ຄະນະນຳ ສພຊ ໄວ້ອາໄລເຖິງດວງວິນຍານ ອະດີດເລຂາທິການໃຫຍ່ພັກຄອມມູນິດ ຫວຽດນາມ
08/10/2018

(ສພຊ) ໃນວັນທີ 5 ຕຸລາຜ່ານມາ, ຄະນະນໍາສະພາແຫ່ງຊາດ (ສພຊ) ນໍາໂດຍສະຫາຍ ນາງ ປານີ ຢາທໍ່ຕູ້ ກໍາມະການກົມການເມືອງສູນກາງພັກ, ປະທານສະພາແຫ່ງຊາດ ພ້ອມດ້ວຍຄະນະ ໄດ້ເຂົ້າຮ່ວມພິທີ ໄວ້ອາໄລແດ່ສະຫາຍ ໂດ ເມືອຍ ອະດີດເລຂາທິການໃຫຍ່ພັກຄອມມູນິດ ຫວຽດນາມ ໂດຍໄດ້ວາງພວງມາລາ ແລະ ຂຽນປຶ້ມໄວ້ອາໄລທີ່ສະຖານທູດ ສສ.ຫວຽດນາມ ນະຄອນຫລວງວຽງຈັນ ເພື່ອສະແດງຄວາມ ໄວ້ອາໄລ ແລະ ເສຍໃຈຢ່າງສຸດຊຶ້ງ ຕໍ່ການຈາກໄປຂອງສະຫາຍ ໂດ ເມືອຍເຊິ່ງສະຫາຍແມ່ນພະນັກງານປະຕິວັດອາວຸໂສຜູ້ທີ່ໄດ້ອຸທິດຊີວິດ, ສະ​ຕິ​ປັນ​ຍາ, ເຫື່ອ​ແຮງ ແລະ ຜົນງານຂອງຕົນ ເພື່ອພາລະກິດຕໍ່​ສູ້​
ປົດ​ປ່ອຍປະ​ເທດ​ຊາດ ເພື່ອ​ຍາດ​ເອົາ​ເອ​ກະ​ລາດ​ແຫ່ງ​ຊາດ ກໍຄືພາລະກິດປົກປັກຮັກສາ ແລະ ສ້າງສາພັດທະນາປະເທດຊາດຫວຽດນາມ; ສະຫາຍ ເປັນ​ຜູ້​ນຳທີ່ໄດ້​ຮັບ​ຄວາມ​ໄວ້​ເນື້ອ​ເຊື່ອ​ໃຈ ແລະ ​ເຄົາ​ລົບ​ນັບ​ຖືຈາກ​ພັກ, ລັດ ແລະ​ ປະ​ຊາ​ຊົນ​ຫວຽດ​ນາມ ທັງ​ເປັນເພື່ອນມິດທີ່ສະໜິດສະໜົມຂອງພັກ-ລັດ ແລະ ປະຊາຊົນລາວ; ສະຫາຍເປັນຜູ້ທີ່ໄດ້ປະກອບສ່ວນຢ່າງຫ້າວຫັນ ເຂົ້າໃນການເພີ່ມພູນຄູນສ້າງສາຍພົວພັນມິດຕະພາບທີ່ເປັນມູນເຊື້ອ, ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງສອງຊາດລາວ-ຫວຽດນາມ ຢ່າງສະເໝີຕົ້ນສະເໝີປາຍ ແລະ ນັບມື້ແຕກດອກອອກຜົນຍິ່ງຂຶ້ນ.