ສພຊ ສະເຫລີມສະຫລອງວັນແມ່ຍິງສາກົນ ຄົບຮອບ 109 ປີ
11/03/2019

(ສພຊ) ວັນ​ທີ 5 ມີນາ 2019 ​ທີ່ຫ້ອງປະຊຸມຄະນະເລຂາທິການສະພາ​ແຫ່ງ​ຊາດ (ຫລັກ 6) ນະຄອນຫລວງວຽງຈັນ, ສະພາ​ແຫ່ງ​ຊາດ (ສພຊ) ໄດ້ຈັດ​ພິທີ​ສະ​ເຫລີ​ມສະຫລອງ​ວັນ​ແມ່ຍິງ​ສາກົນ ຄົບຮອບ 109 ປີ (8/3/1910-8/3/2019) ​ໂດຍ​ການ​ເປັນ​ປະທານ​ຮ່ວມ​ຂອງ​ທ່ານ ນາງ ສີ​ໃສ ລື​ເດດ​ມູນ​ສອນ ຮອງ​ເລຂາ​ຄະນະ​ບໍລິຫານ​ງານ​ພັກ​ ສພຊ, ຮອງ​ປະທານ​ ສພຊ ​ແລະ ທ່ານ ນາງ ທະວີ​ໄສ ພະ​ສະຖານ ຮອງ​ປະທານ​ຄະນະ​ບໍລິຫານ​ງານ​ສະຫະພັນ​ແມ່ຍິງ ສພຊ, ຮອງ​ປະທານ​ຄະນະ​ສະມາຊິກ​ສະພາ​ແຫ່ງ​ຊາດ​ (ສສຊ) ເພດ​ຍິງ; ​​ມີການ​ນຳ​ຂອງ​ກຳມາ​ທິການ, ຄະນະ​ເລຂາທິການ ສພຊ, ຄະນະ​ກົມ, ສູນ, ຕາງໜ້າອົງການ​ຈັດ​ຕັ້ງມະຫາຊົນ,  ພະນັກ​ງານ​ອະ​ວຸ​ໂສ​ບຳນານ ພ້ອມ​ດ້ວຍ​ສະມາຊິກ​ສະຫະພັນ​ແມ່ຍິງ​ທົ່ວ ສພຊ ​ເຂົ້າ​ຮ່ວມ​ຢ່າງ​ເປັນ​ຂະ​ບວນຟົດຟື້ນ ຈຳນວນທັງໝົດ 138 ທ່ານ ຊາຍ 13 ທ່ານ.

​​          ພິທີ​ສະ​ເຫລີ​ມສະຫລອງ​ດັ່ງກ່າວ​ຈັດ​ຂຶ້ນ​ເພື່ອ​ເປັນ​ການ​ທົບ​ທວນຄືນ​ມູນ​ເຊື້ອປະຫວັດ​ການ​ເຄື່ອນ​ໄຫວ​ຂອງ​ຂະ​ບວນການ​ແມ່ຍິງ​ໂລກ, ພາກພື້ນອາຊຽນ ​ແລະ ການ​ເຂົ້າ​ຮ່ວມ​ເຄື່ອນ​ໄຫວ​ໃນ​ຂະ​ບວນດັ່ງ​ກ່າວ​ຂອງ​ສະຫະພັນ​ແມ່ຍິງ​ ສພຊ; ​ເປັນ​ການ​ປຸກລະດົມ​ສະມາຊິກ​ສະຫະພັນ​ແມ່​ຍິ​ງພາຍ​ໃນ ສພຊ ​ເຂົ້າ​ຮ່ວມ​ການ​ຈັດ​ຕັ້ງ​ປະຕິບັດ​ຂະ​ບວນການ​ແຂ່ງຂັນ​ຮັກ​ຊາດ ​ແລະ ພັດ​ທະນາ ​ແລະ ຂະ​ບວນ​ແຂ່ງຂັນ 3 ດີ ຂອງ​ສະຫະພັນ​ແມ່ຍິງ​ລາວ​ໃຫ້​ເປັນ​ຮູບ​ປະ​ທຳ;​ ໂອກາດ​ນີ້, ທ່ານ ນາງ ດາວ​ເພັດ ສີ​ຫາ​ວົງ ຮອງ​ປະທານ​ຄະນະບໍລິຫານ​ງານ​ສະຫະພັນ​ແມ່ຍິງ​ ສພຊ ທັງເປັນຫົວໜ້າກົມ​ການ​ເງິນ​ ສພຊ, ​ໄດ້​ຜ່ານ​ບົດ​ສະຫລຸບ​ຕີ​ລາຄາ​ຄືນ​ການ​ເຄື່ອນ​ໄຫວປະຕິບັດໜ້າທີ່​ວຽກງານ​ຂອງ​ສະມາຊິກ​ສະຫະພັນ​ແມ່ຍິງ​ສະພາ​ແຫ່ງ​ຊາດໃນໜຶ່ງປີຜ່ານມາ  ​ແລະ ທິດ​ທາງ​​ແຜນການ​ໃນຕໍ່ໜ້າ ​ພ້ອມທັງຮັບ​ຟັງ​ບົດຮຽນກ່ຽວກັບ​ການ​ຍົກ​ສູງ​ບົດ​ບາດ​ຂອງ​ສະມາຊິກ​ສະພາ​ແຫ່ງ​ຊາດ​ເພ​ດຍິງ​ໃນ​ເວທີ​ພາກພື້ນ ​ແລະ ສາກົນ ຈາກ​ທ່ານ ນາງ ບຸນ​ຍົງ ບຸບຜາ ອະດີດຮອງ​ປະທານ​ກຳ​ມາ​ທິການ​ການ​ຕ່າງ​ປະ​ເທດ, ອະດີດປະທານ​ຄະນະ​ ສສຊ​ເພດ​ຍິງ ຊຸດ​ທີ VII.

          ​ໃນ​​ໂອກາດ​ດັ່ງກ່າວ, ​ສະມາຊິກ​ແມ່ຍິງ​ ສພຊ ​​ໄດ້​ຮັບ​ຟັງ​ການ​​​​ໂອ້ລົມ​ຈາກ​ທ່ານ ນາງ ສີ​ໃສ ລື​ເດດ​ມູນ​ສອນ ເຊິ່ງທ່ານ​ໄດ້​ໃຫ້​ທິດ​ຊີ້ນຳ ​ແລະ ​ເນັ້ນໜັກ​ 3 ຈຸດ​ໃຫຍ່​ຄື: 1. ຕ້ອງ​ປັບປຸງ​ບົດ​ສະຫລຸບ​ໃຫ້​ມີ​ຄາດໝາຍສູ້​ຊົນໃຫ້​ມີ​ຄວາມ​ຮັດກຸມ ​ເພື່ອ​ໃຫ້​ສະຫະພັນ​ແມ່ຍິງ​ ສພຊ​ ສົມທົບ​ກັບ​ຄະນະ ສສຊ ​ເພດ​ຍິງ ​​ພ້ອມ​ກັນ​ບັນລຸ​ຕາມ​ຄາດໝາຍຄວາມ​ສະ​ເໝີພາບ​ຍິງ-​ຊາຍ ​ແລະ ພ້ອມ​ກັນ​ປັບປຸງ​ຂໍ້​ແຂງ​ຂັນ 3 ດີ​ໃນ​ແຕ່ລະ​ຂົງ​ເຂດ​ໃຫ້​ແທດ​ເໝາະກັບ​ຕົວ​ຈິງ; 2. ກຳ​ແໜ້ນ​ແນວທາງ​ນະ​ໂຍບາຍ​, ຕ້ອງ​ໄດ້ເຝິກຝົນ​ຫລໍ່​ຫລອມ​ດ້ານ​ການ​ເມືອງ​, ຍົກ​ລະດັບ​ດ້ານ​ວິຊາ​ສະ​ເພາະ​ວິທະຍາສາດ, ທຳ​ມະ​ຊາດ ແລະ ສັງຄົມ ລວມທັງ​ດ້ານ​ເສດຖະກິດ ​ແລະ ພາສາ​ຕ່າງປະ​ເທດ ​ເພີ່ມ​ທະວີ​ຂີດ​ຄວາມ​ສາມາດ​ຕົນ​ເອງ​ໃຫ້​ສູງ​​ໃນ​ຍຸກ​ດິຈິ​ຕອນ ​ເພື່ອ​ກ້າວ​ເຂົ້າ​ສູ່​ຕຳ​ແໜ່ງງານ​ທີ່​ສຳຄັນ​ຕ່າງໆ ​ເປັນ​ຕົ້ນ ສສຊ ​ເພື່ອ​ເປັນ​ພະນັກງານ​ສືບ​ທອດ​ ໂດຍ​ຫັນ​ເປັນ​ໜຸ່ມໃນ​ອານາ​ຄົດ; 3. ຄວາມໝາຍຄວາມ​ສຳຄັນ​ຂອງ​ວັນ​ແມ່ຍິງ​ສາກົນ ວັນ​ທີ 8 ມີນາ ຄົບຮອບ 109 ປີ ​ແລະ ສາ​ເຫດ​ທີ່ເຮັດໃຫ້​ມີ​ວັນ​ແມ່ຍິງ​ສາກົນ ​ເພື່ອ​ເປັນ​ການ​ທົບ​ທວນຄືນ ​ແລະ ປູກ​ຈິດ​ສຳນຶກ​ໃຫ້​ບັນດາ​ສະມາຊິກ​ແມ່ຍິງ ສພຊ ​ເຂົ້າ​ໃຈ​ແຈ້ງ​ຕື່ມ​ທີ່​ຕິດ​ພັນ​ໃນ​ຫລາຍໆບັນ​ຫາ ລວມທັງ​ປາກົດ​ການ​ຫຍໍ້​ທໍ້​ຕ່າງໆທີ່​ເກີດ​ຂຶ້ນກັບ​​ເອື້ອຍນ້ອງ​ແມ່ຍິງ ​ແລະ ​ອື່ນໆ ​ເພື່ອ​ເປັນ​ບົດ​ຮຽນ​​ອັນ​ລ້ຳ​ຄ່າ, ​ເປັນຄວາມ​ຮູ້​ໃຫ້​ສະມາຊິກ​ແມ່ຍິງ ສພຊ ນຳ​ເອົາ​ໄປ​ໃຊ້​ໃນ​ຊີວິດ​ປະຈຳ​ວັນ ໃນ​ການ​ປະຕິບັດ​ພັນທະ ແລະ ໜ້າທີ່​ໃຫ້​ປາກົດ​ຜົນ​ເປັນ​ຈິງ.

 

(ນ.ໄຊໂສພາພອນ ມິ່ງມຸງຄຸນ)