຫາຍ ຫວຽນ ຖິ ກິມ ເງິນ ປະທານສະພາແຫ່ງຊາດ ສສ.ຫວຽດນາມ ມາຍັງສະຫາຍປະທານສະພາແຫ່ງຊາດລາວ; ສະຫາຍ ຫງວຽນ ຮວາ ບິງ ໄດ້ລາຍງານ ຜົນສໍາເລັດຂອງການພົບປະເຮັດວຽກກັບສະຫາຍ ຄຳພັນ ສິດທິດໍາພາ ກໍາມະການສູນ ກາງພັກ, ປະທານສານປະຊາຊົນສູງສຸດ; ພ້ອມນັ້ນສະຫາຍກໍໄດ້ສະແດງຄວາມຂອບໃຈ ຕໍ່ພັກ-ລັດ ກໍຄືສະພາແຫ່ງຊາດລາວ ໃນໄລຍະຜ່ານມາ ທີ່ໄດ້ປະດັບບັນດາຫລຽນອັນ ປະເສີດໃຫ້ແກ່ການນໍາຂອງສານປະຊາຊົນສູງສຸດ ສສ.ຫວຽດນາມ, ແລະ ສານປະຊາ ຊົນສຸງສຸດຫວຽດນາມ ໄດ້ມອບເງິນຈາກພະນັກງານ-ລັດຖະກອນສານປະຊາຊົນສຸງ ສຸດ ເຊິ່ງໄດ້ແບ່ງເອົາເງິນເດືອນມື້ໜຶ່ງຂອງຕົນເອງ ເພື່ອຊ່ວຍເຫລືອປະຊາຊົນລາວທີ່ຖືກ ຜົນກະທົບໃນບັນດາແຂວງພາກໃຕ້ ໂດຍສະເພາະແຂວງອັດຕະປື ເປັນຈໍານວນເງິນ 500 ລ້ານດົງ; ພ້ອມນັ້ນ ສະຫາຍກໍໄດ້ລາຍງານສະພາບການຮ່ວມມືຂອງສອງສານປະ ຊາຊົນສູງສຸດ ຕໍ່ການເຄື່ອນໄຫວເຮັດວຽກ ແລະ ສະໜັບສະໜູນເຊິ່ງກັນ ແລະ ກັນໃນ ໄລຍະຜ່ານມາ ບໍ່ວ່າຈະເປັນການຊ່ວຍເຫລືອໃນເວທີພາກພື້ນ ແລະ ສາກົນ, ສໍາຫລັບ ການແລກປ່ຽນການຢ້ຽມຢາມຂອງຄະນະຜູ້ແທນຂອງສອງສານປະຊາຊົນສູງສຸດ ແມ່ນ ເປັນປົກກະຕິ ນອກຈາກນັ້ນ ຍັງມີການແລກປ່ຽນບົດຮຽນ, ການຮ່ວມມືຂອງບັນດາ ທ້ອງຖິ່ນສອງປະເທດ ເພື່ອຕ້ານອາຊະຍາກໍາຕ່າງໆ, ສໍາລັບຂົງເຂດວຽກງານການຮ່ວມ ມືບໍາລຸງກໍ່ສ້າງພະນັກງານ ຝ່າຍສານປະຊາຊົນສຸງສູດ ສສ.ຫວຽດນາມ ໄດ້ມີການກະ ກຽມສູດເຝິກອົບຮົມໄລຍະສັ້ນ ເປັນຕົ້ນການບໍາລຸງສ້າງຜູ້ພິພາກສາໃຫ້ແກ່ລາວ ໃນແຕ່ ລະປີ ຈະໃຫ້ທຶນໃນການສຶກສາ 10 ທຶນ ໃຫ້ແກ່ນັກສຶກສາ ແລະ ພະນັກງານຂອງສານ ປະຊາຊົນສູງສຸດຂອງລາວ ໄປສຶກສາຢູ່ໂຮງຮຽນສານປະຊາຊົນສູງສຸດຂອງຫວຽດນາມ, ສໍາລັບການສ້າງກົດໝາຍ ໃນແຕ່ລະປີ ໄດ້ແຕ່ງຕັ້ງຄະນະສ່ຽວຊານມາບັນຍາຍ ແລະ ແລກປ່ຽນບົດຮຽນຂອງຫວຽດນາມ ໂດຍສະເພາະການຮ່ວມມືໃນການສ້າງກົດໝາຍ ວ່າດ້ວຍການດໍາເນີນຄະດີປົກຄອງ ກໍຄືການສ້າງຄະນະສານປົກຄອງຂອງລາວ.

(ສົມນຶກ ແກ້ວໄຊຍະຈັກ)