ກວດກາເນື້ອໃນຮອບດ້ານຮ່າງກົດໝາຍວ່າດ້ວຍສຳນັກງານຜູ້ຕາງໜ້າ ແຫ່ງ ສປປລາວ ປະຈຳຢູ່ຕ່າງປະເທດ
08/10/2018

(ສພຊ) ລະຫວ່າງວັນທີ 1-2 ຕຸລາ 2018, ທີ່ເມືອງແກ້ວອຸດົມ ແຂວງວຽງຈັນ, ກໍາມາທິການກົດໝາຍ ແລະ ກຳມາທິການການຕ່າງປະເທດ ສະພາແຫ່ງຊາດ ຮ່ວມກັບກະຊວງການຕ່າງປະເທດ ໄດ້ຈັດກອງປະຊຸມກວດກາເນື້ອໃນຮອບດ້ານຮ່າງກົດໝາຍວ່າດ້ວຍສຳນັກງານຜູ້ຕາງໜ້າ ແຫ່ງ ສປປລາວ ປະຈຳຢູ່ຕ່າງປະເທດ ໂດຍການເປັນປະທານຂອງທ່ານ ສົມພັນ ແພງຄຳມີ ຮອງປະທານສະພາແຫ່ງຊາດ, ທັງເປັນຜູ້ຊີ້ນຳວຽກງານກົດໝາຍ; ມີບັນດາປະທານ-ຮອງປະທານກຳມາທິການ ພາຍໃນສະພາແຫ່ງຊາດ, ຮອງລັດຖະມົນຕີ, ພະນັກງານອາວຸໂສບຳນານ, ຜຸ້ຕາງໜ້າຈາກຫ້ອງວ່າການປະທານປະເທດ, ຫ້ອງວ່າການສຳນັກງານນາຍົກລັດຖະມົນຕີ, ກະຊວງຍຸຕິທຳ, ກະຊວງພາຍໃນ, ຫົວໜ້າ-ຮອງຫົວໜ້າກົມ, ລັດຖະກອນຈາກສະພາແຫ່ງຊາດ ແລະ ກະຊວງການຕ່າງປະເທດ ເຂົ້າຮ່ວມຈຳນວນໜຶ່ງ.

          ກອງປະຊຸມຄັ້ງນີ້ ແມ່ນໄດ້ກວດກາເນື້ອໃນຮອບດ້ານຮ່າງກົດໝາຍວ່າດ້ວຍສໍານັກງານຜູ້ຕາງໜ້າ ແຫ່ງ ສປປ ລາວ ປະຈຳຢູ່ຕ່າງປະເທດ ປະກອບມີ 10 ພາກ, 12​ ໝວດ, 65 ມາດຕາ ເຊິ່ງຜູ້ເຂົ້າຮ່ວມກອງປະຊຸມແມ່ນໄດ້ສຸມໃສ່ປະກອບຄຳຄິດຄຳເຫັນຢ່າງກົງໄປກົງມາຕໍ່ຮ່າງກົດໝາຍສະບັບດັ່ງກ່າວ ເພື່ອເຮັດໃຫ້ມີເນື້ອໃນຄົບຖ້ວນ, ຮັດກຸມ, ເຂົ້າໃຈງ່າຍ, ສອດຄ່ອງກັບກົດໝາຍອື່ນໆທີ່ກ່ຽວຂ້ອງ ແລະ ສາມາດຈັດຕັ້ງປະຕິບັດໄດ້.

ພາຍຫລັງສຳເລັດການກວດກາເນື້ອໃນຮອບດ້ານແລ້ວ ຈະໄດ້ລາຍງານຕໍ່ກອງປະຊຸມຄະນະປະຈຳສະພາແຫ່ງຊາດ ເພື່ອພິຈາລະນາຕົກລົງນຳເຂົ້າໃນວາລະກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດຊຸດທີ VIII ເພື່ອພິຈາລະນາຮັບຮອງເອົາ.

(ກົມໂຄສະນາ ແລະ ຕີຄວາມໝາຍກົດໝາຍ)