ຄະນະຜູ້ແທນ ສສຊ ຫວຽດນາມ ເຮັດວຽກຮ່ວມກັບ ສສຊ ລາວ
12/09/2018

(ສພຊ) ໃນລະຫວ່າງວັນທີ 9-11 ກັນຍາ 2018 ທີ່ຫໍປະຊູມສະພາແຫ່ງຊາດ (ຫລັກ 6) ນະຄອນຫລວງວຽງຈັນ, ສະພາແຫ່ງຊາດ ສປປ ລາວ ແລະ ສະພາແຫ່ງຊາດ ສສ.ຫວຽດນາມ ໄດ້ຈັດກອງປະຊຸມສໍາມະນາກ່ຽວກັບ ການພິຈາລະນາຮັບຮອງຜ່ານແຜນງົບປະມານ ແລະ ການກວດສອບແຫ່ງລັດ ໃຫ້ສະມາຊິກສະພາແຫ່ງຊາດ (ສສຊ) ແລະ ສະມາຊິກສະ ພາປະຊາຊົນແຂວງ (ສສຂ), ໂດຍການເປັນປະທານຂອງ ທ່ານ ນາງ ສີໃສ ລືເດດມູນສອນ ຮອງປະທານ ສະພາແຫ່ງຊາດ; ຝ່າຍຫວຽດນາມນໍາໂດຍທ່ານ ຫງວຽນ ຕ່ວນ ແອງ ຮອງຫົວໜ້າຄະນະວຽກງານຜູ້ແທນປະຊາຊົນ ສະພາແຫ່ງຊາດ ພ້ອມດ້ວຍຄະນະ.ທັ້ງນີ້, ກໍເພື່ອປະກອບສ່ວນເສີມຂະຫຍາຍສາຍພົວພັນມິດຕະພາບອັນເປັນມູນ ເຊື້ອ, ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງສອງພັກ, ສອງລັດ ແລະ ປະຊາຊົນສອງຊາດເວົ້າລວມ, ເວົ້າສະເພາະ ລະຫວ່າງສອງອົງການນິຕິບັນຍັດ ລາວ-ຫວຽດນາມ ໃຫ້ນັບມື້ເຂົ້າສູ່ລວງເລິກ ແລະ ເກີດດອກອອກຜົນຢ່າງແທ້ຈິງ; ພ້ອມນັ້ນ, ຍັງເປັນການແລກປ່ຽນບົດຮຽນ, ປະສົບການ ການພິຈາລະນາຮັບຮອງຜ່ານ ແຜນງົບປະມານ; ການກວດສອບແຫ່ງລັດ ແລະ ການນໍາໃຊ້ຜົນການກວດສອບແຫ່ງ ລັດ; ວິທີຄໍານວນ GDP ແລະ ພິຈາລະນາແຜນພັດທະນາເສດຖະກິດ-ສັງຄົມ ຈາກ ສສ.ຫວຽດນາມ ໃຫ້ແກ່ ສສຊ ແລະ ສສຂ ໃນການເຄື່ອນໄຫວວຽກງານຄວາມຮັບ ຜິດຊອບ ໃຫ້ມີປະສິດທິພາບຫລາຍຂຶ້ນ. ໃນກອງປະຊຸມຜູ້ເຂົ້າຮ່ວມຈະໄດ້ຮັບຟັງ ບົດຮຽນ, ປະສົບການໃນການພິຈາລະນາ, ຮັບຮອງວຽກງານສໍາຄັນຈໍານວນໜຶ່ງ ຈາກບັນດາທ່ານຊ່ຽວຊານຂອງສະພາແຫ່ງຊາດຫວຽດນາມ.ປະທານກອງປະຊຸມໄດ້ມີຄຳເຫັນວ່າ:ໃນ 4 ຫົວຂໍ້ທີ່ນໍາມາແລກປ່ຽນໃນຄັ້ງນີ້ ແມ່ນມີຄວາມສໍາຄັນ ແລະ ຄວາມຈໍາເປັນທີ່ ສສຊ ແລະ ສສຂ ຈະໄດ້ມີຄວາມຮັບຮູ້ ແລະ ເຂົ້າໃຈ ຢ່າງເລິກເຊິ່ງ ໂດຍສະເພາະກະກຽມໃນການປະຕິບັດໜ້າທີ່ ພິຈາລະນາຮັບຮອງບັນຫາ ສໍາຄັນພື້ນຖານຂອງປະເທດຊາດ ແລະ ທ້ອງຖິ່ນໃຫ້ມີປະສິດທິຜົນນັບມື້ສູງຂື້ນ.