ປະທານ ສພຊ ໄດ້ຕ້ອນຮັບເອກອັກຄະລັດຖະທູດ ອົດສະຕາລີ
24/09/2018

(ສພຊ) ວັນທີ 14 ກັນຍາ 2018 ຜ່ານມາ, ທີ່ຫ້ອງຮັບແຂກສະພາແຫ່ງຊາດ (ສພຊ) ທ່ານ ນາງ ປານີ ຢາທໍ່ຕູ້ ປະທານ ສພຊ ໄດ້ຕ້ອນຮັບການເຂົ້າຢ້ຽມຂໍ່ານັບຂອງທ່ານ ຈີນ ເບີນາດ ຄາຣາສໂກ (Jean-Bernard Carrasco) ເອກອັກຄະລັດຖະທູດ ອົດສະຕາລີ ປະຈໍາ ສປປລາວ ເພື່ອເສີມຂະຫຍາຍສາຍພົວພັນມິດຕະພາບ ແລະ ການຮ່ວມມື ລະຫວ່າງອົງການນິຕິບັນຍັດ ລາວ-ອົດສະຕາລີ, ໂດຍສະເພາະການປຶກສາຫາລືກ່ຽວກັບແຜນການຢ້ຽມຢາມຂອງຄະນະຜູ້ແທນລັດຖະສະພາອົດສະຕາລີ ໃນຕໍ່ໜ້າ.

ໂອກາດດັ່ງກ່າວ, ທ່ານ ນາງ ປານີ ຢາທໍ່ຕູ້ ໄດ້ກ່າວສະແດງຄວາມຍິນດີຕ້ອນຮັບອັນອົບອຸ່ນ ແລະ ຕີລາຄາສູງ ຕໍ່ທ່ານ ຈີນ ເບີນາດ ຄາຣາສໂກ ໃນການປະຕິບັດໜ້າທີ່ຮັດແໜ້ນສາຍພົວພັນການທູດປະຈໍາ ສປປລາວ ເຊິ່ງເປັນການສືບຕໍ່ການຮ່ວມມື ແລະ ເປັນຂົວຕໍ່ການຮ່ວມມືລະຫວ່າງ ລາວ-ອົດສະຕາລີ ໃຫ້ມີຄວາມສາມັກຄີອັນແໜ້ນແຟ້ນ, ເຂົ້າສູ່ລວງເລິກ ແລະ ມີປະສິທິຜົນ; ພ້ອມທັງຊົມເຊີຍທີ່ລັດຖະບານ ແລະ ປະຊາຊົນອົດສະຕາລີ ທີ່ໄດ້ໃຫ້ການຮ່ວມມືຊ່ວຍເຫລືອ ສປປລາວ ໃນໄລຍະຜ່ານມາ ແລະ ເປັນຄູ່ຮ່ວມພັດທະນາທີ່ດີ ເປັນຕົ້ນແມ່ນນະໂຍບາຍການຮ່ວມມືທາງດ້ານເສດຖະກິດ-ສັງຄົມ, ດ້ານສຶກສາພັດທະນາຊັບພະຍາກອນມະນຸດ ແລະ ດ້ານອື່ນໆ; ນອກຈາກນີ້, ທ່ານປະທານສະພາແຫ່ງຊາດຍັງໄດ້ສະເໜີໃຫ້ມີການແລກປ່ຽນຂໍ້ມູນຂ່າວສານ ແລະ ແລກປ່ຽນຄະນະຜູ້ແທນທັງສອງສະພາລາວ-ອົດສະຕາລີ ໃຫ້ຫລາຍຂຶ້ນກວ່າເກົ່າ ພ້ອມທັງອວຍພອນໄຊອັນປະເສີດແກ່ເອກອັກຄະລັດຖະທູດ ພ້ອມດ້ວຍຄະນະ ຈົ່ງມີສຸຂະພາບເຂັ້ມແຂງ ປະສົບຜົນສໍາເລັດທຸກໜ້າທີ່ວຽກງານ.

