ກະກຽມຮັບໃຊ້ກອງປະຊຸມສະໄໝສາມັນເທື່ອທີ 6 ຂອງ ສພຊ ຊຸດທີ VIII
08/11/2018

ເພື່ອເຮັດໃຫ້ກອງປະຊຸມສະໄໝສາມັນຂອງສະພາແຫ່ງຊາດ ຊຸດທີ VIII ສຳເລັດຕາມລະດັບຄາດໝາຍທີ່ວາງໄວ້,

ວັນ​ທີ 5 ພະຈິກ 2018 ທີ່​ສະພາ​ແຫ່ງ​ຊາດ​ (ຫລັກ 6) ນະຄອນຫລວງວຽງຈັນ ​ໄດ້​ຈັດ​ກອງ​ປະຊຸມ​ກະກຽມຮັບ​ໃຊ້ກອງ​ປະຊຸມ​ສະ​ໄໝສາມັນ ​ເທື່ອ​ທີ 6 ຂອງ​ສະພາ​ແຫ່ງ​ຊາດ ຊຸ​ດທີ VIII ​ເຊິ່ງຈະ​ໄຂຂຶ້ນ​ໃນ​ກາງ​ເດືອນ 11 ນີ້; ​ໂດຍ​ການ​ເປັນ​ປະທານ​ຂອງ ທ່ານ ນາງ ສີ​ໃສ ລື​ເດດ​ມູນ​ສອນ ຮອງ​ປະທານ​ສະພາ​ແຫ່ງ​ຊາດ ​ເຂົ້າ​ຮ່ວມ​ມີ​ບັນດາຄະນະ​ປະຈຳ​ສະພາ​ແຫ່ງ​ຊາດ, ບັນດາ​ຮອງ​ປະທານ​ກຳມາ​ທິການ, ຄະນະ ສສຊ ​ເພດ​ຍິງ, ຄະນະ​ຮັບຜິດຊອບ​ວຽກງານ​ເຂດ​ເລືອກ​ຕັ້ງ, ສະ​ຖາ​ບັນ​ຄົ້ນຄວ້າ​ນິຕິ​ກຳ, ຄະນະ​ເລຂາທິການ, ຄະນະ​ກົມ, ຄະນະ​ສູນ ​ແລະ ສະມາຊິກ​ພັກ, ພະນັກງານ​ລັດຖະກອນ ທັງໝົດພາຍ​ໃນ​ສະພາ​ແຫ່ງ​ຊາດ​ເຂົ້າ​ຮ່ວມ.

ກອງ​ປະຊຸມ​ໄດ້​ຮັບ​ຟັງ​ການ​ຜ່ານ​ຮ່າງ​ຂໍ້​ຕົກລົງ​ການ​ແບ່ງ​ວຽກຮັບ​ໃຊ້​ກອງ​ປະຊຸ​ມສະ​ໄໝສາມັນ​ເທື່ອ​ທີ 6 ຂອງ​ສະພາ​ແຫ່ງ​ຊາດ​ ຊຸດ​ທີ VIII ​ແລະ ການ​ປະຕິບັດ​ນະ​ໂຍບາຍ. ຫລັງ​ຈາກ​ນັ້ນ ທ່ານ ນາງ ສີ​ໃສ ລື​ເດດ​ມູນ​ສອນ ໄດ້ມີຄໍາເຫັນ​​ໂອ​ລົມ ​ເຊິ່ງທ່ານໄດ້​​​ເນັ້ນ 7 ບັນຫາ​ໃຫຍ່ ຄື: 1. ສະ​ເໜີ​ໃຫ້​ກຳມາ​ທິການ, ຄະນະ​ເລຂາທິການ​ສະພາ​​ແຫ່ງ​ຊາດ, ກົງຈັກ​ທີ່​ຄະນະ​ປະຈຳ​ສະພາ​ແຫ່ງ​ຊາດ​ສ້າງ​ຕັ້ງ​ ສຶກສາ​ອົບຮົມ​ການ​ເມືອງ​ແນວ​ຄິດ​ໃຫ້ພະນັກງານ-ລັດຖະກອນ ທີ່ຢູ່​ໃນ​ຂອບ​ເຂດ​ຄວາມ​ຮັບຜິດຊອບ​ຂອງ​ຕົນ ​ໃຫ້​ເຫັນ​ໄດ້ຄວາມໝາຍຄວາມ​ສຳຄັນ​ຂອງ​ການ​ດຳ​ເນີນ​ກອງ​ປະຊຸມ​ສະພາ​ແຫ່ງ​ຊາດ ທີ່​ເປັນ​ຮູບ​ແບບ​ການ​ເຄື່ອນ​ໄຫວ​ວຽກງານ​ສູງ​ສຸດ​ຂອງ​ສະພາ​ແຫ່ງ​ຊາດ ​ເພື່ອ​ປະຕິບັດ​ພາລະ​ບົດບາດ​ ພິຈາລະນາ​ຮັບຮອງ​ເອົາ​ບັນຫາ​ສຳຄັນ​ພື້ນຖານ​ຂອງ​ປະ​ເທດ​ຊາດ, ​ເປັນ​ການ​ເຄື່ອນ​ໄຫວ​ວຽກງານ​ອົງການ​ສຳຄັນ​ຂອງ​ລັດ, ​​ເປັນ​ໃບໜ້າຂອງ​ປະຊາຊົນ​ບັນດາ​ເຜົ່າ​ໃນ​ທົ່ວ​ປະ​ເທດ; 2. ສະ​ເໜີ​ໃຫ້​ບັນດາ​ກຳມາ​ທິການ, ຄະນະ​ເລຂາທິການ​ສະພາ​ແຫ່ງ​ຊາດ​, ກົງຈັກ​ທີ່​ຄະນະ​ປະຈຳ​ສະພາ​ແຫ່ງ​ຊາດ​ສ້າງ​ຕັ້ງ ​ເອົາ​ໃຈ​ໃສ່​ການ​ຄົ້ນ​ຄວ້າ ​ກຳ​ໃຫ້​ໄດ້​ເນື້ອ​ໃນ​ຈິດ​ໃຈ​ຂອງ​​ແຜນ​ແບ່ງ​ຄວາມ​ຮັບຜິດ​ຊອບ​ການ​ກະກຽມ ກອງປະຊຸມສະ​ໄໝສາມັນ​ເທື່ອ​ທີ 6 ຂອງ​ສະພາ​ແຫ່ງ​ຊາດ ​ຊຸດ​ທີ VIII ​ໃຫ້​ແຕ່​ລະ​ພາກສ່ວນ​ເພື່ອ​ນຳ​ໄປ​ຈັດ​ຕັ້ງ​ຜັນ​ຂະຫຍາຍ​ເຂົ້າ​ໃນ​ແຜນການ​ເຄື່ອນ​ໄຫວ​ວຽກງານ ທີ່ຢູ່​ໃນ​ຂອບ​ເຂດ​ວຽກງານ​ທີ່​ຕົນ​ຮັບຜິດຊອບ, ຊີ້ນຳ​ກົງຈັກ​ຊ່ວຍ​ວຽກ, ​ແບ່ງ​ງານ, ​ແບ່ງ​ຄວາມ​ຮັບຜິດຊອບ ​ໃຫ້​ພະນັກງານ-ລັດຖະກອນ​ແຕ່ລະຄົນ​ຮັບຜິດຊອບ​ຢ່າງ​ຈະ​​ແຈ້ງ; 3. ສະ​ເໜີ​ໃຫ້​ບັນດາ​ກຳມາ​ທິການ, ຄະນະ​ເລຂາ​ທິການ​ສະພາ​ແຫ່ງ​ຊາດ, ກົງຈັກ​ທີ່​ຄະນະ​ປະຈຳ​ສະພາ​ແຫ່ງ​ຊາດ​ສ້າງ​ຕັ້ງ ​ເອົາ​ໃຈ​ໃສ່​ປະສານ​ສົມທົບກັບ​ກະຊວງ, ອົງການ ທີ່ຢູ່​ໃນ​ຂອບ​ເຂດ​ຄວາມ​ຮັບຜິດຊອບ​ຂອງ​ຕົນ​ກະກຽມ​ເນື້ອ​ໃນ​ໃຫ້​ຮັບປະກັນ​ຄຸ​ນນະພາ​ບ, ສົ່ງ​ໃຫ້​ສະພາ​ແຫ່ງ​ຊາດ​ແຕ່​ຫົວທີ, ພາຍຫລັງ​ທີ່​ແຕ່​ລະ​ພາກສ່ວນ​ໄດ້​ຮັບ​ເອກະສານ​ຈາກ​ກະຊວງ, ອົງການ​ ​ແລ້ວ ກໍ​ໃຫ້​ເອົາ​ໃສ່​ຄົ້ນຄວ້າ, ສະຫລຸບຢ່າງ​ລະອຽດ ​ເພື່ອ​ລາຍ​ງານ​ຕໍ່ກອງ​ປະຊຸມ​ຄະນະ​ປະຈຳ​ສະພາ​ແຫ່ງ​ຊາດ. ຖ້າ​ກົງຈັກ​ເສນາ​ທິການ​ຄົ້ນຄວ້າ​ບໍ່​ເລິກ​ເຊິ່ງ ກໍ​ຈະ​ເຮັດ​ໃຫ້ການ​ພິຈາລະນາ​ຂອງ​ຄະນະ​ປະຈຳ​ສະພາ​ແຫ່ງ​ຊາດ​ໃຊ້​ເວລາ​ດົນ; 4. ການ​ຮັບ​ໃຊ້​ກອງ​ປະຊຸມ​ສະພາ​ແຫ່ງ​ຊາດ​ໃນ​ໄລຍະ​ຜ່ານ ພວກ​ເຮົາ​ຍັງ​ມີ​ບາງ​ບັນຫາ​ທີ່​ຕ້ອງ​ໄດ້​ປັບປຸງ​​ແກ້​ໄຂ ​ເປັນ​ຕົ້ນ ການ​ສ້າງ​ຄຳ​ຖາມ​ເຈາະ​ຈິ້​ມ, ການ​ເຮັກ​ບົດ​ສັງ​ລວ​ມຄວາມ​ເຫັນ​ຂອງ​ປະທານ​ກອງ​ປະຊຸມ ຕໍ່ກັບ​ການ​ປະກອບ​ຄຳ​ເຫັນ​ຂອງ​ຜູ້​ແທນ​ກອງ​ປະຊຸມ ຜ່ານ​ມາ​ຄຸນ​ນະພາ​ບຍັງບໍ່​ສູງ, ບໍ່ທັນ​ສັງ​ລວມ​ໄດ້​ຄຳ​ເຫັນ​ຂອງ​ສະມາຊິກ​ສະພາ​ແຫ່ງ​ຊາດ, ​ເຮັດ​ໃຫ້​ສະມາຊິກ​ສະພາ​ແຫ່ງ​ຊາດ ບໍ່ທັນ​ເພິ່ງ​ພໍ​ໃຈ. ຕໍ່ກັບ​ບັນ​ຫາ​ດັ່ງກ່າວ​ຈະ​ຕ້ອງ​ໄດ້​ພ້ອມ​ກັນ​​ແກ້​ໄຂ. ​ໃນ​ນີ້ກົງຈັກ​ເສນາ​ທິການ​ຈະ​ຕ້ອງ​ໄດ້ຄົ້ນຄວ້າ​ກຳ​ໃຫ້​ໄດ້ ​ເນື້ອ​ໃນ​ຂອງ​ບົດ​ລາຍ​ງານ​ຂອງ​ກະຊວງ,​ ອົງການ, ​ເນື້ອ​ໃນ​ຂອງ​ນິຕິ​ກຳ​ທີ່​ໄດ້​ປະກາດ​ໃຊ້​ໄປ​ແລ້ວ ​​ເຊິ່ງພົວພັນ​ກັບ​ເນື້ອ​ໃນ​ຂອງ​ບົດ​ລາຍ​ງານ ​ເພື່ອ​ຈະ​ໄດ້​ສົມທຽບ ​ແລະ ຍົກ​ເຫດຜົນ​ຂອງ​ການ​ປະກອບ​ຄຳ​ເຫັນ​ຂອງ​ສະມາຊິກ​ສະພາ​ແຫ່ງ​ຊາດ ຕໍ່​ແຕ່​ລະ​ບັນຫາ​ວ່າ​ມີ​ເຫດ​ທາງ​ດ້ານ​ກົດໝາຍ ​ແລະ ນິຕິ​ກຳ​ໃດ​ແດ່. ທັງ​ນີ້ກໍ​ເພື່ອ​ເຮັດ​ໃຫ້​ຄະນະ​ຮັບຜິດຊອບ​ແຕ່ລະ​ເອກະສານ​ນຳ​ໄປ​ປັບປຸງ​ແກ້​ໄຂ​; 5. ການ​ປະ​ເມີນ​ຜົນ​ເປົ້າໝາຍຕ່າງໆ ຢູ່​ໃນ​ກອງ​ປ​ະຊຸມ​ສະພາ​ແຫ່ງ​ຊາດ ​ເປັນ​ບັນຫາໜຶ່ງທີ່​ຈະ​ຕ້ອງ​ໄດ້​ກຳນົດກ່ຽວກັບ​ວິທີ​ການ​ໃຫ້​ລະອຽດ ​ເປັນ​ຕົ້ນ​ເປົ້າໝາຍ, ​ເນື້ອ​ໃນ​ທີ່​ຈະ​ປະ​ເມີນ, ຜູ້​ປະ​ເມີນ, ການ​ໃຫ້​ຄະ​ແນນ ​ແລະ ບັນຫາ​ອື່ນໆ. ຕໍ່ກັບ​ບັນຫາ​ດັ່ງກ່າວ ສະ​ເໜີ​ໃຫ້​ຄະນະ​ຮັບ​ຜິດ​ຊອບ​ວຽງານ​ເຂດ​ເລືອກ​ຕັ້ງ ຄົ້ນຄວ້າ​ສ້າງ​ເປັນ​ບົດ​ລາຍ​ງານ ຂໍ​ທິດ​ຊີ້ນຳ​ຈາກ​ຄະນະ​ປະຈຳ​ສະພາ​ແຫ່ງ​ຊາດ ​ເພື່ອ​ເຮັດ​ໃຫ້ການ​ຈັດ​ຕັ້ງ​ປະຕິບັດ​ມີ​ຄວາມ​ຄ່ອງ​ຕົວ ​ແລະ ມີ​ຄຸນ​ນະພາ​ບ; 6. ການ​ແຕ່ງ​ຕັ້ງໜ່ວຍງານ​ຮັບຜິດຊອບ​ແຕ່​ລະວຽກງານ​ໃຫ້​ເອົາ​ໃຈ​​ໃສ່​ຄົ້ນຄວ້າ​ການ​ປະກ​​​ອບບຸກຄະລາ​ກອນ ​ໃຫ້​ສອດຄ່ອງ, ​ເໜາະສົມ ​ແລະ ຄຳ​ນຶ່ງ​ເຖິງ​ເປົ້າໝາຍພະນັກງານ​ສືບ​ທອດ​ໃນຕໍ່ໜ້າ ຢູ່​ແຕ່ລະ​ຄົງ​ເຂດ​ວຽກງານ. ພະນັກງານ-ລັດຖະກອນ ທີ່​​ໄດ້​ຮັບ​ການໝອບໝາຍວຽກງານ​ຕ່າ​ງໆ ກໍ​ໃຫ້​ຕັ້ງໜ້າຮັບ​ໃຊ້​ວຽງານ ຊອກ​ຮູ້ຮ່ຳຮຽນວຽກງານ​ຕົວ​ຈິງ​ໃນ​ການ​ຮັບ​ໃຊ້​ວຽກງານ​ກອງ​ປະຊຸມ; 7. ວຽກງານ​ປ້ອງ​ກັນ​ຄວາມ​ສະຫງົບ​ໃຫ້​ແກ່​ການ​ດຳ​ເນີນ​ກອງ​ປະຊຸມ​ສະພາ​ແຫ່ງ​ຊາດ​ ກໍ​ເປັນວຽກງານໜຶ່ງທີ່​ຕ້ອງ​ໄດ້​ເອົາ​ໃຈ​ໃສ່​ຮ່ວມ​ກັນ ນອກຈາກ​ການ​ປ້ອງ​ກັນ​ຂອງ​ເຈົ້າໜ້າທີ່​ແລ້ວ ພະນັກງານ-ລັດຖະກອນ ກໍ​ຕ້ອງ​ເປັນ​ເຈົ້າ​ການ​ໃນ​ວຽກງານ​ຮັກສາ​ຄວາມ​ສະຫງົບ​ຮ່ວມ​ກັນ, ການ​ເຂົ້າ​-ອອກ​ສຳນັກງານ​ອົງການ​ໃນ​ໄລຍະ​ກຳ​ເນີນ​ກອງ​ປະຊຸມ​ສະພາ​ແຫ່ງ​ຊາດ ກໍ​ໃຫ້​ມີ​ສະຕິ, ປະຕິບັດ​ຕາມ​ກົດ​ລະບຽບຢ່າງ​ເຂັ້ມ​ງວດ.

 

ຮຽບຮຽງ:  ໄຊໂສພາພອນ ມິ່ງມຸງຄຸນ