ສພຊ ຮັບຮອງເອົາການປະມວນກົດໝາຍແພ່ງ ແລະ ກົດໝາຍວ່າດ້ວຍທະນາຄານທຸລະກິດ
06/12/2018

(ສພຊ) ​ໃນ​ວັນ​ທີ 6 ທັນວາ 2018 ທີ່​ຫ້​ອງປະຊຸມ​ສະພາ​ແຫ່ງ​ຊາດ (ຫລັກ 6) ນະຄອນຫລວງ​ວຽງຈັນ, ໂດຍ​ການ​ເປັນ​ປະທານ​ຂອງ​ທ່ານ ສົມ​ພັນ ​ແພງ​ຄຳ​ມີ ຮອງ​ປະທານ​ສະພາ​ແຫ່ງ​ຊາດ ກອງ​ປະຊຸມ​ສະ​ໄໝສາມັນ​ເທື່ອ​ທີ 6 ຂອງ​ສະພາ​ແຫ່ງ​ຊາດ​ຊຸດ​ທີ VIII ແມ່ນຢູ່ໃນວາລະແຫ່ງຊາດພິຈາລະນາ ແລະ ຮັບຮອງເອົາບັນດາກົດໝາຍ ສ້າງໃຫມ່, ປັບປຸງ ແລະ ທາບທາມ​, ເຊິ່ງບັນດາ​ສະມາຊິກ​ສະພາ​ແຫ່ງ​ຊາດ (ສສຊ) ​ໄດ້​ສືບຕໍ່ສຸມ​ສະຕິ​ປັນຍາ​ເຂົ້າ​ໃນ​ການ​ປະກອບ​ຄຳ​ຄິດ​ຄຳ​ເຫັນ​ໃສ່​ຮ່າງ​ປະມວນ​ກົດໝາຍ​ແພ່ງ; ຈາກ​ນັ້ນ, ຕາງໜ້າອະນຸ​ກຳ​ມະ​ການ​ສ້າງ​ຮ່າ​ງກົດໝາຍ​ດັ່ງກ້າວ ໄດ້​ໃຫ້​ຄວາມ​ກະຈ່າງ​ແຈ້ງ​ຕໍ່ບັນດາບັນຫາ​ທີ່ ສສຊ ຍັງມີຄວາມ​ສົນ​ໃຈ​ ເປັນຕົ້ນແມ່ນ​ກ່ຽວກັບ​ກົດໝາຍວ່າ​ດ້ວຍ​ຄອບຄົວ ​ເຊັ່ນ: ການ​ຍ່າ​ຮ້າງ​ດ້ວຍ​ຄວາມ​ສະໝັກ​ໃຈ, ການ​ຮ່ວມ​ປະ​ເວ​ນີການ​ກ່ອນ​ການ​ເອົາກັນ​ເປັນຜົວ-​ເມຍ, ການໜັ້ນໝາຍ ຫລື ການ​ສູ່ຂໍ, ການ​ບໍ່ປະຕິບັດ​ຕາມ​ການໝັ້ນໝາຍ ຫລື ສູ່ຂໍ, ການ​ແບ່ງປັນ​ຊັບ​ເດີມ ຫລື​ ສິນ​ສົມ​ສ້າງ ​ແລະ ບັນຫາອື່ນໆ​ອີກ​ຈຳນວນໜຶ່ງ.  ໃນຕອນທ້າຍ ປະທານກອງປະຊຸມສັງຫລຸບສັງລວມການປະກອບຄໍາເຫັນ ແລ້ວໄດ້ສະເໜີໃຫ້ ສສຊ ໃຊ້ສິດຂອງຕົນລົງຄະແນນສຽງຮັບຮອງເອົາ ຮ່າງປະມວນກົດໝາຍແພ່ງ, ​ເຊິ່ງຜົນ​ຂອງ​ການ​ລົງ​ຄະ​ແນນ​ສຽງ​ແມ່ນເຫັນ​ດີ 108 ທ່ານ, ບໍ່​ເຫັນ​ດີ 10 ທ່ານ ບໍ່ອອກສຽງ 0 ທ່ານ ລວມ 118 ສຽງ.

ວັນ​ທີ 7 ທັນວາ 2018, ​ໂດຍ​ການ​ເປັນ​ປະທານ​ຂອງ​ທ່ານ ບຸນ​ປອນ ບຸດ​ຕະນະ​ວົງ ຮອງ​ປະທານ​ສະພາ​ແຫ່ງ​ຊາດ ກອງປະຊຸມ​​​ໄດ້​ຮັບ​ຟັງ​ການສະ​ເໜີຮ່າງ​ກົດໝາຍວ່າ​ດ້ວຍ​ທະນາຄານ​ທຸລະ​ກິດ  (ປັບປຸງ)​ ຈາກ​ທ່ານ ສອນ​ໄຊ ສິດ​ພະ​ໄຊ ຜູ້​ວ່າ​ການ​ທະນາຄາ​ນ ​ແຫ່ງ ສປປລາວ; ພາຍຫລັງປະທານ​ກອງ​ປະຊຸມ​​ໄດ້​ເຈາະ​ຈີ້ມ ​ແລະ ​ໃຫ້​ທິດ​ຊີ້ນຳ​ໃນ​ການ​ປະກອບ​ຄຳ​ເຫັນ ບັນດາ​ທ່ານ ສສຊ ​ໄດ້​ມີ​ຄຳຄິດ​ຄຳ​ເຫັນຢ່າງ​ມີ​ຈຸດ​ສຸມ ​ແລະ ກົງ​ໄປ​ກົງ​ມາຕໍ່ຮ່າງ​ກົດ  ໝາຍດັ່ງກ່າວ; ພ້ອມ​ດຽວກັນ​ນັ້ນ, ຕາງໜ້າອະນຸ​ກຳມະການ​ປັບປຸງ​ຮ່າງ​ກົດໝາຍກໍ​ໄດ້​ໃຫ້​ຄວາມ​ກະຈ່າງ​ແຈ້ງ​ເພີ່ມ​ຕື່ມ.  ພາຍຫລັງ ປະທານກອງປະຊຸມສະຫລຸບສັງລວມ ການປະກອບຄໍາເຫັນ ແລ້ວໄດ້ສະເໜີໃຫ້ ສສຊ ໃຊ້ສິດຂອງຕົນ ລົງຄະແນນສຽງຮັບຮອງເອົາ ຮ່າງປະມວນກົດໝາຍແພ່ງ, ​ເຊິ່ງຜົນ​ຂອງ​ການ​ລົງ​ຄະ​ແນນ​ສຽງ​ແມ່ນເຫັນ​ດີເປັນສຽງສ່ວນຫລາຍ.

 

(ນາງ ສຸພາ​ວັນ ຫອມ​ສະ​ນິດ)