ທ່ານ ຈີນ ເບີນາດ ຄາຣາສໂກ ກໍໄດ້ກ່າວສະແດງຄວາມຂອບໃຈຕໍ່ທ່ານປະທານສະພາແຫ່ງຊາດ ທີ່ໄດ້ໃຫ້ການຕ້ອນຮັບຢ່າງອົບອຸ່ນ ແລະ ມີຄວາມພາກພູມໃຈຫລາຍທີ່ໄດ້ປະຈໍາການຮັບໜ້າທີ່ເປັນເອກອັກຄະລັດຖະທູດຢູ່ ສປປລາວ; ປະເທດລາວເປັນປະເທດສວຍສົດງົດງາມ;  ພ້ອມທັງແຈ້ງໃຫ້ຮູ້ວ່າ: ນອກຈາກຈະເຮັດໜ້າທີ່ທາງສາຍການທູດແລ້ວ ຍັງຈະສົ່ງເສີມໃຫ້ແມ່ຍິງລາວໄດ້ມີໂອກາດເທົ່າທຽມກັບເພດຊາຍ ໃນດ້ານການສຶກສາ ໂດຍເນັ້ນໜັກໃສ່ແມ່ຍິງທີ່ດ້ອຍໂອກາດຢູ່ຊົນນະບົດ ເຂດຫ່າງໄກສອກຫລີກໃຫ້ຮຽນຮູ້ ແລະ ເຂົ້າໃຈຕໍ່ສິ່ງທ້າທາຍຕ່າງໆ ໃນການພັດທະນາຂອງ ສປປລາວ; ພ້ອມດຽວກັນນັ້ນ, ທ່ານຍັງໄດ້ລາຍງານກ່ຽວກັບການຈະເດີນທາງໄປແຂວງຊຽງຂວາງ ເພື່ອຄົ້ນຄວ້າຄວາມເປັນມາຂອງທົ່ງໄຫຫີນຊຽງຂວາງ ທີ່ໄດ້ຮັບທຶນສະໜັບສະໜູນຈາກສະພາຄົ້ນຄວ້າອົດສະຕຣາລີ ໃນປີ 2015-2019 ພ້ອມທັງຫາລືແຜນໃນຕໍ່ໜ້າ ເປັນຕົ້ນແມ່ນການສະເໜີທົ່ງໄຫຫີນຊຽງຂວາງຂຶ້ນເປັນມໍລະດົກໂລກໃນອະນາຄົດ.

ໃນໄລຍະຜ່ານມາ, ສອງອົງການນິບັນຍັດ ລາວ-ອົດສະຕາລີ ໄດ້ມີສາຍພົວພັນ ແລະ ຮ່ວມມືອັນດີງາມຕະຫລອດມາ ເຊິ່ງສະແດງອອກຄື: ສອງຝ່າຍໄດ້ມີການພົວພັນແລກປ່ຽນຄະນະນໍາເຊິ່ງກັນ ແລະ ກັນ ປົກກະຕິ ເປັນຕົ້ນແມ່ນຄະນະຜູ້ແທນຂັ້ນສູງ ນໍາໂດຍ ທ່ານ ນາງ ປານີ ຢາທໍ່ຕູ້, ຢ້ຽມຢາມສັນຖະວະໄມຕີຢ່າງເປັນທາງການໃນເດືອນສິງຫາ 2012 ແລະ ຄະນະຜູ້ແທນຂັ້ນສູງຂອງລັດຖະສະພາອົດສະຕາລີນໍາໂດຍທ່ານ ນາງ ບຣາວວິນ ປີຊອນ ປະທານລັດຖະສະພາອົດສະຕາລີຢ້ຽມຢາມສັນຖະວະໄມຕີ ແລະ ເຂົ້າຮ່ວມກອງປະຊຸມ AIPA ຄັ້ງທີ 35 ທີ່ນະຄອນຫລວງວຽງຈັນ, ສປປລາວ ໃນເດືອນຕຸລາ 2014